Ostroh Bible❧Книга пророка Єремії, розділ 27

1

В начат꙽ке црс̑҇тва і҆ѻ҆а҆ки́ма сн҃а і҆ѻ҆сїина цр҃ѧ і҆ѹ́дина.

2

Бы́сть сло́во сїе къ і҆еремїи ѿ г҃а гл҃ѧ·

3

Та́ко рече г҃ь, сътворѝ себѣ ѹ́зы и҆ кла́ды и҆ възложѝ на вы́ю свою, и҆ да послеши ѧ҆̀ къ цр҃ю и҆дꙋме́искꙋ, и҆ къ цр҃ю моа́в꙽скомꙋ, и҆ къ цр҃ю сн҃овъ а҆м꙽мо́нь. и҆ къ цр҃ю тѷрьскꙋ, и҆ къ цр҃ю сидо́ньскꙋ, в рꙋкꙋ посло́мъ и҆хъ, и҆дꙋщим̑ въ і҆ерс̑҇лимъ въ срѣте́нїе е҆мꙋ къ седекїи цр҃ю і҆ѹ́динꙋ. и҆ съчини и҆мъ къ господемъ и҆хъ рещи·

4

Та́ко рече г҃ь б҃ъ і҆и҆л҃евъ, тако р꙽ците къ господем̑ свои҆мъ. а҆́зъ сътвори́хъ зе́млю и҆ чл҃ка, и҆ скотъ е҆же на лицы землѝ, крѣпостїю своею вели́кою, и҆ мы́шцею своею высо́кою. и҆ дамъ ю҆̀ е҆мꙋже бꙋдетъ м̂и лю́бо пред̑ ѻ҆чи́ма мои́ма. тѣмже и҆ нн҃ѣ а҆зъ да́хъ всю̀ землю сїю в рꙋ́цѣ навходоносо́рꙋ цр҃ю вавѷлон̑҇скꙋ, да е҆мꙋ рабо́таютъ. ктомꙋ̀ и҆ звѣрь пол꙽скїи да́хъ дѣлати е҆мꙋ. и҆ послꙋжатъ е҆мꙋ всѝ ꙗ҆зы́цы, и҆ сн҃ꙋ е҆го, и҆ сн҃ꙋ сн҃а е҆го. до́ндеже не пришелъ часъ землѝ е҆го и҆ е҆го самого ҆҇. и҆ послꙋжатъ е҆мꙋ мно́ѕи народи и҆ цр҃и вели́цы. страна же и҆ црс̑҇тво и҆же а҆ще не в꙽дежꙋтъ вы́ѧ своеѧ въ ѧрем̑ цр҃ѧ вавѵло́ньска, мечемъ и҆ гла́домъ посѣщꙋ и҆хъ, рече г҃ь. дондеже скон꙽ча́ютсѧ в рꙋцѣ е҆го·

5

Вы́ же не послꙋшаите про̑҇ркъ свои҆хъ, и҆ влъхвꙋю҆щихъ вамъ, и҆ видѧщихъ сонїѧ ва́мъ. ни чарова́нїи вашихъ, ни врачевъ ва́шихъ гл҃ющихъ вамъ. не послꙋжите цр҃ю вавѷлонскꙋ, ꙗ҆ко лжꙋ прорица́ютъ тїи вамъ. ꙗ҆́коже ѹ҆дали́тисѧ вамъ ѿ землѧ вашеѧ и҆звер꙽гли васъ е҆же поги́бнꙋти вам̑·

6

страна же ꙗ҆́же въклонитъ вы́ю свою въ ꙗ҆ремъ цр҃ѧ вавѷлон꙽ска, и҆ послꙋжитъ е҆мꙋ. ѻ҆ста́влю ю҆̀ на землѝ е҆го, гл҃етъ г҃ь. и҆ ѻ҆ра́ти бꙋдетъ ю҆̀ и҆ всели́тсѧ на неи. и҆ къ седекїи цр҃ю і҆ѹ́динꙋ гл҃ахъ по всѣмъ словесе́мъ си́мъ гл҃ѧ. въклони́те вы́ѧ ва́ша под̑ и́го цр҃ѧ вавѷлоньска, и҆ слꙋжи́те е҆мꙋ и҆ людемъ е҆го, и҆ жи́ви бꙋдете. почто ѹ҆мира́ете, т̂ы и҆ лю́дїе твоѝ мечемъ, и҆ гладомъ, и҆ мо́ромъ. ꙗ҆́коже рече г҃ь къ страна́мъ, не хотѧ́щимъ слꙋжи́ти цр҃ю вавѷло́н꙽скꙋ. не послꙋшаите словъ прро̑҇ковъ гл҃щих̑ вамъ, не послꙋжи́те цр҃ю вавѷлонъскꙋ, ꙗ҆́ко непра́ведно тїи прори́чют̑ вамъ·

7

ꙗ҆ко не посла́хъ и҆хъ рече г҃ь. тїи же прорица́ютъ и́мѧ мое ѻ҆ непра́вдѣ, ꙗ҆́коже погꙋбити в̂ы. и҆ поги́бнете в̂ы, и҆ про̑҇рцы ваши прорица́ю҆щеи вамъ ѻ҆ неправдѣ л꙽жею. ва́мъ и҆ всѣмъ лю́демъ симъ, и҆ жръцемъ гл҃ахъ рекїи. та́ко рече г҃ь, не послꙋшаите словесъ прро̑҇ческъ, прорица́ю҆щихъ ва́мъ, и҆ гл҃ющихъ. сѐ сосꙋди до́мꙋ гн҃ѧ ѻ҆браща́ютсѧ ѿ вавѷлона па́ки нн҃ѣ въско́рѣ. ꙗ҆́ко ло̑ пророкꙋ́ютъ вамъ, сего ради не послꙋшаите и҆хъ. н̂о слꙋжи́те цр҃ю вавѷлонъскꙋ да жи́ви бꙋдете. въскꙋю под̑дава́ете мѣсто сїе въ пꙋсты́ню. а҆ще сꙋть про̑҇рцы, и҆ е́сть сло́во гн҃е в нихъ, да преста́нꙋтъ г҃ꙋ вс̂едръжи́телю, да не прїидꙋтъ сосꙋди ѻ҆ста́вшаѧсѧ в домꙋ гн҃и, и҆ в домꙋ̀ цр҃ѧ і҆ѹ́дина, и҆ въ і҆ерс̑҇лимѣ, до вавѷло́на·

8

Та́ко б̂о гл҃етъ г҃ь вседръжитель къ столпомъ и҆ ко ѹ҆мыва́лницы и҆ къ под̑ставкомъ, и҆ къ про́чимъ сосꙋдомъ ѻ҆ста́вшим̑сѧ в꙽ мѣсте сем̑, и҆хже не взѧ̀ навходоносо́ръ цр҃ь вавѷлонъскїи. е҆гда преселѝ і҆ехонїю сн҃а і҆ѻ҆а҆кѷмова цр҃ѧ і҆ѹ́дина и҆зъ і҆ерс̑҇лі́ма̑ въ вавѷлонъ, и҆ всѝ старѣ́ишины і҆ѹ́дины і҆ и҆ерс̑҇лимлѧ·

9

Та́ко б̂о гл҃етъ г҃ь вседръжитель б҃ъ і҆ил҃ев꙽, къ сосꙋдом̑ ѻ҆ста́вшим̑сѧ в꙽ домꙋ̀ гн҃и, и҆ въ домꙋ̀ і҆ѹ́динѣ и҆ въ і҆ерс̑҇лѣмѣ. въ вавѷлонъ пренесꙋтсѧ, и҆ та́мо бꙋдꙋтъ да́же до дн҃е посѣще́нїѧ свое҆го гл҃етъ г҃ь. и҆ повелю̀ принестѝ ѧ҆̀, и҆ въз꙽врати́ти въ градъ се́и