Ostroh BibleЄвангеліє від св. Матвія, розділ 1
Шрифт:
Запис:
1
зач̑҇, а҃.
2
Кни́га род̑ства і҆ѵ҃ хв҃а, сн҃а дввд̑а, сн҃а а҆враа́млѧ·
3
А҆враа́мъ родѝ і҆саа́ка·
4
І҆саак же родѝ і҆а́кова·
5
і҆а́ков же родѝ і҆ѹ́дꙋ и҆ бра́тїю е҆го·
6
І҆ѹ́да же родѝ фареса и҆ за́ра, ѿ ѳама́ры·
7
фаре́с же родѝ е҆сро́ма·
8
е҆сро́м же родѝ а҆ра́ма·
9
а҆ра́м же родѝ а҆минада́ва. а҆минада́в же родѝ наа҆ссо́на. наа҆ссо́н же родѝ салмо́на·
10
салмо́н же родѝ въѻ́за, ѿ раха́вы. воѻ́з же родѝ ѻ҆ви́да ѿ рꙋѳы·
11
ѻ҆вид̑ же родѝ і҆ессе́а. і҆е҆ссеиж̑ родѝ дв҃да цр҃ѧ·
12
двд̑ъ же цр҃ь родѝ соло́мона, ѿ ѹрїины.
13
Соло́мон же родѝ ровоа́ма·
14
ровоа́м же род̑и̑ а҆ві́а. а҆вїа же родѝ а҆́сса. а҆́сса же родѝ і҆ѻ҆сафата. і҆ѻ҆сафа́т же родѝ і҆ѻ҆ра́ма·
15
І҆ѻ҆ра́м же родѝ ѻ҆зі́ю. ѻ҆зі́а же родѝ і҆ѻ҆аѳа́ма·
16
і҆ѻ҆а҆ѳам̑ же родѝ а҆ха́за. а҆хаз же родѝ е҆зекію. е҆зекі́а же родѝ манасїю·
17
Манасїа же родѝ а҆мо́на·
18
а҆мо́н же род̑и̑ і҆ѻ҆сїю. і҆ѻ҆сїа же родѝ е҆хонїю, и҆ братїю е҆го, въ преселе́нїе вавѷло́нское·
19
По преселе́нїи же вавѷло́нстѣмъ, і҆е҆хонїа родѝ, салаѳїилѧ. салаѳїиль же род̑и̑ зороваве́лѧ. зороваве́л же родѝ, а҆виѹ́да·
20
а҆виѹ́д же родѝ е҆лїакі́ма·
21
е҆лиакі́м же роди а҆зора. а҆зо́р же родѝ садо́ка·
22
садо́к꙽ же родѝ а҆хі́ма. а҆хи́м же родѝ е҆лиѹ́дꙋ. е҆лиѹ́д же род̑и̑ е҆леа҆за́ра·
23
е҆леа҆за́р же родѝ матѳа́на. мат̑ѳа́н же родѝ і҆а́кова·
24
і҆а́ков же родѝ і҆ѻ́сифа, мꙋжа мр҃їина, і҆з неа́же родис́ѧ і҆с҃ гл҃емыи х҃с·
25
Всѣх꙽ же родо́въ ѿ а҆враа́ма до дв҃да, родове четы́ринадесѧте·
26
І҆ ѿ дв҃да до преселе́нїа вавѷло́ньскаго, родове четы́рина́десѧте·
27
И҆ ѿ преселе́нїа вавѷлоньскаго до х҃а, ро́дове четы́ринадесѧте·
28
зач̑҇, в҃·
29
І҆ѵ҃ хв҃о рожд̑ество, си́це б̂ѣ·
30
ѻ҆брꙋченѣ ѹ҆бо бы́вши мт҃ри е҆го мр҃їи, і҆ѻ҆́сифови, пре́же даже не сни́тисѧ и́ма, ѻбрѣтесѧ и҆мꙋ́щи въ чревѣ ѿ дх҃а ст҃а·
31
і҆ѻ́сиф же мꙋжъ еа̀ пра́веденъ сыѝ, и҆ не хотѧ еа̀ ѻ҆бличи́ти, въсхотѣ та́и пꙋсти́ти ю҆̀·
32
Сіа́ же е҆мꙋ помы́слившꙋ, с̂е а҆́гг҃лъ гн҃ь въ снѣ̀ ꙗ҆ви́сѧ е҆мꙋ̀, гл҃ѧ, і҆ѻ́сифе сн҃ꙋ двд̑въ, не ѹ҆бо́исѧ прїа́ти мр҃їа́мъ жены твоеа̀·
33
Рожд̑ьшее б̂о сѧ в не́и, ѿ дх҃а е҆сть ст҃а·
34
родит̑ же сн҃а, и҆ нарече́ши и҆мѧ е҆мꙋ̀ і҆с҃. то́и б̂о сп҃се́тъ лю́ди своѧ̀ ѿ грѣхъ их̑. се́ же вс̂е бы́сть, да събꙋ́детсѧ рече́ное ѿ г҃а прро̑҇комъ гл҃ющимъ·
35
с̂е дв҃аа въ чревѣ прїи́метъ, и҆ роди́тъ сн҃а, и҆ нарекꙋтъ и҆мѧ е҆мꙋ̀ е҆мманꙋи҆лъ, е҆же е҆сть сказа́емо с на́ми б҃ъ·
36
въста́в꙽ же і҆ѻ́сифъ ѿ сна̀, сътворѝ ꙗ҆́коже повелѣ̀ е҆мꙋ̀ а҆́гг҃лъ гн҃ь. и҆ прїат̑ женꙋ̀ свою̀ и҆ не знаа́ше еѧ̀, до́ндеже родѝ сн҃а свое҆го первенца̀, и҆ наречѐ и҆мѧ е҆мꙋ і҆с҃·
Джерела
