Ostroh Bible❧Книга Суддів, розділ 1

1

И бы́сть по скон̑҇ча́нїи і҆сꙋ́совѣ, въпроша́хꙋ сн҃ове і҆и҆л҃еви е҆гда̀ гл҃юще. кт̂о взы́идет̑ съ на́ми к ханане́ю въе҆во́дою сѣщ́исѧ с ни́ми·

2

И҆ реч̑҇ г҃ь, і҆ю҆́да взы́идетъ, с̂е да́хъ зе́млю в рꙋ́цѣ е҆го·

3

И҆ рече і҆ю҆́да къ симеѻ҆нꙋ бра́тꙋ свое҆мꙋ. взы́ди со мно́ю свобожда́ти жре́бїи мои, да сѣче́мсѧ съ ханане́ѻмъ·

4

да и҆ а́зъ поидꙋ̀ с тобо́ю свобожда́ти жре́бїи твой·

5

І҆ и҆дѐ с нимъ симеѻ́н꙽·

6

И҆ взы́иде і҆ю́да и҆ да́сть г҃ь ханаа́на, и҆ ферезе́ѧ в рꙋцѣ е҆го, і҆ и҆збы́ша в꙽ везе́цѣ. і҃, ты́сꙋщъ мꙋжъ·

7

І҆ ѻ҆брѣто́ша а҆донивезе́ка в꙽ везе́цѣ и҆ сѣко́шасѧ с ни́ми. і҆ и҆зби́ша ханане́ѧ и҆ ферезе́ѧ·

8

И҆ ѿбѣж́е а҆донивезе́къ. и҆ гна́ша въ слд̑ѣ е҆го и҆ пости́гнꙋша и҆̀. и҆ ѿсѣко́ша пѧ́сти рꙋ́кꙋ е҆го, и҆ пле́снѣ но́гꙋ е҆го·

9

И҆ рече а҆донивезе́къ, сед̑ми десѧ́ти ц҃ремъ ѻ҆бсеко́хъ рꙋцѣ и҆ но́ѕѣ·

10

И҆ бы́ша собира́юще ѿ крꙋпиц̑҇ под̑ трапе́зою мое҆ю ꙗ҆́коже ѹ҆бо сотворих̑ та́кож̑ и҆ ѿда̀ ми б҃ъ. и҆ приведо́ша и҆̀ въ і҆е҆рс̑҇лимъ, и҆ ѹ҆́мре т̂ꙋ·

11

И҆ вое҆ва́ша сн҃ове і҆ю҆́дини на і҆ерс̑҇лим̑, и҆ взѧ́ша и҆̀. и҆ погꙋби́ша и҆̀ мече́мъ. и҆ гра̑ запали́ша ѻ҆гне́мъ·

12

Посе́м же снидо́шасѧ сн҃ове і҆ю́дини, вое҆ва́ти на ханане́ѧ, живꙋщ́аго в го́рстѣи ко ю҆́гꙋ, и҆ в ра́внѣи·

13

І҆ и́де і҆ю́да на ханаа́на живꙋщ́аго в хевро́нѣ. и҆мѧ же б̂ѣ хевро́нꙋ преже карїа҆ѳа́ръвъсефе́ръ. и҆ ѹ҆би́ша сеси́на, и҆ а҆хима́на·

14

И҆ ѳоломїѧ. род̑ е҆на́ков꙽·

15

И҆ възыидо́ша ѿтꙋ́дꙋ къ живꙋщ́имъ в дави́рѣ. и҆́мѧ же дави́рꙋ б̂ѣ пре́же град̑ писмен̑҇ныи·

16

И҆ рече хале́въ и҆же кт̂о и҆збїет̑ гра́ды писме́нныи, и҆ во́зметъ е҆го. да́мъ е҆мꙋ а҆сха́нь дще́рь мою въ женꙋ̀·

17

И҆ взѧ̀ е҆го гоѳоні́илъ сн҃ъ кене́ѯовъ бра́тъ хале́вовъ мнїи·

18

И҆ дас̑҇ е҆мꙋ хале́въ а҆сха́нь дще́рь свою̀ въ женꙋ̀·

19

И҆ бы́сть внегда̀ ѿхожда́ше, и҆ подви́же ю҆̀ гоѳонїи́лъ, проси́ти ѹ҆ ѿц҃а свое҆го села̀. и҆ въздыха́ше сѣдѧ́щи на ѻ҆слѧ́ти. и҆ възопѝ на ѻ҆слѧ́ти, на́ землю ю҆́жескꙋ ѿдал̑҇ м̂ѧ е҆си. и҆ рече е҆й хале́въ что̀ т̂и е҆сть·

20

И҆ рече е҆мꙋ а҆сха́нь, да́ждь м̂и блс̑҇венїе ꙗ҆́ко на́ землю ю҆́жескꙋ ѿдае́ши м̂ѧ. да м̂и дасѝ і҆ и҆схо́дища вод̑ныѧ. и҆ дас̑҇ е́й хале́въ по срд̑цꙋ еѧ̀. и҆схо́дища вы́шнихъ, і҆ и҆схо́дища нижнихъ·

21

Сн҃ове же кине́вли зѧ́тѧ моѷсїѻ҆ва, взыидо́ша ѿ гра́да фини́ческа, къ сн҃омъ і҆ю́диномъ въ пꙋсты́ню сꙋщꙋю на ю́гъ. къ и҆схо́дꙋ а҆ре́довꙋ. и҆до́ша и҆ всели́шасѧ съ люд̑ми·

22

І҆ и́де і҆юда съ сїмеѻ́номъ бра́томъ свои҆мъ. і҆ и҆збѝ ханане́ѧ живꙋщаго в сефе́ѳѣ. и҆ потреби́ша и҆̀. и҆ прозва́ша и҆́мѧ гра́дꙋ потребле́нїе·

23

Посе́мъ взѧ̀ і҆ю́да га́зꙋ и҆ ѻ҆крс̑҇тныѧ е҆го. и҆ а҆скало́на. и҆ ѻ́крс̑҇тныѧ е҆го. и҆ а҆каро́нъ, и҆ предѣ́лы е҆го. и҆ а҆зато́нъ, и҆ предѣлы ег̑҇·

24

И҆ бѧ́ше г҃ь со і҆ю҆́дою. и҆ прїѧт̑ горꙋ̀, н̂о не възмого́ша прїѧ́ти живꙋщихъ в раздо́лїи, зане риха́въ раздѣлѝ ю҆̀ колесни́цы желѣ́зны и҆мѣѧ́ше·

25

И҆ да́ша хале́вꙋ хевро́нъ, ꙗ҆коже гл҃а моѷсїи. и҆ причастѝ т̂ꙋ тр̂и гра́ды сн҃овъ е҆на́ковъ. і҆ и҆згна̀ ѿтꙋдꙋ тр̂и сн҃ы е҆на́ковы·

26

Но е҆вꙋсе́ѧ живꙋщаго въ і҆ерс̑҇ли́мѣ, не из̑гна́ша сн҃ове венїа҆ми́нови. и҆ живѧ́хꙋ и҆евꙋсе́и, съ сн҃ъми венїа҆ми́ни въ і҆ерс̑҇лі́мѣ и҆ до сего̀ дне·

27

И҆ взыидо́ша сн҃ове і҆ѻ́сифли, и҆ сїи́ въ веѳи́ль и҆ г҃ь бѧ́ше с ни́ми·

28

И҆ соглѧда́ли быша сн҃ове і҆ѻ́сифовы веѳи́ль·

29

И҆мѧ же б̂ѣ пре́же градꙋ лю́за·

30

И҆ ви́дѣша стрегꙋщїи мꙋжа сходѧ́щаго и҆з гра́да. и҆ ѧ́ша и҆̀ и҆ реко́ша е҆мꙋ покажѝ н̂ы вход̑ въ град̑, и҆ сътворим̑ с тобо́ю млс̑҇ть·

31

И҆ показа̀ и҆мъ вход̑ гра́дныи, и҆ посѣко́ша град̑ и҆хъ мече́мъ, а҆ мꙋжа и҆ сород̑ство е҆го, ѿпꙋсти́ша, и҆ ѿи҆́де мꙋжъ сїи въ зе́млю геѳии҆́м꙽скꙋ. и҆ съзи́жде т̂ꙋ град̑, и҆ прозва̀ и҆́мѧ е҆мꙋ лю́за, с̂е и҆́мѧ е҆мꙋ до дн҃е·

32

Но не и҆згна̀ манаси́съ. вефса́нь е҆же е҆сть скиѳо́нскъ град̑, н̂и ѻ҆́крс̑҇тныхъ предѣ́лъ е҆го. ниже е҆кѳана́хъ, ни ѻ҆крс̑҇тных̑ предл̑҇ѣ е҆го. н̂и живꙋщих̑ в꙽ дорѣ, ниже ѻ҆крс̑҇тных̑ е҆го. ни́же живꙋщаа въ е҆ла́мѣ, н̂и ѻ҆крс̑҇тных̑ е҆го. ни живꙋщаѧ въ мее҆до́нїи ни ѻ҆крс̑҇тных̑ е҆го, понеже възлюбѝ ханаан̑҇ жити на землѝ се́и·

33

И҆ быс̑҇ е҆гда̀ ѹ҆крепи́сѧ і҆и҆л҃ь, и҆ сътворѝ ханане́а дан̑҇ника и҆згна́нїем̑ же не из̑гна̀ е҆го·

34

І҆ е҆фре́мъ не и҆згна̀ ханане́а живꙋщаго въ газе́рѣ. н̂о живѧ́ше ханаа́нъ средѣ их̑ въ газе́рѣ. и҆ бы́сть емꙋ в꙽ дан꙽ника̀·

35

И҆ заѹ҆ло́нъ не и҆зъгна̀ живꙋщихъ въ хедронѣ, и҆ живꙋщихъ въ а҆ма́нѣ. и҆ всели́сѧ ханаан̑҇ средѣ и҆хъ, и҆ бы́сть е҆мꙋ да́нник꙽·

36

І҆ а҆си́ръ не и҆згна̀ живꙋщаѧ въ а҆кхоре́и, ни живꙋщаѧ въ до́рѣ. ни живꙋщаѧ в꙽ сидо́нихъ, ни живꙋщаѧ в дала́ѳѣ. и҆ въ а҆хазїи. и҆ въ е҆́лве, и҆ въ наѳе́кꙋ. и҆ въ роѻ҆́ѳѣ·

37

И҆ всели́сѧ а҆си́ръ средѣ ханане́ѧ живꙋщаго на землѝ то́и. занѐ не възмо́же и҆згна́ти е҆го·

38

И҆ неѳали́мъ не и҆зъгна̀ живꙋщихъ в꙽ веѳсамꙋ́сѣ. ниже живꙋщих̑ в꙽ веѳана́хꙋ. и҆ всели́сѧ нефѳали́м꙽, средѣ ханаа́на живꙋщ́аго на землѝ се́и, живꙋщїи же въ е҆ѳсамꙋ́сѣ. и҆ в꙽ веѳана́хꙋ, бы́ша е҆мꙋ да́нницы·

39

И҆ въгна̀ а҆м꙽море́и сн҃ы да́новы в горꙋ̀. ꙗ҆́ко не попꙋстѝ и҆мъ сни́ти на равнинꙋ̀·

40

И҆ възлюбѝ ам̑морре́и жи́ти в꙽ горѣ̀ в ка́менѣ. в꙽ мерсиѻ҆́нѣ, и҆ в салави́не, и҆ ѻ҆тѧжча̀ рꙋка̀ до́мꙋ і҆ѻ́сифлѧ на ам̑морре́ѧ. и҆ бы́сть е҆мꙋ да́нн꙽икъ·

41

Предѣ́ли же а҆м꙽мор꙽реистїи и҆дꙋме́ѻсъ свы́ше ѿ восхода а҆кра́лина ѿ камы́ка вы́ше·