Ostroh Bible❧Книга Йова, розділ 1

1

Мꙋжъ бѣ̀ въ земли хꙋсъ и҆менем̑ і҆́ѻвъ·

2

Бѣ чл҃къ то́и, и҆́стиненъ непоро́ченъ пра́веденъ, бл҃гочести́в꙽, ѹ҆далѧа́сѧ ѿ всѧког̑҇ ѕл̂а дѣанїа.

3

Бысть же е҆мꙋ сн҃овъ сед̑мь, и҆ дще́рѧ тр̂и. и҆ б̂ѣ скот̑ е҆го, ѻ҆ве́цъ, ҂з҃, вельблюд̑, ҂г҃. сꙋпрꙋ́гъ воло́вых̑, е҃ сот̑. и҆ ѻ҆сли́ць пасо́мыхъ пѧ́ть сот̑ стад̑·

4

и҆ слꙋж́ба е҆мꙋ многа ѕѣ́ло, и҆ дѣ́ла ве́лїа ѻ҆ нем̑ бѣша на землѝ·

5

И҆ бѧше чл҃къ то́и до́бра ро́дꙋ, ѿ востокъ слн҃чъных꙽·

6

Съходѧ́ще же сѧ сн҃ове е҆го къ себѣ, и҆ творѧ́хꙋ пиръ по всѧ̀ дн҃и, пое҆млющесѧ въкꙋпѣ, и҆ тр̂и сестры своа, ꙗ҆́сти и҆ пити с ни́ми·

7

е҆гда же скончахꙋсѧ дн҃їе пи́ра. посыла і҆́ѻ҆въ, и҆ чищаше их̑·

8

въста́ю҆щи заѹ҆́тра, приноша́ше за нихъ жрътвы по числꙋ и҆хъ, и҆ телецъ е҆ді́нъ ѻ҆ грѣсѣхъ за дш҃а их̑·

9

Гл҃аше б̂о і҆́ѻвъ, е҆гда како сн҃ове мои въ ра́зꙋмѣ свое҆мъ ѕл̂о помы́слиша къ б҃ꙋ. та́ко ѹ҆бо творѧше і҆́ѻвъ по всѧ̀ дн҃и·

10

И҆ е҆гда бысть ꙗ҆́ко се́и дн҃ь. и҆ с̂е прїидо́ша а҆́гг҃ли бж҃їѝ, пред̑ста́ти пред̑ гм҃ъ, и҆ дїа́волъ прїиде с ни́ми·

11

И҆ рече г҃ь дїа́волꙋ, ѿкꙋдꙋ прїиде. и҆ ѿвѣща дїа́волъ и҆ реч̑҇ гв҃и·

12

ѻ҆бхождь зем̑лю, и҆ прохо́жд̑ь под̑нбс̑҇нꙋю прїидохъ·

13

И҆ реч̑҇ е҆мꙋ г҃ь, помы́слил̑҇ ли е҆си ѹ҆бо на раба̀ мое҆го і҆́ѻва, ꙗ҆́ко нѣсть чл҃ка такова̀ ѿ сꙋщих̑ на́ зем̑ли непоро́чна пра́вед̑на и҆́стинна бл҃гочести́ва, ѹ҆далѧ́асѧ ѿ всѧкаго ѕл̂а дѣа́нїѧ·

14

ѿвѣща же дїа́волъ, пред̑ гм҃ъ и҆ рече. е҆гда̀ тꙋне чтетъ і҆́ѻвъ г҃а. не ты̀ л̂и ѻ҆гради внѣшнѧа е҆го и҆ внꙋтренѧѧ до́мꙋ е҆го, и҆ вс̂е сꙋщее ѻ҆́крс̑҇тъ е҆го·

15

дѣ́ла же рꙋкꙋ е҆го блс̑҇вил̑҇ е҆си, и҆ ско́ты е҆го мно́ги сътвори́лъ е҆си на землѝ. н̂о послѝ рꙋкꙋ твою̀ и҆ косни́сѧ въ всѐ е҆же и́мать. а҆ще ѹ҆бо въ лице т̂ѧ блс̑҇ви́тъ·

16

Тогда̀ рче г҃ь дїаволꙋ, с̂е все е҆лико е҆сть е҆го предаю въ рꙋ́цѣ твоѝ, само́го же не косни́сѧ·

17

І҆ и҆зыиде дїа́волъ ѿ лица̀ гн҃ѧ·

18

И҆ б̂ѣ ꙗ҆́ко се́и дн҃ь, сн҃ве і҆́ѻ҆вови и҆ дще́рѧ е҆го ꙗ҆дѧ́хꙋ и҆ пїа́хꙋ вино̀, въ домꙋ̀ бра́та свое҆го старѣ́ишаго·

19

И҆ с̂е вѣстникъ прїиде къ і҆́ѻ҆вꙋ, и҆ реч̑҇ е҆мꙋ. сꙋпрꙋ́гъ воловъ ѻ҆рѧхꙋ, и҆ ѻ҆слицы пасѧ́хꙋ близъ их̑, и҆ пришед̑ше плѣнѧ́ющеи плѣниша и҆хъ, и҆ рабы̀ ѹ҆би́ша мечем꙽, а҆́з же ѻстах̑ е҆ді́нъ, и҆ прїидохъ възвѣсти́ти тебѣ̀·

20

Є҆щѐ семꙋ гл҃ющꙋ прїиде дрꙋгыи вѣстникъ и҆ рече къ і҆́ѻ҆вꙋ. ѻ҆́гнь падѐ съ нб҃се на́ землю и҆ пожъже ѻ҆́вца, и҆ пасты́рѧ поꙗ҆́сть та́кожд̑е, а҆́з же ѻ҆стахъ е҆ді́нъ, и҆ прїидохъ възвѣстити тебѣ·

21

Є҆ще же семꙋ̀ гл҃щꙋ прїиде дрꙋгїи вѣ́стникъ и҆ реч̑҇ къ і҆́ѻ҆вꙋ. кон꙽ницы сътвори́ша че́ты тр̂и, и҆ ѻ҆быидоша вельблю́ды и҆ плѣни́ша их̑, и҆ рабы̀ ѹ҆би́ша мечем꙽, а҆з же ѻ҆стах̑ е҆ді́нъ, и҆ прїидо́хъ възвѣстити тебѣ·

22

Є҆ще же и҆ семꙋ̀ гл҃ющꙋ, и҆́нъ вѣстникъ прїиде гл҃ѧ къ і҆́ѻ҆вꙋ. сн҃омъ твои҆мъ и҆ дще́рѧмъ, ꙗ҆дꙋщ́имъ и҆ пїющимъ ѹ҆ бра́та и҆хъ старѣ́ишаго, и҆ вънеза́пꙋ вѣтръ вели́къ наи҆де ѿ пꙋстынѧ, и҆ коснꙋсѧ въ четы́ри ѹ҆́глы храмины, и҆ падѐ хра́мина на дѣти твоѧ̀ и҆ ѹ҆мроша, а҆́з же ѻ҆ста́хъ е҆ді́нъ, и҆ прїидохъ възвѣсти́ти тебѣ·

23

И҆ с̂е ѹ҆слы́ша і҆́ѻ҆въ въста̀ и҆ растерѕа ри́зы своа̀, и҆ постриже вла́сы главы своеѧ, и҆ посы́па пр́ьстїю. и҆ пад̑ на́ землю поклони́сѧ гв҃и и҆ рече. а҆зъ б̂о на́гъ и҆зыидохъ ѿ чре́ва мт҃ре мое́ѧ, на́гъ и҆ пои҆дꙋ·

24

Гь҃ да́сть и҆ г҃ь взѧ̀, ꙗ҆коже и҆зволи́сѧ гв҃и, та́ко и҆ бысть, бꙋ́ди и҆мѧ гн҃е блс̑҇ве́но въ вѣки·

25

ѿ всѣхъ си́хъ слꙋчившихсѧ е҆мꙋ, ничи́мже і҆́ѻ҆въ съгрѣши пред̑ бм҃ъ, н̂и въ ѹ҆стнꙋ своею и҆ не да́сть безꙋмїа б҃ꙋ·