Ostroh Bible❧Євангеліє від св. Матвія, розділ 3

1

зач̑҇, е҃·

2

Въ̀ дн҃и же ѻ҆́ны, прїиде і҆ѻа́нн꙽ крс̑҇ти́тель проповѣдаа в꙽ пꙋсты́ни і҆ѹ҆де́истѣѝ, и҆ гл҃ѧ. пока́итесѧ, прибли́жи б̂о сѧ црс̑҇твїе нбс̑҇ное·

3

Се́й б̂о ес̑҇ рече́ныи і҆са́йемъ прро̑҇комъ, глющем̑, глс̑҇а въпїю́щаго в꙽ пꙋсты́ни. ѹ҆гото́ваите пꙋть гн҃ь пра́вы творите стеѕѧ̀ е҆го̀. са́м же і҆ѻа́ннъ и҆мѧ́ше ри́зꙋ свою̀ ѿ вла́съ вельбꙋжд̑ь, и҆ по́ѧсъ ѹ҆смѣнъ ѻ҆ чреслѣхъ свои҆хъ. снѣ́дь же е҆го̀ б̂ѣ, прꙋжїе и мд̑е дивїи·

4

Тогда̀ и҆схожда́ше к немꙋ і҆е҆рс̑҇ли́ма, и҆ вс̂ѧ і҆ѹ҆деа, и҆ вс̂ѧ страна̀ і҆ѻ҆рда́нскаа̀. и҆ кр҃ща́хꙋсѧ въ і҆ѻ҆рда́ни ѿ него̀, и҆сповѣдающе грѣхы̀ своѧ̀·

5

Видѣ́в же мно́гы фарисе́а и҆ сад̑дꙋке́а грѧдꙋщ́а на кр҃щенїе е҆го, речѐ и҆мъ. рожд̑енїа е҆хи́днова, кт̂о сказа вамъ бѣжати ѿ бꙋ́дꙋщаго гнѣ́ва; сътвори́те ѹ҆́бо плд̑о достои́нъ покаа́нїа. и҆ не начина́ите гл҃ати в себѣ, ѿц҃а и҆́мамы а҆враа́ма. гл҃ю б̂о вамъ, ꙗ҆ко мо́жетъ б҃ъ ѿ ка́менїа сего̀ възд̑ви́гнꙋти чѧ́да а҆враа́мꙋ·

6

Ѹ҆же б̂о и҆ секі́ра при́ корени древа лежи́тъ. всѧко ѹ҆бо древо и҆́же не твори́тъ плода добра̀, посѣка́емо быва́етъ, и҆ въ ѻ҆гнь вмѣта́емо·

7

А҆́зъ ѹ҆бо кр҃ща́ю в̂ы водо́ю, в꙽ покаа́нїе. грѧды́и же по мн̂ѣ, крѣпли́и мене ес̑҇, е҆мꙋже нѣ́смь досто́инъ сапогѝ понестѝ, то́й в̂ы крс̑҇титъ дх҃ом̑ ст҃ым꙽ и҆ ѻ҆гнем̑. Є҆мꙋж́е лопа́та в рꙋцѣ е҆го̀, и҆ потребитъ гꙋмно свое, и҆ събере́тъ пшени́цꙋ свою в꙽ жи́тницꙋ, плѣвы же съжжетъ ѻ҆гнем̑ негаса́ющимъ·

8

зачѧ́ло, ѕ҃·

9

Тогда̀ прихо́дит̑ і҆с҃ ѿ галиле́а на і҆ѻ҆рдан̑҇ къ і҆ѻ҆а́ннꙋ, крс̑҇титисѧ ѿ него̀·

10

І҆ѻ҆̀анн꙽ же възбранѧ́ше е҆мꙋ гл҃ѧ. а҆зъ требꙋю тобою крс̑҇ти́тисѧ, и҆ ты л̂и грѧде́ши къ мнѣ̀ ѿвѣща́в же і҆с҃, речѐ к немꙋ̀. ѻ҆ста́ви н҃нѣ, та́ко б̂о подобно е҆сть нам̑ и҆спо́лнити всѧ́кꙋ пра́вдꙋ. тогда ѻ҆ста́ви е҆го·

11

И҆ крс̑҇ти́всѧ і҆с҃, взы́де а҆́бїе ѿ воды̀. и҆ с̂е ѿвръзо́шасѧ е҆мꙋ̀ нб҃са, и҆ видѣ дх҃ъ бж҃їи и҆сходѧ́щь ꙗ҆́ко го́лꙋбь, грѧдꙋщь на́нь. и҆ с̂е глс̑҇а съ нб҃се гл҃ѧ·

12

сей е҆сть сн҃ъ мо́и възлюбленыи, ѻ҆ нем꙽же бл҃говолих̑·