Ostroh Bible❧Євангеліє від св. Матвія, розділ 18

1

зач̑҇, о҃д·

2

В то́и часъ пристꙋпишѧ ѹ҆чн҃цы къ і҆с҃ꙋ гл҃юще. кто ѹ҆бо бо́лїи е҆сть в꙽ црс̑҇твїи нбс̑҇нѣмъ; и҆ призвавъ і҆с҃ ѻ҆троча̀, поста́ви е҆̀ посредѣ их̑, и҆ рече·

3

А҆минь гл҃ю вамъ, а҆ще не ѻ҆братите́сѧ, и҆ бꙋ́дете ꙗ҆́ко дѣти, не вни́дете в꙽ црс̑҇тво нбс̑҇ное. и҆же б̂о сѧ смѣритъ ꙗ҆ко ѻ҆троча с̂е, то́и е҆сть болїи в꙽ црс̑҇твїи нбс̑҇нѣмъ·

4

І҆ и҆же а́ще прїиметъ ѻ҆троча таково̀ въ и҆мѧ моѐ, менѐ прїе́млет꙽. а҆ и҆же а҆ще събла́знитъ е҆диного малыхъ сихъ вѣ́рꙋющихъ в м̂ѧ, ѹ҆́не е҆мꙋ е҆сть, да ѻ҆бѣ́ситсѧ жръновъ ѻ҆се́льскыи на выѝ е҆го, и҆ пото́нетъ в пꙋчи́нѣ морстѣи. го́ре ми́рꙋ ѿ събла́знъ. нꙋж́да бо е҆сть прїити събла́зном꙽. ѻ҆ба́че го́ре чл҃кꙋ томꙋ̀, и҆́мже събла́знъ прихо́дит·

5

Аще л̂и рꙋка твоа̀ и҆лѝ нога твоа̀ съблажнѧ́етъ тѧ. ѿсѣци ю҆̀, и҆ врьзи ѿ себѐ. добрѣише т̂и е҆сть вни́ти в живот̑ хро́мꙋ, и҆лѝ бѣ́днꙋ. не́жели двѣ рꙋцѣ и҆ двѣ ноѕѣ и҆мꙋщꙋ, в꙽верженꙋ бы́ти въ ѻ҆́гнь вѣ́чныи·

6

И҆ а́ще ѻ҆́ко твоѐ съблажнѧ́етъ тѧ, и҆зми е҆̀, и҆ врьзи ѿ себѐ. добрѣ́ише ти е҆сть съ е҆ді́нѣмъ ѻ҆́комъ в живо́тъ вни́ти, не́же двѣ ѻ҆́цѣ и҆мꙋщꙋ в꙽ве́рженꙋ бы́ти в гее́нꙋ ѻ҆́гненꙋю·

7

зач̑҇, о҃е·

8

Блюдѣте, да не пре́зрите е҆ді́ного ѿ ма́лыхъ сих̑·

9

Гл҃ю б̂о ва́мъ ꙗ҆́ко а҆́гг҃ли и҆хъ на нб҃сѣхъ вы́нꙋ ви́дѧтъ лицѐ ѿц҃а мое҆го нбс̑҇наго·

10

Прїиде б̂о сн҃ь чл҃чьскїи взыска́ти и҆ спс̑҇ти погы́бшаго·

11

Что сѧ вамъ мнитъ; а҆ще бꙋ́детъ нѣ́кое҆мꙋ чл҃кꙋ, сто̀ ѻ҆ве́цъ, и҆ заблꙋдитъ е҆ді́на ѿ нихъ. не ѻ҆ста́вит̑ л̂и девѧтьдесѧтъ и҆ девѧть въ горах̑, и҆ ше́дъ и҆́щетъ заблꙋжд̑ьшеѐ; и҆ а́ще бꙋ́детъ ѻ҆брѣсти ю҆̀. а҆ми́нь гл҃ю вам̑. ꙗ҆́ко радꙋетсѧ ѻ҆ не́и, па́че, неже ѻ҆ девѧтьдесѧ́тихъ и҆ девѧть не заблꙋж꙽шихъ·

12

Та́ко нѣсть во́лѧ пред̑ ѿц҃ем꙽ вашимъ нбс̑҇нымъ, да погы́бнетъ е҆ді́нъ ѿ ма́лыхъ сихъ·

13

А҆́ще съгрѣшитъ к тебѣ брат̑ твои, и҆дѝ і҆ ѻ҆бличѝ е҆го межд̑ꙋ собо́ю и҆ тѣмъ е҆ді́нѣмъ·

14

А҆́ще тебѐ послꙋшаетъ, приѻ҆брѣ́лъ е҆си бра́та твое҆го. а҆́ще ли тебѐ не послꙋшаетъ, пои҆ми с꙽ собо́ю па́кы е҆ді́ного и҆ли дв̂а, да при ѹ҆стх̑ѣ двою̀ и҆ли трїехъ свѣдѣтелїи ста́нет̑ всѧкъ гл҃ъ·

15

А҆ще же не послꙋшаетъ и҆хъ, повѣжд̑ь цр҃кви·

16

а҆ще же и҆ цр҃ковь преслꙋшаетъ, бꙋди т̂и ꙗ҆́ко ꙗ҆́зы́чникъ и҆ мыта́рь·

17

зач̑҇, о҃ѕ·

18

А҆́минь б̂о гл҃ю вамъ, е҆ли́ка а҆́ще свѧ́жете на земли, бꙋ́дꙋтъ свѧ́зана на нб҃си. и҆ е҆ли́ка а҆ще разрѣшитѐ на земли, бꙋдт̑ꙋ разрѣше́на на нб҃сех̑·

19

Па́кы а҆ми́нь гл҃ю вамъ. ꙗ҆́ко а҆ще два ѿ васъ совѣща́ета на земли, ѻ҆ всѧ́кои вещи е҆же а҆ще про́сита, бꙋдетъ и҆́ма ѿ ѻ҆ц҃а мое҆го и҆же на нб҃сех̑·

20

И҆дѣже бо е҆ста дв̂а и҆ли трїе со́брани въ и҆мѧ моѐ, т̂ꙋ е҆смь посредѣ и҆хъ·

21

Тогда̀ пристꙋ́пль к немꙋ петръ, рече. г҃и, коль краты а҆ще съгрѣшитъ в꙽ м̂ѧ брат̑ мои, и҆ ѿпꙋщꙋ е҆мꙋ; до сед̑мь кратъ ли; гл҃а е҆мꙋ і҆с҃, не гл҃ю тебѣ до сед̑мь кратъ. н̂о до сед̑мьдесѧтъ кратъ сед̑ми́цею·

22

зач̑҇, о҃з·

23

Сего ради ѹ҆подобисѧ црс̑҇твїе нбс̑҇ное чл҃кꙋ цр҃ю, и҆же въсхотѣ̀ стѧза́ти сѧ ѻ҆ словесѝ с рабы̀ свои́ми. наче́ншꙋ же е҆мꙋ стѧза́тисѧ, приведоша е҆мꙋ е҆ді́ного длъжника тмою тала́нтъ. не и҆мꙋщꙋ же е҆мꙋ въздати, повелѣ и҆̀ г҃ь е҆го продати, и҆ женꙋ е҆го и҆ чѧ́да, и҆ вс̂ѧ е҆ли́ка и҆мѧ́ше, и҆ ѿдати·

24

Пад̑ ѹ҆бо рабъ то́и кла́нѧшесѧ е҆мꙋ гл҃ѧ. г҃и, потрьпи на мнѣ, и҆ вс̂ѧ т̂и въздамъ·

25

Млс̑҇рдовавь же г҃ь раба того, простѝ е҆го, и҆ длъгъ ѿпꙋстѝ е҆мꙋ·

26

И҆зшед̑ же рабъ то́и, ѻ҆брѣте е҆ді́ного клеврѣтъ свои҆хъ, и҆же б̂ѣ длъженъ е҆мꙋ ст̂о пѣнѧѕь. и҆ е҆мъ е҆го давлѧ́ше гл҃ѧ. ѿдажд̑ь м̂и и҆мьже м̂и е҆си длъженъ. па́дъ ѹ҆бо клеврѣтъ е҆го на ноѕѣ е҆го, молѧше е҆го гл҃ѧ. потрьпи на мнѣ, и҆ вс̂ѧ въздам꙽ т̂и. ѻ҆нъ же не хотѧше, н̂о ведъ всади е҆го в темни́цꙋ, дондеже въздасть длъжно́е·

27

Видѣвше же клевре́ти е҆го бывшаѧ, съжа́лиша с̂и ѕѣло, и҆ пришед̑ше сказа́шѧ господинꙋ свое҆мꙋ вс̂ѧ бывшаѧ·

28

Тогда̀ призвавъ е҆го господинъ е҆го, гл҃а е҆мꙋ·

29

Ра́бе лꙋка́выи, весь длъгъ ѻ҆нъ ѿпꙋстихъ тебѣ, понеже ѹ҆молѝ м̂ѧ. не подоба́ше л̂и и҆ тебѣ поми́ловати клеврѣта свое҆го, ꙗ҆́коже и҆ а҆зъ т̂ѧ поми́ловахъ; и҆ прогнѣвавъсѧ г҃ь е҆го, предасть е҆го мꙋчи́телемъ, дондеже въздасть весь длъгъ свои·

30

Тако и҆ ѿц҃ь мои нбс̑҇ныи сътворитъ вамъ, а҆ще не ѿпꙋститѐ кождо братꙋ свое҆мꙋ ѿ срд̑цъ ваших꙽ прегрѣшенїа и҆́хъ·