Ostroh Bible❧Книга Юдити, розділ 13

1

Єгда же бы́сть ве́черъ тща́шасѧ ѻ҆́троцы е҆го въ станы̀ воѧ̀, и҆ заключѝ вага́въ две́ри ло́жница и҆ ѿи́де·

2

Бѧ́хꙋ же вс̂и преможе́ни ѿт̑ вина̀. и҆ю́диѳъ же е҆ді́на б̂ѣ в ло́жницѣ, и҆ ѻ҆лофе́рнъ лежа́ше въ посте́ли ѕѣ́ло пїѧ́нъ и҆ ѹ҆спѐ крѣп́ко·

3

Рече же и҆юди́ѳъ ѻ҆трокови́цы свое́и, да стои҆тъ вн̂ѣ пред̑ ло́жницею и҆ стреже́тъ·

4

И҆ ста и҆ю҆ди́ѳъ пред̑ посте́лею молѧ́щисѧ съ слеза́ми, и҆ дви́жꙋще ѹ҆стна́ми. въ молча́нїи рекꙋщи, ѹ҆крѣпи м̂ѧ г҃и б҃е і҆и҆л҃евъ, и҆ при́зри в сїи ча́съ на дѣ́ло рꙋ́къ моих̑, ꙗ҆́коже ѻ҆бѣща́лъ е҆си і҆ерс̑҇ли́мꙋ гра́дꙋ твое҆мꙋ възвели́чити, да съвершꙋ сїе ꙗ҆́же ѹ҆мы́слихъ, ѹ҆пова́юще възмо́жно бы́ти тобо́ю семꙋ·

5

И҆ е҆гда̀ сїе рече, пристꙋ́пль къ столпꙋ и҆же бы́сть ѹ҆ главы̀ посте́ли е҆го, и҆ ме́чь е҆го и҆же на не́мъ привѧ́занъ висѧ́ше и҆звлечѐ·

6

Є҆гда же и҆звлече ꙗ҆́тъ за власы главы̀ е҆го и҆ рече, ѹ҆крѣпи м̂ѧ г҃и в сїи час̑҇·

7

И҆ ѹ҆да́ри два́жды въ вы́ю е҆го, и҆ ѿсѣче главꙋ̀ е҆го, и҆ взѧ̀ завѣсꙋ ѿ столповъ, и҆ ѻ҆бвѝ трꙋпъ е҆го без꙽ главы̀·

8

И҆ пома́лѣ и҆зы́иде вн̂ѣ, и҆ дадѐ главꙋ̀ ѻ҆лофе́рновꙋ рабы́ни свое́и, и҆ повелѣ̀ вложи́ти ю҆̀ в꙽ пїрꙋ свою̀·

9

І҆ и҆зыидо́ста дво́е по ѻ҆бы́чаю свое҆мꙋ вн̂ѣ по́лка ꙗ҆́ко на мл҃твꙋ, и҆ проидо́ста стра́жи до́ломъ ѻ҆́крс̑҇тъ, и҆ прїидо́ста къ вра́томъ град̑ским̑·

10

И҆ въпїѧ́ше и҆юди́ѳъ и҆здале́ча къ стра́жемъ стѣ́ннымъ гл҃юще, ѿверзи́те вра́та ꙗ҆́ко с на́ми е҆сть г҃ь б҃ъ и҆же сътворѝ си́лꙋ въ і҆и҆л҃и·

11

И҆ бы́сть е҆гда̀ ѹ҆слы́шаша мꙋ́жи глас̑҇ е҆ѧ̀, и҆ възва́ша презви́теръ град̑скихъ·

12

И҆ притеко́ша к не́и ѿ ма́ла да́же и҆ до вели́ка. ꙗ҆́ко не ѹ҆пова́хꙋ ктомꙋ ви́дѣти е҆ѧ̀·

13

И҆ въже́гши свѣти́лники ѻ҆быидо́ша ю҆̀ ѻ҆крс̑҇тъ вс̂и·

14

ѻ҆на же въстꙋпи́вши на вы́ш꙽шее мѣ́сто повелѣ̀ сътвори́ти молча́нїе·

15

Є҆гдаж̑ вс̂и молча́хꙋ рече и҆ю҆ди́ѳъ, хвали́те г҃а б҃а на́шего и҆же не ѻ҆ста́ви ѹ҆пова́ющихъ на́нь, и҆ менѐ рабꙋ̀ свою напол̑҇нилъ млс̑҇ти свое҆ѧ, ю҆же ѻ҆бѣща̀ до́мꙋ і҆и҆л҃евꙋ, и҆ закла́лъ рꙋко́ю мое҆ю вра́га людїи свои҆хъ в сїю но́щь·

16

І҆ и҆зѧ́т꙽ ѿ пи́ры главꙋ ѻ҆лофе́рновꙋ и҆ показа̀ и҆м꙽, рекꙋщи, с̂е глава̀ ѻ҆лофе́рнова нача́лника во́и а҆сѷрїискихъ·

17

И҆ с̂е покрыва́ло е҆го под̑ ни́мже лежа́ше пїѧ́нъ, и҆дѣже порази е҆го рꙋко́ю же́ньскою г҃ь б҃ъ на́шъ·

18

Но жи́въ г҃ь б҃ъ ꙗ҆́ко съхрани м̂ѧ а҆гг҃лъ е҆го, е҆гда̀ та́мо и҆дѧ́хъ и҆ бѣ́хъ та́мо, та́коже е҆гда̀ възврати́хсѧ сѣ́мо. и҆ не попꙋсти м̂ѧ г҃ь б҃ъ рабꙋ̀ свою̀ ѻ҆сквер̑҇ни́ти, и҆ непови́ннꙋ грѣха̀ ѻ҆братѝ м̂ѧ к вамъ, ра́дꙋющꙋсѧ въ ѻ҆долѣнїи е҆го, и҆ въ ѿше́ствїи мое҆мъ, и҆ ѻ҆ и҆збавле́нїѝ ва́шем̑·

19

И҆сповѣда́итесѧ е҆мꙋ вси ꙗ҆́ко бл҃гъ, ꙗ҆́ко в꙽ вѣ́къ млс̑҇ть е҆го·

20

Вси же поклони́шасѧ гв҃и реко́ша к не́и. блс̑҇ви т̂ѧ г҃ь б҃ъ в си́лѣ свое́и и҆же тобо́ю нивъчто́же и҆зведе враги на́ша·

21

ѻ҆сїѧ же нача́лникъ людїи і҆и҆л҃евъ рече к не́и, бл҃жена е҆си т̂ы дщи гм҃ъ бм҃ъ вы́шнимъ паче всх̑ѣ же́нъ на землѝ·

22

Блс̑҇венъ г҃ь б҃ъ и҆же сътворѝ нб҃о и҆ зе́млю, и҆же и҆справи тебѐ въ ѿсѣче́нїе главы̀ нача́лника вра́гъ на́шихъ, і҆ и́же днес̑҇ и҆мѧ твое та́ко възвели́чилъ, да не ѿи҆детъ хвала̀ твоѧ̀ ѿ ѹ҆́стъ члчс̑҇кихъ, да въспомина́ютъ си́лꙋ гн҃ю въ вѣ́ки, и҆же не пощадѣ́ла е҆си живота̀ свое҆го, печа́ли ради и҆ ско́рбїи ро́да твое҆го, н̂о въспомогла̀ е҆си паде́нїю пред̑ лицем̑ г҃а б҃а на́шего·

23

И҆ реко́ша вси лю́дїе бꙋ́ди т̂о бꙋ́ди т̂о·

24

Тогда̀ а҆хїо́ръ возва́нъ прїиде, и҆ рече е҆мꙋ и҆ю҆ди́ѳъ, г҃ь б҃ъ і҆и҆л҃евъ е҆мꙋже т̂ы свѣдѣтельствова́лъ е҆си ꙗ҆́ко ѿм꙽сти́тъ врагом̑ своим̑꙽, се́и е҆сть и҆же ѿсѣклъ главꙋ̀ всѣ́мъ невѣ́рнымъ в сїю но́щь рꙋко́ю мое҆ю. и҆ да позна́еши ꙗ҆́ко тако е҆сть, се глава̀ ѻ҆лофе́рнова, и҆же противле́нїемъ горды́нѧ свое҆ѧ ѹ҆ничижѝ б҃а і҆и҆л҃ева, и҆ тебѣ смр҃тїю претѧ́ше, рекꙋщи, е҆гда̀ плѣне́ни бꙋ́дꙋтъ лю́дїе і҆и҆л҃евы, тогда̀ повелю̀ мече́мъ пробости ребра твоѧ̀. ви́дѧщи же а҆хїѻ́ръ главꙋ̀ ѻ҆лофе́рновꙋ ѹ҆жасе́сѧ страхомъ ве́лїемъ, и҆ паде лице́м꙽ на землѝ и҆ смѧ те́сѧ дш҃а е҆го·

25

Посе́м же е҆гда бы́сть в себѣ, припадѐ к нога́ма і҆ю҆ди́ѳинима поклони́сѧ е́и и҆ рече. блс̑҇вена ты̀ гм҃ъ бм҃ъ твои҆мъ въ все́мъ жили́щи і҆а́ковли, ꙗ҆́ко въ всѣхъ ꙗ҆зы́цехъ и҆же ѹ҆слы́шатъ и҆́мѧ твое. възвели́читсѧ и҆́ми г҃ь б҃ъ і҆и҆л҃евъ тебе ра́ди·