Ostroh Bible❧Перша книга Мойсеєва: Буття, розділ 7

1

И ре́че г҃ь б҃ъ но́еви, вънїиди ты̀ и҆ ве́сь дом̑ тво́и въ ковче́гъ, ꙗ҆́ко ви́дѣхъ тѧ̀ пра́вед̑на предо мно́ю въ ро́дѣ сем꙽. ѿ ско́т꙽ же чи́стыхъ въведѝ къ себѣ сед̑меро сед̑меро, мꙋжескїи полъ и҆ же́ньскїи. ѿ ско́т же нечи́стыхъ дво́е дво́е мꙋжескїи пол̑ и҆ же́ньскїи·

2

ѿ пти́цъ же нбс̑҇ныхъ чи́стых̑, сед̑мь сед̑мь мꙋжескїи полъ и҆ же́ньскїи. ѿ пти́цъ же нечи́стыхъ дво́е дво́е мꙋжескїи по́лъ и҆ же́ньскїи, препита́ти племѧ̀ по все́и землѝ·

3

Є҆ще́ бо дн҃їи сед̑мь, и҆ а҆́зъ наведꙋ̀ до́жд̑ь на́ землю м҃ дн҃їи, и҆ м҃ но́щїи·

4

И҆ потреблю̀ всѧ дви́жꙋщаѧ҆сѧ ꙗ҆́же сътвори́хъ ѿ лица̀ всеѧ̀ землѧ̀·

5

І҆ сътворѝ но́е е҆ли́ко заповѣда̀ е҆мꙋ г҃ь б҃ъ.

6

Но́е же бѣ̀ лѣтъ ѕ҃ сот̑, и҃ пото́пъ бы́сть на землѝ·

7

Вънїиде же но́е, и҆ сн҃ве е҆го жена̀ е҆го, и҆ же́ны сн҃въ е҆го съ ни́мъ въ ковче́гъ, воды̀ ра́ди пото́пныѧ.

8

І҆ ѿ пти́цъ чи́стыхъ, и҆ ѿ птиц̑ нечи́стыхъ, и҆ ѿ всѣхъ ско́тъ чи́стых̑, и҆ ѿ ско́тъ нечи́стых꙽, и҆ ѿ звѣ́реи, и҆ ѿ всѣхъ га́дъ по́лъзаю҆щихъ по землѝ двое дво́е, вънидо́ша до но́ѧ въ ковчег̑҇ мꙋжескїи по́лъ и҆ же́ньскїи, ꙗ҆́коже заповѣда̀ е҆мꙋ б҃ъ·

9

Бы́сть же по сед̑ми дн҃їи вода̀ пото́пнаѧ на́ зем̑лю.

10

Въ ѕ҃ со́тное а҃ е лѣто жи́тїѧ но́ева вто́раго мцс̑҇а въ кз҃ дн҃ь·

11

Въ сїи дн҃ь разъверзо́шасѧ всѝ и҆сто́чницы безнд̑ыѧ и҆ хлѧ́би нбс̑҇ныѧ ѿверзо́шасѧ, и҆ бы́сть дожд̑ь на́ землю м҃ дн҃їи и҆ м҃ но́щїи·

12

Въ сїи дн҃ь вънїиде но́е, и҆ сн҃ве е҆го, симъ, ха́мъ, и҆а҆фе́тъ, и҆ жена̀ но́ева, и҆ трѝ же́ны сн҃въ е҆го съ ни́мъ въ ковче́гъ·

13

І҆ всѧк꙽ звѣ́рь по ро́дꙋ и҆ всѣ ско́ти по ро́дꙋ, и҆ всѧ́къ гадъ дви́жꙋщїисѧ на землѝ по ро́дꙋ. и҆ всѧ́ка пти́ца пер꙽на́таѧ по ро́дꙋ внидо́ша къ но́еви въ ковче́гъ дво́е дво́е мꙋжескїи по́лъ и҆ же́ньскїи ѿ всѧ́кїѧ пло́ти, въ не́и же е҆́сть дх҃ъ живо́тенъ·

14

І҆ въходѧ́ще ѿ всѧкїѧ пло́ти вънидо́ша мꙋже́скїи по́лъ и҆ же́ньскїи, ꙗ҆́коже заповѣда̀ но́еви б҃ъ·

15

І҆ затворѝ г҃ь б҃ъ внѣ̀ѹ҆́дꙋ ковче́гъ и҆ бы́сть пото́пъ м҃ дн҃їи и҆ м҃ н́ощїи, на землѝ, и҆ ѹ҆мно́жисѧ вода̀ и҆ възѧ̀ ковче́гъ, и҆ възнесе́сѧ ѿ землѧ̀·

16

І́ ѻ҆дръжа́шесѧ вода̀ и҆ множа́шесѧ ѕѣло̀ на землѝ, и҆ ноша́шесѧ ковче́гъ ве́рхꙋ воды̀, вода́ же ѻ҆дръжа́шесѧ ѕѣло на землѝ, и҆ покры̀ всѧ̀ го́ры высо́кїѧ, ꙗ҆́же бѧ́хꙋ под̑ нб҃сем꙽. е҃і, лако́тъ ве́рхꙋ възнесе́сѧ вода̀, и҆ покры̀ всѧ̀ го́ры высо́кїа·

17

І҆ ѹ҆мре всѧ́ка пло́ть дви́жꙋщаѧ҆сѧ по землѝ птиць же и҆ ското́въ, и҆ звѣреи и҆ все движꙋщее҆сѧ по землѝ, и҆ вс̂и чл҃цы и҆ всѐ е҆́же и҆́мать дыха́нїе живо́тно, и҆ всѐ е҆ли́ко бѣ̀ на́ сꙋсѣ ѹ҆́мре, и҆ потребѝ всѧ̀ движꙋщаѧ҆сѧ и҆же бѧ́хꙋ на лицы̀ всеѧ̀ землѧ̀. ѿ чл҃ка до ско́та гад̑ же и҆ пти́ць нбс̑҇ных̑, потреби́шасѧ на землѝ. и҆ ѻ҆ста̀ е҆ді́нъ но́е, и҆ сꙋщїѝ съ ни́мъ въ ковче́зѣ, и҆ стоѧ҆ше вода̀ над̑ земле́ю рн҃ дн҃їи·