Ostroh Bible❧Книга пророка Єремії, розділ 39

1

И бы́сть въ девѧ́тое лѣто седекїѧ цр҃ѧ і҆ѹ́дина, въ мс̑҇ць і҃. прїиде нав꙽ходоносо́ръ цр҃ь вавѷлон꙽скъ, и҆ всѧ̀ си́ла его на і҆ерс̑҇лимъ, и҆ вое҆вахꙋ на́нь. и҆ въ пер꙽военадесѧте лѣто седекїѧ, въ мс̑҇ць четвер꙽тыи пѧтыи дн҃ь мс̑҇ца расы́пасѧ градъ. и҆ в꙽нидо́ша всѝ кн҃ѕи цр҃ѧ вавѵлон̑҇ска, и҆ сидѣша въ вра́техъ среднихъ. ни́ргелъ, сараса́ръ, самага́дъ, и҆ навꙋхаса́ръ, и҆ навꙋсари́съ, и҆ нагар̑҇га́съ, и҆ насеръ, равама́гъ, и҆ про́чаѧ вое҆во́ды цр҃ѧ вавѵлонъска·

2

И҆ е҆гда ѧ҆̀ ѹ҆зрѣ седекїѧ цр҃ь і҆ѹ́динъ, и҆ всѣ мꙋжи рат꙽нїи и҆збѣгоша. і҆ и҆зыидо́ша в нощи ѿ града по пꙋтѝ загра́ды цр҃евы, и҆ скво́зѣ вра́та е҆же бѣ междꙋ двою стѣнъ, і и҆зыидо́ша в꙽ пꙋть пꙋсты́ни. и҆ гна́ша ѧ҆̀ во́инъство хал꙽дѣиско, и҆ постиго́ша̑ седекїю на́ поли пꙋсты́ни е҆рихо́нъ, и҆ е҆м꙽ше приведо́ша к꙽ навходоносо́рови цр҃ю вавѵло́нъскꙋ до ревлата. е҆же е҆сть в꙽ землѝ е҆ма́ѳъ, и҆ рече к немꙋ сꙋды. и҆ поби́лъ цр҃ь вавѷлонъскїи сн҃ы седекїины в ревла́тѣ пред̑ ѻ҆чи́ма е҆го. и҆ всѧ вельмо́жа і҆ѹ́дины побѝ цр҃ь вавѷлонъскїи. ѻ́чи же седекїи изѧ́тъ, и҆ ѻ҆кова̀ е҆го пꙋты, и҆тѝ въ вавѷлонъ. дом꙽ же цр҃евъ, и҆ домы̀ всѣхъ людїи пож꙽гоша халде́и ѻ҆гнем̑ и҆ стѣнꙋ і҆ерс̑҇лимъскꙋ преврати́ша·

3

и҆ ѻ҆ста́нокъ людїи ѻ҆ста́вшихъ въ градѣ, и҆ ѹ҆бѣг꙽шаѧ и҆же ѹ҆теко́ша к немꙋ, і҆ и҆збы́токъ людїи ѻ҆ста́вших꙽, пресели навꙋзарда́нъ вое҆во́да̑ во́инъ до вавѷлона, и҆ ѿ людїи ѹ҆богихъ ничто́же не и҆мꙋщихъ, не плѣнѝ навꙋзарда́нъ вое҆во́да во́инъ в꙽ землѝ і҆ѹ́динѣ. и҆ даде и҆мъ виногра́ды и҆ рве́ники в то́и дн҃ь·

4

И҆ заповеда̀ нав꙽ходоносо́ръ цр҃ь вавѷлонъскїи ѻ҆ і҆еремїи про̑҇рцѣ, навꙋзарда́нови вое҆во́дѣ во́и, и҆ рече. возмѝ е҆го и҆ положѝ нань ѻ́чи твоа, и҆ ничто́же е҆мꙋ не сътворѝ ѕл̂а, н̂о ꙗ҆́коже въсхо́щет̑ та́ко сътвори е҆мꙋ. сего ра́ди посла̀ навꙋзарда́нъ вое҆во́да во́инъства, а҆на́вꙋ, и҆ сес꙽вана, и҆ рав꙽саке́са, и҆ нир̑҇ге́ла, и҆ насера, и҆ равама́га, и҆ про́чаѧ вое҆во́ды цр҃ѧ вавѷлонъска. и҆ посла́ша, и҆ поѧша і҆еремїю ѿ двора̀ темни́чнаго. и҆ да́ша и҆̀ къ годолїи сн҃ꙋ а҆хика́мовꙋ сн҃а сафа́нѧ, і и҆зведо́ша и҆̀ и҆ сѣде средѣ людїи·

5

И҆ къ і҆еремїи быс̑҇ слово гн҃е, въ дворѣ темни́чнемъ гл҃ѧ, и҆дѝ и҆ рцы къ а҆в꙽демеле́хꙋ мꙋринꙋ, гл҃ѧ. та́ко рече г҃ь б҃ъ іи҆л҃евъ. сѐ а҆зъ приношꙋ словеса̀ моа на градъ сеи, на ѕло̀ а҆ не на бл҃го. и҆ бꙋдꙋ пред̑ лицемъ твои҆мъ в꙽ тои дн҃ь і и҆зба́влю т̂ѧ в꙽ тои дн҃ь. и҆ не дамъ тебе в рꙋцѣ чл҃къ, их̑же т̂ы бои́шисѧ ѿ лица̀ и҆хъ. ꙗ҆́ко и҆збавлѧ́ѧ сп҃сꙋ т̂ѧ, и҆ мечемъ не паде́ши. и҆ бꙋдет̑ дш҃а твоѧ на ѻ҆брѣте́нїе, ꙗ҆́ко ѹ҆пова̀ къ мн̂ѣ, рече г҃ь·