Ostroh Bible❧Книга пророка Єремії, розділ 26

1

В нача́токъ сн҃а і҆ѻ҆сїина цр҃ѧ і҆ѻ҆а҆кима. бы́сть сло́во с̂е ѿ г҃а·

2

Та́ко рече г҃ь ста́ни въ дворѣ домꙋ гн҃ѧ. и҆ проповѣси всемꙋ і҆ѹ́дѣ в꙽ходѧ́щимъ кла́нѧтисѧ в до́мъ гн҃ь всѧ̀ словеса̀ ꙗ҆́же съчиних̑ тебѣ проповѣда́ти и҆мъ, не ѹ҆ими словесѐ. негли послꙋшавше ѻ҆братѧ́тсѧ ко́ждо ѿ пꙋтѝ свое҆го зла́го. и҆ почїю ѿ ѕло́бы е҆же мы́шлю сътвори́ти им̑ ѕлых̑ ради хꙋдо́жествъ и҆хъ. и҆ рече́ши, та́ко рече г҃ь. а҆ще не послꙋшае҆те мене, ꙗ҆коже ходи́ти в꙽ зако́ны моѧ. ꙗ҆́же дахъ пред̑ лицемъ ва́шим꙽ в꙽ послꙋшанїе словесъ ѻ́трокъ мои҆хъ про̑҇ркъ. ꙗ҆́же а́зъ посылаю к вам̑ и҆зъ ѹ́тра, и҆ посла́хъ и҆ не послꙋшасте мене. и҆ дамъ домъ сїи ꙗ҆́ко и҆ силꙋа҆ма. и҆ гра́дъ сеи дамъ въ клѧ́твꙋ всѣмъ страна́мъ всеѧ землѧ·

3

И҆ слы́шаша жръцы и҆ лжѝ прро̑҇цы, и҆ всѝ лю́дїе, і҆еремїю гл҃юща в домꙋ̀ гн҃и.

4

И҆ бысть і҆еремїи премлъкнꙋвшꙋ, все е҆ли́ко съчини е҆мꙋ г҃ь гл҃ати всѣм꙽ лю́демъ. и҆ ѧ́ша і҆ермїю жръцы̀ и҆ лжи прро̑҇ци, и҆ вси лю́дїе гл҃юще, см҃ртїю да ѹ́мрет꙽. ꙗ҆́ко прорече и́менемъ гн҃имъ гл҃ѧ, ꙗ҆́ко и҆ силꙋа́мъ бꙋдетъ сеи до́мъ, и҆ гра́дъ се́и ѻ҆пꙋстѣетъ ѿ живꙋщих̑. и҆ събра́шасѧ всѝ лю́дїе на і҆еремїю въ домꙋ гн҃и.

5

И҆ послꙋшаша кнѧ́ѕи і҆ѹ́дины словес̑҇ сихъ, и҆ в꙽зыдоша ѿ домꙋ цр҃ва в дом̑ гн҃ь, и҆ сѣдоша въ пред̑дверїи вратъ домꙋ гн҃ѧ. и҆ рѣша жерьцы и҆ л꙽꙽жѝ про̑҇рцы кн҃ѕем̑ и҆ всм̑ѣ людем̑ гл҃ще. сꙋд꙽ смр҃тныи чл҃кꙋ семꙋ, ꙗ҆́ко прорече на сеи град̑, ꙗ҆́коже слы́шасте въ ѹ́ши ва́ши·

6

И҆ рече і҆еремїѧ къ кнѧѕемъ и҆ всѣмъ лю́демъ гл҃ѧ. г҃ь посла м̂ѧ прорещи на до́мъ сеи, и҆ на град̑ сеи всѧ̀ словеса̀ ꙗ҆же слы́шасте. и҆ нн҃ѣ ѹ́ньша сътвори́те пꙋтѝ ва́ша, и дѣлеса̀ ва́ша, и҆ послꙋшаите гл҃а г҃а б҃а ва́шего. и҆ ѻ҆ста́витсѧ г҃ь ѿ ѕлоб̑҇ ю҆же гл҃а на вы·

7

и҆ се а́зъ в рꙋкꙋ ва́шею, сътвори́те ми ꙗ҆́коже сѧ строит̑ ꙗ҆́коже ѹ҆не вамъ ꙗ҆́влѧ́етсѧ. н̂о разꙋмѣ́юще да разꙋмѣ́ете, ꙗ҆́ко а҆ще ѹ҆бїете м̂ѧ в̂ы, кро́вь непови́ннꙋ дае҆те сами на́ сѧ, и҆ на гра́дъ се́и, и҆ на живꙋщаѧ в немъ. ꙗ҆́ко по и́стин̑҇нѣ посла мѧ г҃ь гл҃ати к꙽ ва́мъ, въ ѹ́ши ва́ши всѧ̀ словеса̀ с̂и. и҆ рѣша кнѧѕи и҆ вси людїе къ жръцемъ, и҆ къ всѣмъ лжи́мъ про̑҇ркомъ. нѣсть чл҃кꙋ семꙋ сꙋдъ смр҃тныи, ꙗ҆́ко во и҆мѧ г҃а нашего гл҃а к꙽ намъ·

8

И҆ въста́ша мꙋжи ѿ ста́рецъ зе́мныхъ, и҆ рѣша всемꙋ събо́рꙋ люд̑скомꙋ гл҃ще. михе́ѧ мораѳи́тъскїи, б̂ѣ въ дн҃и і҆езекїѧ цр҃ѧ і҆ѹ́дина, и҆ рече всѣмъ лю́демъ і҆ѹ́диномъ гл҃ѧ·

9

Та́ко реч̑҇ г҃ь. сїѻ́нъ ꙗ҆́ко ни́ва разоре́тсѧ, и і҆е҆рс̑҇лимъ ꙗ҆́ко кꙋща пꙋдъска бꙋдет̑, и҆ гора ды́мнаѧ бꙋдетъ в лꙋгъ дꙋбрав꙽скь. е҆да ѹ҆бива́а ѹ҆би и҆̀ е҆зекїа цр҃ь і҆ѹ́динъ, и҆ всѝ лю́дїе і҆ѹ́дины. не ѹ҆боѧ́ша ли сѧ ѹ҆бо г҃а, и҆ ꙗ҆́ко моли́шасѧ лицꙋ гн҃ю. и҆ ѻ҆ста́висѧ г҃ь ѿ ѕло́бы ꙗ҆́же гл҃алъ б̂ѣ на́ нѧ. и҆ мы̀ сътвори́хомъ ѕло́бы велики на дш҃а наша. и҆ бѣ чл҃къ прорица́ѧ и́менем̑ гн҃имъ, ѹ́рїѧ сн҃ъ саме́ѻвъ ѿ кариа҆ѳїари́ма. и҆ прорече ѻ҆ землѝ се́и, по всѣмъ словесе́мъ і҆еремїиномъ.

10

И҆ слы́ша цр҃ь і҆ѻа҆кимъ, и҆ вси кн҃ѕи всѧ словеса̀, і҆ и҆скахꙋ да и҆̀ ѹ҆бїют꙽. и҆ слы́ша ѹ́ріѧ и҆ ѹ҆боѧсѧ и҆ бѣжа̀, и҆ прїиде въ е҆гѷпет̑. и҆ посла̀ цр҃ь мꙋжа въ е҆гѷпет̑, і҆ и҆зведоша и҆̀ ѿтꙋдꙋ и҆ приведоша къ цр҃ю, и҆ порази и҆̀ мечем̑ и҆ въврьже и҆̀ въ гробъ сн҃овъ людїи е҆го.

11

Развѣ рꙋка хикама сн҃а сафанїина бѣ съ і҆еремїею, ꙗ҆́ко не преда́ти е҆го в рꙋцѣ людїи е҆го, да не ѹ҆бїют̑ е҆го·