Ostroh Bible❧Книга пророка Єремії, розділ 40

1

Сло́во бывшее къ і҆еремїи ѿ г҃а послѣжде попꙋще́нїи навꙋзарда́нѣ а҆рхимахи́ра. е҆гда в꙽зѧ̀ е҆го свѧзанаго пꙋты ѿ сре́ды всх̑ѣ шед̑ших̑ ѿ і҆ерс̑҇ли́ма и҆ ѿ і҆ѹ́ды, и҆ ведени бы́ша̑ до вавѷлона. и҆ поѧ и҆̀ а҆рхимахиръ, и҆ рече е҆мꙋ. г҃ь б҃ъ твои съгл҃алъ е҆сть ѕл̂о на се мѣсто, и҆ приведе. и҆ сътвори г҃ь ꙗ҆́коже рече, занѐ съгрѣшисте е҆мꙋ, и҆ не послꙋшасте словес̑҇ е҆го, и҆ бысть вамъ гл҃ъ сеи·

2

Сего ради нн҃ѣ се разрѣши́хъ т̂ѧ днесь ѿ ѹ́зъ ꙗ҆же на рꙋкꙋ твое́ю. а҆ще т̂и е҆сть добро прїити со мно́ю въ вавѵлон̑҇ пои҆дѝ, и҆ положꙋ ѻ́чи своѝ на тѧ. а҆ще ли же н̂и, ѻ҆ста́ни здѣ. и҆ сѐ всѧ землѧ̀ пред̑ лицемъ твои҆мъ е҆сть чт̂о и҆зволиши. идѣже въсхо́щеши и҆тѝ, та́мо и҆дѝ, а҆ со мно́ю не и҆дѝ. но пребыва́и ѹ҆ годолїѧ сн҃а а҆хика́мова сн҃а сафа́нѧ. е҆гоже поста́ви цр҃ь вавѵлонъскъ в꙽ землѝ і҆ѹ́динѣ, и҆ живѝ с нимъ среди людїи. всѣми бл҃готами пред̑ ѻ҆чи́ма твои́ма ꙗ҆́кож̑ ходи́ти, и҆ ходи·

3

И҆ дадѐ е҆мꙋ а҆рхимахи́ръ пи́щꙋ и҆ да́ры, и҆ пꙋсти и҆̀ и҆ прїиде і҆еремїѧ къ годолїи сн҃ꙋ и҆а҆хи́камовꙋ въ масифат̑, и҆ сѣде средѣ людїи ѻ҆ста́вшихъ на землѝ·

4

И҆ егда ѹ҆слы́шаша вое҆во́ды си́лы, ꙗ҆́же на селѣ тїи и҆ си́лы и҆хъ. ꙗ҆́ко поста́вилъ е҆сть цр҃ь вавѵлон꙽скїи годолїю сн҃а а҆хи́камова властели́на над̑ землею, и҆ ꙗ҆́ко предадѐ е҆мꙋ мꙋжи и҆ же́ны и҆ дѣти, и҆ ѿ ѹ҆богихъ зем̑ли, и҆же не преве́дени быша до вавѷло́на. прїидо́ша къ годолїи въ масифат̑, и҆смаи҆лъ сн҃ъ наѳанїинъ, и҆ѻ҆а҆на́нъ сн҃ъ карїевъ, и҆ сареа҆съ сн҃ъ ѳанее҆меѳовъ, и҆ сн҃ове ѻ́ѳи, и҆же бѣша с꙽ неѳофа́ѳы, и҆ ехонїѧ сн҃ъ мата́ѳы тїи и҆ мꙋжи и҆хъ. и҆ клѧ́сѧ и҆мъ годолїѧ, и҆ дрꙋгомъ и҆хъ гл҃ѧ. не ѹ҆бо́итесѧ ѿ лица ѻ́трокъ халде́искъ. н̂о вселитесѧ на землѝ, и҆ слꙋжи́те цр҃ю вавѷлонъскꙋ, и҆ ѹ́не вамъ бꙋдетъ. и҆ се а҆зъ сѣжꙋ въ масифа́ѳѣ ста́ти противꙋ лицꙋ халде́искꙋ и҆же а҆ще прїидꙋтъ на васъ. вы́ же съберѣте вино̀ и҆ ѻ́вощь и҆ съберѣте ма́сло, и҆ вълїите въ сосꙋды своѧ. и҆ всели́тесѧ въ гра́ды ꙗ҆́же ѹ҆дръжа́сте. и҆ всѝ жи́дове и҆же в землѝ моа́вли, и҆ въ сн҃ѣхъ ам̑мо́нихъ, і҆ и҆же въ и҆дꙋме́и, і҆ иже въ всеи землѝ. слы́шавше ꙗ҆́ко да́лъ е҆сть цр҃ь вавѷло́нъскъ ѻ҆ста́нокъ въ і҆ѹ́дѣ. і҆ ꙗ҆́ко поста́вилъ е҆сть над̑ ни́ми годолїю сн҃а а҆хикамова сн҃а сафа́нова. и҆ прїидоша всѝ жи́дове со всх̑ѣ мѣстъ до нихже бѣхꙋ ѹ҆бѣгли. и҆ прїидо́ша̑ к꙽ годолїи в꙽ землю і҆ѹ́динꙋ в꙽ масифат̑ и҆ събра́ша вино̀ и҆ ѻ́вощь мно́го ѕѣло и҆ масло·

5

І҆ѻ҆а҆ннан꙽ же сн҃ъ карїевъ и҆ всѧ вое҆во́ды си́лы ꙗ҆́же на селѣхъ, прїидо́ша к꙽ годолїи в꙽ масифа́тъ, и҆ реко́ша е҆мꙋ. вѣждь ꙗ҆ко вели́са цр҃ь сн҃овъ а҆м꙽мо́нь, посла к тебѣ исма́ила порази́ти дш҃ꙋ твою·

6

и҆ не вѣрова и҆мъ годолїѧ. и҆ѻ҆а҆н꙽нан̑҇ же рече годолїи ѻ҆таи въ масифаѳѣ гл҃ѧ, да и҆дꙋ ѹ́бо и҆ побїю и҆сма́ила сн҃а наѳа́нѧ, никто́же да не ѹ҆вс̑҇ѣ. е҆да ка́ко пораѕѧ́тъ дш҃ꙋ твою, и҆ расы́плетсѧ весь і҆ѹ́да събра́ныи к тебѣ, и҆ поги́бнетъ ѻ҆ста́нокъ і҆ѹ́дин꙽. и҆ рече годолїѧ ко і҆ѻ҆а҆н꙽на́нꙋ не сътворѝ дѣтели тоѧ, ꙗ҆́ко лжꙋ̀ т̂ы гл҃еши ѻ҆ и҆сма́илѣ·