Ostroh Bible❧Книга Йова, розділ 19

1

Ѿвѣща́ же і҆́ѻвъ и҆ рече. доколѣ притрꙋ́днꙋ съътвори́те дш҃ꙋ мою, и҆ низложи́сте м̂ѧ словесы̀. разꙋмѣи́те то́кмо, ꙗ҆́ко б҃ъ сътворѝ м̂ѧ си́цева, тѧ́жѣте м̂ѧ, не стыдѧ́щисѧ нале́жите м̂и. и҆ ѹ́бо въи́стиннꙋ а҆зъ прельсти́хсѧ, ѹ҆ мене́ же не въдворѧ́етсѧ лестець, гл҃ти сло́во мое е҆же не подоба́етъ. словеса́ же моѧ съблажнѧ́ютсѧ и҆ не въ вре́мѧ. ѻ҆стани же ꙗ҆́ко на мѧ велича́етесѧ. наскака́ете же м̂и словесы поно́сными. разꙋмѣ́ите ѹ҆бо ꙗ҆́ко г҃ь е҆сть мои, ѹ҆тверже́нїе свое на мѧ възнесѐ. с̂е смѣхъ поноше́нїѧ не възъгл҃ю, и҆ възопїю и҆ нигдѣ же сꙋдъ. ѻ҆́крс̑҇тъ ѻ҆гражден̑҇ е҆смь, и҆ не и҆́мамъ минꙋти. пред̑ лицем꙽ же мои҆мъ тмꙋ̀ положѝ, сла́вꙋ же ѻ҆ мн̂ѣ съвлече, ѿѧ́т꙽ же вѣнець ѿ главы̀ моеа. разтерза́ же м̂ѧ ѻ҆́крс̑҇тъ и҆ ѿи҆дох̑, посѣче́ же ꙗ҆ко дре́во надежд̑ꙋ мою̀. лю́тѣ гнѣво сътворѝ м̂и и҆мѣ же м̂ѧ ꙗ҆ко вра́га. въкꙋпѣ прїидо́ша и҆скꙋше́нїѧ е҆го на́ мѧ, на пꙋтехъ же мои҆хъ ѻ҆быидо́ша м̂ѧ пред̑сѣдѧ́щеи. и҆ бра́тїѧ моѧ ѿстꙋпи́ша ѿ мене, позна́ша чю́жа неже мене. и҆ дрꙋзи моѝ немлс̑҇тиви бы́ша, не прїѧша м̂ѧ бли́жнїи моѝ и҆ вѣдꙋще и҆́мѧ мое забы́ша м̂ѧ. сосѣди до́мꙋ и҆ рабынѧ моѧ̀, ꙗ҆́ко и҆ноплеме́нникъ бых̑ пред̑ ними. раба̀ свое҆го възва́хъ и не послꙋша, ѹ҆стаж̑ моѧ молѧ́хꙋсѧ, и҆ слꙋжа́хꙋ женѣ̀ мое́и. призыва́х же ласкаѧ сн҃ы под̑ложниць моих̑, ѻни́ же мене въ вѣк꙽ ѿринꙋша. е҆гда̀ въста́нꙋ, на мѧ гл҃ют꙽. ме́рзокъ бывъ вѣдꙋщим̑ м̂ѧ и҆хже люби́хъ въста́ша на́ мѧ. въ кожи мое́и согни́ша пло́ти моѧ̀, ко́сти же моѧ в зꙋбѣхъ съдръжат̑. поми́лꙋите м̂ѧ поми́лꙋите м̂ѧ ѽ дрꙋзи, рꙋка б̂о гн҃ѧ коснꙋвшїи м̂ѧ е҆сть. почто́ же м̂ѧ го́ните, ꙗ҆́коже и҆ г҃ь. ѿ пло́ти же мое́ѧ не насыща́е҆тесѧ·

2

Кт̂о ѹ҆бо да́сть да бы́ша написана словеса моѧ. и҆ положи́ти и҆хъ въ кни́гахъ въ вѣкъ, въ писа́нїи желѣзнѣ ѻко́вѣ, и҆л̂и в ка́мени въваѧ́ти. ви́дѣ б̂о ꙗ҆ко прс̑҇носꙋще ес̑҇ и҆же и҆́мать разори́ти по землѝ, въздви́гнꙋти ко́жꙋ мою въздвиза́ющꙋюсѧ, ѿ г҃а же сїе быс̑҇ м̂и. и҆ е҆же азъ въ себѣ съвѣдѣ, ꙗ҆́же ѻ҆́ко мое видѣ а҆ не и́нъ, и҆ все́ же ми сконча́сѧ в ло́нѣ. а҆ще же и҆ речете чт̂о речемъ пред̑ ни́мъ, и҆ ко́рень словеси ѻ҆брѧ́щем̑ на немъ. ѹ҆бо́ите же сѧ и҆ вы̀ ѿ покрове́нїѧ, ꙗ҆́рость б̂о на безако́н꙽ныѧ на́идетъ, и҆ тогда ѹ҆вѣдѧтъ гд̂ѣ и҆хъ е҆сть ве́щь·