Ostroh BibleОб'явлення св. Івана Богослова, розділ 7
Шрифт:
Запис:
1
И посемъ видѣхъ четы́ри а҆гг҃лы стоѧ́ща на четырехъ ѹ҆глехъ землѝ, держа́ща четыри вѣтры земъскїа, да не дышет̑ вѣтръ на землю ни на́ море, ни на всѧко древо. и҆ видх̑ѣ и҆́нъ а҆гг҃лъ въсходѧщъ ѿ восхода слн҃цꙋ, и҆мыи печать б҃а живаго, и҆ възпи гласомъ велїи҆мъ к четыремъ а҆гг҃ломъ. и҆мже дано̀ бысть вредити землю̀ и҆ мо́ре, гл҃ѧ. не вредите ни зе́млю ни море ни древа, дондеже запечатлѣемъ рабы̀ б҃а нашего на челѣхъ и҆хъ·
2
И҆ слы́шахъ число запечатлѣнныхъ, ст̂о четыредесѧтъ четыре ты́сѧщи запечатлѣн꙽ных̑ ѿ всѧкого колѣ́на. сн҃овъ і҆и҆л҃евъ ѿ колѣна і҆ѹ҆дова, дв̂анадесѧть ты́сѧщъ запечатлѣ́нныхъ, ѿ колѣ́на рꙋви́мова, дв̂анадесѧть ты́сѧщь запечатлѣ́нныхъ, ѿ колѣ́на га́дова дв̂анадесѧть ты́сѧщь запечатлѣнных̑·
3
ѿ колѣ́на а҆сѷрова, дв̂анадесѧть ты́сѧщъ запечатлѣнныхъ. ѿ колѣна нефѳали́млѧ дв̂анадесѧть ты́сѧщъ запечатлѣ́нныхъ. ѿ колѣ́на манасїина, дванадесѧть ты́сѧщъ запечатлѣ́нныхъ. ѿ колѣ́на сѷмеѻ҆́нова, дванадесѧть ты́сѧщъ запечатлѣнныхъ. ѿ колѣна левїина. дванадесѧть ты́сѧщъ запечатлѣнных̑. ѿ колѣна і҆саха́рова. дванадесѧть ты́сѧщъ запечатлѣнных̑. ѿ колѣ́на завꙋлонѧ, дванадесѧть ты́сѧщъ запечатлѣ́нныхъ. и҆ ѿ колѣна і҆ѻ́сифова, дванадесѧть ты́сѧщъ запечатлѣнныхъ. ѿ колѣ́на венїа҆ми́нова, дванадесѧть ты́сѧщ̑҇ запечатлѣнныхъ·
4
По сихъ видѣх꙽ и҆ с̂е народ̑ мно́гъ, е҆гоже и҆счестѝ никтоже мо́жетъ, ѿ всѧкаго ꙗ҆́зы́ка и҆ колѣ́на и҆ людїи и҆ племен꙽. стоѧ́ще пред̑ прс̑҇тломъ, и҆ пред̑ а́гньцемъ, ѻ҆блечены в ри́зы бѣлы, и҆ фѷницы в рꙋкахъ и҆хъ. и҆ възопи́ша гласомъ ве́лїимъ гл҃юще, спс̑҇нїе сѣдѧщаго на прс̑҇тлѣ б҃а на́шего и҆ а́гньца. и҆ вси а҆гг҃ли стоѧ́хꙋ ѻ҆крс̑҇т꙽ прс̑҇тла, и҆ ста́рец̑҇ и҆ четыре животныхъ. и҆ падоша на лицы пред̑ прс̑҇тломъ и҆ поклонишасѧ б҃ꙋ. гл҃юще, а҆ми́нь. блс̑҇венїе и҆ сла́ва и҆ премꙋдрость и҆ хвала̀ и҆ честь и҆ си́ла и҆ крѣпость б҃ꙋ нашемꙋ въ вѣки вѣкомъ а҆ми́нь·
5
И҆ ѿвѣща е҆ді́нъ ѿ ста́рецъ гл҃а ми. сїи ѻ҆блеченїи в ри́ѕы бѣлыѧ, кт̂о сꙋть и҆ ѿкꙋдꙋ прїидоша; и҆ рѣхъ е҆мꙋ, г҃и, т̂ы вѣси·
6
И҆ рече м̂и, сїи сꙋть и҆же прїидо́ша ѿ скорби вели́кїѧ, і҆ и҆спра́ша ри́ѕы своѧ и҆ ѹ҆бѣли́ша ри́ѕы своѧ во кровѝ а҆́гньчи, сего ради сꙋть пред̑ прс̑҇тломъ бж҃їимъ и҆ слꙋжатъ е҆мꙋ дн҃ь и҆ нощъ въ цр҃кви е҆го. и҆ сѣдѧ́и на прс̑҇тлѣ всели́тсѧ в н̂ѧ. не въза́лчꙋть ктомꙋ ни въжа́ждꙋтъ·
7
Не и҆́мать же па́сти на нихъ слн҃це, и҆ всѧкъ зно́и·
8
Ꙗ҆́ко а҆гнецъ и҆же посрѣдѣ прс̑҇тла ѹ҆пасет̑ ѧ҆̀ и҆ наста́витъ и҆хъ на животныѧ и҆сточники водъ, и҆ ѿи҆метъ б҃ъ всѧкꙋ слезꙋ ѿ ѻ҆́чїю и҆хъ·
Джерела
