Ostroh BibleКнига Суддів, розділ 5
Шрифт:
Запис:
1
И възопѝ дево́ра и҆ вара́къ сн҃ъ авинее́мовъ. в то́и дн҃ь. и҆ рѣ́ста·
2
Внегда же ѿдастъ ѿмще́нїе ѻ҆би́дѧщим̑ і҆и҆л҃ѧ, въ и҆зволе́нїе людем̑. блс̑҇вите г҃а·
3
Слы́шите цр҃и и҆ внꙋши́те кн҃ѕи, а҆зъ гв҃и въспою. и҆ въсхва́лю б҃а і҆и҆л҃ева·
4
Ги҃ въ и҆схо́дѣ твое҆мъ ѿ сїи҆ра. вънегда въздвижа́шесѧ ѿ села̀ е҆до́мова. землѧ̀ сѧ потресѐ, и҆ нб҃о възмꙋти́сѧ. и҆ ѻ҆́блаци прокапа́ша во́дꙋ, го́ры подвиза́шасѧ ѿ лица̀ гн҃ѧ. и҆ гора̀ сїѻ́нъ ѿ лица̀ г҃а б҃а і҆и҆л҃ева·
5
Въ́ дн҃и самега́ровы, сн҃а е҆на́ѳова, въ дн҃и і҆и҆л҃евы·
6
ѻ҆скꙋдѣша пꙋтїе і҆ и҆до́ша без̑ чинꙋ. и҆до́ша в꙽ пꙋтѝ кри́вы·
7
ѻ҆скꙋдѣша живꙋщїи въ і҆и҆л҃и. ѻ҆скꙋдѣша до́ндеже въстах̑ а҆зъ дево́ра м҃ти въ і҆и҆л҃и·
8
Є҆гда̀ и҆зво́лиша богѝ но́вы, ꙗ҆́ко хлб̑҇ѣ ꙗ҆́ченъ. тогда̀ и҆мѣа́ше врагѝ въ вра́тѣхъ и҆ въе҆ва́ша гра́ды и҆хъ, и҆ не ꙗ҆влѧшесѧ пра́ща, а҆ни ко́пїе·
9
въ м҃. ты́сѧщахъ въ і҆и҆л҃и·
10
Срд̑це моѐ къ заповѣ́данымъ і҆и҆л҃евы. си́лнымъ в людех̑ блс̑҇вите г҃а·
11
ѻ҆҇ ездѧ́щїи на ѻ҆слѧ́тахъ бѣ́лыхъ и҆ на сꙋ́дъ и҆дꙋщїи совѣта. провѣща́ите·
12
Глс̑҇а плетꙋщих̑ средѣ веселѧ́щих̑сѧ·
13
тамо да дадѧ́тъ пра́вдꙋ гв҃и правед̑нїи да ѹ҆крѣпиши въ і҆и҆л҃и. нн҃ѣ да разыдт̑ꙋсѧ въ гра́ды своѧ̀ лю́дїе гн҃и·
14
Въста́ни въста́ни дево́ра, въста́ни въста́ни гл҃и съ пѣ́снїю. въста́ни и҆ вара́кꙋ. и҆ плѣнѝ плѣ́нь тво́и сн҃е а҆винее́нь·
15
Нн҃ѣ възвели́читсѧ ѻ҆ста́вшїи въ вельмо́жах̑ людїи. г҃ь сми́ри на́мъ крѣ́пльшаѧ нас̑҇. лю́ди е҆фрѣмлѧ ѹ҆томи́ша и҆хъ в доли́не·
16
Братъ тво́и венїами́нъ послѣднїи в лю́дехъ свои҆хъ. бы́сть ѿ менѐ махи́ръ сни́де взыска́ющїи тебѐ. и҆ ѿ заѹ҆ло́на ѹ҆крѣплѧ́ющїисѧ въ ски́петре ѹ҆казꙋ́юще писа́нїе·
17
Нача́лнїи въ и҆саха́рѣ съ дево́рою и҆ вараком̑·
18
такоже и҆ варакъ ѿпꙋстѝ пѣшца своѧ̀ в꙽ поли́нꙋ. прострѐ нога́ма свои҆ма ѹ҆ раздѣленїа рꙋви́мова. вели́ка и҆спытанїа срд̑ца·
19
И҆ варакъ въскꙋю ми сѣ́сти средѣ мосѳеѳа́ма. послꙋшати звизда́нїе въстава́ющих̑ проити въ рꙋвїю ве́лїѧ. и҆спыта́нїа срд̑ца·
20
Галаа҆дъ ѻ҆бонꙋ странꙋ̀ і҆ѻ҆рдана, вселисѧ и҆ да́нъ. въскꙋю ѻ҆бита́еши въ мно́гихъ. аси́ръ ѻ҆бита̀ в помо́рїихъ мо́рскихъ. и҆ в лꙋѕѣхъ свои҆х꙽ вселисѧ заѹ҆ло́нъ. лю́дїе ѹкори́ша дш҃ꙋ ег҃о на смр҃ть. и҆ неѳали́мъ на высотѣ̀ села̀·
21
И҆ прїидо́ша до него̀ цр҃и, и҆ въполчи́шасѧ, тогда̀ вое҆ва́ша цр҃и ханаа́ни въ ѳанаа́хꙋ, ѹ҆ воды̀ маге́довы. и҆ мно́жества сребра̀ не взѧ́ша·
22
ѿ нб҃си вое҆ва́ша ѕвѣ́зды ѿ чинꙋ и҆хъ. вое҆ва́ша съ сиса́рою·
23
Въ водоте́чїи ки́с꙽сооп̑҇. и҆згна̀ ѧ҆̀ водоте́чь, кадими́нъ, въ водоте́чь кис꙽со́нъ. попере́тъ ѧ҆̀ дш҃а моѧ̀ си́лно·
24
Тогда̀ ѿсѣко́ша копы́та ко́ньски, и҆ ѹ҆мѧкче́ны ѿ потопта́нїѧ си́лныхъ е҆го·
25
Проклина́ите мазо́ра. и҆ реч̑҇ а҆гг҃лъ гн҃ь, проклѧ́тїемъ клени́те живꙋщаѧ в не́и. ꙗ҆́ко не прїидо́ша въ помо́щь гн҃ю. въ помо́щь гн҃ю на си́лъныхъ·
26
Блс̑҇вена в꙽ женахъ і҆и҆л҃евых̑, жена̀ хаве́рова кинїина ѿ жен̑҇ в꙽ кꙋщи, блс̑҇вена бꙋ́ди·
27
Воды̀ проси ѹ҆ неѧ, и҆ да́стъ е҆мꙋ мле́ко въ ча́ши си́лных̑. принесѐ ма́сло·
28
Рꙋ́кꙋ свою лѣ́вꙋю до ко́ла. прострѐ десни́цꙋ свою до мла́та рабо́тающихъ. и҆ ѹ҆бѝ сиса́рꙋ. и҆ разбѝ главꙋ̀ е҆го, и҆ ѿлꙋчѝ че́люсть е҆мꙋ, и҆ ѹ҆бѝ ме́жꙋ нога́ма е҆ѧ̀, преклони́въ, паде́сѧ ѹ҆трꙋжде́нъ и҆ ѹ́мре посредѣ но́гъ е҆ю̀ и҆ т̂ꙋ падѐ нечести́вне. ѻ҆ко́нцом̑ призира́ше ма́ти сиса́рина. ѻ҆кно́мъ средѣ решот̑ки. чт̂о премедлѝ колесни́ца е҆го прїити въскꙋ́ю ѹ҆медлѣша стопы̀ ѻ҆рꙋж́їѧ е҆го·
29
Мꙋ́дрыѧ нача́л꙽ства е҆ѧ̀, ѿвѣща́ша е́й. и҆ сама̀ ѿвѣщава́ше словеса своѧ̀ к себѣ·
30
Не ѻ҆брѧ́щꙋтъ е҆го раздѣлѧ́юща кори́сть, дрꙋжа́ѧ дрꙋ́ги на главꙋ̀ мꙋж́а си́лна кори́сть, ри́зы разноли́чныѧ сиса́ръ кори́сть. разли́чна ри́зъ ѹ҆краше́нныхъ. и҆ разли́чнаѧ шве́нїѧ на вы́и е҆го·
31
Та́ко да поги́бнꙋтъ вс̂и вра́зи твоѝ г҃и. и҆ любѧ́щїи е҆го ꙗ҆́ко въсто́къ слн҃ца въ си́лѣ свое́й. и҆ бы́сть въ поко́и землѧ̀, м҃, лѣтъ·
Джерела
