Ostroh BibleПерша книга хронік, розділ 16
Шрифт:
Запис:
1
Принесо́ша же ѹ҆бо кїѻ́тъ бж҃їи и҆ поставиша е҆го посредѣ жи́лища и҆же въздвиж̑ е҆мꙋ дв҃дъ. и҆ принесо́ша вс̂есъж꙽же́нїѧ и҆ мирнаѧ предъ гм҃ъ·
2
И҆ съверши дв҃дъ въздающи вс̂есъж꙽же́нїѧ и҆ ми́рнаѧ, и҆ блс̑҇ви люд̑и̑ въ и҆мѧ гн҃е·
3
И҆ раздѣлѝ в꙽сѣмъ по е҆ді́номꙋ ѿ мꙋжъ даже до же́нъ хлѣбъ е҆ді́нъ. и҆ часть пече́на мѧ́са воло́ва, и҆ прѧже́на ѻ҆ле́ѧ симидал̑҇·
4
Постави же пред̑ кїѻ́томъ гн҃имъ ѿ левѷтъ, и҆же слꙋжи́ти и҆ поминати дѣла е҆го і҆ и҆сповѣдати и҆ хвали́ти г҃а б҃а і҆и҆л҃ева·
5
А҆сафъ же началник̑҇ и҆ дрꙋгїи по немꙋ̀ захарїѧ паки і҆е҆и́ль и҆ самирамо́тъ. и҆ а҆і҆и́ль. и҆ маѳаѳиа҆съ, и҆ е҆лїа́въ, и҆ ване́ѧ, и҆ а҆вдедом̑, і҆ и҆и́ль сїи въ ѻ҆рга́ны и҆ ѱалты́ри и҆ гꙋсли и҆гра́ша, а҆са́ф же въ ким꙽ва́лехъ въз꙽глаша́ѧ·
6
И҆ ванѣа, и҆ ѻ҆зїи́ль сщ҃енницы трꙋбиша вы́нꙋ въ трꙋбꙋ̀ пред̑ кїѻ́томъ завѣта гн҃ѧ·
7
В то́иж̑ дн҃ь ѹ҆строѝ дв҃дъ въ нача́лѣ аса́фа и҆сповѣда́ти г҃а и҆ братїю е҆го·
8
И҆сповѣда́итесѧ гв҃и, и҆ призыва́ите и҆́мѧ е҆го, зна́емы сътвори́те гл҃ы творе́нїи е҆го·
9
По́ите е҆мꙋ и въспо́ите е҆мꙋ. и҆сповѣдите всѧ̀ чюдеса̀ е҆го ꙗ҆́же сътворѝ г҃ь·
10
Хвали́те и҆мѧ ст҃ое е҆го. да възвесели́тсѧ срд̑це и҆́щꙋщихъ бл҃говоле́нїѧ е҆го·
11
Взы́щете г҃а и҆ ѹ҆крѣпи́тесѧ. в꙽зы́щите лица е҆го вы́нꙋ·
12
Помѧни́те чюдеса̀ е҆го ꙗ҆́же сътворѝ, зна́менїѧ и҆ сꙋдбы̀ ѹ҆стъ е҆го·
13
Сѣмѧ і҆и҆л҃ево рабѝ е҆го сн҃ове і҆а́ковли и҆збра́н꙽нїи е҆го. то́и г҃ь б҃ъ на́шъ въ все́и землѝ сꙋдбы̀ е҆го·
14
Помѧне́мъ въ вѣкъ завт̑ѣ е҆го словеса̀ е҆го ꙗ҆же повелѣ̀ въ ты́сѧща ро́дъ·
15
Ꙗ҆́же завѣща̀ съ а҆враа́мом̑. и҆ клѧ́твы е҆го съ і҆саа́комъ·
16
И҆ поста́ви е҆̀ і҆а́ковꙋ въ повеле́нїе, і҆и҆л҃ю въ завѣтъ вѣченъ·
17
Гл҃ющи, тебѣ да́мъ зе́млю ханаа́ню, жре́бїи достоѧ́нїѧ ва́шего·
18
Є҆гда бы́ти ва́мъ ма́ломъ число́мъ, до́ндеж̑ бы́ша и҆ живꙋщїи е҆го и҆ пресели́шасѧ в ню̀·
19
И҆ преи҆до́ша ѿ ꙗ҆зы́ка въ ꙗ҆зык̑҇ и҆ ѿ црс̑҇твїѧ к лю́демъ и҆́нымъ·
20
Не ѻ҆ста́ви никомꙋ́же ѻ҆би́дѣти и҆хъ. и҆ запрѣтѝ про и́хъ цр҃и·
21
Не прикаса́итесѧ хрс̑҇томъ мои́мъ, и҆ въ проро́цѣхъ мои҆хъ не лꙋкавнꙋ́ите·
22
Поите гв҃и всѧ землѧ̀, възвѣсти́те ѿ дн҃е на́ дн҃ь сп҃сенїе е҆го·
23
Възвѣсти́те въ ꙗ҆зы́цѣхъ сла́вꙋ е҆го. и҆ въ всѣхъ лю́дехъ чюдеса̀ е҆го. Ꙗ҆́ко ве́лїи г҃ь и҆ хваленъ ѕѣло. и҆ стра́шенъ е҆сть над̑ всѣми бо́ги·
24
Всѝ бо бо́ѕи лю́дъстїи и҆́доли. и҆ г҃ь же нб҃са сътворѝ, сла́ва и҆ вели́чество пред̑ ним̑ и҆ крѣпость и҆ похва́ла въ мѣстѣ е҆го ст҃омъ·
25
Принесѣте гв҃и ѿч҃ествїѧ ꙗ҆зы́комъ. принесѣте гв҃и сла́вꙋ и҆ крѣпость·
26
дади́те гв҃и сла́вꙋ и҆́мени е҆го. въздвигнѣте жрътвꙋ и҆ прїидѣте пред̑ лице е҆го, и҆ поклони́тесѧ гв҃и въ дворѣ̀ ст҃ѣмъ е҆го·
27
да ѹ҆бои́тсѧ ѿ лица̀ е҆го всѧ землѧ̀. и҆ да и҆спра́витсѧ землѧ̀, и҆ да не подвижи́тсѧ·
28
да веселѧт̑сѧ нб҃са и҆ ра́дꙋетсѧ землѧ̀, и҆ да рекꙋтъ въ ꙗ҆зы́цехъ г҃ь црс̑҇твꙋ́етъ·
29
да възъгласит̑ мо́ре і҆ и҆сполне́нїе е҆го. и҆ дре́ва по́льскаѧ и҆ всѧ̀ ꙗ҆́же на ни́хъ сꙋть·
30
Тогда̀ въсхва́лѧт̑ дре́ва дꙋбра́внаѧ пред̑ лице́мъ гн҃имъ. ꙗ҆ко прїидетъ сꙋди́ти землѝ. и҆сповѣда́итесѧ гв҃и ꙗ҆́ко бл҃гъ, ꙗ҆ко въ вѣкъ млс̑҇ть е҆го·
31
И҆ гл҃ите сп҃си н̂ы бж҃е сп҃сителю нашъ. и҆ съберѝ насъ, і҆ и҆змѝ на́съ ѿ ꙗ҆зы́къ. да хва́лимъ и҆́мѧ ст҃ое твоѐ, и҆ ра́дꙋемсѧ въ хвале́нїихъ твои҆хъ·
32
Блс̑҇венъ г҃ь б҃ъ і҆и҆л҃евъ, ѿ вѣка да́же и҆ до́ вѣка. и҆ рекꙋтъ всѝ лю́дїе а҆ми́нь, и҆ въсхвали́ша г҃а.
33
И҆ ѻ҆стави́ша т̂ꙋ пред̑ кїѻтом̑ завѣта гн҃ѧ а҆са́фа и҆ бра́тїю е҆го. да слꙋжат̑ пред̑ кїѻ́томъ вы́нꙋ по всѧ̀ дн҃и·
34
И а҆вдедо́мъ и҆ бра́тїѧ е҆го, ѯ҃и·
35
И а҆вдедо́мъ сн҃ъ и҆а҆ѳо́мовъ. и҆ ѻса́и. поста́виша две́рницы·
36
Садо́ка же сщ҃енника и҆ бра́тїю е҆го сщ҃ен꙽никами пред̑ жили́щемъ гн҃имъ въ вы́шнихъ и҆же бѣ̀ въ гаваѻ́нѣ·
37
да въздают̑ вс̂есъж꙽же́нїѧ гв҃и, на ѻ҆лтарѝ вс̂есъж꙽же́нїѧ вы́нꙋ ѹ́тро и҆ ве́черъ. по всѣхъ и҆же пи́сана сꙋть въ зако́нѣ гн҃и, ꙗ҆́же повелѣ сн҃омъ і҆и҆л҃евомъ рꙋко́ю моѷсїѧ раба̀ бж҃їѧ·
38
И҆ по нем̑ е҆м꙽ма́нъ и҆ диѳꙋмъ и҆ про́чїи и҆збран̑҇нїи е҆ді́нъ ко́ждо зва́нїемъ свои҆мъ къ и҆сповѣда́нїю г҃ꙋ, ꙗ҆́ко въ вѣки млс̑҇ть е҆го·
39
И҆ с нимѝ трꙋб꙽ницы и҆ бїю́щїи кѷм꙽ва́лы и҆ вс̂ѧ мꙋсикїѧ а҆рга́номъ къ пѣнїю бж҃їю, сн҃ове же и҆дифꙋмли въ вра́тех̑ стоѧ́хꙋ·
40
ѻ҆брати́ша же сѧ вс̂и лю́дїе в домы своѧ̀, и҆ дв҃дъ ѻ҆брати́сѧ да блс̑҇ви́тъ до́мъ свои·
Джерела
