Ostroh BibleКнига пророка Єремії, розділ 6
Шрифт:
Запис:
1
Ѹ҆тверди́тесѧ сн҃ове вениами́нови посредѣ і҆ерс̑҇ли́ма, и҆ въ каѳекꙋи въстрꙋбите трꙋбо́ю, и҆ на веѳахаремъ въз꙽дви́гнете хорꙋговь. ꙗ҆же ѕл̂о ви́дѣно е҆сть ѿ сѣвера, и҆ сътре́нїе вели́ко. кра́снѣи и҆ въ стра́нъствѣ живꙋщеи ѹ҆подоби́лъ е҆смь дще́рь сїѻ́нѧ, к неи прїидꙋтъ пасты́рїе и҆ стада и҆хъ·
2
Ѹ҆глꙋби́ша в неи ѻ́крс̑҇тъ, пасе́тъ е҆ді́нъ ко́ждо и҆хъ и҆же под̑ рꙋкꙋ свое҆ю сꙋть. ѻ҆ст҃ите нань бра́нь, съвоста́ните и҆ възы́идемъ въ полꙋдни·
3
Го́ре намъ и҆же ѹ҆клони́сѧ дн҃ь, и҆же должае сътворе́ны сꙋть сѣни вечернїи·
4
Въста́ните і҆ и҆зы́идемъ в꙽ нощи, и҆ расточим̑ домы̀ е҆го·
5
И҆же сїѧ рече г҃ь сил꙽. посѣцѣте дре́во е҆го, ѿврьзите ѻ҆́крс̑҇тъ і҆ерс̑҇лима тыны̀. сѐ е҆сть град̑ посѣще́нїѧ, всѧ́ка клевета̀ посреди е҆го. ꙗ҆́ко стꙋде́нꙋ сътвори́тъ и҆сто́чникъ во́дꙋ свою, тако стꙋде́но сътворѝ лꙋка́въство свое·
6
Безако́нїѧ и҆ па́кости слы́шатсѧ в неи, предо мно́ю всегда не́мощь и҆ ꙗ҆́зва·
7
Ѹ҆чи́сѧ і҆ерс̑҇лиме да не ѿи҆детъ дш҃а моѧ ѿ тебе, да не положꙋ тѧ пꙋстꙋ зе́млю не ѻ҆бита́ннꙋ·
8
Сїѧ рече г҃ь си́лъ. даже до гро́зда съберꙋтъ ꙗ҆́ко въ виногра́дѣ ѻ҆ста́нки і҆и҆л҃ьски. ѻ҆братѝ рꙋкꙋ твою ꙗ҆ко торгатель ко́шницы. комꙋ възъгл҃ю, и҆ комꙋ свѣдѣтельствꙋюсѧ да слы́шат̑. с̂е неѻ҆брѣзаны ѹ҆жеса̀ их̑, и҆ слы́шати не мо́гꙋтъ·
9
Сѐ сло́во гн҃е бы́сть к ни́мъ в꙽ поноше́нїе, и҆ не въспрїимт̑ꙋ того. сего ради ꙗ҆́рости гн҃ѧ и҆сполнихсѧ ѹ҆трꙋди́хсѧ тръпѧ́щи·
10
И҆злїю на мало́е внѣ, и҆ на събра́нїе ю҆́ношъ въкꙋпѣ. мꙋжъ б̂о съ женою ꙗ҆́тъ бꙋдет̑, и҆ ста́рецъ съ и҆спол꙽неным̑ дн҃їи. и҆ преидꙋтъ домы̀ и҆хъ къ чю́ждимъ, и҆ полѧ̀ и҆ же́ны та́коже. и҆же прострꙋ рꙋкꙋ мою на ѻ҆бита́ющих̑ зе́млю, рече г҃ь. ѿ меншаг̑҇ паки даж̑ до бо́лшаго, всѝ сребролюбїю ѹ҆чат̑сѧ и҆ ѿ про̑҇рка даже до сщ҃енн꙽ика, вси творѧтъ ле́сть. и҆ цѣлѧ́хꙋ сътре́нїѧ дщерїи людїи мои҆хъ, съ лестїю рекꙋщи, ми́ръ ми́ръ, и҆ не бѣ ми́ръ. стꙋдни сꙋть и҆же поноше́нїе сътвори́ша. чт̂о на́ипаче постыдѣнїем̑ непостыдѣни, и҆ посрами́тисѧ не вѣдѧтъ. сеѧ ради ве́щи падꙋтъ промежъ рꙋшаю҆щихъ, и҆ въ времѧ посѣще́нїѧ свое҆го разрꙋшат̑сѧ, рече г҃ь. сїѧ рече г҃ь, стоите на пꙋте́хъ и҆ ви́дѣте, и҆ въпроси́те ѿ стезь дре́внихъ, и҆хже бꙋдетъ пꙋть бл҃гъ. и҆ ходи́те по ни́хъ, и҆ ѻ҆брѧ́щете прохлажде́нїе дш҃амъ вашимъ. и҆ реко́ша, не ходи́мъ. и҆ поста́вихъ на вас̑҇ стра́жа. и҆ реко́хъ, слы́шите гла́съ трꙋбы̀. и҆ реко́ша, не ѹ҆слы́шимъ.
11
Сего ради слы́шите ꙗ҆́зы́цы, и҆ позна́йте събра́нїе, коли́ко аз̑ сътворю̀ им̑. слы́ши землѧ̀, сѐ аз̑ и҆зведꙋ ѕлаѧ на по́лкъ сїи пло́дъ помышле́нїѧ их̑, и҆же слове́съ мои҆хъ не послꙋшаша, и҆ зако́нъ мои ѿврьгоша. въскꙋю мнѣ кади́ло ѿ сава приносите, и҆ касїа бл҃гимъ ѻ҆бонѧ́нїем̑ ѿ землѧ̀ далнѧа. всесъж꙽же́нїа ваша не сꙋть ѹ҆го́дна, и҆ закла́нїѧ ва́ша не ѹ҆годи́ша мнѣ·
12
Сего ради рече г҃ь, се а҆зъ дамъ на лю́ди сїи разрд̑ꙋше́нїе, и҆ раздрꙋша́ютъ в нихъ ѿц҃ы и҆ сн҃ове вкꙋпѣ сосѣдъ, і҆ искренїи поги́бнꙋт꙽.
13
Сїѧ рече г҃ь. сѐ лю́ди прїидꙋтъ ѿ землѧ̀ сѣверьски, и҆ ꙗ҆зы́къ вели́къ въста́нетъ ѿ конець землѧ. стрѣлꙋ̀ и҆ щи́тъ въсхи́тѧтъ, мꙋчитель ес̑҇ и҆ не ѹ҆млс̑҇рдитсѧ. глс̑҇а е҆го ꙗ҆́ко мо́ре възшꙋмит̑, и҆ на ко́ни възы́идꙋтъ ѹ҆гото́вани ꙗ҆́ко мꙋжъ на ѻ҆полче́нїе на тѧ дщи сїѻ́нѧ. слы́шахомъ слх̑ꙋ е҆го, безъ въздержа́нїѧ сꙋть рꙋцѣ на́ши, ско́рбь ѻ҆бъѧ́тъ насъ болѣзнїи ꙗ҆́ко родѧ́щаѧ. не хощѣте и҆сходи́ти на ни́вы ни и҆сходѣте на пт̑ꙋ. ꙗ҆́ко мечь врага̀, и҆ страхъ ѻ҆́крс̑҇тъ. дще́ро людїи мои҆хъ препоѧ҆шисѧ вре́тищемъ, и҆ посы́плисѧ пе́пелом̑. пла́чъ е҆ді́нородныи, сътворѝ себѣ плаче́мъ горким̑. и҆же ѹ҆стремле́но прїидетъ запꙋстѣнїе на ва́съ. и҆скꙋси́телѧ дахъ тебе на люди моѧ крѣпка, и҆ вѣси і҆ и҆скꙋсиши пꙋтѝ их̑. всѝ тїи нача́лницы ѹ҆кланѧ́ющїи ходѧ́щи льсти́во. мѣдь и҆ желѣзо всѝ растлѣни сꙋть. ѻ҆скꙋдѣ надꙋтїе на ѻ́гнь, и҆стлѣ ѻ́лово, в сꙋетꙋ̀ надымал̑҇ над꙽ми́тель, лꙋка́въства б̂о и҆хъ не сꙋть и҆стлѣни. сребро ѿмѣтно зовѣтѐ их̑, и҆же г҃ь ѿврьглъ тѣхъ·
Джерела
