Ostroh BibleКнига Юдити, розділ 2
Шрифт:
Запис:
1
Лѣта, г҃і, навходоносо́ра цр҃ѧ, к҃в дн҃е, мс̑҇ца пр́ьваг̑҇·
2
Бы́сть сло́во въ домꙋ̀ навходоносо́ра цр҃ѧ а҆сѷрїиска да м꙽ститсѧ. и҆ возва̀ всѣхъ старѣишинъ и҆ вое҆водъ и҆збра́нныхъ свои҆хъ. і҆ и҆мѣ с ни́ми та́инꙋ совѣта свое҆го, повѣда помышленїе своѐ в немъ быти. да повинитъ всю̀ землю свое҆мꙋ црс̑҇твꙋ, и҆ речен꙽ное ѹ҆год̑но бы́сть всѣмъ·
3
И҆ възва̀ навходоносоръ цр҃ь ѻ҆лофе́рна нача́лника вое́мъ своим̑, и҆ рече е҆мꙋ·
4
И҆зыиди на всѣ црс̑҇тва запад̑ныѧ, проти́вꙋ сихъ наипаче и҆же ѹ҆ничижи́ша повеленїе мое. да не ѿпꙋ́ститъ ѻ҆́ко твое н̂и е҆ді́номꙋ црс̑҇твꙋ, всѧкъ же град̑ ѹ҆тверженъ покори́шъ мн̂ѣ·
5
Тогда ѻ҆лофе́рнъ возва вое҆во́ды и҆ правители людеи си́лы а҆сѷрїискїѧ. и҆ съчита мꙋжїи хра́брыхъ къ бра́ни ꙗ҆́коже повелѣ е҆мꙋ цр҃ь, ҂р҃, и҆ ҂к҃. пѣшецъ вои҆нникъ, и҆ ко́нникъ стрѣл꙽цовъ, ҂в҃і·
6
И҆ повелѣ пред̑и҆тѝ всемꙋ воиньствꙋ въ мно́жествѣ безъ числа̀ вер꙽блюд̑. и҆ си́мъ ꙗ҆́же довлѣют̑ во́и мно́жества пи́ща воло́въ и҆ ско́товъ, ста́да же ѻ҆́вчаѧ и҆́мже не бѣ̀ числа̀. ѻ҆би́лїе ѿ все́ѧ сѷрїѧ въ прохо́дъ свои ѹ҆гото́вати повелѣ, зла́та б̂о и҆ сребра̀ ѿ до́мꙋ цр҃ева взѧ̀ съ собою мно́го ѕѣ́ло. і҆ и҆зы́де то́и и҆ вс̂е во́иньство съ колесни́цами и҆ конники и҆ съ стрѣлцы, и҆же покры́ша лице земли ꙗ҆́ко прꙋѕи·
7
Є҆гда же преи҆де предѣ́лы а҆сѷрїискїѧ. прїидетъ къ вели́кимъ горамъ а҆́нге, и҆же сꙋть ѻ҆шꙋ́юю киликїѝ. і҆ и҆зыиде въ всѧ̀ гра́ды их̑, и҆ ѻ҆бьѧ̀ вс̂ѧ ѻ҆держа́нїа·
8
Разрꙋши же град̑ мелоѳитъ богат̑ ѕѣло. и҆ плени́ же вс̂и сн҃ове ѳарси́съ. и҆ сн҃ве и҆змаи҆ли и҆же бѧхꙋ проти́вꙋ лица̀ пꙋсты́ни, и҆ къ ю́гꙋ земли хеллонъ. и҆ прешед̑ е҆фра́тъ·
9
И҆ прїиде въ месопота́мїю, и҆ съкрꙋши вс̂и гра́ды вели́цы и҆же бѧ́хꙋ т̂ꙋ ѿ пото́ка ма́мъврїиска, да́же прїиде къ мо́рю. и҆ ѻ҆бьѧ предѣлы и҆хъ ѿ киликїѧ даже до конца ꙗ҆ѳетъ и҆же сꙋть къ ю́гꙋ. и҆зведе же всѣхъ сн҃овъ мадїамль, и҆ плѣнѝ вс̂е бога́тество и҆хъ. всх̑ѣх же противлѧ́ющих̑сѧ е҆мꙋ и҆збѝ мечем̑·
10
И҆ посемъ прїиде на́ поле дама́ска въ дн҃и жа́твы, и҆ пож̑же сѣ́аннаѧ вс̂ѧ. всѣх же древъ и҆ виноград̑ повелѣ посещи. и҆ нападе страхъ е҆го на всѣхъ ѻ҆бита́ющихъ на́ земли·
Джерела
