Ostroh BibleКнига пророка Єремії, розділ 14
Шрифт:
Запис:
1
И бы́сть сло́во гн҃е къ і҆е҆ремїи ѿ слове́съ сꙋхо́тныхъ·
2
стена́ла і҆ѹ҆деѧ и҆ врата е҆ѧ̀ разрꙋши́шасѧ, и҆ ѻ҆темни́шасѧ на землѝ, и҆ во́пль і҆е҆рс̑҇лима взы́иде·
3
Бо́лшїи посла́ша ме́ншихъ свои҆хъ к во́дѣ. прїидо́ша к черпа́нїю и҆ не ѻ҆брѣто́ша воды̀. и҆ ѿнесоша па́ки съсꙋды своѧ̀ то́щны·
4
Посты́дни сꙋть и҆ ѻ҆злобле́ни, и҆ покры́ша главы̀ своѧ̀ ради па́кости землѝ, и҆же не прїидет̑ до́жд̑ь на́ землю. постыже́ни сꙋть нивнїи дѣ́латели, покры́ша главы̀ своѧ̀. и҆же и҆ е҆ле́ница в ни́вѣ роди́сѧ и҆ ѻ҆ста́вила, и҆же не бѣ трава̀. и҆ ѻ҆на́гри ста́ша на скалах̑, бра́ша вѣтръ ꙗ҆́ко ѕмїеве. ѻ҆скꙋдѣша ѻ҆́чи и҆хъ и҆же не бѣ̀ трава̀. а҆ще безако́нїѧ на́ша ѿвѣща́ютъ нам̑. г҃и сътвори ради и҆мени твое҆го, ꙗ҆́ко мно́га сꙋть ѿвраще́нїѧ на́ша, тебѣ съгрѣши́хом꙽. пожда́нїе і҆и҆л҃ево. сп҃си́телю нашъ въ вре́мѧ ско́рби, въскꙋ́ю ꙗ҆́ко пришле́цъ е҆си на землѝ, и҆ ꙗ҆́ко пꙋтникъ ѹ҆кланѧ́ющсѧ на жи́тїе·
5
Въскꙋ́ю бы́лъ ꙗ҆́ко мꙋж́ъ прошле́цъ е҆си, и҆ крѣ́пкыи и҆же не мо́жетъ спс̑҇ти·
6
Ты же в нас̑҇ е҆си г҃и, і҆ и҆мѧ твое възва́но е҆сть на нас̑҇, не ѻ҆ста́ви нас̑҇·
7
Сїѧ рече г҃ь лю́демъ сим̑, и҆же възлюби, под̑виза́ти но́ѕѣ свои и҆ не покои́шас̑҇, и҆ г҃ꙋ не ѹ҆годи́ша. нн҃ѣ въспомѧне́тъ безако́нїѧ и҆хъ и҆ посѣтѧ́тъ грѣхѝ и҆хъ·
8
И҆ рече г҃ь къ мнѣ̀, не хощи молитисѧ за лю́ди с̂и въ бл҃го. е҆гда постѧ́тсѧ не ѹ҆слы́шꙋ проше́нїѧ и҆хъ. и҆ а́ще принесꙋт꙽ вс̂есъж꙽же́нїа и҆ жертвꙋ, не въспрїимꙋ и҆хъ. ꙗ҆́ко мечем̑ и҆ гла́домъ и҆ мо́ром̑ а҆́зъ и҆стлю̀ и҆хъ·
9
И҆ реко́хъ, ѽ г҃и б҃е прро̑҇цы рекꙋтъ и҆мъ, не ѹ҆зрите меча и҆ гла́дъ не бꙋ́детъ вамъ, н̂о ми́ръ и҆́стинныи да́сть вамъ на мѣстѣ семъ·
10
И҆ рече г҃ь къ мнѣ̀, л꙽жи́во прро̑҇цы прорица́ютъ въ и҆мѧ мое, не посла́хъ и҆хъ, ни заповѣ́дахъ и҆мъ, ни гл҃алъ е҆смь к ним̑. видѣ́нїѧ л꙽жи́ва и҆ ѹ҆гада́нїе л꙽сти́во, и҆ прел꙽ще́нїемъ срд̑ца свое҆го прорица́ютъ вамъ·
11
Сего ради сїа рече г҃ь ѻ҆ прро̑҇цѣхъ, и҆же прро̑҇чествꙋ́ютъ въ и҆мѧ мое, их̑же а҆зъ не посла́хъ. рекꙋще, мечъ и҆ гла́дъ не бꙋ́детъ на землѝ се́и. в ме́чъ и҆ глад̑ и҆стлѧт̑т̑сѧ прро̑҇цы тїи. и҆ лю́дем̑ и҆мже прро̑҇чествꙋ́ютъ бꙋ́дꙋтъ и҆звержени на пꙋте́хъ і҆ерс̑҇лима, ради гла́да и҆ ме́ча. и҆ не бꙋ́детъ и҆же погреб꙽сти и҆хъ. тїи и҆ же́ны и҆хъ, сн҃ове и҆ дще́ри и҆хъ, і҆ и҆злѣ́ю на нихъ ѕла́ѧ и҆хъ. и҆ рече́ши к ни́мъ сло́во сїе, и҆зведꙋтъ ѻ҆́чи мои сле́зы по но́щ꙽ и҆ дн҃ь, и҆ не ѹ҆мо́лкнꙋтъ, ꙗ҆́ко сътре́нїемъ вели́ким̑ сътре́на дв҃а дще́рь людїи мои҆хъ, ꙗ҆́звою ѕло́ю ѕѣ́ло. а҆ще и҆сходѧ́щъ бꙋдꙋ на ни́вы, с̂е закла́ни мече́мъ. и҆ а́ще вни́дꙋ въ́ градъ, с̂е просте́рты гла́домъ·
12
Прро̑҇къ же и҆ сщ҃енникъ ѿи҆до́ша в зе́млю, е҆ѧ́же не вѣдѧ́хꙋ. Є҆да ли ѿме́щꙋщи ѿве́рглъ е҆си і҆ѹдꙋ, и҆ли сїѻ́нъ в ме́рзость и҆мѣ дш҃а твоа. въскꙋ́ю б̂о поразил̑҇ е҆си нас̑҇, та́ко да ни е҆ді́но бꙋдетъ и҆сцѣле́нїе·
13
Пожда́хом̑ мѷра, и҆ нѣсть бл҃го, и҆ вре́мѧ и҆сцѣле́нїѧ, и҆ се смꙋще́нїе·
14
Позна́хомъ г҃и нече́стїе на́ше безаконїѧ ѿц҃ъ наших̑ ꙗ҆́ко съгрѣши́хомъ к тебѣ̀, не да́и нас̑҇ в꙽ поноше́нїе ради и҆мени твое҆го, ни сътвори намъ доса́ды. на престо́лъ сла́вы твое҆ѧ въспомѧни, и҆ не разори завѣтъ твои с на́ми. е҆да̀ сꙋть въ зваѧ́ныхъ ꙗ҆зы́ческихъ и҆же дож꙽дѧт̑, и҆ли нб҃са могт̑ꙋ да́ти ро́сꙋ, а҆ще не т̂ы воли́ши. е҆да ли не ты е҆си г҃и б҃ъ нашъ е҆гоже жда́хомъ, ты б̂о сътвори́лъ е҆си всѧ сїѧ·
Джерела
