Ostroh Bible❧Перша книга Мойсеєва: Буття, розділ 8

1

И помѧнꙋ̀ б҃ъ но́ѧ, и҆ всѧ́къ звѣ́рь, и҆ всѧ́къ ско́тъ, и҆ всѧ̀ пти́ца, и҆ всѧ̀ га́ды, и҆же бѧ́хꙋ с ним̑ въ ковче́зѣ.

2

И наведе б҃ъ вѣтръ на́ землю и ѹ҆ста вода̀. и҆ заключи́шасѧ и҆сто́чницы бе́знд̑ыѧ, и҆ хлѧ́би нбс̑҇ныѧ и҆ ѹ҆ста̀ до́жд̑ь ѿ нб҃си, и҆ въспѧ́ть по́иде вода̀ съ зем̑лѧ·

3

Нача́тъ сѧ́кнꙋти и҆ ѹ҆быва́ти воды̀ по рн҃ дн҃їи·

4

И҆ сѣ́де ковче́гъ въ мс̑҇цъ з҃, въ кз҃ дн҃ь, на гора́хъ а҆рара́тъскихъ·

5

Вода́ же ѹ҆ходѧщи ма́лѧшесѧ до десѧ́таго мс̑҇ца·

6

въ а҃і мс̑҇цъ, въ а҃ дн҃ь мс̑҇ца, ѧ҆ви́шасѧ ве́рси гора́мъ·

7

И҆ бы́сть по м҃ дн҃їи ѿве́рзе но́е ковче́гꙋ ѻкн̑҇оце ꙗ҆́же сотворѝ, и҆ посла̀ вра́нъ ви́дѣти а҆́ще е҆сть ѹ҆стꙋпи́ло воды̀ ѿ лица̀ землѝ, и҆ ше́дъ не ѻ҆брати́сѧ до́ндеже и҆зъсѧ́че вода̀ ѿ землѧ̀·

8

И҆ посла̀ голꙋби́цꙋ по не́мъ, ви́дѣти а҆́ще е҆сть ѹ҆стꙋпи́ло воды̀ ѿ лица̀ зе́мнаго, и҆ не ѻ҆брѣтѐ голꙋби́ца поко́ѧ нога́ма свои́ма, и҆ въз꙽врати́сѧ къ немꙋ̀ въ ковче́гъ, вода̀ б̂о бѧ́ше на лицы̀ всеѧ̀ землѧ̀, и҆ просте́ръ рꙋкꙋ свою̀ ꙗ҆тъ ю҆̀, и҆ вънесе́ ю҆̀ къ себѣ̀ въ ковче́гъ·

9

И҆ премед̑ли́въ е҆ще, з҃ дн҃їи, па́ки и҆спꙋсти́въ голꙋби́цꙋ и҆с ковче́га, и҆ ѻ҆брати́сѧ къ немꙋ̀ къ ве́черꙋ, и҆мѣа́ше сꙋче́цъ масли́ченъ съ ли́ствїемъ въ ѹ҆стѣх́ъ свои҆хъ.

10

И҆ разꙋмѣ̀ но́е ꙗ҆ко ѿстꙋпѝ вода ѿ лица̀ землѝ, и҆ ѹ҆держа́въ е҆ще з҃ дн҃їи дрꙋги́хъ, па́ки и҆спꙋстѝ голꙋби́цꙋ, и҆ не приложѝ къ немꙋ̀ ѻ҆брати́тисѧ пото́мъ·

11

І҆ бы́сть въ е҆ді́но и҆ въ шестьсо́тное лѣто жи́тїѧ но́ева въ а҃ дн҃ь, а҃ го мс̑҇ца, и҆съсѧ́че вода̀ ѿ лица̀ землѝ·

12

И҆ ѿкры̀ но́е покро́въ ковче́гꙋ и҆же сътворѝ, и҆ видѣ ꙗ҆́ко и҆съсѧ́че вода̀ ѿ лица землѝ·

13

Въ мс̑҇цъ же вторы́и, въ кз҃ дн҃ь мс̑҇ца исъше землѧ̀·

14

Ре́че г҃ь б҃ъ но́еви гл҃ѧ, и҆зы́иди и҆с ковче́га ты̀, и҆ сн҃ве твоѝ, жена твоѧ̀, и҆ же́ны сн҃въ твои҆́хъ с тобо́ю·

15

И҆ всѧ́ка пло́ть ѿ птицъ и҆ до ско́та, и҆ всѧ́къ га́дъ дви́жꙋщїисѧ по землѝ и҆зведѝ съ собо́ю, растѣтесѧ и҆ множи́тесѧ на землѝ·

16

І҆ и҆зы́иде но́е и҆ сн҃ве е҆го жена̀ е҆го, и҆ жен́ы сн҃въ е҆го съ ни́мъ.

17

И҆ всѝ звѣрїе и҆ вси ско́ти, и҆ всѧ пти́ца, и҆ всѧ дви́жꙋщаа҆сѧ по ро́дꙋ свое҆мꙋ на землѝ, и҆зы́идоша и҆с ковче́га.

18

И҆ създ̑а но́е тре́бникъ гв҃и, и҆ възе́м꙽ ѿ всѣхъ ско́тъ чи́стых̑, и҆ ѿ пти́цъ чи́стых̑ и҆ възнесѐ всесъж꙽жига́емое на тре́бникъ, ѝ ѻ҆бонѧ̀ г҃ь воню̀ бл҃гоѹ҆ханїѧ·

19

И҆ ре́че г҃ь б҃ъ, не приложꙋ ктомꙋ̀ проклѧ́ти зе́млю за дѣ́ла члчс̑҇ка. занѐ прилежит̑ помышле́нїе чл҃кꙋ прилѣжно на зла́ѧ ѿ ю҆́ности е҆го и҆ того ради не приложꙋ ктомꙋ̀ ѹ҆би́ти всѧ́кїѧ пло́ти живы́ѧ, ꙗ҆́же сътвори́хъ всѧ̀ дн҃и на землѝ·

20

Сѣѧ́тва и҆ жа́тва, зима̀, и҆ зно́и, лѣт́о, и҆ ѻ҆́сень, дн҃ь и҆ но́щь не преста́нꙋт꙽·