Ostroh BibleЄвангеліє від св. Матвія, розділ 2
Шрифт:
Запис:
1
зач̑҇, г҃·
2
Ис҃ꙋ же ро́жд̑ьшꙋсѧ въ ѳлее҆мѣ и҆ѹ҆дѣ́истѣмъ, въ дн҃и и҆́рода цр҃ѧ·
3
Се̂ влъ́сви ѿ въсто́къ прїидо́шѧ въ і҆е҆рс̑҇ли́м꙽ гл҃юще, гдѣ̀ е҆сть рожд̑еѝсѧ цр҃ь и҆ю҆де́искы́и;
4
Видѣ́хомъ б̂о ѕвѣздꙋ е҆го на въсто́цѣ, и҆ прїидо́хомъ поклони́тисѧ е҆мꙋ·
5
слы́шав꙽ же и́род̑ цр҃ь, смꙋтисѧ, и҆ вс̂ѧ і҆е҆рс̑҇ли́ма с нимъ. и҆ събравъ вс̂ѧ пръ́восщ҃е́нникы, и҆ кни́жникы люд̑скыѧ̀, въпраша́ше ѿ них̑, гдѣ̀ х҃с ражд̑а́е҆тсѧ; ѻ҆ни же реко́ша е҆мꙋ̀, въ виѳлее́мѣ і҆ѹ҆дѣ́истм̑ѣ.
6
Та́ко б̂о пи́сано е҆сть прро̑҇комъ. и҆ т̂ы виѳлее́мъ земле і҆ѹ́дова, ничи́мже менши е҆си въ влд̑кахъ і҆о́у҆довахъ·
7
и҆с тебѐ б̂о и҆зы́дет꙽ вожд̑ь, и҆же ѹ҆пасет̑ лю́ди моѧ̀ і҆и҃лѧ·
8
Тогда̀ и҆род̑ та́и призва̀ влъхвы, и҆ і҆спытоваше ѿ нихъ вре́мѧ ꙗ҆́влъшаасѧ ѕвѣзды̀. и҆ посла́в꙽ и҆хъ въ виѳлеем̑, речѐ. шед̑ше, и҆спыта́ите и҆звѣ́стно ѻ҆ ѻ҆троча́ти·
9
е҆гда же ѻ҆брѧ́щете, възвѣсти́те м̂и. ꙗ҆́ко да и҆ а́зъ шед̑ поклонюсѧ е҆мꙋ·
10
ѻ҆ни же послꙋшавше царѧ̀, и҆до́шѧ·
11
и҆ се ѕвѣзда̀ ю҆̀же видѣшѧ на въсто́цѣ, и҆дѧ́ше прд̑е ни́ми. до́ндеже пришед̑ши ста̂ връхꙋ̀ и҆дѣже б̂ѣ ѻ҆троча̀. ви́дѣв꙽ше же ѕвѣзд̑ꙋ, възра́довашѧс̑҇ ра́достїю ве́лїею ѕѣло̀.
12
И҆ пришед̑ше въ хра́минꙋ видѣшѧ ѻ҆троча̀ с марїею ма́терїю его. и҆ падъше поклони́шасѧ е҆мꙋ·
13
и҆ ѿвръзше съкро́вищѧ своѧ̀, принесо́шѧ е҆мꙋ да́ры. злато, и҆ лива́нъ, и҆ сми́рнꙋ, и҆ вѣ́сть прїемше въ снѣ не възврати́тисѧ къ и́родꙋ·
14
и҆нѣм꙽ пꙋтем̑ ѿи҆до́ша въ странꙋ свою̀·
15
зач̑҇ д·
16
Ѿшед̑шим же и҆́мъ, с̂е а҆́гг҃лъ гн҃ь въ снѣ ꙗ҆ви́сѧ і҆ѻ́сифꙋ гл҃ѧ, въста́въ поимѝ ѻ҆тро́ча и҆ мт҃ре е҆го, и҆ бѣжи въ е҆гѷпет꙽. и҆ бꙋ́ди та́мо, до́ндеже рекꙋ т̂и. хощетъ б̂о и҆род̑ и҆ска́ти ѻ҆троча́те да погꙋбит̑ е҆̀·
17
ѻ҆́н же въста́въ, поѧ҆тъ ѻ҆троча̀ и҆ мт҃ре е҆го но́щїю, и҆ ѿиде въ е҆гѷпет̑. и҆ бѣ та́мо до ѹ҆ме́ртїа и҆́родова·
18
да събꙋ́детсѧ рече́но́е ѿ г҃а прро̑҇комъ гл҃ющемъ, ѿ егѷпта възвах̑ сн҃а мое҆го·
19
Тогда̀ и҆род̑ видѣвъ ꙗ҆ко порꙋга́нъ быс̑҇ ѿ влъ́хвъ, разгнѣвасѧ ѕѣло̀·
20
и҆ посла́въ, и҆збѝ вс̂ѧ дѣти, сꙋщаѧ̀ въ виѳлее́мѣ, и҆ въ всѣх꙽ предѣ́лехъ е҆го, ѿ двою̀ лѣтꙋ и҆ нижа́иша, по́ времени е҆же и҆звѣстно и҆спыта̀ ѿ влъ́хвъ·
21
Тогда̀ сбы́стьсѧ рече́ное и҆е҆ремїемъ прро̑҇комъ гл҃ющемъ, глс̑҇а в р́амѣ слы́шанъ бысть, пла́чь и҆ рыда́нїе и҆ во́пль мно́гъ. рахи́ль пла́чющисѧ чѧдъ свои҆хъ, и҆ не хотѧ́ше ѹтѣшитисѧ, ꙗ҆́ко нѣ сꙋт꙽·
22
ѹ҆мръшꙋ же и҆́родꙋ. с̂е а҆гг҃лъ гн҃ь въ снѣ ꙗви́сѧ и҆ѻ́сифꙋ въ е҆гѷптѣ, гл҃ѧ. въста́въ поимѝ ѻ҆троча̀ и҆ мт҃ре е҆го, и҆ и҆дѝ в землю і҆и҃левꙋ. и҆з꙽мро́шѧ б̂о и҆щꙋщеѝ дш҃ꙋ ѻ҆троча́те·
23
ѻ҆́н же въставъ, поѧ́тъ ѻ҆троча̀ и҆ мт҃ре е҆го, и҆ прїиде в землю і҆и҃левꙋ·
24
Слы́шав꙽ же ꙗ҆́ко а҆рхела́и црс̑҇твꙋе҆тъ въ і҆ѹ҆де́й в мѣсто ирода ѿц҃а свое҆го̀, ѹ҆боѧ́сѧ та́мо и҆ти. вѣсть же прїе́мъ въ снѣ̀ ѿи́де въ пре́дѣлы галиле́искїа. и҆ пришд̑е всели́сѧ въ́ градѣ нарица́емѣмъ назеретъ ꙗ҆́ко да сбꙋдетсѧ рече́ное прро̑҇кы, ꙗ҆́ко назоре́и наречетсѧ·
Джерела
