Ostroh Bible❧Об'явлення св. Івана Богослова, розділ 2

1

Агг҃лꙋ е҆фес̑҇кїа цр҃кве напиши тако гл҃етъ дръжаѝ сед̑мь ѕвѣздъ в десници своеѝ, и҆ ходѧѝ посредѣ сед̑ми свѣти́лникъ златыхъ. вѣмъ твоѧ дѣла и҆ трд̑ꙋ твои и҆ тръпѣнїе твое, и҆ ꙗ҆́ко не можеши носити злых̑. і҆ и҆скꙋсил̑҇ е҆си гл҃ющаѧсѧ быти а҆пс̑҇лы, и҆ нѣ сꙋть, и҆ ѻ҆брѣте ѧ҆̀ лжа̀. и҆ поне́слъ е҆си и҆ тръпѣнїе и҆́маши. и҆ за и҆мѧ моѐ трꙋдисѧ, и҆ не из̑немо́же. н̂о и҆́мам̑ на тѧ, ꙗ҆ко любов̑҇ твою̀ пр́ьвꙋю ѻ҆ста́ви. помѧни ѹ҆бо ѿкꙋд̀ꙋ спадѐ, и҆ пока́исѧ. и҆ пр́ьваѧ дѣла сътворѝ·

2

А҆ще ли н̂и, грѧд̀ꙋ т̂и ско́ро, и҆ дви́гнꙋ свѣти́лникъ твои ѿ мѣста свое҆го, а҆ще не пока́ешисѧ. н̂о сѐ и҆́маши, ꙗ҆́ко ненавидиши дѣлъ никола́итескъ, и҆хже и҆ а҆́зъ ненави́жꙋ·

3

И҆мѣаѝ ѹ҆хо да слы́шитъ чт̂о дх҃ъ гл҃етъ цр҃квамъ, побѣжда́ющемꙋ дамъ ꙗ҆сти ѿ древа животнаго, е҆же е҆сть посредѣ ра́ѧ бж҃їа·

4

І҆ а҆гг҃лꙋ цр҃кви змѷрн꙽скїа напиши. тако гл҃ет̑ пр́ъвыи и҆ послд̑ѣнїи, и҆же быс̑҇ мр҃твъ, и҆ с̂е жи́въ е҆сть. вѣмъ твоѧ дѣла, и҆ ско́рбь, и҆ ни́щетꙋ. н̂о богат̑ е҆си, и҆ хꙋлы̀, гл҃ющихъсѧ быти і҆ѹ҆де́а, и҆ нѣ сꙋть. н̂о со́нмище сатанино. не бо́исѧ ничесоже ѧж̑ хо́щеши пострадати. сѐ б̂о и҆́мать дїа́волъ всажати ѿ васъ в темни́цѧ да и҆скꙋ́ситесѧ. і҆ и́мате скорбь до десѧти дн҃їи. бꙋди вѣ́ренъ до смр҃ти, и҆ дамъ ти вѣнец꙽ живота·

5

И҆мѣа́и ѹ҆хо слы́шати да слы́шит̑. чт̂о дх҃ъ гл҃етъ цр҃квам̑. побѣжд̑ааѝ, не и҆мать вредитисѧ ѿ смр҃ти вторы́ѧ. и҆ а҆гг҃лꙋ перъгам꙽скїа цр҃кви напиши. тако гл҃етъ и҆мѣѧѝ мечъ ѻ҆бою́дꙋ и҆з꙽ѻ҆щренъ. вм̑ѣ дѣ́ла твоѧ, и҆ гд̂ѣ живеши и҆дѣже прс̑҇тлъ сатанинъ. и҆ дръжиши и҆мѧ моѐ, и҆ не ѿвр́ъжесѧ вѣ́ры моеѧ̀. и҆ в моѧ дн҃и. а҆нтипасъ свѣдѣтель мои вѣрныи и҆же ѹ҆бїенъ бысть в꙽ вас̑҇, и҆дѣже живетъ сатана̀. н̂о и҆́мамъ на тѧ ма́ло, ꙗ҆ко и́маши т̂ꙋ дръжащаѧ ѹ҆ченїе валаа́мово, и҆же ѹ҆чаше вала́ка, положити съблазнь пред̑ сн҃ъми і҆и҃левыми, ꙗ҆сти жрътвы и҆долскїа, и҆ любы творити. тако и҆́маши и҆ ты дръжа́щаа ѹ҆ченїе николаи҆тъско, е҆гоже ненави́жꙋ. покаисѧ, а҆ще ли н̂и, прїидꙋ т̂и ско́ро, и҆ бра́нь сътворю̀ с ними мечемъ ѹ҆стъ мои҆хъ. и҆мѣаѝ ѹ҆хо слы́шати да слы́шитъ, чт̂о дх҃ъ гл҃етъ црк҃вам̑. побѣжда́ющемꙋ дам꙽ ꙗ҆́сти ѿ манны съкровенныѧ·

6

и҆ дам̑ е҆мꙋ ка́мень бл̑҇ѣ, и҆ на ка́мени и҆́мѧ но́во напи́сано, е҆го̑ никтоже вѣсть, токмо прїемлѧѝ·

7

И҆ а҆гг҃лꙋ ѳѷатѷрскїа цр҃кви напиши. тако гл҃етъ сн҃ъ бж҃їи, и҆мѣаѝ ѻ҆́чи своѝ ꙗ҆́ко пла́мень ѻ҆гненъ. и҆ ноѕѣ е҆го подо́бни мѣди ха́лколива́новѣ. вѣм꙽ твоѧ дѣла и҆ любовь и҆ вѣ́рꙋ и҆ слꙋжбꙋ и҆ тръпѣ́нїе твое, и҆ дѣла твоа, и҆ послѣ́днѧа болша пе́рвыхъ, н̂о и́мам꙽ на тѧ мало, ꙗ҆́ко ѻ҆ставлѧ́еши женѣ і҆е҆завель гл҃ющеисѧ быти прро̑҇чца, ѹ҆читъ и҆ лстит꙽ моа рабы любодѣиствовати, и҆ снѣсти жрътвꙋ и҆дол꙽скꙋю. и҆ дах̑ ей вре́мѧ да пока́етсѧ ѿ любодѣи҆ства свое҆го, и҆ не пока́ѧсѧ. с̂е а҆зъ полага́ю ю҆̀ на ѻ҆дрѣ, и҆ любодѣющаѧ с не́ю въ скорбь велїю, а҆ще сѧ не пока́ютъ ѿ дѣлъ свои҆хъ, и҆ чада их̑ ѹ҆мрꙋтъ смр҃тїю. и҆ разꙋмѣю҆тъ вс̂ѧ цр҃кви, ꙗ҆ко а҆зъ е҆смь и҆спытааѝ срд̑ца и҆ ѹ҆тробы, и҆ дамъ вамъ комꙋждо по дѣ́ломъ ва́шимъ, вам̑ же гл҃ю, и҆ про́чимъ сꙋщим̑ въ ѳїатирѣ, и҆же не и҆мꙋтъ ѹ҆ченїа сего і҆ и҆же не разꙋмѣю҆тъ глꙋбины сатанины, ꙗ҆́ко гл҃ют̑ не възложю̀ на вы̀ тѧготы и҆́ноѧ, токмо е҆же и҆́мате дръжи́те, дондеж̑ прїидꙋ·

8

И҆ побѣжда́ющемꙋ и҆ съблюда́ющемꙋ дѣ́ла моа до конца̀, дамъ е҆мꙋ власть на ꙗ҆́зы́цехъ и҆ ѹ҆пасет̑ ѧ҆̀ жезломъ желѣз́ным꙽, и҆ ꙗ҆́ко съсꙋды и҆ скꙋделнича съкрꙋшатсѧ. ꙗ҆́коже и҆ а҆зъ прїѧхъ ѿ ѻ҆ц҃а мое҆го·

9

И҆ дамъ е҆мꙋ ѕвѣздꙋ ѹ҆тренюю. и҆мѣаѝ ѹ҆хо слы́шати да слы́шитъ чт̂о дх҃ъ гл҃етъ цр҃квамъ·