Ostroh Bible❧Книга Йова, розділ 8

1

Ѿвѣща же велда́дъ савхе́т꙽скїи гл҃ѧ. доко́лѣ гл҃еши сїѧ, дх҃ъ многогл҃ивъ въ ѹ҆стѣхъ твои҆хъ·

2

Є҆гда г҃ь ѻ҆бидитъ сꙋдѧ́и, и҆л̂и сътвори́выи вс̂е возметъ пра́вдꙋ·

3

и҆л̂и сн҃ове твоѝ съгреши́ша пред̑ ним̑, пꙋсти́лъ в рꙋцѣ и҆хъ безако́нїѧ их̑, ты́ же заѹ҆трѧ́и къ г҃ꙋ молѧ́сѧ·

4

А҆ще чистъ е҆си і҆ и́стиненъ, мл҃твꙋ твою ѹ҆слы́шитъ·

5

Ѹ҆строит꙽ же т̂и жи́тїе пра́вды, бꙋдꙋт꙽ же прьваѧ твоѧ ма́ла, послѣ́днѧѧ же твоѧ бес числа̀·

6

Въпросѝ ѹ́бо прьвыи и҆хъ ро́дъ, и҆слѣди же по ро́дꙋ ѿц҃ь. вчера́шнїи б̂о е҆смь и҆ не вѣмъ, сѣнь б̂о е҆сть по землѝ наше житїе, не л̂и сїѧ наѹ҆чи́тъ тѧ, и҆ възвѣстѧ́тъ т̂и ѿ срд̑ца і҆ и҆знест̑ꙋ словеса̀·

7

Є҆да ни́четъ рого́зъ без̑ воды̀, и҆л̂и расте́тъ вино безъ напое́нїѧ. е҆ще сꙋщее в ко́рени не по́жнетсѧ, прьвїе пи́тїѧ всѐ бы́лїе не и҆схне́тъ л̂и·

8

Та́ко ѹ҆бо бꙋдꙋтъ послѣднѧа всх̑ѣ, забыва́ющихъ г҃а. наде́жд̑а б̂о нечести́ваго поги́бнетъ, не ѹ҆селен꙽ б̂о бꙋдетъ до́мъ е҆го, паѹ҆чи́на же събꙋдетсѧ хра́мъ е҆го. а҆ще под̑пре́т꙽ хлѣвинꙋ̀ свою не ста́нетъ, и҆мет̑ же е҆мꙋ не сте́рпитъ. мо́кръ б̂о е҆сть слн҃цемъ, и҆ ѿ гно́ѧ е҆го лѣторасль и҆зыидетъ. на собо́рѣ ка́менїѧ спи́тъ, по́средѣ же до́брна ка́менїа поживе́тъ. а҆ще же и҆ пожрет̑ мѣсто солже́тъ е҆го, не вѣ́дѣ л̂и такова̀. ꙗ҆́ко развраще́нїе нечести́ва таково̀, ѿ землѧ́ же и҆́ного прозѧ́бнетъ·

9

Гь҃ б̂о не ѿринетъ незлоби́ваго, всего́ же да́ра нечести́ваго не прїимет̑. и҆́стин꙽на же ѹ҆ста̀ и҆спо́лнит̑ смѣха̀, ѹ҆стны́ же и҆хъ и҆сповѣда́нїѧ. вра́зи же и҆хъ ѻ҆блекꙋтсѧ въ стꙋдъ, жи́тїе же нечести́ваго не бꙋдетъ·