Ostroh Bible❧Книга Юдити, розділ 8

1

И бы́сть е҆гда̀ слы́ша сїѧ словеса̀ і҆ю҆ди́ѳъ в꙽дови́ца, и҆же б̂ѣ дщи мера́рина, сн҃а и҆доѯова, сн҃а і҆ѻ́сифлѧ. сн҃а ѻсїина, сн҃а е҆лаи҆на, сн҃а и҆а҆мино́рова, сн҃а гедеѻ́нова, сн҃а раѳаи́мова, сн҃а а҆хи́това, сн҃а мел̑҇хїева сн҃а е҆на́нова, сн҃а венаѳа́нова, сн҃а салаѳїи҆лева, сн҃а симеѻ́нова, сн҃а рꙋви́мова·

2

И҆ мꙋж́ъ е҆ѧ̀ бы́сть манаси́съ, и҆же ѹ҆́мре въ дн҃и жа́твы ꙗ҆чме́нѧ·

3

Настоѧ́ше б̂о над̑ привѧза́ющаѧ рꙋкоѧ́ти в по́ли. и҆ прїиде зно́и на главꙋ̀ е҆го, и҆ ѹ҆́мре въ бетꙋлїи гра́дѣ свое҆мъ, и҆ погребе́нъ быс̑҇ т̂ꙋ съ ѿц҃ы свои҆ми·

4

Бѣ же і҆ю҆ди́ѳъ ѻ҆ста̀ жена̀ е҆го вдови́цею ѹ҆же лѣта тр̂и и҆ мс̑҇ць, ѕ҃. и҆ на вы́ш꙽ше до́мꙋ свое҆го сътвори́ла себѣ та́ино жили́ще, в не́м꙽же съ ѻ҆трокови́цами свои҆ми затворе́на живѧ́ше·

5

І҆ и҆мѣ́ющи на чре́слѣхъ свои҆хъ вре́тище, постѧ́шесѧ вс̂ѧ дн҃и живота̀ свое҆го, кро́мѣ сꙋбо́ты, и҆ новомѣ́сѧчїѧ. и҆ празд̑ник̑҇ до́мꙋ і҆и҆л҃ева·

6

Бѣ же лѣ́па ѻ҆бразом̑ ѕѣ́ло, е́иже мꙋ́жъ свои ѻ҆ста́вилъ бога́тьства мно́га, и҆ домоча́дцы ѹ҆мно́жены, и҆ ѻ҆держа́нїе, воло́въ и҆ ѻ҆вецъ и҆ ста́дъ мно́гихъ по́лна·

7

И҆ б̂ѣ сїѧ въ все́мъ сла́вна, ꙗ҆́ко боѧ́шесѧ г҃а б҃а ѕѣ́ло. не бѣ и҆же кт̂о г҃лет̑ ѻ҆ не́и сло́во ѕл̂о·

8

Сїѧ б̂о е҆гда̀ слы́ша ꙗ҆́ко ѻ҆сїа сщ҃енникъ ѻ҆бѣща̀ по пѧти дн҃ехъ преда́ти гра́дъ, и҆ посла̀ къ презви́теромъ хабри и҆ харми. и҆ прїидо́ша къ не́и, и҆ рече и҆мъ, чт̂о е҆сть с̂е и҆же и҆зво́ли и҆ѻ҆сїѧ, да предас̑҇ град̑ а҆сирїѻ҆мъ, а҆ще ли межд̑ꙋ пѧти дн҃їи не прїидетъ вамъ по́мощь. и҆ кто е҆сте в̂ы и҆же и҆скꙋша́ете г҃а б҃а. и҆ нѣ́сть сїе сло́во и҆же млс̑҇ть призовет̑, н̂о на́ипаче ꙗ҆́рость въз꙽бꙋ́дитъ, и҆ гнѣ́въ вож꙽же́т꙽·

9

Положи́сте в̂ы вре́мѧ млс̑҇ти гн҃ѧ, и к воли ва́шеи дн҃ь поста́вили е҆сте е҆мꙋ·

10

Но̂ ꙗ҆́же тръпе́ливъ е҆сть г҃ь, сего ради пока́емсѧ того. и҆ ѿпꙋще́нїѧ е҆го и҆злїѧ́нїемъ сле́знымъ и҆спро́симъ. не м꙽сти́тъ г҃ь б҃ъ та́ко ꙗ҆́ко чл҃къ, ни гнѣ́ваетсѧ ꙗ҆́ко сн҃ъ чл҃чь·

11

И҆ сего ра́ди смири́мъ е҆мꙋ̀ дш҃и на́ши, и҆ дх҃омъ съкрꙋше́ннымъ и҆ смире́ннымъ слꙋжа́ще е҆мꙋ, речем̑ же съ пла́чемъ г҃ꙋ б҃ꙋ, да по во́ли свое́и сътво́ритъ с на́ми млс̑҇ть свою̀. да ꙗ҆́ко съскорбле́но е҆сть срд̑це на́ше въ го́рдости и҆хъ, та́коже да на́шим̑ смире́нїемъ ѹ҆тѣшимсѧ. ꙗ҆́ко нѣсмы послѣдовали грѣхꙋ ѿц҃ъ на́ших̑, и҆же ѻ҆ста́виша б҃а свое҆го, и҆ поклони́шасѧ богом̑ чю́ждимъ·

12

Є҆гоже ра́ди грѣха да́ни сꙋть въ погꙋбле́нїе меча̀ и҆ въ расхище́нїе, и҆ въ стыдѣ́нїе врагомъ свои҆мъ·

13

Мы́ же и҆́ного б҃а не вѣмы кромѣ е҆го, по́ждемъ смире́нне ѹ҆тѣшенїѧ е҆го, и҆ възы́щет̑ кровь нашꙋ ѿ ꙗ҆звле́нїа вра́гъ на́шихъ. и҆ сми́ритъ вс̂и ꙗ҆зы́цы, е҆ли́цы въста́ютъ на́ ны. и҆ сътвори́тъ и҆хъ безъ чести г҃ь б҃ъ на́шъ·

14

И҆ нн҃ѣ бра́тїѧ в̂ы и҆же е҆сте презви́тери въ лю́дехъ бж҃їихъ, на вас̑҇ възы́щт̑ꙋсѧ дш҃а и҆хъ·

15

Сего ради ва́шими прещенїи въздви́гнете срд̑ца и҆хъ, да въспомина́ютъ на и҆скꙋше́нїе ѿц҃ъ на́шихъ. и҆скꙋше́ни сꙋще и҆спра́вѧт̑ слꙋженїе г҃ꙋ б҃ꙋ свое҆мꙋ. воспомина́юще памѧт̑ни быти на сїе ка́ко ѿц҃ъ наш̑҇ а҆враа́мъ и҆скꙋшенъ е҆сть·

16

И҆ по мно́ѕх̑ѣ скꙋшенїихъ дрꙋгъ бж҃їи нареч̑҇сѧ.

17

Та́коже і҆саа́къ, і҆ и҆а́ковъ, и҆ моѷсїи и҆ вс̂и любѧ́щїи г҃а б҃а по мно́ѕѣхъ и҆скꙋшенїихъ и҆зыидо́ша ѿ ми́ра въ вѣрѣ·

18

Тїи же и҆же и҆скꙋшенїѧ не прїѧ́ша, съ стра́хомъ гн҃имъ, и҆ нетръпѣнїи свое҆мъ, в поношенїе роп꙽танїе свое приноси́ли пред̑ гм҃ъ и҆стреблени сꙋть ѿ гꙋби́телѧ и҆ ѿ змїи погибо́ша·

19

Сего ради и҆ м̂ы не м꙽стим̑сѧ сихъ ра́ди ве́щеи и҆хже тръпим̑. н̂о мнѧ́щи за грѣхи наши сїѧ стра́жд̑емъ и҆ боим̑сѧ страда́нїа малѣ́иша сꙋть ꙗ҆́звы бж҃їѧ. и҆же прїидо́ша раби е҆го къ на́шемꙋ и҆справле́нїю, а҆ не погꙋбленїю. и҆ рече и҆ѻ҆сїѧ и҆ презви́тери, вс̂ѧ и҆же гл҃ала е҆си и҆́стинна сꙋть. и҆ нѣсть въ словесѣхъ твоих̑ н̂и е҆ді́но хꙋленїе·

20

Нн҃ѣ б̂о моли за насъ, ꙗ҆́ко жена̀ ст҃а е҆си, и҆ бл҃гочестива. и҆ рече и҆мъ і҆ю҆ди́ѳъ, вѣсте б̂о ꙗ҆́ко ѿ б҃а сꙋть ꙗ҆́же рекох̑·

21

Та́коже і҆ и҆скꙋси́те, ѿ́ бг҃а л̂и сꙋть сїѧ, ꙗ҆́же помы́слихъ сътвори́ти·

22

И҆ моли́тесѧ да крѣпокъ сътвори́тъ г҃ь б҃ъ совѣтъ мо́и·

23

Ста́ните в̂ы ѹ҆ забра́ла но́щи сеѧ, и҆ а́зъ и҆зыдꙋ съ а́брою мое́ю. и҆ моли́тесѧ, да ꙗ҆́ко рекли е҆сте, въ дн҃и пѧть да посѣтит̑ г҃ь лю́ди своа і҆и҆л҃ѧ·

24

Вы́ же не хо́щꙋ да пои҆́щете дѣа́нїе мое. и҆ доколѣ не ѿвѣща́ю ва́мъ ничт̂о и҆́но, сътвори́те то́кмо мл҃твꙋ за́ мѧ къ г҃ꙋ б҃ꙋ на́шемꙋ·

25

И҆ рече к не́и ѻ҆сїѧ нача́лник̑҇ і҆ѹ҆де́и. и҆дѝ въ ми́ре, и҆ г҃ь бꙋдетъ с тобо́ю, въ ѿмщенїе вра́гомъ на́шимъ, и҆ ѻ҆браща́ющисѧ ѿи҆до́ша ѿ не́ѧ·