Ostroh Bible❧Книга Суддів, розділ 6

1

И сътвори́ша сн҃ове і҆и҆л҃еви ѕло́е пред̑ гм҃ъ. и҆ преда́стъ ѧ҆̀ г҃ь въ рꙋ́кꙋ мадїа́млю, з҃, лѣтъ·

2

И҆ ѹ҆крѣпи́сѧ рꙋка̀ мадїа́млѧ на і҆и҆л҃ѧ. и҆ сътвори́ша себѣ сн҃ове і҆и҆л҃еви ѿ лица̀ мадїа́млѧ ѻ҆гра́ды в꙽ гора́хъ в꙽ пеще́рах̑ и҆ въ тве́рдехъ·

3

И҆ бы́сть е҆гда̀ сѣѧ́ше чл҃къ і҆и҆л҃евъ, и҆ въсхожда́ше, мадїа́мъ, и҆ а҆мали́къ и҆ сн҃ове въсто́къ. и҆ въсхожда́хꙋ на́ нѧ·

4

И҆ въполча́хꙋсѧ на́ нѧ. и҆ рас꙽сыпова́хꙋ пло́ды земныѧ, до́ндеже вни́ти въ газа́нꙋ. и҆ не ѻ҆ставлѧ́хꙋ бы́тїа жи́зненаго въ і҆и҆л҃и. н̂и стадъ теле́цъ н̂и ѻ҆слѧ́тъ·

5

Ꙗ҆́ко са́ми и҆ ско́тъ их̑ въсхожд̑аа́хꙋ. и҆ кꙋщи их̑ принесо́ша, и҆ прїидо́ша ꙗ҆́ко прꙋзи мно́жеством̑·

6

самѣмъ же и҆ вельблю́домъ и҆хъ не бѧ́ше числа̀. и҆ прихожда́хꙋ б̂о на́ землю і҆и҆л҃евꙋ рас꙽сы́пати ю҆̀·

7

И҆ ѻ҆ѹ҆бозѣ і҆и҆л҃ь ѕѣ́ло ѿ лица мадїа́млѧ·

8

И҆ възопи́ша сн҃ове і҆и҆л҃еви къ г҃ꙋ·

9

И бы́сть е҆гда възопи́ша сн҃ове і҆и҆л҃еви къ г҃ꙋ. мадїа́ма ра́ди. и҆ посла̀ г҃ь мꙋж́а прро̑҇ка сн҃омъ і҆и҆л҃евомъ. и҆ реч̑҇ и҆мъ с̂е гл҃етъ г҃ь б҃ъ і҆и҆л҃евъ. аз̑ е҆смь и҆зведы́и вас̑҇ изъ е҆гѷпта. і҆ и҆зведох̑ ва́съ и҆з до́мꙋ рабо́ты·

10

І҆ изба́вих̑ вас̑҇ ѿ рꙋкѝ е҆гѷпет̑скїѧ. и҆ ѿ рꙋки всѣ́хъ стꙋжа́ющихъ ва́мъ, и҆ прогнах̑ ѧ҆̀ ѿ лица̀ ва́шего. и҆ дах̑ ва́мъ зе́млю и҆хъ·

11

И҆ реко́хъ ва́мъ а҆́зъ е҆смь г҃ь б҃ъ ва́шъ. не ѹ҆бо́итесѧ бо́гъ а҆м꙽мор꙽ре́искъ. в꙽ них꙽же живетѐ въ землѝ ихъ. н̂о не послꙋш́асте гла́са мое҆го·

12

И҆ прїиде а҆гг҃лъ гн҃ь, и҆ сѣ́де под̑ дꙋ́бом̑, ꙗ҆́же е҆сть въ е҆ѳра́ѳе и҆же бы́сть и҆ѻ҆а́са ѿц҃а е҆сри́мова. и҆ гедеѻ́нъ сн҃ъ е҆го млача́ше пшеницꙋ на гꙋмнѣ̀ е҆го. да бѣжа́тъ с не́ю ѿ лица̀ мадїа́млѧ·

13

И҆ ꙗ҆висѧ е҆мꙋ а҆гг҃лъ гн҃ь, и҆ реч̑҇ г҃ь с тобо́ю мꙋж́ꙋ си́л꙽ныи·

14

И҆ реч̑҇ к немꙋ̀ гедеѻ́нъ. г҃и мо́и, а҆ще е҆сть г҃ь в на́съ. т̂о въскꙋ́ю н̂ы ѻ҆брѣто́ша вс̂ѧ ѕла́ѧ с̂и. и҆ гд̂ѣ сꙋть вс̂ѧ чюдеса̀ е҆го. е҆лико повѣ́даша нам̑ ѿц҃ы наши гл҃юще. не и҆зъ е҆гѷпта л̂и и҆зведѐ насъ г҃ь, и҆ нн҃ѣ ѿвр́ьже нас̑҇ г҃ь. и҆ преда́стъ нас̑҇ в рꙋ́кꙋ мадїа́млю·

15

И҆ възрѣ́въ на́нь а҆гг҃лъ гн҃ь и҆ реч̑҇ е҆мꙋ. и҆дѝ въ крѣ́пости свое́й се́и. и҆ сп҃се́ши і҆и҆л҃ѧ ѿ рꙋ́кꙋ мадїа́млю, и҆ с̂е пошлю̀ т̂ѧ·

16

И҆ реч̑҇ къ немꙋ гедеѻ́нъ. г҃и. чим̑ сп҃сꙋ і҆и҆л҃ѧ. с̂е ты́сѧща м̂ѧ хꙋдѣ́иша в꙽ манасїи. и҆ а́зъ мнїи́ в꙽ домꙋ ѿц҃а мое҆го·

17

И҆ реч̑҇ к немꙋ г҃ь поне́же а҆зъ бꙋ́дꙋ с тобо́ю. і҆ и҆збїе́ши мадїа́ма ꙗ҆́ко е҆ді́наго мꙋжа·

18

И҆ реч̑҇ к немꙋ гедеѻ́нъ. а҆́ще е҆смь ѻ҆брѣ́лъ блгд̑ть прд̑е ѻ҆чи́ма твои́ма. да сътвори́ши м̂и зна́менїе, ꙗ҆́ко т̂ы е҆си и҆же гл҃еши со мно́ю·

19

Не постꙋпѝ ѿсю́дꙋ до́н꙽деже прїидꙋ̀ к тебѣ̀, и҆ принесꙋ̀ тре́бꙋ свою и҆ положꙋ̀ прд̑е тобо́ю, и҆ реч̑҇ а҆зъ премедлю̀ до́ндеже ѻ҆брати́шисѧ·

20

Гедеѻ́нъ же, в꙽ни́де и҆ сътворѝ ко́злище ѿ ко́зъ, и҆ че́тверть е҆́фи мꙋкѝ ѻ҆прѣ́сноковъ, и҆ вложѝ с мѧ́сомъ въ кро́шницꙋ, и҆ ю́хꙋ в꙽лїѧ̀ въ горне́цъ, і҆ и҆знесѐ к немꙋ под̑ дꙋб꙽, и҆ поста́ви·

21

И҆ рече к немꙋ̀ а҆гг҃лъ гн҃ь възмѝ мѧ́са и҆ хлѣ́бы прѣ́сныѧ, и҆ положѝ ѹ҆ ка́мене ѻ҆́ного, и҆ ю́хꙋ близ̑ пролїи́, и҆ сътворѝ та́ко·

22

И҆ прострѐ а҆гг҃лъ гн҃ь коне́цъ жезла̀ и҆же въ рꙋцѣ̀ е҆го, и҆ прикоснꙋ́сѧ мѧ́сѣхъ и҆ хлѣ́бехъ прѣ́сныхъ, и҆ възгорѣ́сѧ ѻ҆́гнь ѿ ка́мене, и҆ съж꙽жѐ мѧ́са и҆ ѻ҆прѣ́сноки, а҆гг҃лъ же гн҃ь ѿи҆́де ѿ ѻ҆́чїю е҆го·

23

И҆ ви́дѣ гедеѻ́нъ, ꙗ҆́ко а҆гг҃лъ е҆сть гн҃ь, и҆ рече гедеѻн̑҇, ѽ г҃и г҃и сего̀ ли ра́ди ви́дѣхъ а҆гг҃ла гн҃ѧ лице́мъ къ лицꙋ̀·

24

И҆ рече е҆мꙋ г҃ь, ми́ръ тебѣ не бо́исѧ, не ѹ҆́мреши·

25

И҆ съградѝ та́мо гедеѻ́нъ ѻ҆л̂тарь гв҃и, и҆ прозва̀ и҆̀ ми́ръ гн҃ь до сего дн҃е, и҆ е҆щѐ сꙋщꙋ е҆мꙋ въ е҆ѳра́ѳѣ ѿц҃а е҆срїи́на·

26

И҆ быс̑҇ в т̂ꙋ но́щь и҆ реч̑҇ е҆мꙋ г҃ь, поимѝ теле́ц꙽ ѹ҆пита́н꙽ныи ѿ ско́тъ ѿц҃а твое҆го, теле́цъ и҆ дрꙋгїи́, въ з҃, лѣтъ, и҆ разорѝ ѻ҆лтарь ваа́ль, и҆же е҆сть ѿц҃а твое҆го, и҆ са́дъ и҆же ѹ҆ него̀ да посѣче́ши·

27

И҆ да съгради́ши ѻ҆л꙽тарь гв҃и б҃ꙋ твое҆мꙋ, ꙗ҆ви́вшꙋ ти сѧ е҆мꙋ на верхꙋ̀ горы̀ сеѧ̀, въ пред̑чинїю̀, и҆ да по́имеши теле́цъ вторы́и и҆ възнесе́ши въ всѐсъж꙽же́нїе, на́ древх̑ѣ сада и҆же посѣче́ши·

28

И҆ поѧ̀ гедеѻ́нъ і҃, мꙋ́жь ѿ ра́бъ свои҆хъ, и҆ сътворѝ ꙗ҆́коже заповѣ́да е҆мꙋ г҃ь, и҆ бы́сть ꙗ҆́ко сѧ ѹ҆́боѧ̀ до́мꙋ ѿц҃а свое҆го, и҆ мж̑ꙋ град̑ныхъ, сътвори́ти сего̀ въ дн҃е, и҆ сътворѝ но́щїю·

29

ѻ҆бꙋтрѣвше же мꙋж́и град̑стїи заѹ҆́тра, ви́дѣша и҆ с̂е раско́панъ ѻ҆лтарь ваа́ль, и҆ сад̑ и҆же ѹ҆ него посѣче́нъ, и҆ теле́цъ ѹ҆пита́ныи възнесе́нъ на вс̂есъж꙽же́нїе на ѻ҆л꙽тарь но́во съгражде́ныи·

30

И҆ реко́ша дрꙋ́гъ къ дрꙋгꙋ кт̂о со́творѝ ве́щъ сїю и҆ въпраша́хꙋ і҆ и҆ска́хꙋ, и҆ реко́ша ꙗ҆́ко гедеѻ́нъ сн҃ъ и҆а́совъ сътвори́лъ е҆сть ве́щъ сїю·

31

И҆ реко́ша мꙋж́и грд̑астїи къ и҆ѻ҆а́сꙋ и҆зведѝ сн҃ъ тво́и, и҆ да ѹ҆́мретъ, ꙗ҆́ко раскопа̀ ѻ҆лтарь ваа́ль, и҆ ꙗ҆́ко посѣчѐ са́дъ и҆́же ѹ҆ него̀·

32

И҆ реч̑҇ и҆ѻ҆а́съ къ мꙋже́мъ въста́вшимъ на́нь, вы̀ л̂и нн҃ѣ прю̀ гл҃ете ѿ ваа́ла, и҆ вы̀ л̂и е҆го сп҃сетѐ, н̂о а҆́ще кт̂о сътвори́лъ е҆мꙋ е҆сть кривинꙋ̀, да ѹ҆́мретъ до заѹ҆́трїѧ, а҆́ще б҃ъ е҆сть да м꙽сти́тъ себѐ кт̂о раскопа̀ е҆го ѻ҆лтарь·

33

И҆ прозва́ша и҆̀ в то́и дн҃ь прѣт́ели ваа́ла рекꙋще да ѿм꙽сти́тъ на не́мъ ваа́ль. кт̂о раскопа̀ ѻ҆л꙽тарь е҆го·

34

Тогда̀ ве́сь мадїа́мъ и҆ а҆мали́къ, и҆ сн҃ове въсток̑҇ снидо́шасѧ вкꙋ́пѣ, и҆ преидо́ша рекꙋ̀ и҆ ста́ша в доли́нѣ і҆ил҃ь·

35

дх҃ъ же бж҃їи бы́сть ѹ҆крѣплѧ́а гедеѻ́на и҆ въстрꙋби ро́гомъ, и҆ възпѝ а҆вїезе́ръ въ слѣ́дъ е҆го·

36

посла же послы̀ къ всемꙋ̀ манасїю, и҆ съзва́сѧ и҆ се́и въ слѣ́дъ е҆го, посе́мъ посла̀ послы̀ въ а҆си́ръ, и҆ въ заѹ҆ло́нъ, и҆ въ нефѳали́мъ, и҆ взыидоша сꙋпроти́витисѧ и҆мъ·

37

И҆ реч̑҇ гедеѻ́нъ къ б҃ꙋ, а҆́ще и҆́стинно сп҃са́еши рꙋко́ю моею і҆и҆л҃ѧ, ꙗ҆́коже гл҃а·

38

Се̂ а҆́зъ положꙋ̀ рꙋ́но во́лнѧно на тоцѣ̀, и а҆́ще роса̀ бꙋ́дет꙽ на́ рꙋ́нѣ то́чїю, а҆ по всеи зем̑лѝ сꙋша, т̂о ѹ҆ви́дѣ ꙗ҆́ко сп҃са́еши рꙋко́ю моею і҆и҆л҃ѧ, ꙗ҆́коже гл҃а·

39

И҆ бы́сть та́ко, и҆ ѻ҆бꙋт́рѣвъ гедеѻ́нъ наѹ҆́трїѧ, и҆збѝ рꙋ́но і҆ и҆ска́па и҆з рꙋ́на роса̀, и҆ напо́лни ча́шꙋ воды̀·

40

И҆ реч̑҇ гедеѻ́нъ къ б҃ꙋ, да не разгнѣ́ваетсѧ ꙗ҆́рость твоѧ̀ на́ мѧ, да гл҃ю е́щѐ е҆ді́ною, і҆ и҆скꙋшꙋ е҆щѐ е҆ді́ною, в рꙋ́нѣ се́мъ, да бꙋ́детъ в рꙋ́нѣ то́чїю сꙋша, а҆ по все́и землѝ роса̀ бꙋ́детъ·

41

И҆ сътворѝ б҃ъ в꙽ тꙋ но́щь та́ко, и҆ бысть сꙋ́хо на рꙋ́нѣ то́чїю, а҆ по все́и землѝ роса̀·