Ostroh Bible❧Книга Юдити, розділ 10

1

Бы́сть же е҆гда преста̀ въпи́ти къ г҃ꙋ. въста̀ ѿ мѣста на не́м꙽же лежа̀ просте́р꙽та къ г҃ꙋ б҃ꙋ възва́ же а҆́брꙋ свою. и҆сходѧщи въ до́мъ свои и҆ совлече с꙽ себе вре́тище и҆ ѻ҆де́ждꙋ вдовства свое҆го и҆ ѹ҆мы̀ тѣло свое. и҆ пома́засѧ мастьми и҆ ми́ромъ бл҃говоннымъ, и҆ распростре вла́сы главы̀ свое́ѧ. и҆ наста́ви ми́трꙋ на главꙋ̀ свою. и҆ ѻ҆блечесѧ ѻ҆дѣа́нїем̑ бл҃гостынѧ свое́ѧ, и҆ на но́ѕѣ своѝ плесници прїа и҆ нарам̑ницꙋ швенꙋ цвѣтїем̑ и҆ ѹ҆серѧзи и҆ перьстени и҆ всѣми красотами свои́ми ѹ҆краси́сѧ е́йже и҆ г҃ь даде красотꙋ. и҆ ꙗ҆́ко вс̂ѧ сїѧ сложенїѧ не ѿ похо́ти блд̑ꙋства, н̂о ѿ преподо́бїѧ·

2

И҆ сего ради г҃ь съпоспѣшествова красотѣ еѧ̀. да не то́щною красото́ю всѣмъ ѻ҆чесемъ ꙗ҆ви́тсѧ. и҆ възложи на а́брꙋ ѻ҆трокови́цꙋ свою, лагвицꙋ вина́ и҆ сосꙋдъ і҆е҆ле́ѧ, и҆ крꙋпъ, и҆ смокви и҆ хлъбъ и҆ сы́ръ, і҆ и҆доста. е҆гда же прїидо́ста къ вра́томъ гра́да, и҆ ѻ҆брѣте ждꙋща і҆ѻ҆сїю, и҆ презви́теры град̑ски. ви́дѣвше ю҆̀ ѹ҆жасошасѧ дивѧ́щесѧ ѕѣло красотѣ еѧ̀. ѻ҆баче ничтож̑ въпроси́ша ю҆̀, н̂о пꙋсти́ша ю҆̀ проити рекꙋщи. б҃ъ ѿц҃ъ на́шихъ да дасть тебѣ блгд̑ть. и҆ весь совѣтъ срд̑ца твое҆го, свое́ю си́лою да ѹ҆крѣпит̑ и҆ да славит̑сѧ ѻ҆ тебѣ і҆ерс̑҇ли́мъ, и҆ да бꙋ́детъ и҆мѧ твое в꙽ числѣ прпд̑бных̑ и҆ пра́вед̑ныхъ·

3

И҆ реко́ша вс̂и сꙋщїѝ т̂ꙋ е҆ді́ногла́сно. бꙋ́ди т̂о бꙋ́ди. і҆ю҆ди́ѳъ же молѧ́щисѧ г҃ꙋ б҃ꙋ прои҆де сквоѕѣ вра́та и҆ а́бра еѧ̀·

4

Бы́сть же е҆гда̀ схожда́ше съ горы̀, слн҃цꙋ въсходѧ́щꙋ и҆ срѣтоша ю҆̀ стра́жи а҆сѷрїистїи. и҆ ꙗ҆́ша ю҆̀ рекꙋщи, ѿкꙋ́дꙋ грѧдеши и҆ ка́мо и҆де́ши. ѻ҆на́ же ѿвѣща дщ̂и е҆смь е҆врѣ́иска. сего ради и҆збѣгохъ ѿ лица̀ их̑, ꙗ҆́ко бꙋ́дꙋщаѧ проразꙋмѣхъ ꙗ҆́ко дадꙋтсѧ вам̑ въ плѣненїе·

5

Того ра́ди и҆же ѹ҆ничижи́ша вас̑҇, не восхотѣша б̂о предатисѧ ва́мъ. дабы ѻ҆брѣли млс̑҇ть пред̑ ѻ҆чи́ма ва́шима, и҆ мышлѧх̑ в но́щь сїю сама̀ въ себѣ рекꙋщи·

6

И҆дꙋ̀ къ лицꙋ̀ кнѧ́зѧ ѻ҆лофе́рна да скажꙋ е҆мꙋ таинаѧ и҆хъ. и҆ покажꙋ е҆мꙋ и҆́мже прих́одомъ мо́жетъ ѻ҆бъꙗ҆́ти и҆хъ. та́ко да не поги́бнет̑ н̂и е҆ді́нъ ѿ во́и е҆го·

7

И҆ е҆гда̀ ѹ҆слы́шахꙋ словеса̀ сїа смотрѧхꙋ лица̀ еѧ̀, и҆ б̂ѣ ѻ҆чи́ма их̑ ди́вно. и҆ чюдѧ́хꙋсѧ красотѣ еѧ̀ ѕѣло. и҆ реко́ша к не́и, съхрани́ла е҆си живо́тъ свои сего ради ꙗ҆ко си́цевъ ѻ҆брѣла е҆си совѣтъ, да и҆́деши къ господи́нꙋ на́шемꙋ·

8

И҆ сїѧ вѣждь ꙗ҆ко е҆гда̀ пред̑ста́неши пред̑ ни́мъ бл҃го тебѣ бꙋ́детъ, и҆ бꙋ́деши любезнѣиши въ срд̑цы е҆го·

9

Ведо́ша же еѧ̀ къ станꙋ ѻ҆лоферновꙋ. и҆ е҆гда̀ вни́де пред̑ лице е҆го, а҆́бїе ѹ҆ꙗ҆зви́сѧ ѻ҆лофернъ видѣнїем꙽·

10

Реко́ша же к не́мꙋ ѻ҆́троцы е҆го, кт̂о ѹ҆ничижит̑ лю́ди е҆врѣ́иски и҆же та́ки кра́сны же́ны и҆мѣ́ютъ. да ка́ко не возмо́жемъ ѻ҆полча́тисѧ проти́вꙋ их̑·

11

Ви́дѧщиж̑ і҆ю҆диѳ̑҇ ѻ҆лофе́рна сѣдѧ́щи под̑ завѣсою и҆же бы́сть ѿ перфи́ры и҆ зла́та і҆ и҆зма̑рагда и҆ ка́менїемъ драгимъ сплетена. и възрѣвше въ лице е҆го и҆ поклони́сѧ е҆мꙋ пад̑ши на́ землю. и҆ въздвиго́ша ю҆̀ рабѝ ѻ҆лоферновы по повелѣнїю господи́на свое҆го·