Ostroh Bible❧Євангеліє від св. Матвія, розділ 28

1

зач̑҇. ре҃і·

2

Въ вечер же сꙋбо́тныи, свитающи въ е҆ді́нꙋ ѿ сꙋботъ, прїиде ма́рїа магдалы́ни, и҆ дрꙋга́а ма́рїа, ви́дѣти гробъ. и҆ се трꙋсъ бысть ве́лїи. а҆гг҃лъ б̂о гн҃ь съшед̑ с нб҃се, пристꙋ́пль ѿвалѝ ка́мень ѿ дверїи гро́ба, и҆ сѣдѧ́ше на немъ. бѣ же зра́къ е҆го ꙗ́ко мл́ънїи, и҆ ѻ҆дѣа́нїе е҆го бѣло ꙗ҆́ко снѣгъ·

3

ѿ страха же е҆го сътрѧсо́шасѧ стрегꙋщеѝ, и҆ бы́шѧ ꙗ҆́ко мерътви. ѿвѣщав же а҆гг҃лъ, рече женамъ. не бо́итесѧ в̂ы. вѣмъ б̂о, ꙗ҆́ко і҆с҃а распѧтаго и҆́щете. нѣсть зд̂ѣ. в꙽ста̀ б̂о, ꙗ҆́коже рече. прїидѣте. ви́дите мѣ́сто, и҆деже лежа̀ г҃ь. и҆ скоро шед̑ше, рцѣте ѹчн҃комъ е҆го, ꙗ҆́ко въста̀ ѿ мр҃твых꙽, и҆ с̂е варѧе҆тъ в̂ы в꙽ галиле́ѝ, та́мо е҆го ѹ҆зрите. с̂е рѣхъ вамъ·

4

І҆ и҆зшед̑ше ско́ро ѿ гроба съ страхомъ, и҆ радостїю ве́лїею, теко́стѣ възвѣсти́те ѹ҆чн҃ком꙽ е҆го. ꙗ҆́коже и҆дѧсте възвѣстити ѹ҆чн҃ком̑ е҆го и҆ с̂е і҆с҃ срѣте ѧ҆̀, гл҃ѧ, радꙋитесѧ·

5

ѻ҆нѣже пристꙋ́пльши, ꙗ҆стѣсѧ за ноѕѣ е҆го, и҆ поклони́стѣсѧ е҆мꙋ·

6

Тогда гл҃а и҆мъ і҆с҃, не бо́итесѧ. и҆дѣте, възвѣсти́те бра́тїи моеѝ, да и́дꙋтъ в꙽ галиле́ю, и҆ т̂ꙋ м̂ѧ ви́дѧтъ. и҆дꙋщема же и́ма, с̂е нѣ́цїи ѿ кꙋстодїа пришед̑ше въ́ градъ, възвѣсти́шѧ а҆рхїере́ѻмъ вс̂ѧ бы́вшаѧ. и҆ събравшесѧ съ ста́рцы, совѣтъ сътвори́шѧ, сребреникы дово́лны дашѧ во́иномъ, гл҃юще. рцѣте, ꙗ҆́ко ѹ҆чн҃цы е҆го но́щїю пришедъше ѹ҆крадоша е҆го, намъ спѧщемъ. и҆ а́ще с̂е ѹ҆слы́шано бꙋдетъ ѹ҆ и҆гѣ́мона, м̂ы ѹ҆толимъ е҆го, и҆ васъ беспеча́лны сътвори́мъ. ѻ҆ни́ же прїе́мше сре́бреникы, сътвори́шѧ ꙗ҆коже наѹ҆чени бы́шѧ. и҆ промче́сѧ сло́во с̂е въ и҆ѹ҆де́е҆хъ, да́же до сего дн҃е·

7

зач̑҇, рѕ҃і.

8

Є҆́ді́нии҆ же надесѧте ѹ҆чн҃цы, и҆до́ша в галиле́ю, в꙽ го́рꙋ, ꙗ҆́може повелѣ̀ и́мъ і҆с҃. и҆ видѣвше е҆го, поклони́шасѧ е҆мꙋ. ѻ҆ви же ѹ҆съмнѣшѧсѧ·

9

И҆ пристꙋ́пль і҆с҃, речѐ и́мъ, гл҃ѧ. дастъ м̂и сѧ всѧ́ка власть, на́ нб҃си и҆ на земли·

10

шед̑ше ѹ҆бо наѹ҆чи́те вс̂ѧ ꙗ҆́ѕы́кы, крс̑҇тѧ́ще и҆хъ, въ и҆мѧ ѿц҃а и҆ сн҃а и҆ ст҃аго дх҃а, ѹ҆ча́ще и҆хъ блюстѝ вс̂ѧ е҆ли́ка заповѣдах̑ вамъ. и҆ с̂е а́зъ с ва́ми е҆смь вс̂ѧ дн҃и до сконча́нїѧ вѣ́ка, а҆ми́нь·

11

Конецъ, е҆же ѿ матъѳеа ст҃аго еѵг̑҇лїа. и҆мать в себѣ, глв̑҇а, к҃и·

12

а҆ зач̑҇лъ. цр҃ковныхъ, рѕ҃і·