Ostroh BibleЄвангеліє від св. Матвія, розділ 6
Шрифт:
Запис:
1
зач̑҇, ѕі҃·
2
Вънемлѣте млс̑҇тынѧ ва́ша не твори́те пред̑ чл҃ки, да ви́дими бꙋ́дете и́ми·
3
а҆ще ли же, н̂и мз꙽ды не и҆мате ѿ ѻ҆ц҃а ва́шего, и҆же ес̑҇ на нб҃сех̑·
4
Є҆гда̀ ѹ҆бо твори́ши млс̑҇тыню, не въстрꙋби прд̑е собою ꙗ҆коже лицемѣ́ри творѧ́тъ в сонмищих̑, и҆ въ стъгна́х꙽, ꙗ҆́ко да просла́вѧтсѧ ѿ чл҃къ·
5
А҆минь гл҃ю вамъ, въспрїе́млютъ м꙽здꙋ свою̀·
6
Тебѣ же творѧ́щꙋ млс̑҇тынѧ, да не ѹ҆вѣсть шꙋ́ица твоа̀ что твори́тъ десни́ца твоа̀, ꙗ҆ко да бꙋ́детъ млс̑҇тыни твоа̀ в та́инѣ·
7
И҆ ѻ҆ц҃ъ тво́и видѧѝ в та́инѣ, тои́ възда́сть тебѣ ꙗ҆вѣ·
8
И҆ е҆гда̀ мо́лишисѧ, не бꙋ́ди ꙗ҆коже лицемѣри, ꙗ҆ко лю́бѧт̑ в сонмищих̑, и҆ в꙽ стогнах꙽ пꙋтїи стоѧ҆ще моли́тисѧ, ꙗ҆ко да ꙗ҆вѧ́тсѧ чл҃ком꙽·
9
А҆ми́нь гл҃ю вам̑, ꙗ҆́ко въспрїимꙋть м꙽здꙋ свою̀·
10
Ты́ же е҆гда мо́лишисѧ, вни́ди в꙽ клѣть свою̀, и҆ затворивъ две́ри твоа̀, помоли́сѧ ѿц҃ꙋ твоемꙋ в та́инѣ. и҆ ѿц҃ъ твои видѧѝ в та́инѣ, възда́сть тебѣ ꙗ҆вѣ·
11
молѧ́ще же сѧ, не ли́ш꙽ше гл҃ите ꙗ҆коже ꙗ҆зы́чницы. мнѧ́т꙽ бо ꙗ҆ко въ мно́гогл҃анїи свое҆мъ ѹ҆слы́шани бꙋдꙋтъ·
12
не подо́битесѧ ѹ҆бо им̑, вѣсть б̂о ѻ҆ц҃ъ ва́шъ и҆хже требꙋете, пре́жде проше́нїѧ ва́шего·
13
си́це ѹ҆бо мл҃и́тесѧ вы̀·
14
Ѿч҃е на́шъ, и҆же е҆си. на́ нб҃сех̑, да ст҃и́тсѧ и҆мѧ твоѐ, да прїидетъ црс̑҇твїе твоѐ·
15
да бꙋдет̑ волѧ твоа̀, ꙗ҆ко на́ нб҃си и҆ на землѝ·
16
хлѣ́бъ на́шъ насꙋщныи да́ждъ на́мъ дне́сь. и҆ ѻ҆ста́ви на́мъ дол꙽гы на́ша, ꙗ҆ко и҆ мы̀ ѻ҆ставлѧ́емъ дол꙽жникомъ на́шим̑·
17
и҆ не в꙽веди на́съ в напа́сть. н̂о и҆зба́ви нас̑҇ ѿ лꙋка́ваго·
18
Ꙗ҆́ко твоѐ е҆сть црс̑҇твїѐ и҆ си́ла и҆ сла́ва, въ вѣки, а҆мин̑҇·
19
зач̑҇, зі҃·
20
А҆́ще бо ѿпꙋща́ете чл҃ком̑ съгрѣшенїа̀ и҆́хъ, ѿпꙋститъ и҆ ва́мъ ѻ҆ц҃ъ вашъ нбс̑҇ныи·
21
А҆́ще лѝ не ѿпꙋща́ете чл҃ком̑ съгрѣше́нїа и҆хъ, ни ѻ҆ц҃ъ ва́шъ ѿпꙋститъ ва́мъ съгрѣше́нїи ва́шихъ·
22
Є҆ѓдаж̑ постите́сѧ. не бꙋдѣте ꙗ҆коже лицемѣри, сѣтꙋюще, помрача́ют̑ б̂о лица своѧ̀. ꙗ҆ко да ꙗ҆́вѧ́тсѧ чл҃комъ постѧ́щесѧ. а҆ми́нь гл҃ю ва́мъ ꙗ҆́ко въспрїимꙋтъ м꙽здꙋ свою̀·
23
Ты́ же постѧ́сѧ, пома́жи главꙋ̀ свою̀, и҆ лице твоѐ ѹ҆мы́и, ꙗ҆́ко да не ꙗ҆ви́шисѧ чл҃ком̑ постѧ́сѧ, н̂о ѻ҆ц҃ꙋ твое҆мꙋ и҆же в та́йнѣ. и҆ ѻ҆ц҃ъ твои видѧ́и в та́инѣ, възда́сть тебѣ ꙗ҆́вѣ·
24
Не съкрыва́ите себѣ съкро́вищъ на землѝ, и҆дѣже червь и҆ тл̂ѧ тли́тъ. і҆ и҆дѣже та́тїе под̑ко́поваютъ и҆ кра́дꙋтъ·
25
Съкрыва́ите же себѣ̀ съкро́вища на́ нб҃си, и҆дѣже ни че́рвь ни тлѧ̀ тлитъ, и҆ і҆дѣже та́тїе не под̑ко́пова́ютъ, ни кра́дꙋт꙽. и҆дѣже б̂о ес̑҇ съкро́вище ва́ше, т̂ꙋ бꙋдет̑ и҆ срд̑це ва́ше·
26
зач̑҇, иі҃·
27
Свѣти́лникъ тѣлꙋ е҆сть ѻ҆́ко. а҆ще ѹ҆́бо бꙋдетъ ѻ҆́ко твое про́сто, вс̂е тѣло твоѐ свѣтло бꙋ́дет꙽·
28
а҆́ще л̂и ѻ́ко твоѐ лꙋка́во бꙋдетъ, вс̂е тѣ́ло твоѐ темно бꙋ́детъ. а҆́ще ѹ҆бо свѣтъ и҆же в꙽ тебѣ̀, тма̀ е҆сть, т̂о тма̀ ко́лми; никто́же мо́жетъ двѣма̀ господи́нома рабо́тати. либо е҆ді́наго възлю́битъ, а҆ дрꙋга́го възненави́дитъ. и҆ли е҆ді́ного дръжи́тсѧ, ѻ҆ дрꙋзѣм꙽ же неради́ти на́чнетъ. не мо́жете б҃ꙋ рабо́тати и҆ мамо́нѣ·
29
сего̀ ради гл҃ю ва́мъ, не пецѣтесѧ дш҃ею вашею чт̂о ꙗ҆́сте, и҆ли чт̂о пие́те. ни тѣломъ ва́шим̑, въ что̀ ѻ҆блече́тесѧ. не дш҃а ли болши е҆сть пи́ща, и҆ тѣло ѻ҆дежд̑а; възри́те на пти́цѧ нб҃сьныа, ꙗ҆ко не сѣютъ ни жнꙋтъ, ни събира́ютъ в꙽ жи́тницѧ, и҆ ѿц҃ъ ва̑ нбс̑҇ныи пита́етъ и҆хъ. не вы̀ л̂и паче лꙋ́чши и҆хъ е҆сте; кто же ѿ ва́съ пекїисѧ можетъ приложити въз́растꙋ свое҆мꙋ ла́котъ е҆ді́нъ; и҆ ѻ҆ ѻ҆де́жди чт̂о пече́тесѧ; смотри́те крины селныхъ, ка́ко растꙋтъ, не трꙋжа́ютсѧ ни прѧдꙋт꙽. гл҃ю же вам̑, ꙗ҆́ко ни соло́монъ въ все́и сла́вѣ своеѝ ѻ҆блечесѧ ꙗ҆ко е҆ді́нъ ѿ сихъ·
30
А҆́ще же сѣно се́л꙽ное, днс̑҇е сꙋще, и҆ ѹ҆трѣ в пещь вмѣта́емо, б҃ъ та́ко ѻ҆дѣетъ. не мно́го л̂и паче васъ ма́ловѣри;
31
зач̑҇, ѳі҃·
32
Не пецѣтесѧ ѹ҆́бо гл҃юще чт̂о ꙗ́мы, и҆ли чт̂о пїем̑, и҆ли чимъ ѻ҆дежд̑имсѧ; всѣхъ б̂о сихъ ꙗ҆зы́цы и́щꙋтъ. вѣсть бо ѿц҃ъ ва́шъ нбс̑҇ныи, ꙗ҆ко требꙋе҆те си́хъ всѣхъ·
33
и҆щи́те же преже црс̑҇твїа бж҃їа, и҆ пра́вды е҆гѻ̀, и҆ сїа вс̂ѧ приложа́тсѧ ва́мъ·
34
Не пецѣтесѧ ѹ҆́бо на ѹ҆трѣи, ѹ҆́тренїи б̂о собо́ю пече́тъсѧ. до́влеть дн҃еви зло́ба е҆го·
Джерела
