Ostroh Bible❧Об'явлення св. Івана Богослова, розділ 6

1

И видѣхъ е҆гда ѿвр́ьзе а҆гнецъ е҆ді́нꙋ ѿ седми печа́тїи, и҆ слы́шахъ е҆ді́ного ѿ четырех̑ животныхъ гл҃юща ꙗ҆́ко глас̑҇ громныи, грѧди и҆ ви́ждь·

2

И҆ видѣхъ, и҆ с̂е конь бѣлъ, и҆ сѣдѧѝ на немъ и҆мѣаше лꙋ́къ, и҆ данъ быс̑҇ е҆мꙋ вѣнецъ, і҆ и҆зыиде побѣжд̑аѧѝ да побѣдитъ. и҆ е҆гда̀ ѿве́рзе печать вторꙋ́ю, слы́шахъ второ́е животно гл҃юще, грѧди и҆ ви́жд̑ь. і҆ и҆зы́де дрꙋгїи ко́нь ры́жъ, и҆ сѣдѧ́щемꙋ на немъ дано бысть взѧти ми́ръ ѿ землѧ̀, и҆ да ѹ҆бїетъ дрꙋгъ дрꙋга, и҆ данъ бысть е҆мꙋ мечь вели́кїи. и҆ е҆гда ѿвр́ьзе третїю печать. слы́шах̑ третїе живо́тно гл҃юще, грѧдѝ и҆ ви́жд̑. и҆ видѣхъ, и҆ с̂е ко́нь во́ронъ. и҆ сѣдѧѝ на немъ и҆мѣѧше мѣ́рило в рꙋцѣ свое́й. и҆ слы́шахъ гласъ посредѣ четы́рехъ животныхъ гл҃ющь. мѣра пшеницы за дина́рь, и҆ тр̂и мѣ́ры ꙗ҆́чме́ню за дина́рь, і҆ е҆ле́и и҆ вино̀ не вредѝ·

3

И҆ егда ѿвр́ьзе четве́ртꙋю печа́ть, слы́шахъ гласъ четве́ртаго животна гл҃ющь, грѧди и҆ ви́ждь. и҆ видѣхъ. и҆ с̂е ко́ньблѣдъ. и҆ сѣдѧщ̑҇ на немъ и҆мѧ е҆мꙋ смр҃ть, и҆ а́дъ и҆дѧше въ слѣдъ е҆го. и҆ дана̀ бысть е҆мꙋ ѻ҆́бласть на четвертои ча́сти землѧ̀ ѹ҆бити ѻ҆рꙋжїемъ и҆ гла́домъ и҆ смертїю, и҆ ѕвѣрмѝ земными. и҆ егда ѿве́рзе пѧтꙋю печа́ть. видѣхъ под̑ ѻ҆лтаремъ дш҃а и҆збїе́ныхъ за слово бж҃їе и҆ за свѣдѣтельство е҆же и҆мѣа́хꙋ и҆ възопи́ша гласомъ вели́комъ гл҃юще, доко́лѣ влд̑ко ст҃ыи і҆ и́стинныи, не сꙋ́диши, и҆ не м꙽стиши крови на́ша ѿ живꙋщихъ на земли; и҆ даны быша комꙋжд̑о и҆хъ ризы бѣлы̀. и҆ ре́чено бысть и҆мъ да почїютъ е҆щѐ времѧ ма́ло дондеже сконча́ютсѧ и҆ клевре́ти и҆хъ, и҆ братїа и҆хъ хотѧ́щеѝ и҆збїени быти ꙗ҆́коже и҆ тїи. и҆ видх̑ѣ е҆гда ѿве́рзе шестꙋ́ю печа́ть. и҆ с̂е бысть трꙋ́съ велїи, и҆ сл҃нце мра́чно бысть ꙗ҆́ко вретище вла́сѧно. и҆ лꙋна̀ бысть ꙗ҆́ко кро́вь. и҆ звѣѕды нб҃сныѧ падоша на́ землю, ꙗ҆́ко смоков꙽ница ѿмѣта́ющи пꙋпы своа ѿ вѣтра вели́ка дви́жима·

4

И҆ нб҃о ѿлꙋчи́сѧ ꙗ҆́ко свитокъ свива́емо. и҆ всѧка гора̀ и҆ ѻ́стровъ ѿ мѣстъ свои҆хъ двигнꙋшасѧ, и҆ цр҃їе земъстїи и҆ велмо́жи и҆ бога́тїи и҆ ты́сꙋщницы и҆ си́лнїи. и҆ всѧк̑҇ рабъ и҆ всѧкъ свободъ, съкрышасѧ в пещерахъ и҆ каменїи горъстѣмъ. и҆ гл҃аша горамъ и҆ ка́менїю, падѣте на ны и҆ покрыите н̂ы, ѿ лица сидѧщаг̑҇ на прс̑҇толѣ, и҆ ѿ гнѣва а҆гньчѧ. ꙗ҆́ко прїиде дн҃ь вели́кїи гнѣва е҆го, и҆ кт̂о мо́жетъ ста́ти·