Ostroh Bible❧Книга пророка Єремії, розділ 8

1

Въ времѧ т̂о рече г҃ь. и҆зве́ргꙋтъ ко́сти цр҃еи і҆ѹ҆диныхъ. и҆ ко́сти нача́лников̑҇ е҆го. и҆ ко́сти сщ҃енниковъ и҆ ко́сти прро̑҇къ, и҆ ко́сти и҆же ѻ҆бита́ша въ і҆ерс̑҇лимѣ, ѿ гро́бъ и҆хъ, и҆ прострꙋтъ и҆хъ къ слн҃цꙋ и҆ лꙋнѣ и҆ къ всѣмъ ѕвѣзда́мъ нбс̑҇ным̑ и҆хже възлюби́ша. і҆ и́мже слꙋжи́ша̑ и҆ въ слѣдъ и҆хъ ходи́ша, і҆ и҆хже взыска́ша и҆ поклонишасѧ·

2

Не соберт̑ꙋсѧ ни погребꙋтсѧ, н̂о въ гноѝ на лицы̀ землѝ бꙋ́дꙋтъ. і҆ и҆зберꙋтъ на́ипач̑҇ смр҃ть неже живот̑ всѝ и҆же ѻ҆ста́ша ѿ племени сего стропти́ваго въ всх̑ѣ мѣстехъ и҆же ѻ҆ста́влени сꙋть. ѿ ни́х же и҆звергохъ ѧ҆̀ рече г҃ь си́лъ. и҆ речеши к ни́мъ, сїѧ рече г҃ь, е҆да и҆же падетъ не въста́нет̑ л̂и, и҆л̂и ѿверъшїисѧ не ѻ҆брати́тъ л̂и сѧ. въскꙋю б̂о ѿвраще́нъ е҆сть по́лкъ сїи въ і҆ерс̑҇лимѣ ѿвраще́нїемъ непокори́вымъ. взѧ́ша лжꙋ, и҆ не хотѣша ѻ҆брати́тисѧ, внимахъ и҆ послꙋшахъ, и҆ никт̂о что̀ бл҃го е҆сть гл҃етъ, ни е҆ді́нъ е҆сть и҆же дѣе҆тъ покаѧ́нїе на грѣсѣ̀ свое҆мъ рекꙋщи, чт̂о сътворихъ. всѝ ѻ҆браще́ни ст̑ꙋ на тече́нїе свое ꙗ҆́ко ко́нь съ стремле́нїемъ и҆дꙋщъ на ѻ҆полче́нїе. пилю́к꙽ на нб҃си позна̀ вре́мѧ свое. го́рлица і҆ ла́стовица и҆ сиконїа съхрани́ша времѧ прише́ствїѧ свое҆го. людїе же моѝ не позна́ша сꙋда гн҃ѧ, ка́ко речете мы̀ мꙋ́дры е҆смы, и҆ закон̑҇ гн҃ь с на́ми е҆сть. и҆́стинно лжꙋ̀ дѣ́лалъ е҆сть ѹ҆правле́нїе лжи́во пи́серамъ·

3

Постыдѣни сꙋть премꙋдрїи. ѹ҆стра́шени пои҆мани сꙋть, сло́во б̂о гн҃е ѿврьгоша и҆ премꙋдрость ни е҆ді́на ес̑҇ в нихъ. сего ра́ди дамъ же́ны и҆хъ стра́ннымъ, полѧ̀ и҆хъ преслѣдова́телемъ·

4

Ꙗ҆́же ѿ менша да́же до бо́лша, вси златолю́бецъ послѣдꙋю҆тъ ѿ про̑҇рка даже до сщ҃енника, всѝ сътворѧтъ лжꙋ̀·

5

І҆ и҆сцѣлѧ́хꙋ сътре́нїѧ дще́рїи людїи мои҆хъ к постыдѣнїю рекꙋщи, ми́ръ, ми́ръ. е҆гда не бы́сть ми́ръ·

6

Постыдѣни сꙋть и҆же гнꙋсьство сътвори́ша, за всѧ̀ сїѧ постыдѣнїю не сꙋть постыдни, и҆ срамитисѧ не вѣдѣша сего ра́ди падꙋтъ междꙋ падающих̑ въ времѧ посѣще́нїѧ свое҆го падꙋтъ рече г҃ь. събира́ющи съберꙋ и҆хъ реч̑҇ г҃ь, нѣсть гроздъ в лоза́хъ, и҆ не ст̑ꙋ смо́кви въ смоко́вницѣ, ли́стъ ѿпаде, и҆ далъ и҆же престꙋпле́на сꙋть почт̂о сѣдимъ. съвокꙋпитесѧ и҆ вънидем̑ въ гра̑ запа́сен꙽. и҆ молчим̑ т̂ꙋ, и҆же г҃ь б҃ъ нашъ молча́ти сътворил̑҇ нас̑҇, и҆ пити далъ намъ во́дꙋ желчи. съгрѣшихомъ б̂о г҃ꙋ, ждахомъ ми́р꙽ и҆ не бѣ бл҃го. времѧ врачева́нїѧ. и҆ с̂е бо́ѧзнь. ѿ да́на слы́шана е҆сть рза́нїѧ ко́неи и҆хъ. ѿ гла́са во́плѧ побо́рникъ е҆го подвигнꙋта е҆сть всѧ̀ землѧ̀. и҆ прїидо́ша и҆ пожро́ша зем̑лю і҆ и҆сполне́нїе еѧ̀. гра́дъ и҆ ѻ҆бита́ющих̑ в немъ·

7

И҆же с̂е а҆зъ послю̀ вамъ змїи и҆мже нѣсть заклина́нїѧ і҆ и҆з꙽ѧдѧ́тъ васъ рече г҃ь. болѣзнь моа надъ бо́лѣзнь, въ мнѣ срд̑це мое пла́чюще. сѐ глс̑҇а во́плѧ дще́рїи людїи моихъ, ѿ землѧ̀ далеча. е҆да г҃ь нѣсть в сїѻ́нѣ, и҆л̂и цр҃ь е҆го нѣсть в немъ. въскꙋ́ю м̂ѧ къ гнѣвꙋ подвиго́сте, и҆ въ и҆зваѧ́ныхъ свои҆хъ и҆ въ сꙋетахъ чюжихъ·

8

Про́иде жат̑ва сконча́но е҆сть лѣто и҆ м̂ы сп҃сени нѣсмы, надъ сокрꙋше́нїем̑ дще́ри людїи моих̑, съкрꙋше́нъ е҆смь и҆ ско́рбенъ. ѹ́жасъ ѻ҆бъѧт̑ м̂ѧ, е҆да кле́ѧ нс̑҇ѣ в꙽ галаа́дѣ, и҆л̂и врача нс̑҇ѣ т̂ꙋ, воскꙋю б̂о нс̑҇ѣ и҆сцѣле́на ра́на дще́рїи людїи моих̑·