Ostroh Bible❧Книга Юдити, розділ 3

1

Тогда́ же посла́ша мꙋжїе послы̀ своѧ ѿ всѣхъ гра́довъ и҆ предѣлъ, цр҃їе и҆ кнѧ́ѕи, сѷрїистїи, и҆ месопотамїи и҆ сѷрїи, сова́ла, и҆ ливїѧ, и҆ киликїѧ, и҆же пришед̑ши къ ѻ҆лофе́рнꙋ реко́ша. да преста́нетъ гнѣвъ твои и҆же е҆сть над̑ на́ми. лꙋчше б̂о е҆сть да жи́ви сꙋщи слꙋжимъ навходоносо́рꙋ цр҃ю вели́комꙋ, и҆ под̑рꙋчни бꙋдемъ тебѣ, нежели ѹ́мремъ со и҆мѣнїемъ нашимъ непокори́вшесѧ·

2

Всѧ́къ градъ на́шъ и҆ дръжа́нїе, всѝ го́ры и҆ хлъми и҆ по́лѧ и҆ ста́да̑ воло́въ и҆ ѻ҆ве́ць и козло́въ, ко́нїи же и҆ вельблю́довъ, и҆ вс̂ѧ бога́тъства наша и҆ домоча́дцы пред̑ тобо́ю сꙋть, бꙋдт̑ꙋ всѧ̀ по сꙋдꙋ твое҆мꙋ. та́кож̑ и҆ мы и҆ сн҃ове наши рабѝ твоѝ е҆смы̀. прїиди́ къ намъ господине ми́рне и҆ владѣи работою нашею ꙗ҆́ко годѣ т̂и е҆сть·

3

Тогда̀ сошед̑ше з го́ръ в са́дники в си́лѣ вели́цѣ, и҆ ѻ҆бьѧ́тъ всѧкъ гра́дъ, и҆ всѧ̀ ѻ҆бита́ющаѧ на земли. ѿ всѧ́кого же гра́да взѧ̀ себѣ помо́щниковъ мꙋжїи крѣпких̑ і҆ и҆збра́нныхъ къ бра́ни. толи́ко же стра́хъ велїи на страны̀ сїѧ нападѐ ꙗ҆́ко веѣмъ гра́домъ, ѻ҆бита́ющїи нача́лницы и҆ чс̑҇тни въкꙋпѣ съ гража́ны и҆зыидо́ша въ срѣте́нїе е҆мꙋ на пꙋть. прїемлющи е҆го со вѣнцы̀ и҆ со свѣща́ми. въспѣва́ющи и҆ веселѧ́щесѧ в тим꙽па́нѣхъ и҆ трꙋбах̑. сїѧ б̂о творѧ́щи сверѣпьства срд̑ца е҆го ѹ҆кроти́ти возмого́ша, ꙗ҆́же и҆ гра́ды и҆хъ разорѝ, и҆ лѣсы̀ и҆хъ моли́твеныѧ посѣчѐ, заповѣда б̂о е҆мꙋ навходоносо́ръ цр҃ь. да всѣхъ бого́въ зе́м꙽скихъ и҆стреби́тъ, токмо да то́и са́мъ нарече́тсѧ бо́г꙽. и҆ ѿ тѣхъ роже́нїи и҆же ѻ҆лофе́рновѣ си́лѣ покорѧтсѧ. проходѧ́щи же сѷрїю сова́льскꙋю и҆ вс̂ю а҆п꙽памїю, и҆ месопотамїю. прїиде къ и҆дꙋме́ѻм̑ в зе́млю гаваѻ́тъскꙋ, и҆ пленѝ гра́ды и҆хъ, и҆ пребысть т̂ꙋ тридесѧть дн҃їи в ни́х же собра́ти повелѣ̀ всѝ во́и си́лы свое́ѧ·