Ostroh Bible❧Книга пророка Єремії, розділ 5

1

Ýбыидѣте пꙋтѝ і҆ерс̑҇лим̑скїа, и҆ възри́те, и҆ промы́слите, і҆ и҆щѣте на площа́дѣхъ е҆го. и҆ егда̀ ѻ҆брѧ́щете мꙋжа творѧ́ща сꙋдъ, і҆ и́щꙋща вѣры, и҆ млс̑҇рдъ бꙋдꙋ е҆мꙋ. да а́ще па́ки рекꙋтъ живет̑ г҃ь, и҆ т̂о лжи́во кленꙋтсѧ·

2

Ги҃ ѻ́чи твоѝ зрѧ́тъ вѣрꙋ. би́лъ е҆си и҆хъ, и҆ не болѣша. съкрꙋшилъ е҆си их̑, и҆ ѿринꙋли въсприѧ҆ти наказа́нїе. ѻ҆жести́ша лица̀ своѧ выше ка́мени, и҆ не хотѣша ѻ҆брати́тисѧ. а҆з же рѣхъ, ѹ҆́бо ѹ҆боги сꙋть и҆ бꙋ́и, не вѣдꙋщи пꙋтѝ гн҃ѧ, и҆ сꙋда б҃а свое҆го. и҆дꙋ̀ бо къ дръжа́внымъ и҆ гл҃ю и҆мъ, тїи б̂о позна́ша пꙋть гн҃ь, и҆ сꙋдъ б҃а свое҆го. и҆ сѐ на́ипаче сїи съкрꙋши́ша и́го, и҆ растерго́ша ѹ҆́жи. сего ра́ди поби́лъ их̑ ле́въ ѿ лѣса, и҆ во́лкъ къ ве́черꙋ погꙋби и҆хъ. па́рдосъ бдѧ́щъ на гра́дх̑ѣ и҆хъ, и҆ всѧкъ же и҆сходѧщ꙽ ѿ нихъ бꙋдетъ ꙗ҆т꙽, и҆же многа сꙋть престꙋпленїа и҆хъ, покрѣплены сꙋть ѿвращенїѧ и҆хъ. на кое҆мъ млс̑҇рдъ тебѣ быти могꙋ. сн҃ве твоѝ ѻ҆ставиша мѧ, и҆ кленꙋт꙽сѧ в꙽ тѣхъ и҆же не сꙋт꙽ бози. насытих̑ и҆хъ и҆ съблꙋдишѧ, и҆ в домѣ блꙋд꙽нѣмъ блꙋд꙽стовахꙋ. кони любов꙽ницы на жены, и҆ ѻ҆реве сътворени сꙋт꙽. е҆динъ кождо к женѣ и́скренѧго свое҆го ржа́ше. е҆да ли на сих̑ не посѣщꙋ рече г҃ь. и҆ въ ꙗ҆зы́цехъ не м꙽сти́т ли сѧ дш҃а моѧ, възы́идете на стѣны и҆хъ, и҆ разоритѐ, и҆стлѣнїѧ не сътвори́те. во́змете ѿра́сли е҆го, и҆же не сꙋть гн҃и. престꙋпле́нїемъ б̂о престꙋпи́лъ е҆сть на мѧ домъ і҆и҆л҃евъ, и҆ дом̑ і҆ѹ́динъ, реч̑҇ г҃ь. ѿвръго́шасѧ г҃а и҆ реко́ша, нѣсть тои. ни прїидетъ на нас̑҇ ѕл̂о, ме́ча и҆ гла́да не ѹ҆́зримъ. прро̑҇ки бы́ша на вѣтръ гл҃али, и҆ ѿвѣтъ не бы́сть в ни́хъ. сїѧ б̂о слꙋ́чатсѧ тѣмъ·

3

Сїѧ рече г҃ь си́лъ. и҆же гл҃али е҆стѐ сло́во т̂о. с̂е а҆зъ даю̀ словеса̀ моѧ̀ въ ѹ҆ста̀ твоѧ̀ въ ѻ҆́гнь, и҆ лю́ди сїѧ въ дре́ва и҆ пожре́тъ и҆хъ·

4

Се̂ а҆зъ наведꙋ̀ на вас̑҇ ꙗ҆зы́ки и҆здале́ча до́ме і҆и҆л҃евъ, рече г҃ь. ꙗ҆зы́къ си́лныи, ꙗ҆зы́къ старыи, е҆го́же ꙗ҆зы́ка не ѹ҆вѣси ни възразꙋмѣ́еши чт̂о гл҃ет꙽. тꙋ́лъ е҆го ꙗ҆́ко гро́бъ ѿвер꙽стъ, вс̂и крѣ́пцы. і҆ и҆зъꙗ҆дѧ́тъ кла́сы твоа̀ и҆ хлѣбъ твои, и҆ пожре́тъ сн҃овъ твои҆хъ и҆ дще́рїи твои҆хъ. ста́до твое и ско́ты твоѧ̀ и҆зъꙗ́сть, виногра́дъ твои и҆ смо́квы твоѧ̀. и҆ съкрꙋшитъ гра́ды твоѧ твер꙽ды, в них̑же т̂ы и҆́маши дръзнове́нїе мече́мъ. ѻ҆ба́че въ дн҃ехъ тѣ́хъ реч̑҇ г҃ь, не сътворю вас̑҇ въ истлѣнїе·

5

да а҆ще речетѐ, почто̀ сътворѝ г҃ь б҃ъ на́шъ намъ сїѧ всѧ̀. рече́ши к ни́мъ, ка́ко ѻ҆ста́висте м̂ѧ, и҆ послꙋжи́сте богом̑ чю́ждимъ в землѝ ва́шеи. та́ко послꙋжи́те бого́мъ чю́ждимъ в꙽ землѝ не ва́шеи. възвѣсти́те сїѧ до́мꙋ і҆а́ковлю, и҆ ѹ҆слы́шанїе сътвори́те въ і҆ѹ́дѣ рекꙋщи·

6

Слы́ши по́лче бꙋ́и, и҆же не и҆́маши срд̑ца. и҆же и҆мѣю҆ще ѻ҆́чи не ви́дите, и҆ ѹ҆́ши и҆ не слы́шите·

7

Мене б̂о не ѹ҆боите ли сѧ рече г҃ь, и҆ ѿ лица̀ мое҆го не разболи́тесѧ. и҆же положи́хъ пѣсо́къ предѣ́лъ мо́рѧ за́повѣдь вѣ́чнꙋ, и҆же не ми́мои҆детъ. и҆ съдви́гнꙋтсѧ і҆ и҆знемо́гꙋтъ, и҆ надмꙋтсѧ во́лны е҆го и҆ не пре́идꙋтъ того. лю́дем же сим̑ бы́сть срд̑це невѣ́рно и҆ жесто́ко, ѿи҆до́ша и҆ поидо́ша. и҆ не реко́ша въ срд̑цы свое҆мъ, ѹ҆боимысѧ г҃а б҃а на́шего. и҆же да́сть намъ до́жд̑ь ра́нъ и҆ по́зден꙽ въ вре́мѧ своѐ, и҆сполне́нїе лѣтнїе жа́твы стрегꙋщи намъ·

8

Безако́нїѧ на́ша ѹ҆клони́ша сїа, и҆ грѣхѝ на́ша въз꙽дръжа́ша бл҃го ѿ нас̑҇. и҆же ѻ҆брѣте́ны сꙋть в лю́дехъ моих̑ нечестиви лови́теле, ꙗ҆́ко пти́чныи лове́ць сѣти ставлѧющи, и҆ поножы на зацѣпле́нїе мꙋжемъ. ꙗ҆́ко пом꙽ча по́лна пти́ць, та́ко до́мы их̑ по́лны ле́сти. сего ради възвели́чени сꙋть и҆ ѻ҆богаще́ни. ѹ҆ты́ли сꙋть и҆ ѹ҆тол꙽стѣли, и҆ ми́мои҆до́ша слове́съ мои҆хъ злѣише. прю̀ вдови́цы не сꙋди́ша, прю̀ си́ра не ѹ҆пра́виша, и҆ сꙋ́да ѹ҆бо́гим̑ не сꙋдиша·

9

Є҆да̀ сихъ ра́ди не посѣщꙋ рече г҃ь, и҆ли на лю́дехъ таковх̑ѣ не м꙽сти́тсѧ дш҃а моѧ̀·

10

Ѹ҆́жасъ и҆ чюдеса сътворе́на сꙋть на землѝ. прро̑҇цы прро̑҇чествова́ша л꙽жꙋ, и сщ҃ен꙽ницы плеска́хꙋ рꙋка́ми свои҆ми, и лю́дїе мои възлюби́ша такова. чт̂о бо сътво́ритсѧ въ послѣ́днѧѧ е҆го·