Ostroh Bible❧Книга пророка Малахії, розділ 3

1

Се̂ а҆зъ послю̀ а҆гг҃ла своего и҆ призритъ на пꙋть предъ лицемъ мои҆мъ. и҆ внеза́пꙋ прїидетъ въ цр҃ковь свою г҃ь е҆гоже в̂ы и҆́щете, и҆ а́гг҃лъ завѣта е҆гоже в̂ы хо́щете. с̂е прїидетъ гл҃етъ г҃ь вседръжи́тель, и҆ кт̂о потръпи́тъ дн҃ь прише́ствїа е҆го, и҆ кт̂о посто́итъ въ видѣнїи е҆го. зане сей въсхо́дитъ ꙗ҆́ко ѻ́гнь разваренїѧ, и҆ ꙗ҆́ко мы́ло перꙋщихъ. и҆ сѧ́детъ разварѧ́а и҆ ѻ҆цыщаѧ ꙗ҆́ко сребро и҆ ꙗ҆́ко зла́то. и҆ ѻ҆цы́ститъ сн҃ы левѷи҆ны, и҆ прелїетъ ѧ҆̀ ꙗ҆́ко зла́то и҆ ꙗ҆́ко сребро̀. и҆ бꙋ́дꙋтъ гв҃и приносѧ́ще жрътвꙋ въ пра́вдꙋ. и҆ го́дѣ бꙋдетъ гв҃и жрътва і҆ѹ́дова въ і҆ерс̑҇лимѣ ꙗ҆́коже дн҃и вѣка, и҆ ꙗ҆́коже лѣта пред̑нѧа. и҆ прїидꙋ к꙽ вамъ на сꙋдъ, и҆ бꙋдꙋ свѣдитель ско́ръ на прокази́телѧ, и҆ на прелюбодѣ́ица, и҆ на кленꙋщаѧсѧ и҆менемъ моим̑ въ л꙽жꙋ, и҆ на лиша́щаѧ м꙽зды нае҆мника, и҆ на насильствꙋ́ющаѧ вдови́ца, и҆ п꙽ха́ющаѧ си́рыѧ, и҆ на ѹ҆кланѧ́ющаѧ сꙋдъ прише́лца, и҆ на не боѧ́щаѧсѧ менѐ, гл҃етъ вседръжи́тель·

2

Занѐ а҆зъ гь б҃ъ вамъ и҆ не и҆змѣнѧ́юсѧ. и҆ в̂ы сн҃ы і҆а́ковли и҆ не съдръза́етесѧ ѿ грѣхъ ѿц҃ь вашихъ. ѹ҆клони́сте зако́ны моѧ и҆ не съхрани́сте. ѻ҆брати́тесѧ къ мнѣ̀ и҆ ѻ҆бращꙋсѧ къ вамъ, гл҃тъ г҃ь вседръжи́тель. и҆ рѣ́сте, ѻ҆ чесом̑ ѻ҆брати́мсѧ. е҆да̀ ѻ҆больща́етъ чл҃къ б҃а. занѐ в̂ы ѻ҆больсти́сте м̂ѧ. и҆ рѣ́сте, ѻ҆ чесомъ ѻ҆больсти́хомъ тѧ. ꙗ҆́ко десѧти́ны и҆ начат꙽цы с꙽ вами сꙋть, и҆ възира́юще в̂ы възира́ете на́ нѧ, и҆ мене б̂о ѻ҆больща́ете, лѣто с̂е и҆скон꙽ча́сѧ. и҆ внесо́сте вс̂ѧ тѧжа́нїѧ въ сокро́вища, и҆ расхище́нїе ни́щаго въ домы ваша. ѻ҆братите же сѧ ѻ҆ сем̑, гл҃етъ г҃ь вседръжи́тель. а҆ще не ѿверзꙋ вамъ хлѧ́бїи нбс̑҇ныхъ, і҆ и҆злїю вамъ блс̑҇ве́нїе мое до́ндеже ѹ҆довлите́сѧ. и҆ ра́зньствꙋ́ю вамъ въ бра́шна, и҆ не и҆мамъ и҆стли́ти вам̑ пло́дъ зе́мльных̑. и҆ не и҆мꙋть и҆знемощи ва́мъ виногра́ди се́лнїи, гл҃етъ г҃ь вседръжи́тель. и҆ ѹ҆бла́жатъ в̂ы вс̂и ꙗ҆зы́цы, занѐ бꙋдете в̂ы землѧ̀ и҆зволена, гл҃етъ г҃ь вседръжи́тель·

3

ѻ҆тѧжчи́сте на́ мѧ словеса ваша, гл҃етъ г҃ь вседръжи́тель. и҆ рѣсте, ѻ҆ чемъ ѻ҆клевета́хомъ на́ тѧ. рѣсте сꙋетенъ работаѧ́й б҃ꙋ. и҆ чт̂о бо́лѣ ꙗ҆́ко съхрани́хомъ съхране́нїѧ е҆го. и҆ занѐ поидо́хомъ мл҃твеницы пред̑ лицемъ г҃а вседръжи́телѧ. и҆ нн҃ѣ мы блажи́мъ чю́ждихъ, и҆ възижда́ютсѧ вс̂и творѧ́щеи везако́нїе. противи́шасѧ бв҃и, и҆ спаслисѧ сꙋть. с̂е ѻ҆клевета́ша боѧ́щаасѧ г҃а ко́ждо къ и҆скренемꙋ свое҆мꙋ, и҆ внѧ́тъ г҃ь, и҆ ѹ҆слы́ша. и҆ написа кни́ги па́мѧтїи пред̑ собо́ю боѧ́щим̑сѧ г҃а и҆ говѣ́ющимъ и҆мени е҆го. и҆ бꙋдт̑ꙋ м̂и гл҃етъ г҃ь вседержи́тель, въ дн҃ь ѻ҆́нъ и҆же а҆зъ сътворю в꙽ посꙋжде́нїе, і҆ и҆зво́лю ѧ҆̀ ꙗ҆́коже и҆зволѧ́етъ чл҃къ сн҃ъ свои до́брѣ рабо́тающь е҆мꙋ·

4

И҆ ѻ҆брати́тесѧ и҆ ви́дите междꙋ пра́вед̑нома, и҆ междꙋ непра́вед̑никꙋ. и҆ междꙋ слꙋжа́щима бв҃и, и҆ междꙋ не рабо́тающаѧ е҆мꙋ·