Ostroh BibleЄвангеліє від св. Матвія, розділ 10
Шрифт:
Запис:
1
зач̑҇·
2
И призвавъ ѻ҆́бана́десѧте ѹ҆ченика своѧ̀, дастъ и҆мъ власть на дꙋсѣх꙽ нечи́стых̑, ꙗ҆ко да и҆зго́нѧт̑ и҆хъ, и҆ сцѣлити всѧкъ недꙋгъ и҆ всѧкꙋ болѣзнь·
3
дванадесѧтим̑ же а҆плс̑҇омъ и҆мена̀ сꙋтъ сїа̀. пе́рвыи си́монъ и҆же нарица́етсѧ петръ, и҆ а҆ндре́а брат꙽ е҆го. и҆а́ковъ зеведе́ѻ҆въ, и҆ і҆ѻа́ннъ брат̑ е҆го. фили́ппъ, и҆ варѳоломе́и. ѳома̀, и҆ матѳе́и мытарь. і҆а́ковъ а҆л꙽феѻ҆въ, и҆ келеве́и нареченыи фад̑де́и. сі́мон꙽ кананитъ, и҆ і҆ѹ́да и҆скариѻ́тъскїи и҆же и҆ предастъ е҆го.
4
Сїа̀ ѻ҆́бана́десѧте посла̀ і҆с҃ заповѣ́давъ и҆мъ гл҃ѧ. на пꙋть ѧ҆зы́къ не и҆дѣте, и҆ въ градъ самарѧ́нскыи не внидѣте. и҆дѣте же паче къ ѻ҆вцѧмъ поги́бшим̑ до́мꙋ і҆ил҃ева·
5
ходѧ́ще же проповѣ́дꙋите, гл҃юще, ꙗ҆́ко прибли́жисѧ црс̑҇твїе нбс̑҇ное·
6
болѧ́щаа и҆сцѣлите, прокаже́ныа ѻ҆чища́ите, мр҃твыа в꙽скр҃шаите, бѣ́си и҆згоните. тꙋ́не прїа́сте, тꙋ́не дади́те·
7
зач̑҇, л҃е·
8
Не стѧжи́те зла́та, нѝ сребра, нѝ мѣди при поѧсѣхь ваших̑. ни пи́ры на пꙋти, ни двою ризꙋ, н̂и сапогъ, н̂и же́злъ. досто́инъ б̂о е҆сть дѣ́латель м꙽зды своеа̀·
9
Во́нже а҆ще коли́жд̑о грд̑а и҆л̂и весь вни̂дете, и҆спыта́ите кт̂о в немъ досто́инъ е҆сть, и҆ т̂ꙋ пребꙋдѣте дондеже и҆зы́дете·
10
входѧще же в до́мъ, цѣлꙋ́ите е҆го. гл҃юще ми́ръ до́мꙋ семꙋ. и҆ а҆ще ѹ҆бо бꙋ́детъ до́мъ досто́инъ, прїидет̑ ми́ръ ва́шъ нань. а҆ще ли же не бꙋ́детъ досто́инъ, мир꙽ ва́шъ к вам꙽ възврати́тсѧ·
11
и҆ і҆́же а҆ще не прїимет꙽ васъ, ниже послꙋшаетъ словесъ ва́шихъ, и҆сходѧ́ще и҆з꙽ домꙋ, и҆лѝ и҆з града того, ѿтрѧсѣте пра́хъ но́гъ ва́шихъ·
12
а҆минь гл҃ю ва́мъ, ѿрад̑нѣе бꙋ́детъ земли содом̑стѣ и҆ гоморстѣи в꙽ дн҃ь сꙋдныи, неже гра́дꙋ томꙋ·
13
зач̑҇, л҃ѕ·
14
Се̂ а҆́зъ посыла́ю вас̑҇ ꙗ҆́ко ѻ҆вцѧ посредѣ влъ́ковъ. бꙋдѣте ѹ҆бо мꙋдри ꙗ҆́ко змїа, и҆ цѣли ꙗ҆ко голꙋбїе·
15
Внемлѣте же ѿ чл҃къ. предадѧт꙽ б̂о в̂ы на со́нмы, и҆ на собо́рищих̑ и҆хъ бїю́тъ вас̑҇. предъ влд̑кы же и҆ цр҃ѧ веде́ни бꙋ́дете, менѐ ради. въ свѣдѣтельство и҆мъ, и҆ ѧ҆зы́комъ. е҆гда же предаю́тъ в̂ы, не пецѣтесѧ, како и҆лѝ чт̂о възгл҃ете. дасть бо сѧ вамъ в то́и часъ, чт̂о въз꙽гл҃ете. не вы б̂о бꙋдете гл҃ющеѝ, н̂о дх҃ь ѿц҃а ва́шего гл҃ѧѝ в꙽ вас꙽. предастъ же братъ бра́та на смр҃ть, и҆ ѿц҃ъ ча́до. и въста́нꙋтъ чѧда на родителѧ, и҆ ѹ҆бїютъ и҆хъ. и҆ бꙋдете ненави́дими всѣми, и҆́мени мое҆го рад̑и̑. претръпѣвыи же до конца то́и сп҃сенъ бꙋдетъ·
16
зач̑҇, л҃з·
17
Є҆́гда же го́нѧтъ в̂ы въ́ градѣ семъ, бѣгаите в꙽ дрꙋгїи. а҆минь б̂о гл҃ю вам̑, не и́мате скончати гра́ды і҆и҃левы, дон꙽деже прїидетъ сн҃ь члчс̑҇кїи·
18
Нѣсть ѹ҆ченикъ над꙽ ѹ҆чи́телемъ своимъ, ниже рабъ, над̑ господиномъ свои҆мъ. до́влетъ ѹ҆ченикꙋ, да бꙋ́детъ ꙗ҆́ко ѹ҆чи́тель его, и҆ рабъ, ꙗ҆́ко г҃ь е҆го·
19
А҆ще господина до́мꙋ веелзевꙋла нареко́шѧ, ко́лми паче домашнѧа̀ е҆го; не ѹ҆бо́итесѧ ѹ҆бо и́хъ. ничт̂оже бо е҆сть покровено, е҆же не ѿкры́етсѧ. и҆ та́ино, е҆же не ѹ҆вѣ́дѣно бꙋ́детъ·
20
Є҆же гл҃ю ва́мъ въ тмѣ, рцѣте въ свѣтѣ. и҆ е҆же въ ѹ҆́ши слы́шите, проповѣ́дите въ кровѣхъ. и҆ не ѹ҆боитесѧ ѿ ѹ҆бива́ющих тѣ́ло, дш҃ꙋ же не могꙋщих꙽ ѹ҆бити. ѹ҆бои́те же сѧ паче могꙋщаго и҆ дш҃ꙋ и҆ тѣ́ло погꙋбїти в꙽ гее́ннѣ·
21
не двѣ́ ли птици цѣни́тасѧ е҆ді́номꙋ а҆ссарїю; и҆ ни еді́на ѿ нею падетъ на земли без̑ ѿц҃а ва́шего. ва́м же и҆ власи главнїи вс̂и и҆зъчтени сꙋть. не ѹ҆бо́итес̑҇ ѹ҆бо, мно́ѕх̑ѣ пти́цъ лꙋ́чши е҆сте в̂ы·
22
зач̑҇ л҃и·
23
Всѧкъ ѹ҆бо и҆же и҆сповѣ́сть мѧ пред꙽ чл҃кы, и҆сповм̑ѣ е҆го и҆ а҆з꙽ пред̑ ѿц҃ем꙽ моим̑, и҆же на нб҃сех꙽. а҆ и҆же ѿвръжет̑сѧ мене пред̑ чл҃кы, ѿвръгꙋсѧ е҆го и҆ а́зъ прд̑е ѿц҃емъ моим̑, и҆же на нб҃сехъ·
24
Не мните ꙗ҆ко прїидох꙽ въврещи ми́ръ на землю. не прїидох̑ бо въврещѝ мирь, н̂о мечь. прїидох̑ б̂о разлꙋчити чл҃ка на ѿц҃а свое҆го, и҆ дще́ре на мт҃ре свою̀. и҆ невѣстꙋ на свекро́вь свою̀. и҆ вра́ѕи чл҃кꙋ дома́шнїи е҆го·
25
зач̑҇, л҃ѳ·
26
И҆́же лю́бит̑ ѻ҆ц҃а и҆ли мт҃ре паче мене, нѣ́сть менѐ досто́инъ. и҆ і́же лю́бит̑ сн҃а и҆ли дщере паче менѐ, нѣсть мене досто́инъ. и҆ і́же не прїимет̑ крс̑҇та свое҆го, и҆ в꙽ слд̑ѣ мене грѧ́дет̑, нѣсть мене досто́и҆нъ·
27
Ѡ҆брѣтыѝ дш҃ꙋ свою̀, погꙋбит̑ ю҆̀. а҆ и́же погꙋбиит̑ дш҃ꙋ свою̀ мене рад̑и̑, ѻ҆брѧщет̑ ю҆̀.
28
И҆же ва̀съ прїе́млет̑, менѐ прїемлет̑. и҆ і́же прїемлет꙽ мене, прїемлет̑ посла́вшаго м̂ѧ. прїемлѧѝ пророка въ и҆мѧ прро̑҇че, м꙽здꙋ прро̑҇чю прїимет꙽. и҆ прїемлѧѝ правд̑еника въ и҆мѧ пра́вед̑ниче, м꙽здꙋ пра́ведничю прїимет꙽·
29
І҆ и́же а҆ще напоит̑ е҆ді́ного ѿ малыхъ сих̑ ча́шꙋ стꙋденꙋ̀ во́дꙋ, токмо въ и҆мѧ ѹ҆чн҃ка. а҆ми́нь гл҃ю вам̑, не погꙋбит̑ м꙽здꙋ свою̀·
Джерела
