Ostroh Bible❧Книга Йова, розділ 33

1

Но послꙋшаи і҆́ѻве словесъ мои҆хъ, и҆ бесѣдꙋ мою вънꙋшѝ с̂и. се бо ѿврьзохъ ѹ҆ста̀ моѧ, и҆ възгл҃а ꙗ҆зы́к꙽ мои. чи́сто срд̑це мое словесы̀, ра́зꙋм же ѹ҆стнꙋ моею чисто разꙋмѣетъ·

2

Но дх҃ъ бж҃їи сътвори́выи мѧ, дыха́нїе же вседръжи́телѧ поѹ҆ча́ѧ м̂ѧ. а҆ще можеши да́и же ми ѿвѣтъ, къ семꙋ потерпѝ и҆ ста́ни противꙋ мнѣ, и҆ а́зъ противꙋ тебе·

3

ѿ бренїѧ растворенъ е҆си ты̀, ꙗ҆́коже и҆ а́зъ ѿ тогоже растворенїѧ е҆сва̀, не стра́хъ мои тѧ смѧтетъ, ниже рꙋка̀ моѧ тѧж̑ка бꙋдетъ на тѧ, ѻ҆ба́че реклъ е҆си въ ѹ́ши моѝ, и҆ гласъ гл҃ъ твои҆хъ ѹ҆слышах̑, зане же гл҃еши чи́стъ е҆смь а҆зъ не съгрѣша́ѧ, непоро́чен же бх̑ѣ и҆ не безаконновахъ. зазор же на мѧ ѻ҆брѣте, и҆ мнитъ мѧ ꙗ҆́ко проти́вника себѣ. вложи́ же но́гꙋ мою въ древѣ, и҆ съхрани пꙋтѝ моѧ всѧ̀. ка́ко б̂о гл҃еши ꙗ҆ко пра́въ е҆смь, и҆ не послꙋша мене вѣченъ б̂о е҆сть и҆же надъ земными. гл҃еши же чесо ради правды моеѧ не ѹ҆слы́ша слово·

4

е҆ді́ною б̂о възгл҃етъ г҃ь, и҆ вторѣм꙽ же въ снѣ̀. и҆л̂и въ поѹ҆че́нїи но́щнѣм꙽, и҆л̂и ꙗ҆ко е҆гда напада́етъ стра́хъ лю́тъ на чл҃ки, на дрѣма́нїе на ложи тогда ѿкры́етъ ѹ҆ма чл҃ческаго, видѣньми стра́ха тацѣми ѹ҆страшивъ·

5

Възврати чл҃ка ѿ непра́вды, тѣло же е҆го ѿ напада́нїѧ и҆зба́ви. пощадѣ же дш҃ꙋ е҆го ѿ смр҃ти и҆ не пасти е҆мꙋ на ра́ти. паки же ѻ҆бличѝ болѣзнїю на ло́жи, и҆ мно́жество ко́сти е҆го ѻ҆сла́бивъ, всѧ́ко же бра́шно и҆ пшени́ца не возмо́же приꙗ҆́ти, а҆ дш҃а е҆го ꙗ҆́ди хо́щетъ. дондеже съгнїе́тъ плоть е҆го, и҆ пока́жетъ кости е҆го т꙽ща̀. приближитъ же сѧ на смр҃ть дш҃а е҆го, и҆ живо́тъ е҆го въ а́дъ. а҆ще бꙋдетъ ты́сꙋщь а҆́гг҃ли смр҃тоносцы, е҆ді́нъ ѿ нихъ не ѹ҆бꙋдетъ е҆го. а҆ще л̂и разꙋмѣ́етъ срд̑цемъ ѻ҆брати́тисѧ къ б҃ꙋ, повѣсть же чл҃кꙋ свои зазор̑҇, безако́нїѧ же е҆го пока́жетъ. и҆ застꙋпитъ и҆̀ не впа́сти е҆мꙋ въ смр҃ть ѻ҆бновитъ же тѣло е҆го, ꙗ҆́коже помаза́нїе на стѣнѣ. ко́сти же е҆го и҆сполнитъ мо́зга, ѹ҆мѧгчи́т же е҆го плоть ꙗ҆коже младенца, и҆ ѹ҆строи҆т же и҆̀ възмꙋжа́вша въ чл҃цѣх꙽ помо́ль же сѧ къ г҃ꙋ, и҆ прїѧ́тъ и҆мъ бꙋдетъ. внидет же лицемъ чи́стым̑ съ ѻ҆бѣщанїемъ. възда́сть же чл҃комъ правдꙋ, не сътворитъ ѹ҆бо влд̑ка ничто́же нелѣпо на ме́ншины. и҆мѣѧи над̑ всѣми ѻ҆дръжа́нїе, не возмѧтетъ пра́веднаго. и҆ всѣхъ творец꙽, не преѻ҆би́дит̑ свое҆го сътворе́нїѧ·

6

Посем же тогда зазритъ чл҃къ сам̑ себе гл҃ѧ ꙗ҆же сконча̀, и҆ недосто́ино мꙋчи м̂ѧ ꙗ҆́коже съгрѣших̑.

7

Сп҃си дш҃ꙋ мою не вни́ти въ и҆стлѣнїе, и҆ житїе мое свѣтъ ѹ́зритъ, и҆ с̂е все творитъ крѣпкїи, пꙋтїе три съ мꙋжемъ. н̂о и҆збави дш҃ꙋ мою ѿ смр҃ти, да животъ мои въ свѣтѣ хва́литъ и҆̀. внима́и си і҆́ѻве и҆ послꙋшаи мене и҆ премлъчи, и҆ а́зъ въз꙽гл҃ю. и҆ а́ще сꙋть словеса̀ с̂и ѿвѣща́и ми и҆ гл҃и, хощꙋ б̂о ѻ҆правдити тѧ. а҆ще л̂и н̂и, но послꙋшаи мене и҆ молчѝ, и҆ наѹ҆чю́ тѧ премꙋдрости·