Ostroh Bible❧Четверта книга Мойсеєва: Числа, розділ 23

1

И рече валаа́мъ къ вала́кꙋ. съградѝ м̂и зд̂ѣ, з҃, тре́бищъ, и҆ ѹ҆гото́ваи м̂и здѣ̀ з҃, теле́цъ, и҆ з҃ ѻ҆ве́нъ·

2

И҆ сътворѝ вала́къ ꙗ҆коже повелѣ̀ е҆мꙋ валаа́мъ, и҆ възложѝ теле́цъ и҆ ѻ҆венъ на требище·

3

И҆ рече валаамъ къ валакꙋ стани ѹ҆ требы свое҆ѧ̀, и҆ да и҆дꙋ̀ а҆́ще ми сѧ ꙗ҆́витъ б҃ъ въ срѣтенїе, и҆ слово е҆же м̂и ѹ҆кажет̑ и҆сповѣмъ т̂и·

4

И҆ ста̀ вала́къ ѹ҆ тре́бы свое҆ѧ. валаамъ же и́де въпроси́ти б҃а, и҆́де же прѧ́мо·

5

И ꙗ҆́ви́сѧ б҃ъ валаа́мꙋ. и҆ рече к немꙋ валаа́мъ. з҃, тре́бищъ съгото́вих̑, и҆ възложих̑ теле́цъ, и҆ ѻ҆ве́нъ на тре́бища·

6

И҆ вложѝ б҃ъ сло́во, въ ѹ҆ста̀ валаа́мꙋ и҆ реч̑҇, възврати́сѧ къ вала́кꙋ и҆ та́ко гл҃и·

7

И҆ възврати́в꙽сѧ к немꙋ̀, сеже стоѧ́ше ѹ҆ вс̂есъж꙽же́нїи свои҆хъ, и҆ вс̂и кн҃ѕи моа́вли с ни́мъ·

8

И҆ бы́сть дх҃ъ бж҃їи на не́мъ. и҆ въспрїим̑ притча е҆го и҆ рече и҆мъ, ѿ межꙋрѣ́чїѧ приведѐ м̂ѧ, валакъ цр҃ь моавль, ѿ горъ въсточныхъ гл҃ѧ, ходѝ да м̂и прокленеши і҆акова, и҆ ходѝ да м̂и прокленеши і҆и҃лѧ·

9

Чт̂о прокленꙋ̀ е҆гоже не клене́тъ б҃ъ. и҆ чт̂о злоблю е҆гоже не ѻ҆злоби б҃ъ·

10

Ꙗ҆́ко ѿ верхъ горъ вижю е҆го, и҆ ѿ хо́лмъ прозираю е҆го. а҆ с̂е люди е҆дины вополча́ютсѧ, и҆ къ ꙗ҆зыкомъ не примѣша́ютсѧ·

11

Кт̂о и҆считал̑҇ е҆сть племѧ̀ і҆а́ковле, и҆л̂и кт̂о и҆зочте́тъ со́нмы і҆и҆л҃ѧ, да ѹ҆́мретъ дш҃а моѧ въ дш҃ах꙽ пра́ведныхъ, и҆ бꙋди племѧ̀ мое ꙗ҆́коже племѧ̀ и҆хъ·

12

И҆ рече вала́къ къ валаа́мꙋ чт̂о сътворѝ м̂и, на клѧ́тїе вра́гъ моих̑ възва́х т̂ѧ, и҆ с̂е блс̑҇ви ѧ҆̀ блс̑҇ве́нїемъ·

13

И҆ рече валаа́мъ къ вала́кꙋ. с̂е е҆ли́ко вложѝ б҃ъ сло́во, въ ѹ҆ста̀ моѧ̀ снабжꙋ̀ гл҃ати·

14

И҆ рече к немꙋ̀ вала́къ, пои҆дѝ е҆щѐ со мно́ю на мѣсто и҆́но, ѿнюдꙋже ѹ҆́зриши их̑ ѿтꙋ́дꙋ, н̂о ча́сть и҆хъ ѹ҆́зриши, а҆ всѣхъ не ѹ҆́зриши, и҆ прокле́неши их̑ мн̂ѣ та́мо·

15

И҆ поѧ̀ е҆го на стра́жбы се́лныѧ. на ве́рхꙋ и҆сте́санъ и҆ съград̑и̑ т̂ꙋ, з҃. тре́бищь, и҆ възложѝ телца̀ и҆ ѻ́вна на тре́бище·

16

И҆ рече валаа́мъ къ вала́кꙋ. ста́ни ѹ҆ тре́бы своеѧ, а҆́з же и҆дꙋ̀ въпраша́ти б҃а·

17

И҆ срѣте б҃ъ валаа́ма. и҆ вложѝ сло́во въ ѹ҆ста̀ е҆мꙋ, и҆ рече възврати́сѧ къ вала́кꙋ и҆ да гл҃еши сїѧ же·

18

И҆ въз꙽врати́сѧ к немꙋ̀, се́и же стоѧ́ше ѹ҆ вс̂есъж꙽же́нїи свои҆хъ. и҆ вс̂и кн҃ѕи моа́вли с нимъ,.

19

И҆ рече е҆мꙋ вала́къ чт̂о гл҃а г҃ь·

20

И҆ възпрїимъ при́тчи е҆го и҆ рече, въста́ни вала́че и҆ послꙋшай, и҆ вънꙋшѝ с̂и свѣдѣтельство сн҃ꙋ сепъфо́ровъ·

21

Не ꙗ҆́ко чл҃къ преставлѧ́етъ б҃ъ. ниже ꙗ҆ко сн҃ъ чл҃чьскїи и҆зменѧ́етъ. е҆гда̀ гл҃аше н̂о не сътворит̑ л̂и и҆ ѻ҆беща́вый не да́сть л̂и с̂е блс̑҇вити ѧ҆̀ поча́хъ блс̑҇влю и҆ не възъвращꙋ̀сѧ·

22

Не бꙋдетъ трꙋда̀ въ і҆а́ковѣ ниже ѹ҆́зри́тсѧ болѣзнь въ і҆и҆л҃и, г҃ь б̂о б҃ъ и҆хъ с ни́мъ, и҆ сла́ва цр҃ьскаѧ на ни́хъ·

23

б҃ъ и҆зведы́и и҆х꙽ и҆зъ е҆гѷпта. ꙗ҆́ко си́ла е҆ді́норога в нихъ·

24

Нѣсть б̂о вражбы̀ въ і҆а́ковѣ, ниже въл꙽хвова́нїѧ, въ і҆и҆л҃и, въ́ времѧ нарече́тсѧ і҆а́ковъ і҆и҆л҃ю чт̂о съвръшѝ б҃ъ·

25

с̂е лю́ди ꙗ҆́ко льви́чищи въста́нꙋтъ. ꙗ҆́ко ле́въ възнесе́тсѧ, не лѧ́жетъ до́ндеже ꙗ҆́сть пи́щꙋ и҆ кро́вь сѣ́ченыхъ, и҆зъпїе́тъ·

26

И҆ рече вала́къ к꙽ валаа́мꙋ. н̂и клѧ́твами мн̂ѣ кленѝ и҆хъ, ниже блс̑҇венїемъ бл҃свѝ и҆хъ·

27

ѿвѣща́ же валаа́мъ рече къ вала́кꙋ, не гл҃ахъ л̂и т̂и рекїи, сло́во е҆же а҆́ще гл҃етъ б҃ъ т̂о сътворю̀·

28

И҆ рече вала́къ къ валаа́мꙋ и҆дѝ пои҆мꙋ т̂ѧ на мѣсто и҆́но. а҆́ще го́дѣ бꙋдетъ б҃ꙋ, и҆ проклене́ши м̂и и҆х꙽ ѿтꙋдѣ·

29

и҆ поѧ̀ вала́къ валаа́ма. на врь́хъ фоѻ҆го́ра приходѧ́щего въ пꙋсты́ню.

30

И҆ рече валаа́мъ къ вала́кꙋ, съград̑и̑ ми здѣ̀, з҃. тре́бищъ, и҆ ѹ҆гото́ваи м̂и здѣ̀, з҃, теле́цъ, и҆ з҃, ѻ҆ве́нъ·

31

И҆ сътворѝ вала́къ ꙗ҆́коже рече е҆мꙋ валаа́мъ. и҆ възложѝ теле́цъ, и҆ ѻ҆ве́нъ на ѻ҆лтарь·