Ostroh BibleОб'явлення св. Івана Богослова, розділ 14
Шрифт:
Запис:
1
И видѣхъ, и҆ с̂е а́гнець стоѧ́ше на горѣ сїѻ́нъстѣ, и҆ с нимъ ст̂о и҆ четырдесѧтъ и҆ четыри тысꙋща, и҆мꙋще и҆мѧ ѿц҃а е҆го напи́сано на челохъ свои҆хъ. и҆ слы́шахъ глас̑҇ с нб҃с ꙗ҆́ко гласъ водъ мно́гъ, и҆ ꙗ҆́ко гласъ гро́ма вели́ка, и҆ гласъ слы́шахъ гꙋдецъ гꙋдꙋщихъ въ гꙋсли своѧ, и҆ пою҆щихъ ꙗ҆́ко пѣснь но́вꙋ пред̑ прс̑҇тломъ и҆ пред̑ четы́ри живот̑ными, и҆ ста́рцы. и҆ никтоже можа́ше навы́кнꙋти пѣсни, токмо сїи, сто и҆ четы́редесѧт̑ и҆ четы́ре тысѧщи, и҆скꙋплени ѿ землѧ. сїи сꙋть и҆же съ женами не ѻ҆скверни́шасѧ, зане дѣв꙽ственицы б̂о сꙋть·
2
сїи, послѣдꙋю҆тъ а҆гньцꙋ, ꙗ҆́може а҆ще по́идет̑. сїи сꙋть кꙋ́пленї ѿ людїи, пр́ьвѣнцы б҃ꙋ и҆ а́гньцꙋ, и҆ въ ѹ҆стѣхъ и҆хъ не ѻ҆брѣтесѧ лесть ꙗ҆же без порока ѹ҆бо сꙋть пред̑ прс̑҇тлом꙽ бж҃їимъ·
3
И҆ видѣхъ и́нъ а҆гг҃лъ парѧщь посредѣ нб҃се, и҆мꙋще е҆ѵг̑҇лїе вѣчно, бл҃говѣстити живꙋщимъ на землѝ, и҆ всѧкомꙋ племеню і҆ ꙗ҆зы́кꙋ и҆ колѣ́нꙋ и҆ лю́демъ, гл҃ѧ гласомъ вели́кимъ. ѹ҆бо́итесѧ б҃а и҆ дади́те е҆мꙋ сла́вꙋ, ꙗ҆ко прїидетъ час̑҇ сꙋда ег̑҇ и҆ поклони́тесѧ сътворшемꙋ нб҃о и҆ землю, и҆ мо́ре і҆ и҆сточникы водны́ѧ·
4
І҆ и҆нъ а҆гг҃лъ въ слѣдъ и҆де гл҃ѧ, паде паде вавилонъ градъ вели́кїи, зане ѿ вина̀ ꙗ҆рость любодѣѧ́нїа свое҆го напоѝ вс̂ѧ ꙗ҆зыкы·
5
И҆ третїи а҆гг҃лъ въ слѣдъ е҆го и҆де гл҃ѧ гласом̑ вели́кым̑. и҆же а҆ще кт̂о покла́нѧетсѧ ѕвѣрю і҆ и҆ко́нѣ е҆го, и҆ прїе́млетъ начерта́нїе на челѣ̀ своемъ, и҆л̂и на рꙋцѣ свое́й, и҆ то́и и҆́мать пити ѿ вина ꙗ҆́рости бж҃їа, чва́на нерастворе́на, в ча́ши гнѣва е҆го, и҆ бꙋдетъ мꙋ́ченъ ѻ҆гнем̑ и҆ жю́пеломъ, пред̑ а҆гг҃лы ст҃ыми, и҆ пред̑ а҆гньцемъ·
6
И҆ дымъ мꙋченїѧ их̑ въ́ вѣкы вѣкомъ въсходитъ·
7
И҆ не и҆мꙋть поко́ѧ дн҃ь и҆ нощъ покланѧ́ющеѝсѧ ѕвѣ́рю, и҆ ѻ҆́бразꙋ и҆ прїе́млющеѝ начерта́нїе и҆мени е҆го·
8
Зд̂ѣ е҆сть терпѣ́нїе ст҃ыхъ, и҆же соблюда́ю҆тъ за́повѣдь бж҃їю и҆ вѣрꙋ і҆с҃овꙋ·
9
И҆ слы́шахъ глс̑҇а с нб҃се гл҃ющ м̂и, напишѝ, бл҃жени мр҃твїи, ѹ҆мира́юще ѻ҆́ г҃ѣ, ѿ нн҃ѣ е́й, гл҃етъ дх҃ъ, да почїю҆тъ ѿ трꙋдовъ свои҆хъ. дѣла б̂о и҆хъ хо́дѧтъ въ слѣдъ с ними. и҆ видѣхъ, и҆ с̂е ѻ҆́блакъ свѣтелъ. и҆ на ѻ҆́блацѣ сидѧѝ подобен̑҇ сн҃ꙋ члчс̑҇комꙋ имѣѧ на главѣ̀ свое́и вѣнецъ зла́тъ, и҆ в рꙋцѣ е҆го се́рпъ ѻ҆́стръ. і҆ и́нъ а҆гг҃л꙽ и҆зыиде и҆з храмꙋ, въпїа велїимъ гласомъ сѣдѧщемꙋ на ѻ҆́блацѣ. послѝ се́рпъ твои, и҆ жнѝ. ꙗ҆́ко прїиде час̑҇ пожа́ти, зане и҆сше трава̀ зем̑скаѧ. и҆ положѝ сѣдѧѝ на ѻ҆́блацѣ, се́рпъ свои на́ землю, и҆ пожа́та быс̑҇ землѧ̀. і҆ и́нъ а҆гг҃лъ и҆зыде и҆з꙽ цр҃кве сꙋщїа на нб҃си, и҆мы́и и҆ то́и се́рпъ ѻ҆́стръ·
10
І҆ и́нъ а҆гг҃лъ и҆зы́де ѿ ѻ́лтарѧ. и҆мы̀ ѻ҆́бласть на ѻ҆гнѝ, и҆ воз̑пѝ кли́чемъ великым̑ ко и҆мꙋщемꙋ се́рпъ ѻ҆́стрыи̑ гл҃ѧ, послѝ се́рп꙽ твои ѻ҆стрыи и҆ ѻ҆бъе́мли грозды винограда земнаг̑҇ ꙗ҆́ко съѕрѣша ѹ҆же грозды еа̀.
11
И҆ положѝ а҆гг҃лъ се́рпъ свои на землѝ, и҆ ѻ҆бере виноград̑ земъскїи, и҆ вложѝ в точи́ло вели́кїѧ ꙗ҆рости бж҃їа·
12
і҆ и҆спра́но бысть точи́ло вн̂ѣ града, і҆ и҆зы́иде кровь ѿ точи́ла даже до ѹ҆здъ ко́ньских̑, ѿ стадїи ты́сѧща и҆ шесть сот̑·
Джерела
