Ostroh Bible❧Перша книга царів (Третя книга царств), розділ 10

1

И цр҃ца са́въска слы́шавше и҆́мѧ соло́моне. і҆ и́мѧ гн҃е. и҆ прїиде и҆скꙋси́ти е҆го прит̑чами. и҆ прїиде въ і҆ерс̑҇ли́мъ съ си́лою тѧ́жкою ѕѣло. и҆ на вельблю́дх̑ѣ принесо́ша слад̑кости зе́леи, и҆ зла́то мно́го ѕѣло. и҆ ка́мень дра́гїи, и҆ вни́де к соло́монꙋ и҆ гл҃а е҆мꙋ. вс̂е е҆ли́ко и҆мѣ̀ на срд̑цы сѝ·

2

И҆ възвѣстѝ е́и соло́монъ вс̂ѧ гл҃ы е҆ѧ̀. и҆ не бѣ̀ сло́ва ни е҆ді́наго, е҆же гонзѐ цр҃ь и҆ е҆го́же не възвѣстѝ е́и·

3

И҆ ви́дѣ цр҃а са́вска, ве́сь смы́слъ соло́монь, и҆ до́мъ и҆же сози́жде и҆ ꙗ҆де́нїѧ соло́монѧ и҆ сѣда́нїе ѿ ѻ҆́трок̑҇ е҆го. и҆ пред̑стоꙗ҆́нїе слꙋжа́щихъ е҆мꙋ и҆ ѻ҆блаче́нїе и҆хъ, и҆ виноче́рп꙽цы е҆го и҆ вс̂ѧсож꙽же́нїѧ е҆го ꙗ҆́же приноша́ше въ хра́мъ гн҃ь·

4

И҆ в себѣ̀ бы́вше реч̑҇ к꙽ соло́монꙋ цр҃ꙋ. и҆́стин꙽на сꙋть словеса̀ ꙗ҆́же слы́шахъ в землѝ мое́и ѻ҆ словесѣхъ твои҆хъ, и҆ ѻ҆ смы́слѣ твое́мъ·

5

И҆ не и҆нѧхъ вѣри гл҃ющим̑ м̂и, до́ндеже и҆ прїидо́хъ сѣмо, и҆ ви́жꙋ ѹ҆же ѻ҆чи́ма свои́ма. и҆ с̂е нѣсть ни пол̑҇ того̀ е҆же м̂и повѣда́ша н̂о ты̀ приложи́лъ е҆си бл҃гаѧ къ си́м꙽ па́че всѧ́каго слꙋха и҆же слы́шахъ в землѝ мое́и сꙋщи·

6

Блж҃ены же́ны твоѧ, и҆ бл҃жени ѻ҆́троцы твоѝ сїи, и҆же т̂и пред̑стоѧт̑ пред̑ тобо́ю, всегда̀ слы́шащи смы́слъ твой·

7

И҆ бꙋди г҃ь б҃ъ твои блс̑҇венъ, и҆же въсхотѣ т̂ѧ да́ти на прс̑҇тлъ і҆и҆л҃евъ, за любо́вь гн҃ю ю҆́же над̑ і҆и҆л҃емъ поста́ви въ вѣки, и҆ поста́ви тѧ цр҃ѧ над̑ ними твори́ти сꙋдъ въ пра́вдꙋ, в꙽ сꙋдбах̑ е҆го, и҆ да́сть соло́монꙋ, р҃, и҆ к҃, тала́нтъ зла́та, и҆ слад̑кости мно́ги ѕѣ́ло, и҆ ка́менїе драго́е, не прїиде ктомꙋ̀ такова̀ сла́дкость и҆ та́ко мно́жество еѧ̀ ꙗ҆́ко сла́дкости сїѧ мно́жествомъ ꙗ҆́же да́сть цр҃ца сав̑҇ска, цр҃ю со́ло́монꙋ·

8

И҆ кора́бль хира́мль, приносѧ́щи и҆ злато ѿ фира и҆ дре́ва мно́га ѕѣло принесѐ нете́саного, и҆ ка́менїе драго́е·

9

И҆ сътворѝ цр҃ь дре́вомъ недѣланомъ подъпо́ры хра́мꙋ гн҃ю, и҆ до́мꙋ цр҃евꙋ, и҆ сопѣ́ли и гꙋ́сли пѣвцо́мъ, не пришло̀ по сем̑ такова́го дре́ва недѣ́лана на землѝ ниже ви́дѣно бы́сть нигде́же и҆ да́же до дне́сь·

10

И҆ цр҃ь соло́монъ да́сть цр҃цы са́в꙽стѣи вс̂ѧ е҆ли́ко въсхотѣ̀ и҆ е҆гоже просѝ ѹ҆ него ѿ всего и҆же дас̑҇ е́й рꙋка́ма свои́ма соло́монъ цр҃ь, и҆ възвра́щ꙽шисѧ и҆́де в꙽ зе́млю свою, т̂а сама̀ и҆ вс̂и ѻ҆́троцы е҆ѧ̀·

11

И҆ б̂ѣ число̀ прине́сенаго зла́та соло́монꙋ е҆ді́наго лѣта, х҃, и҆ ѯ҃, и҆ ѕ҃, тала́нтъ зла́та ра́звѣ да́нїи притѧжа́ныхъ ѿ кꙋпцо́въ, и҆ ѿ всѣхъ цр҃ь стра́нныхъ, и҆ ѿ вое҆вод̑ зе́мных̑·

12

И сътворѝ цр҃ь соло́монъ, т҃ ко́пїи зла́тыхъ и҆збра́нныхъ, по т҃, зла́тыхъ въ е҆ді́нꙋ копїю̀ в꙽дѣла̀·

13

И҆ т҃, ѻ҆рꙋж́їи и҆збра́нныхъ зла́тых̑ по тре́мъ фꙋн꙽томъ зла́та бѧ́ше на кое́м꙽ждо ѻ҆рꙋжїѝ, и҆ да́сть ѧ҆̀ цр҃ь въ хра́мъ. и҆же б̂ѣ здѣланъ ѿ дре́ва ливан꙽скаго·

14

И҆ сътворѝ цр҃ь прс̑҇тлъ ѿ ко́стїи слоно́выхъ вели́къ. и҆ позлатѝ ѝ зла́томъ и҆скꙋше́нымъ·

15

ѕ҃, степе́нїи прс̑҇тлꙋ. и҆ на връхꙋ е҆го бы́сть ѻ҆крꙋглость соза́ди. и҆ рꙋцѣ сю́дꙋ и҆ сю́дꙋ на прс̑҇тлѣ и҆дѣже сѣ́сти и҆ дв̂а льва стоꙗ҆́ща ѹ҆ рꙋкꙋ, и҆ в҃і. льва̀ стоꙗ҆́ща бѣста т̂ꙋ ѹ҆ степе́нїи сю́дꙋ и҆ сю́дꙋ. и҆ не бѣ̀ та́ко ни в꙽ кое́же црс̑҇тво·

16

И҆ вс̂и сосꙋди и҆же бѧ́ше при цр҃и соло́монѣ зла́ти бѣша. и҆ ѹ҆мыва́лница златы. и҆ вс̂и сосꙋди хра́ма дре́ва лива́ньска, зла́томъ чи́стымъ сни́мано, безъ сребра̀. за ничто́же б̂о бѣ̀ сребро̀ въ дн҃и соло́монѧ, кора́бль б̂о ѳа́рьскїи и҆мѣѧ цр҃ь соло́монъ, в꙽ мо́ри съ сн҃ы хира́мовыми, е҆ді́ною, въ тре́хъ лѣтехъ прихожда́ше цр҃еви ѿ ѳарси́са и҆ приноша́ше зла́та и҆ сребра̀. зꙋбы слоно́вы и҆ пифи́ки и҆ па́вы, и҆ ка́менїе дѣ́лано и҆ не дѣ́лано·

17

Сїѧ б̂ѣ ве́щь коры́сти ю҆́же прине́съ цр҃ь соло́монъ на созида́нїе хра́мꙋ гн҃ю. и҆ до́мꙋ цр҃евꙋ, и҆ стѣнѣ̀ і҆ерс̑҇ли́мъстѣи. и҆ кра́инꙋю же ѻ҆радѝ стѣно́ю гра́да двд҃ва·

18

И҆ а҆сꙋ́ръ, и҆ магда́лъ. и҆ гезе́рꙋ, и҆ веѳе́рꙋ вы́шнюю. и҆ ев̑҇ѳермаѳ̑҇ и҆ вс̂ѧ гра́ды. и҆ в ни́х же бѣша ѻ҆рꙋжницы. и҆ вс̂ѧ гра́ды в ни́х же бѧ́хꙋ без꙽зако́нницы и҆ ко́зни соло́мони, и҆́мже зижда́ше въ і҆ерс̑҇ли́мѣ и҆ въ все́и землѝ ꙗ҆́ко не смꙋтѝ е҆мꙋ всѣхъ людїи́. и҆ ѿ ѻ҆ста́вленых̑ и҆же ѿ хе́та и҆ ѿ а҆марїи, и҆ ѳерезїи́ и҆ ѿ ханане́и и҆ ѿ е҆в꙽ве́и. и҆ ѿ е҆вꙋсе́и, и҆ ѿ гергесе́и, и҆же не бы́ша ѿ сн҃въ і҆и҆л҃евъ. и҆ ча́да и҆хъ ѻ҆ста́виша с ни́ми на землѝ. и҆же не возмого́ша сн҃ове і҆и҆л҃евы и҆стощи́ти и҆хъ, і҆ и҆ възведѐ ѧ҆̀ соло́монъ въ дан꙽никѝ да́же до дне́сь, ѿ сн҃ов꙽ же і҆и҆л҃евъ не да́стъ на дѣ́ло соло́монъ, ꙗ҆́ко тїи́ бѧ́хꙋ мꙋжи хра́бри и҆ ѻ́троцы е҆го и҆ вое҆во́ды трїе е҆го, и҆ вое҆во́ды ѻ҆рꙋж́никъ е҆го, и҆ ко́нникъ е҆го·

19

И҆ возвели́чисѧ соло́монъ па́че всѣхъ цр҃ь зе́мныхъ. и҆ бога́тъствомъ и҆ смы́сломъ·

20

И҆ вс̂и цр҃и зе́м꙽стїѝ. и҆ска́хꙋ ви́дѣти лицѐ е҆го. и҆ слы́шати смы́слъ е҆го, и҆же да́сть е҆мꙋ г҃ь въ срд̑цы е҆го·

21

И҆ тїи́ приноша́хꙋ ко́ждо да́ры своѧ̀. и҆ сосꙋ́ды зла́ты и҆ сре́брены, и҆ ри́зы и҆ ѻ҆рꙋ́жїѧ и҆ слад̑кости. и҆ ко́нѧ и҆ м꙽ща́та, и҆ всѧ́кꙋю ве́щь лѣто по лѣтꙋ. и҆ бѣша ѹ҆ соло́мона, ҂м҃, ста́дъ ко́нныхъ въ колесни́ца. и҆ ҂в҃і, сонꙋзд̑ницъ. и҆ поста́ви ѧ҆̀ въ гра́дѣхъ со колесни́цами. и҆ дрꙋзїи́ бѧ́хꙋ ѹ҆ цр҃ѧ въ і҆ерс̑҇ли́мѣ·

22

И҆ б̂ѣ властели́нъ всѣмъ цр҃емъ. ѿ рѣкѝ и҆ до землѧ̀ и҆ноплеме́нникъ. и҆ до предѣлъ е҆гѷпта. и҆ сложѝ цр҃ь зла́то и҆ сребро̀ въ і҆ерс̑҇ли́мѣ. ꙗ҆́ко ка́менїе и҆ ке́дръ сложѝ. ꙗ҆́ко и҆ черни́чїе е҆же на́ поли ѿ мно́жества·

23

И҆ привожда́хꙋ соло́монꙋ ко́ни ѿ е҆гѷпта. и҆ ѿ ѳе́кꙋ и҆ кꙋпцы̀ цр҃ьстїѝ кꙋпова́хꙋ и҆̀ ѿ ѳекꙋѧ́ и҆змѣ́ною·

24

И҆ прихожда́ше ко́ни со колесни́цами ѿ е҆гѷпта, за х҃, сре́бреникъ. и҆ ко́ни за рн҃ сре́бреникъ. та́коже и҆ въ все́мъ црс̑҇твѣ хиѳи́м꙽скомъ, и҆ сѷрїи́скомъ и҆схожда́ше·