Ostroh Bible❧Об'явлення св. Івана Богослова, розділ 1

1

Апокалїѱисъ і҆с҃ х҃а, и҆же дас̑҇ е҆мꙋ бг҃ъ показати рабомъ свои҆мъ, и҆́мже подоба́ше быти въско́рѣ, и҆ сказа̀ пославъ а҆́гг҃ломъ свои҆мъ, раб̀ꙋ свое҆мꙋ і҆ѻ҆а́ннꙋ, и҆же свѣдѣтельствова сло́во бж҃їе, и҆ свѣдѣтельство і҆ѵ҃ х҃во, е҆ли́ко видѣ·

2

Бл҃женъ чтыѝ и҆ слы́шащїи словеса̀ прро̑҇чествїа е҆го, и҆ съблюда́ющїи пи́санаѧ в немъ, вре́мѧ б̂о близ̑. і҆ѻ҆а́ннъ сед̑мим̑ цр҃квам꙽ и҆же сꙋть въ а҆сїи. блгд̑ть вам̑ и҆ миръ, ѿ сꙋщаго, і҆ и҆же б̂ѣ, и҆ грѧдꙋщ́аго, и҆ ѿ сед̑мѝ дх҃овъ, и҆же пред̑ прс̑҇тломъ е҆го, сꙋть. и҆ ѿ і҆с҃ х҃а и҆же е҆сть свѣдѣтель вѣ́рныи, пр́ъвенец̑҇ и҆з мр҃твых̑, и҆ кн҃зь цр҃ей зем꙽скыхъ, любѧщꙋ н̂ы и҆ ѻ҆мы насъ ѿ грѣхъ на́шихъ кро́вїю своею̀, и҆ сътворилъ е҆сть насъ цр҃ѧ и҆ і҆е҆ре́ѧ б҃ꙋ и҆ ѿц҃ꙋ свое҆мꙋ. томꙋ сла́ва и҆ дръжа́ва въ вѣкы вѣком̑ а҆ми́нь·

3

Се грѧдетъ съ ѻ҆́блакы, и҆ ѹ́зрит̑ и҆̀ всѧко ѻ҆́ко, і҆ и҆же е҆го прободо́ша, и҆ плачь сътворѧт̑ на сѧ ѻ҆́ нем̑ вс̂ѧ колѣна зем꙽ска́ѧ. е́й а҆ми́нь. аз̑ е҆смь а҆лфа и҆ ѡ, нача́ток̑҇ и҆ коне́цъ, гл҃етъ г҃ь, сыи, и҆ б̂ѣ, и҆ грѧдыѝ, вседръжи́тель·

4

аз̑ і҆ѻ҆а́ннъ и҆же и҆ братъ вашъ, и҆ ѻ҆бѣщникъ въ печали и҆ въ црс̑҇твїи, и҆ въ тръпѣнїи і҆с҃ хв҃ѣ. бых̑ въ ѻ҆стровѣ, нарица́емомъ патъмосъ, за сло́во бж҃їе и҆ за свѣдѣтельство і҆с҃ хв҃о. быхъ в д҃сѣ въ дн҃ь нед̑лныи. и҆ слы́шах̑ за собо́ю глас̑҇ ве́лїи ꙗ҆́ко трꙋб̀ꙋ, гл҃щъ а҆зъ е҆смь а҆лфа и҆ ѡ, пр́ьвыи и҆ послд̑ѣнїи. и҆ ꙗ҆́же ви́диши, напиши в кни́ги, и҆ послѝ цр҃квамъ, ꙗ҆же сꙋть въ а҆сїи, въ е҆фесъ, и҆ въ змѷрнꙋ, в пер꙽гамъ, и҆ въ ѳиꙗ҆́тиръ, и҆ въ сардїю, и҆ въ ѳиладелъфїю, и҆ в лаѻ҆дикїю. и҆ ѻ҆братихъсѧ видѣти глас̑҇ и҆же гл҃ше съ мно́ю·

5

И҆ ѻ҆бращсѧ видѣхъ сед̑мь свѣти́лникъ златыхъ, и҆ посредѣ сед̑ми свѣти́лникъ подобенъ сн҃ꙋ чл҃вчю ѻ҆блеченъ в подиръ, и҆ препоѧ́санъ при сосцꙋ по́ѧсомъ златымъ. глава же е҆го и҆ вла́си бѣлы̀ ꙗ҆́ко ꙗ҆ри́на бѣ́лаа ꙗ҆ко снѣ́гъ, и҆ ѻ҆́чи е҆го ꙗ҆́ко пла́мень ѻ҆гненъ. и҆ но́ѕѣ е҆го подобни мѣди хал̑҇коливановѣ, ꙗ҆́ко в пещи ражд̑еже́нѣ·

6

И҆ глас̑҇ е҆го, ꙗ҆́ко глас̑҇ во̑ мно́гъ, и҆ дръжа в рꙋцѣ своеѝ деснѣѝ сед̑мъ ѕвѣз́дъ і҆ и҆зъ ѹ҆стъ е҆го мечъ ѻ҆бою́дꙋ ѻ҆стръ и҆зъѻ҆стренъ и҆сходѧѝ·

7

И҆ лице е҆го ꙗ҆́ко слн҃це сїае҆тъ в силѣ своеѝ. и҆ е҆гд̑а видѣхъ е҆го, падохъ к ногама е҆го ꙗ҆́ко мр҃твъ, и҆ положи десницꙋ свою на мнѣ̀ гл҃ѧ м̂и, не боисѧ·

8

А҆зъ е҆смь пр́ьвыи и҆ послд̑ѣнїи и҆ живыи, и҆ бых̑ мр҃твъ, и҆ се жи́въ е҆смь въ́ вѣкы̀ вѣкомъ. и҆́мам̑ ключа смр҃ти и҆ а́дꙋ. напиши ѹ҆бо ꙗ҆́же видѣ, и҆ ꙗ҆́же сꙋть і҆ и́мже подоба́етъ быти по семъ·

9

Таи́нство сед̑ми ѕвѣздъ ꙗ҆́же ви́дѣлъ е҆си на десни́ци моеи, и҆ сед̑мъ свѣтил̑҇никъ златыхъ, сед̑мъ ѕвѣздъ ст̑ꙋ, а҆гг҃ли сед̑мѝ цр҃квеи сꙋть. сед̑м же свѣти́лник̑҇, ꙗ҆́же видѣ, сед̑мъ цр҃кве́и ст̑ꙋ·