Ostroh Bible❧Євангеліє від св. Матвія, розділ 27

1

зач̑҇, р҃і·

2

Ѹ҆трꙋ же бы́вшꙋ, совѣтъ сътвори́шѧ вс̂и а҆рхїере́е, и҆ ста́рцы людстїи на і҆с҃а, ꙗ҆́ко ѹ҆бити е҆го·

3

И҆ свѧзавше е҆го ведоша, и҆ предаша его понтїискомꙋ пилатꙋ и҆ге́монꙋ·

4

зач̑҇, ра҃і·

5

Тогда̀ видѣвъ і҆ю́да преда́выи е́го ꙗ҆́ко ѻ́сꙋдишѧ е҆го, раска́авсѧ, възвратѝ тридесѧте сре́бреникы а҆рхїереѻм̑ и҆ старцемъ, гл҃ѧ. съгрѣшихъ, предавъ кровъ непови́ннꙋ·

6

ѡ҆́ни же рѣшѧ. что е҆сть намъ; т̂ы ѹ҆зриши. и҆ повръ́гъ сребреникы в꙽ цр҃кви, ѿи҆де, и҆ шед̑ ѹ҆дависѧ·

7

А҆рхие҆рее же прїе́мше сре́бреникы, рѣшѧ. недосто́ино е҆сть вложити и҆хъ в꙽ корва́нꙋ, понеже цѣна крове е҆сть·

8

Совѣт꙽ же сътво́рше, кꙋпи́шѧ и҆́ми село̀ скꙋделниче, в꙽ погреба́нїе стра́ннымъ. тѣмже нарече́сѧ село̀ т̂о, село̀ кро́ве, до сего дн҃е·

9

Тогда с꙽быстьсѧ рече́ное і҆е҆ремїемъ прро̑҇комъ гл҃ющемъ.

10

Ѝ прїа́шѧ тридесѧте сребреникъ цѣнꙋ цѣне́наго, е҆гоже цѣни́ша ѿ сн҃въ і҆ил҃евъ, и даша ѧ҆̀ на селѣ скꙋделничи, ꙗ҆́коже сказа̀ мн̂ѣ г҃ь.

11

І҆с҃ же ст̂а пред̑ и҆гѣмоном̑·

12

И҆ въпроси е҆го и҆гѣмонъ гл҃ѧ. ты̀ л̂и е҆си цр҃ъ і҆ю҆де́скыи;

13

І҆с҃ же рече е҆мꙋ, т̂ы гл҃еши.

14

І҆ е҆гда нанъ гл҃ахꙋ а҆рхїерее́ и ста́рцы, ничесоже не ѿвѣщава́ше.

15

Тогда гл҃а е҆мꙋ пилатъ. не слы́шиши л̂и, колико на т̂ѧ свѣдительствꙋю҆тъ; и҆ не ѿвѣща̀ е҆мꙋ, ни къ е҆ді́номꙋ гл҃ꙋ, ꙗ҆́ко диви́тисѧ и҆гѣмонꙋ ѕѣло̀·

16

На всѧк же пра́здникъ ѻ҆бы́чаи б̂ѣ и҆гѣмонꙋ ѿпꙋщати е҆ді́ного наро́дꙋ свѧ́зана, е҆гоже хотѧ́хꙋ·

17

и҆мѧхꙋ же тогда свѧзана нарочита, гл҃емаго варавва·

18

Събраном же и҆мъ, рече и҆мъ пилат̑. кого хощете ѿ ѻ҆бою ѿпꙋщꙋ вамъ, вара́ввꙋ л̂и, и҆ли і҆с҃а гл҃емаго х҃а; вѣ́дѧше б̂о ꙗ҆́ко за́висти ради преда́шѧ е҆го·

19

Сѣдѧ́щꙋ же е҆мꙋ на сꙋдищи, посла̀ к немꙋ жена̀ е҆го, гл҃ющи. ничтоже тебѣ, и҆ пра́вед̑никꙋ томꙋ. много б̂о пострадахъ дн҃есь въ снѣ е҆го ради·

20

А҆́рхїере́е же и҆ ста́рцы наѹ҆сти́шѧ наро́ды да и҆спро́сѧтъ вара́ввꙋ, і҆с҃а же погꙋбѧтъ·

21

ѿвѣщав же и҆гѣмонъ рече и҆мъ. кого хо́щете ѿ ѻ҆бою ѿпꙋщꙋ вамъ; ѻ҆ниж̑ рѣшѧ, вара́ввꙋ. гл҃а и҆мъ пилат꙽. чт̂о ѹ҆бо сътворю і҆с҃ꙋ, гл҃емомꙋ х҃ꙋ; гл҃ашѧ е҆мꙋ вс̂и, да распѧтъ бꙋдет̑·

22

И҆гѣмон же рече. коѐ ѹ҆бо зл̂о сътворѝ; ѻ҆ни же и҆зли́ха въпїа́хꙋ гл҃юще, да про́пѧтъ бꙋ́детъ·

23

Видѣв же пилат̑, ꙗ҆́ко ничтоже ѹ҆спѣвает̑, н̂о паче млъва бывает̑, прїе́мъ во́дꙋ, ѹ҆мы̀ рꙋцѣ пред̑ наро̀дом̑, гл҃ѧ. неповинн̑҇е е҆смь ѿ крове правед̑наго сего, в̂ы ѹ҆́зрите·

24

и҆ ѿвѣщавше вс̂и людїе, рѣшѧ. кров̑҇ е҆го на нас̑҇, и҆ на чѧ́дѣхъ наших̑·

25

Тогд̑а ѿпꙋсти им̑ вараввꙋ, і҆с҃а же бив꙽ предастъ и҆мъ, да е҆го пропнꙋтъ·

26

зач̑҇, рв҃і·

27

Тогда во́ини и҆гѣ́монови, прїе́мше і҆с҃а на сꙋдищи, събра́шѧ на́нь вс̂е множество во́инъ. и҆ съвлекше е҆го, ѻ҆дѣа́шѧ е҆го хлами́дою чръвле́ною, и҆ с꙽плетше вѣнецъ ѿ тръ́нїа, възложи́шѧ на главꙋ̀ е҆го, и҆ трость в десні́цꙋ е҆го. и҆ покло́ншесѧ на колѣнꙋ пред̑ нимъ, рꙋгахꙋсѧ е҆мꙋ гл҃юще. радꙋисѧ цр҃ю і҆юде́искыи·

28

И҆ плю́нꙋвше нань, прїашѧ трость, и҆ бїа́хꙋ по главѣ̀ е҆го. и҆ е҆гда порꙋга́шѧсѧ е҆мꙋ, съвлеко́шѧ с него багрѧ́ницꙋ, и҆ ѻ҆блеко́шѧ е҆го в ри́зы е҆го, и҆ ведо́шѧ е҆го на пропѧтїе·

29

и҆сходѧще же, ѻ҆брѣто́шѧ чл҃ка киринеиска, и҆менемъ сі́мона. и҆ семꙋ задѣшѧ понести крс̑҇тъ е҆го̀·

30

зач̑҇, рг҃і·

31

И҆́ прише́дше на мѣ́сто нарица́емоѐ голгоѳа. е҆же е҆сть гл҃емо, кра́нїево мѣсто·

32

дашѧ е҆мꙋ пити ѻ҆цетъ съ же́лчїю смѣшенъ. и҆ вкꙋшь, не хотѧ́ше пи́ти·

33

Распе́нше же е҆го, раздѣли́ша ри́зы е҆го, врь́гше жрѣбїа, и҆ сѣдѧ́ще стрежахꙋ е҆го т̂ꙋ·

34

И҆ възложишѧ връхꙋ главы е҆го винꙋ̀ е҆го написанꙋ. се́и есть і҆с҃, цр҃ь і҆юдеискыи·

35

Тогда̀ распѧ́шѧ с нимъ дв̂а разбо́иника, е҆ді́ного ѻ҆деснꙋю, і҆ е҆ді́ного ѻ҆шꙋ́юю·

36

Ми́мо ходѧ́щеи же хꙋ́лѧхꙋ е҆го, покива́юще гла́вами свои́ми, и҆ гл҃юще. разарѧаѝ цр҃ковъ, и҆ трими дн҃ьми съѕида́а, сп҃си́сѧ самъ. а҆ще сн҃ъ е҆си бж҃їи, сниди съ крс̑҇та·

37

Та́кожд̑еже и҆ а҆рхїе҆ре́е рꙋга́ющесѧ съ кни́жникы и҆ ста́рцы, и҆ фарисе́и гл҃ахꙋ. и҆ны́ѧ сп҃сѐ, себе л̂и не мо́жетъ сп҃сътѝ. а҆ще цр҃ь і҆ил҃евъ е҆сть, да сни́детъ нн҃ѣ съ крс̑҇та, и҆ вѣрꙋемъ в него. ѹ҆пова̀ на́ б҃а, да и҆зба́витъ нн҃ѣ е҆го, а҆ще хо́щетъ е҆мꙋ. рече б̂о ꙗ҆́ко бж҃їи е҆смь сн҃ъ·

38

Тожд̑е же и҆ разбо́иника распѧтаѧ с нимъ, поношѧ́ста е҆мꙋ·

39

ѿ шестаго же часа̀, тм̂а бысть по все́и землѝ, до часа девѧ́таго. ѡ҆ девѧ́темъ же часѣ, възопѝ і҆с҃ гла́сомъ ве́лие҆мъ, гл҃ѧ. и҆ли и҆ли, лима савах̑ѳани; е҆же е҆сть, б҃е мои б҃е мои, в꙽скꙋ́ю м̂ѧ е҆си ѻ҆ста́вилъ; нѣ́цїи же ѿ т̂ꙋ стоѧ́щих̑ слы́шавше, гл҃ахꙋ, ꙗ҆́ко и҆лїю глаша́етъ се́и·

40

И҆ а҆бїе текъ е҆ді́нъ ѿ нихъ, и҆ прїемъ гꙋ́бꙋ, и҆спол꙽нив же ѻ҆цта, и҆ възнез꙽ на трость напаа́ше е҆го. про̀чі́и́ же гл҃ахꙋ, ѻ҆ста́ви, да ви́димъ а҆ще прїидетъ и҆лїа спс̑҇ти е҆го·

41

І҆с҃ же пакы въз꙽пи́въ гла́сомъ велїемъ, и҆спꙋстѝ дх҃ъ·

42

И҆ с̂е завѣса цр҃ко́внаа̀ раздра́сѧ на́ двое, с вы́шнѧго кра́а до ни́жнѧго·

43

И҆ землѧ потрѧсе́сѧ, и҆ ка́менїе распаде́сѧ, и҆ гро́би ѿврьзо́шѧсѧ, и҆ мно́га тѣлеса ѹ҆со́пшихъ ст҃ыхъ въста́шѧ. і҆ и҆зшед̑ше и҆з꙽ гробъ по въск҃рсе́нїи е҆го, внидоша в꙽ ст҃ыи градъ, і҆ ꙗ҆́ви́шасѧ мно́зѣмъ·

44

Со́тник же и҆ і́же с нимъ стрегꙋщеѝ і҆с҃а, видѣвше трꙋ́съ, и҆ бы́вшаѧ, ѹ҆боа́шѧсѧ ѕѣло, гл҃юще, въи́стиннꙋ бж҃їи сн҃ъ б̂ѣ, се́и·

45

Бѣхꙋ же т̂ꙋ и҆ жены̀ мно́гы и҆здале́че зрѧще, и҆же и҆доша по і҆с҃ѣ ѿ галиле́а, слꙋжѧ́ще е҆мꙋ. в них̑ же б̂ѣ ма́рїа магдалы́ни, и҆ марїа і҆а́ковлѧ і҆ и҆ѻсїи ма́ти. и҆ мати сн҃ꙋ зеведе́ѻ҆вꙋ·

46

Поздѣ же бы́в꙽шꙋ, прїиде чл҃къ богатъ, ѿ а҆римаѳе́а, и҆́менемъ і҆ѻ́сїфъ, и҆же и҆ то́и ѹ҆чисѧ ѹ і҆с҃а. се́и пристꙋпль к꙽ пила́тꙋ, просѝ тѣлесе і҆с҃ова·

47

Тогда пилатъ повелѣ дати тѣло. и҆ прїемъ тѣло і҆ѻ́сифъ, ѻ҆бвитъ е҆̀ плаща́ницею чи́стою, и҆ положї е҆̀ в но́вѣмъ свое҆мъ гро́бѣ, и҆же и҆с꙽сѣче в ка́мени. и҆ възвалѝ ка́мень ве́лїи надъ дверїи гроба, и҆ ѿи́де·

48

Бѣ же т̂ꙋ ма́рїа магдалы́ни, и҆ дрꙋга́а ма́рїа, сѣдѧ́щи прѧ́мо гро́бꙋ·

49

зач̑҇, рд҃і·

50

Въ ѹ́трѣи же дн҃ь, и҆же е҆сть по пѧтцѣ, събра́шасѧ а҆рхїере́е и҆ фарисе́е к꙽ пила́тꙋ гл҃юще, господи, помѧнꙋхомъ, ꙗ҆́ко льсте́цъ ѻ҆нъ рече е҆ще сыи жи́въ, по трїехъ дн҃ехъ в꙽ста́нꙋ. повелѝ ѹ҆бо ѹ҆твердити гробъ до третїаго дн҃е. да не како пришед̑ше ѹ҆ченицы е҆го, но́щїю ѹ҆кра́дꙋтъ е҆го, и҆ рекꙋтъ лю́демъ в꙽ста̀ ѿ мр҃твыхъ. и҆ бꙋ́детъ послд̑ѣнѧа ле́сть горша пе́р꙽выа. реч̑҇ же и҆мъ пилатъ, и҆́мате кꙋстодїю, и҆дѣте ѹ҆тверди́те ꙗ҆́коже вѣсте·

51

Ѡ҆ни́ же шед̑ше, ѹ҆тверди́ша гробъ, зна́менавше камень с кꙋстодїею·