Ostroh BibleКнига Юдити, розділ 14
Шрифт:
Запис:
1
Рече же і҆ю҆ди́ѳъ къ всѣмъ лю́демъ, ѹ҆слы́шите м̂ѧ бра́тїе възвѣ́сите главꙋ̀ сїю на стѣна́хъ на́шихъ. и҆ е҆гда̀ възы́идетъ сл҃нце, возмѣте ко́ждо васъ ѻ҆рꙋжїе свое і҆ и҆зыидѣте внеза́пꙋ. не ꙗ҆́ко сходѧ́ще съ горы̀ н̂о ꙗ҆́ко въчинѧ́щесѧ на них̑.
2
Тогда стра́жїе понꙋжде́ни бꙋдꙋт꙽, да бѣжа́тъ къ нача́лникꙋ свое҆мꙋ возбꙋди́ти е҆го на ѻ҆полъче́нїе. е҆гдаж̑ вое҆во́ды притекꙋтъ къ ло́жницы ѻ҆лофе́рновѣ и҆ ѻ҆брѧ́щꙋтъ е҆го безъгла́вна пови́та во кро́вѣ е҆го, нападет̑ на ни́хъ стра́хъ. е҆гда же позна́ете бѣжащихъ и҆хъ, и҆дѣте же по ни́хъ дер꙽зновенно, ꙗ҆ко г҃ь б҃ъ съкрꙋшит꙽ под̑ но́ги ва́ша·
3
Тога̀ а҆хїѻ́ръ видѣ си́лꙋ ꙗ҆же сътвори г҃ь б҃ъ і҆и҆л҃евъ, ѻ҆ста́вль совѣтъ ꙗ҆зы́ческъ, и҆ вѣрова г҃ꙋ б҃ꙋ, и҆ ѻ҆брѣзасѧ. приложе́н꙽ е҆сть к лю́демъ і҆и҆л҃евымъ, и҆ всѐ наслѣдїе ро́да е҆го, даже до дне́шнѧго дн҃е·
4
А҆бїе же е҆гда възы́иде сл҃нце і҆ и҆звѣ́сиша на стѣна́хъ главꙋ̀ ѻ҆лофе́рновꙋ. и҆ взѧ̀ ко́ждо мꙋжъ ѻ҆рꙋжїе свое, і҆ и҆зыидо́ша со велики́м꙽ звꙋкомъ и҆ во́племъ·
5
Сїе же ви́дѧще стра́жи, притеко́ша къ ло́жницы ѻ҆лофе́рновѣ·
6
І҆ и́же бѣхꙋ въ стане́хъ приходѧ́щи пред̑ вхоже́нїем꙽ ло́жницы перꙋщи нога́ми да възбꙋдѧтъ е҆го, звꙋкъ хотѧще творѧ́хꙋ, да не ѿ тх̑ѣ и҆же възбꙋжд̑а́хꙋ е҆го. но ѿ шꙋмѧ́щихъ възбнет̑ ѻ҆лофернъ ни е҆ді́нъ б̂о смѣѧ́ше ло́жницꙋ нача́лника а҆сѷрїискаго ѿвръсти, и҆л̂и вни́ти·
7
Но е҆гда прїидо́ша вое҆во́ды е҆го, и҆ ты́сѧщники и всѝ большїи старѣишины во́и а҆сѷрїискихъ, реко́ша посте́лникомъ, вни́дѣте и҆ възбꙋди́те е҆го. ꙗ҆́ко и҆зошлѝ мы́ши и҆с пещер̑҇ свои҆хъ дръзнꙋша поѹ҆сти́ти насъ на ѻ҆плъче́нїе·
8
Тогда е҆внꙋхъ вагав̑҇ вни́де въ ло́жницꙋ е҆го ста̀ пред̑ запо́ном̑ и҆ плеска́ше рꙋка́ма. мнѧ́ше б̂о е҆го спѧ́ща съ і҆юди́ѳою. н̂о е҆гда̀ ничтож̑ слы́ша, пристꙋпѝ бли́зъ запо́ны и҆ въздви́глъ ю҆̀. и҆ ви́дѣ трꙋпъ ѻ҆лофе́рновъ безъ главы̀ въ свое́и кро́ви лежа́щь на землѝ. възопѝ гла́сомъ ве́лїимъ съ пла́чемъ, и҆ раздра̀ ѻ҆дѣнїе свое·
9
И҆ вше́дъ въ ста́нъ и҆дѣже бѣ̀ і҆ю҆диѳъ и҆ не ѻ҆брѣтѐ еѧ̀. і҆ и҆збѣже внѣ̀ к лю́демъ и҆ рече, е҆ді́на̑ жена̀ е҆вре́иска сотворѝ срамотꙋ̀ в домꙋ̀ цр҃ѧ навходоносо́ра. се б̂о ѻ҆лофе́рнъ лежи́тъ на землѝ безъгла́венъ·
10
сїе же е҆гда слы́шаша начал̑҇ницы си́лы а҆сѵрїискїѧ, растерза́ша ри́зы своѧ и҆ несно́сенъ стра́хъ и҆ тре́петъ падѐ на ни́хъ, и҆ смѧте́сѧ срд̑це и҆хъ презѣлне·
11
И҆ бы́сть во́пль си́ленъ ѕѣло посредѣ стано́въ и҆хъ·
Джерела
