Ostroh Bible❧Книга Йова, розділ 7

1

Не и҆скꙋше́нїе л̂и жи́тїе чл҃кꙋ на землѝ. и҆ ꙗ҆́коже м꙽зды̀ дн҃ь жи́знь е҆го, и҆л̂и ꙗ҆́коже ра́бъ боѧисѧ г҃а свое҆го и҆ лꙋчи въ сѣнь. и҆л̂и ꙗ҆́коже нае҆мник̑҇ жды́и м꙽зды̀ своеѧ. та́коже и҆ а́зъ стерпѣхъ мс̑҇ца т꙽ща̀, но́щи же бо́лѣзни да́ны ми сꙋть. а҆ще ѹ҆снꙋ̀ гл҃ю когда дн҃ь, е҆гда́ же въста́нꙋ паки когда ве́черъ. и҆спо́лнъ же болѣзни быва́ю ѿ ве́чера до ѹ҆́тра·

2

Мѧте́т же ми сѧ тѣло во гноѝ и҆ чръвехъ, таю́ же грꙋдїе землѧ̀ ѿ гно́а стрꙋжа̀. жи́тїе мое лжѣ̀ е҆сть бе́сѣды, поги́бе же вът꙽ще наде́жа. помѧни́ же ѹ҆бо ꙗ҆ко дх҃ъ ми живот̑, и҆ ктомꙋ̀ не възвратитсѧ ѻ҆́ко мое ви́дѣти бл҃го, не ѹ́зритъ ѻ́ко ви́дѧщаго м̂ѧ·

3

ѻ҆́чи твоѝ на мн̂ѣ и҆ ктомꙋ̀ нѣсмь. ꙗ҆коже ѻ҆́блакъ ѻ҆чищен̑҇ ѿ нб҃си, а҆ще б̂о чл҃къ сни́де въ а́дъ, ктомꙋ̀ не взы́идет̑, ни възвратит̑сѧ ктомꙋ въ свои дом̑, ни и҆́мать е҆го позна́ти ктомꙋ мѣсто е҆го·

4

И҆ аз̑ б̂о не пощажꙋ̀, ѹ҆сты̀ мои҆ми възъгл҃ю въ бѣдѣ сыи. ѿвръзꙋ го́ресть дш҃а ѻ҆держи́мꙋю. кое ѹ҆бо, море л̂и е҆сть и҆л̂и ѕмїи. ꙗ҆́ко ѹ҆чини́лъ е҆си на́ мѧ хране́нїе. реко́хъ, ꙗ҆́ко ѹ҆тѣшитъ м̂ѧ ѻ҆́дръ мои, и҆ вознесꙋ же к себѣ е҆ді́нъ слово на ло́жи моем̑. ѹ҆страша́еши м̂ѧ со́нїѧми, и҆ видѣнїемъ сна̀ прежаса́еши м̂ѧ·

5

И҆змѣни́ши ѿ дх҃а дш҃ꙋ мою, ѿ сме́рти же ко́сти моѧ. не поживꙋ̀ б̂о въ вѣки да длъготръплю̀ ѿстꙋпѝ ѿ менѐ, т꙽щѐ бо житїе мое. что б̂о е҆сть чл҃къ, ꙗ҆́ко възвели́чилъ е҆си е҆го, и҆л̂и ꙗ҆́ко внима̂еши ѹ҆момъ к немꙋ, и҆л̂и посѣще́нїе твори́ши е҆мꙋ до ѹ́тра, и҆ на поко́и е҆го сꙋдиши доко́лѣ не ѻ҆ста́виши мене, ниже предае́ши мѧ, до́ндеже пожрꙋ̀ сли́ны моѧ̀ въ бо́лѣзни·

6

А҆ще а҆зъ съгрѣши́хъ, что́ ти могꙋ съдѣла́ти. съвѣды́и ѹ҆мъ чл҃чь, почто́ мѧ е҆си положи́лъ противꙋ тебѣ. е҆смь же на́ тѧ бре́мѧ, и҆ почто̀ нѣси сътвори́лъ, безако́нїѧ мое҆го забы́ти, и҆ ѻ҆чище́нїе грѣха̀ мое҆го·

7

Нн҃ѣ же в зе́млю ѿи҆дꙋ, ѹ҆тренюѧ же нѣсмь ѹ҆же·