Ostroh BibleКнига Йова, розділ 20
Шрифт:
Запис:
1
Ѿвѣща же съфаръ минѣи҆нъ и҆ рече. не тако мнх̑ѣ с̂е ти рещи проти́вꙋ, и҆ не разꙋмѣ́ете ли паче нежели а҆́зъ·
2
Наказа́нїе срамле́нїѧ мое҆го ѹ҆слы́шꙋ, и҆ дх҃ъ ѿ ра́зꙋма ѿвѣщева́етъ м̂и·
3
Є҆гда̀ с̂е разꙋмѣ́ютъ лѣта, ѿ негоже положенъ чл҃къ быс̑҇ на землѝ·
4
Весе́лїе б̂о нечести́выхъ паде́нїе силꙋ и҆́мать. ѻ҆брадова́нїе же безако́нникъ па́гꙋба·
5
А҆ще възы́идꙋтъ на́ нб҃о да́ры е҆го, же́ртва же е҆го ѻ҆́блацх̑ѣ сѧ ко́снетъ·
6
Є҆гда̀ мни́тсѧ ѹ҆же ѿве́рженъ, тогда̀ поги́бнет̑ до конца̀. ви́дѣвшїи же е҆го рекꙋтъ гд̂ѣ е҆сть. ꙗ҆́коже со́нъ ѿ тѣ́ла вн̂ѣ ѻ҆брѧ́щет̑сѧ, ѿлетѣ же а҆ки мечта́нїе но́щное. ꙗ҆́ко презрѣ̀ и҆ не приложи́тъ, и҆ ктомꙋ̀ не приближитъ е҆го мѣсто е҆го·
7
Сн҃ы их̑ да погꙋбѧтъ ме́ншины, и҆ рꙋцѣ е҆го пожгꙋтъ бо́лѣзнь. и҆ ко́сти е҆го и҆спо́лнѧтсѧ ю҆́ности е҆го, и҆ с ни́мъ на пе́рсти ѹ҆сне́тъ·
8
А҆ще ѹ҆слади́тсѧ въ ѹ҆стх̑ѣ е҆го ѕло́ба, съкрыет̑ ю҆̀ под̑ ꙗ҆зы́комъ свои҆мъ. не постыди́тсѧ и҆ не ѻ҆ста́витъ е҆ѧ̀, и҆ съберет̑ ю҆̀ посредѣ горта́ни свое҆го. не възмо́жетъ помощи себѣ, ꙗ҆́дъ а҆спидь въ чре́вѣ е҆го·
9
Бога́тьство бес пра́вды събира́емо и҆з꙽блю́етсѧ, і҆ и҆з꙽ хлѣвины е҆го да и҆звлече́тъ и҆̀ а҆гг҃лъ·
10
Ꙗ҆́рос̑҇ же ѕмїевꙋ да със꙽сетъ, да ѹ҆бїет̑ же е҆го ꙗзы́къ ѕмии́нъ·
11
да не ѹ҆зритъ ѿ дое́нїа прибыт̑кꙋ, ниже прибыт̑кꙋ ме́да и҆ ма́сла, вътще и҆ всꙋе трꙋди́сѧ бога́тьство ѿ негоже не въкꙋсит̑·
12
Ꙗ҆́коже клоки несожьва́емы и҆ не пожерты, в꙽ поги́бель не́мощных̑ домы съкрꙋшѝ·
13
жи́тїе же разграби и҆ не поста́ви, нѣсть спс̑҇нїѧ и҆мѣнїю е҆го·
14
Въжд̑елѣ́нїе е҆го не спс҃етъ е҆го, нѣсть ѻ҆ста́нка бра́шнꙋ е҆го·
15
Сего ради не процвѣтет̑ е҆мꙋ бл҃гаѧ, и҆ е҆гда же мни́тъ ѹ҆же и҆спо́лнь бы́ти ѻ҆скорблѧ́е҆тсѧ. всѧ́ка же бѣда на́нь прїидет̑, а҆ще ка́ко и҆спо́лнитъ чре́во е҆го·
16
напꙋститъ на́нь гнѣ́въ и҆ не ѹ҆цѣлѣет̑, и҆ ꙗ҆́рость гнѣ́ва ѹ҆бꙋдитъ и҆̀ на болѣзнь. ѿ рꙋки желѣ́зны да ѹ҆стрѣлитъ е҆го лꙋкъ мѣ́дѧнъ, и҆ да про́идет̑ сквоѕѣ тѣло е҆го стрѣла̀·
17
Но ни ѕвѣзды же въ жи́тїи е҆го, да похо́дѧтъ на́нь стра́си. и҆ всѧ́ка же тма̀ на́нь пребꙋ́ди, и҆ да поѧ́сть и҆̀ ѻ҆́гнь раждеже́ныи·
18
да ѻ҆ѕлобитъ до́мъ е҆го приходень, и҆ да ѿкры́етъ н҃бо безако́нїа его. и҆ землѧ̀ да въста́нетъ на́нь, да и҆з꙽влечетъ до́мъ е҆го па́гꙋба до кон꙽ца̀·
19
дн҃ь гнѣ́ва да прїидетъ на́нь, сїѧ ча́сть чл҃ка нечести́ваго ѿ г҃а, и҆ стѧжа́нїе сꙋщаго е҆мꙋ ѿ стра́ха·
Джерела
