Ostroh BibleКнига Суддів, розділ 3
Шрифт:
Запис:
1
Сїѧ же страны̀ ꙗ҆́же ѻ҆ста́ви г҃ь. да и҆скꙋси́т꙽ и҆ми і҆и҆л҃ѧ вс̂ѧ невѣ́дꙋщаѧ ра́ти, ханаа́ньски·
2
Ꙗ҆́ко да ѹ҆вѣсть с̂е наслѣ́дникъ сн҃овъ і҆и҆л҃евъ, и҆ да ѹ҆чи́тъ ѧ҆̀ ра́ти. ѻ҆ба́че и҆же прежде сего̀ не ѹ҆вѣ́дѧше·
3
пѧ́ть вое҆во́дъ и҆ноплеме́н꙽ническъ, кнѧзе́и и҆ всего̀ ханане́ѧ, и҆ сидо́нина и҆ е҆ѹ҆е́ѧ живꙋщаго в лива́нѣ, ѿ горы̀ ваа́лъ е҆рмо́на. да ла́въвема́ѳа·
4
И҆ бы́сть ꙗ҆коже и҆скꙋсѝ и҆́ми і҆и҆л҃ѧ. да ѹ҆вѣ́стьсѧ послꙋш́аютъ л̂и за́повѣдь гн҃ю, ꙗ҆́же заповѣ́да ѿц҃ем꙽ и҆хъ рꙋко́ю моѷсїи҆ною·
5
И҆ вселишасѧ сн҃ове і҆и҆л҃еви средѣ ханане́ѧ. и҆ хет꙽ѳе́ѧ. і҆ а҆м꙽морре́ѧ.
6
И҆ ферезе́ѧ. и е҆в꙽ве́ѧ. и҆ гер꙽гесе́ѧ, и҆ е҆ѹ҆се́ѧ·
7
И҆ поꙗ҆́ша дще́ри и҆хъ себѣ̀ въ жены̀, и҆ дще́ри своѧ да́ша сн҃омъ и҆хъ. и҆ послꙋжи́ша бого́мъ и҆хъ·
8
И҆ сътвори́ша сн҃ове і҆и҆л҃еви ѕл̂о пред̑ бм҃ъ и҆ забы́ша г҃а б҃а свое҆го. и҆ послꙋжи́ша ваа́лꙋ и҆ а́л꙽сꙋ·
9
И҆ разгнѣ́васѧ ꙗ҆́ростїю г҃ь на і҆и҆л҃ѧ, и҆ преда́сть ѧ҆̀ в рꙋкꙋ хꙋсарсаѳе́мꙋ цр҃ю сѷрскꙋ в꙽ междорѣчїе и҆ рабо́таша е҆мꙋ, лѣт꙽ и҃·
10
И҆ възопи́ша сн҃ове і҆и҆л҃еви къ г҃ꙋ. и҆ въста́ви г҃ь сп҃сенїе і҆и҆л҃ю. и҆ сп҃се ѧ҆̀ гоѳонии҆́лъ, сн҃ъ кене́зовъ бра́тъ хале́вов̑҇ мнїи, и҆ бы́сть на не́мъ дх҃ъ гн҃ь и҆ сꙋдѝ і҆и҆л҃ѧ. і҆ и҆зы́де на рать къ хꙋсарсаѳе́мꙋ цр҃ю и҆ преда̀ г҃ь в рꙋ́цѣ е҆го цр҃ѧ сѷрска, и҆ ѹ҆крѣпи́сѧ рꙋка̀ е҆го над̑ хꙋсарсаѳемом̑ сѷрскимъ·
11
И҆ бысть въ поко́и землѧ̀, м҃, лѣтъ. и҆ посе́мъ ѹ҆́мре гоѳонии҆́лъ сн҃ъ кене́зов̑҇.
12
И҆ приложи́ша сн҃ове і҆и҆л҃еви сотвори́ти ѕл̂о пред̑ гм҃ъ. и҆ ѹ҆крѣпѝ г҃ь е҆гло́ма цр҃ѧ моа́влѧ на і҆и҆л҃ѧ занеже сътворѝ ѕло́е пред̑ гм҃ъ·
13
И҆ събра̀ к себѣ вс̂ѧ сн҃ы ам̑мо́нѧ. и҆ а҆мали́ковы, і҆ и́де и҆ побѝ і҆и҆л҃ѧ, и҆ прїѧ̀ гра́ды ѳини́чески·
14
И҆ рабо́таша сн҃ове і҆и҆л҃ви е҆гло́мꙋ цр҃ю моа́влю, лѣтъ, и҃і·
15
И҆ възопи́ша сн҃ове і҆и҆л҃еви къ г҃ꙋ. и҆ въста́ви и҆мъ г҃ь сп҃сенїе а҆ѻ́да сн҃а гара́нѧ, сн҃а е҆мїина мꙋжа е҆же не владѣ десни́цею. и҆ посла́ша сн҃ове і҆и҆л҃еви дары рꙋко́ю е҆го, е҆гло́мꙋ цр҃ю моа́влю·
16
И҆ сътворѝ себѣ а҆ѻ́дъ но̑ ѻ҆бою́дꙋ ѻ҆́стръ, на́ пѧдь е҆ди́нꙋ долгота̀ е҆го. и҆ поѧса́сѧ и҆мъ по бедрѣ десно́и свое́и·
17
І҆ и́де и҆ принесѐ дары е҆гло́мꙋ цр҃ю моа́влю. е҆гло́м же мꙋж꙽ ѻ҆сла́блен̑҇ б̂ѣ ѕѣ́ло·
18
И҆ бы́сть ꙗ҆́ко сконча̀ а҆ѻ́дъ приносѧ̀ дары. и҆ вы́слалъ носѧ́щаѧ да́ры·
19
И҆ е҆гло́мъ ѻ҆брати́сѧ ѿ і҆́долъ и҆же въ галга́лѣхъ. и҆ реч̑҇ а҆ѻ́дъ слово мн̂ѣ е҆сть к тебѣ та́ино цр҃ю, и҆ рече е҆гло́мъ всѣмъ пред̑стоѧ҆́щимъ пред ни́мъ. да и҆зы́дꙋтъ во́нъ, і҆ и҆зыдо́ша вс̂и пред̑стоѧ́щїи е҆го·
20
А҆ѻ́д же внїиде к немꙋ̀. се́и же сидѧ́ше на восхо́дницы лѣтнїи е҆ді́н꙽ и҆ рече а҆ѻ́дъ слово бж҃їе мн̂ѣ къ тебѣ цр҃ю. и҆ въста̀ е҆гло́мъ съ стола̀ и҆ прїиде к немꙋ̀·
21
И҆ бысть е҆гда въста̀ а҆гїе, прострѐ а҆ѻ́дъ рꙋкꙋ лѣвꙋю с̂и і҆ и҆звлечѐ но́жъ и҆же над̑ стегно́мъ е҆го де́сным꙽, и҆ вон꙽зѐ во чре́во е҆гло́мово·
22
И҆ под̑ти́снꙋ и҆ чрен̑҇ под̑ ко́жꙋ, и҆ затворѝ ꙗ҆́звꙋ тꙋ́къ, ꙗ҆́ко не и҆звлечѐ ножа̀ и҆с чре́ва е҆го н̂о и҆зы́де лаи҆но̀·
23
І҆ и҆зы́де а҆ѻ́дъ во па́пертъ. и҆ затворѝ двери вхо́дницы го́рнеи е҆го, и҆ заключѝ е҆го.
24
І҆ е҆гда сїи и҆зы́де прїидо́ша рабѝ е҆го ѹ҆зрѣша, и҆ с̂е две́ри въсхо́дницы затво́рены. и҆ рѣша, е҆д̂а в за́дѣ сѣдит̑ ѹ҆го́днаѧ себѣ̀ творѧ̀ ѿшедъ ѿ ло́жа·
25
И҆ прежда́ше ѹ҆мо́л꙽кше·
26
и҆ се не бы́сть ѿврьза́ѧй две́ри въсход̑ницы, и҆ взе́мше клю́чь ѿврьзо́ша, и с̂е господи́нъ и҆хъ лежи́тъ на зем̑лѝ мр҃твъ·
27
А҆ѻ́д же ѹ҆бѣжа̀ до́ндеже ѻ҆бозрѣша, и҆ минꙋ́въ і҆́долы вни́де въ ро́ѳꙋ·
28
И҆ бы́сть е҆гда прїиде а҆ѻд̑ въ зе́млю і҆ил҃евꙋ, и҆ въстрꙋбѝ ро́гом̑ в горѣ̀ ефре́мли, и҆ снидо́ша с нимъ съ горы̀ сн҃ове і҆и҆л҃еви, се́и же пред̑ ни́ми·
29
И҆ рече к ни́мъ, и҆дѣте въ слд̑ѣ менѐ, ꙗ҆́ко преда́сть г҃ь б҃ъ врагы̀ на́ша моа́влѧне в рꙋцѣ на́ши·
30
І҆ и҆до́ша въ слѣ́дъ е҆го, и҆ пред̑взѧ́ша прехо́ды ѹ҆ і҆ѻ҆рда́на и҆ моа́влѧ, и҆ не да́ша никомꙋже минꙋт́и·
31
І҆ и҆зби́ша моа́ва в т̂о вре́мѧ ꙗ҆́ко, і҃, ты́сѧщ̑҇ мꙋжъ вс̂ѧ во́ины, и҆же в ни́хъ, и҆ всѧ́къ мꙋжъ си́ленъ и҆ не ѹ҆бѣже н̂и е҆ді́нъ·
32
И҆ премѣни́сѧ моа́въ в то́и дн҃ь под̑ рꙋкꙋ і҆и҆л҃евꙋ, и҆ бысть в поко́й землѧ̀, п҃, лѣтъ и҆ сꙋдѝ и҆мъ а҆ѻд̑ до́ндеже ѹ҆́мре·
33
По не́м же въста̀ самега́ръ сн҃ъ а҆на́ѳовъ, се́и избѝ и҆ноплеме́н꙽никъ, х҃, мꙋжъ, радлицею плꙋж́ною и҆ сп҃се и҆ се́и і҆и҆л҃ѧ·
Джерела
