Ostroh Bible❧Перша книга царів (Третя книга царств), розділ 11

1

И цр҃ь соло́мон꙽ бѣ̀ любѧ̀ же́ны ѕѣло, и҆ поꙗ҆́тъ же́ны чꙋждаѧ. и҆ дще́рь фараѻ́ню, моа҆ви́тѧнынѧ, и҆ а҆м꙽мани́тѧнынѧ, и҆ а҆сѷрѧны́нѧ и҆домѣаны́нѧ, и҆ хеѳе́ѻнынѧ. и҆ а҆меѳены́нѧ. ѿ ꙗ҆зы́къ, ꙗ҆коже заповѣ́да г҃ь сн҃омъ і҆и҆л҃евымъ не входи́ти в нѧ̀. и҆ тїи́ да не вхо́дѧтъ въ ва́съ. и҆ да не ѿвратѧ́тъ дш҃ъ ва́шихъ, въ слѣ́дъ и҆́долъ и҆хъ. и҆ тх̑ѣ приложи́сѧ соло́мон̑҇ люби́ти·

2

И҆ бы́ста е҆мꙋ же́ны нача́лных̑. з҃ сот̑·

3

и҆ подло́жниць, т҃·

4

И҆ быс̑҇ въ вре́мѧ ста́рости соло́монѧ. и҆ съврати́ша же́ны чꙋж́даѧ срд̑це е҆го въ слд̑ѣ бо́гъ и҆́ныхъ. не бѣ̀ срд̑це е҆го съ гм҃ъ бм҃ъ е҆го, ꙗ҆́коже срд̑це дв҃да ѿц҃а е҆го·

5

И҆ хожда́ше соло́мон̑҇ въ слѣдъ а҆стар̑҇са и҆ скве́рнаго сидо́ньскаго. и҆ въ слѣ́дъ цр҃ѧ и҆хъ и҆́доловъ. сн҃овъ а҆м꙽мо́нь. и҆ сътворѝ соло́мон̑҇ лꙋка́вное пред̑ гм҃ъ. и҆ не ходѝ въ слѣ́дъ г҃а, ꙗ҆коже дв҃дъ ѿц҃ъ е҆го·

6

Тогда созда̀ соло́монъ высо́ко ка́пище и҆́дола моа́влѧ, и҆ цр҃ѧ и҆хъ и҆́долы сн҃овъ а҆м꙽мо́нь. и҆ а҆ста́ртꙋ скве́рнꙋю сидо́ньскꙋю на горѣ̀ и҆же пред̑ і҆ерс̑҇ли́момъ·

7

И҆ та́ко сътворѝ всѣмъ жена́мъ свои҆мъ чꙋжи́мъ. ꙗ҆́же закала́хꙋ и҆ жрѧ́хꙋ и҆́доломъ свои҆мъ·

8

И҆ раз꙽гнѣ́васѧ г҃ь на соло́мона. ꙗ҆́ко ѹ҆клонѝ срд̑це своѐ ѿ г҃а б҃а і҆и҆л҃ева. ꙗ҆́вльшагосѧ е҆мꙋ два́жды·

9

И҆ заповѣ́давшемꙋ е҆мꙋ два́жды ѻ҆ словесѝ се́мъ прс̑҇но. ꙗ҆́ко не ходи́ти е҆мꙋ въ слѣдъ бо́гъ и҆́нѣх꙽ и҆ храни́ти и҆ сътвори́ти ꙗ҆́же заповѣ́да е҆мꙋ г҃ь б҃ъ·

10

И҆ рече г҃ь к꙽ соло́монꙋ, поне́же бы́ша сї́и с тобо́ю. и҆ не съхранѝ за́повѣдїи мои҆хъ и҆ повеле́нїи мои҆хъ, и҆миже заповѣ́дахъ тѝ и҆ разве́ргъ разве́ргꙋ црс̑҇тво твоѐ и҆з рꙋ́кꙋ твое́ю. и҆ да́мъ е҆̀ рабꙋ̀ твое҆мꙋ·

11

Во́ дн҃и же твоѧ̀ не сътворю̀ си́хъ дв҃да ради ѿц҃а твое҆го. ѿ рꙋкиж̑ сн҃овъ твои҆хъ ѿи҆мꙋ̀ и҆̀·

12

То́кмо всего црс̑҇тва не прїимꙋ̀. хорꙋгве́ иже да́мъ сн҃ꙋ твое҆мꙋ дв҃да ра́ди раба̀ мое҆го. і҆ерс̑҇ли́ма ра́ди гра́да е҆гоже и҆збра́хъ·

13

И҆ въздви́же г҃ь на соло́мона стꙋжа́ющаго. раздро́на сн҃а е҆лиде́кова. и҆же и҆збѣжа̀ ѿ вараме́ѳы и҆ а҆драза́ра цр҃ѧ сꙋ́вска господи́на своег̑҇ и҆ събра́шасѧ к немꙋ мꙋ́жи, и҆ б̂ѣ вое҆во́да по́лкꙋ в꙽негда̀ побѣжда́ше ѧ҆̀ дв҃дъ. и҆ прїидо́ша в дама́скъ·

14

и҆ всели́шасѧ в нем̑ и҆ воц҃рисѧ в꙽ седо́кꙋ·

15

И҆ б̂ѣ стꙋжа́ѧ і҆и҆л҃еви въ вс̂ѧ дн҃и соло́монѧ. и҆ вѣздви́же г҃ь стꙋжа́ю҆щаго на соло́мона. и҆ а҆да́ра и҆дꙋмѣꙗ҆нина, ѿ сѣмени цр҃ьска въ и҆дꙋме́и.

16

И бы́сть е҆гда и҆скоренѝ дв҃дъ е҆до́ма. е҆гда̀ и҆́де і҆ѻ҆а́въ вое҆во́да, во́и погреба́ти ꙗ҆́звенїи. і҆ и҆с꙽сѣче всѧ́къ мꙋ́жескъ по́лъ въ и҆дꙋмѣи·

17

Ꙗ҆́ко ѕ҃ мс̑҇цъ. сѣде т̂ꙋ і҆ѻ҆а́въ, и҆ весь і҆и҆л҃ь въ и҆дꙋмѣ́и. до́ндеже и҆зби́ша всѧ́къ мꙋжескъ по́лъ въ и҆дꙋмѣ́и·

18

И҆ бѣжа̀ а҆да́ръ самъ и҆ вс̂и мꙋжи и҆дꙋмѣ́истїи. и҆ ѻ́троки ѿц҃а е҆го с ним̑. а҆да́дъ же бы́сть ѻ҆тро́чищъ ма́лъ·

19

И҆ внидо́ша въ е҆гѷпет꙽. и҆ въста́ша мꙋжи гра́да мадїам̑ска. и҆ прїидо́ша въ фара́нъ. и҆ поꙗ҆́ша мꙋжа съ собо́ю и҆ прїидо́ша къ фараѻ́нꙋ цр҃ю е҆гѷпет꙽скомꙋ. и҆ вни́де а҆да́ръ къ фараѻ́нꙋ. и҆ да́сть е҆мꙋ цр҃ь до́мъ и҆ ѹ҆рок̑҇ ꙗ҆́ди. и҆ зе́млю дадѐ е҆мꙋ·

20

И҆ ѻ҆брѣтѐ а҆дар̑҇ ра́дость пред̑ ѻ҆чи́ма фараѻ́нима ѕѣло. и҆ да́сть е҆мꙋ женꙋ̀ сестрꙋ жены̀ свое́ѧ сестрꙋ ѳекеми́ны старѣ́ишꙋю·

21

И҆ родѝ е҆мꙋ сестра̀ ѳекеме́ина сн҃а а҆деръ ганава́ѳа. и҆ въскормѝ и҆̀ ѳекеми́на по́средѣ сн҃овъ фараѻ́нь. и҆ б̂ѣ ганива́ѳъ по́средѣ сн҃овъ фараѻ́нь·

22

И҆ а҆де́ръ слыша въ е҆гѷптѣ ꙗ҆́ко ѹ҆спѐ дв҃дъ, съ ѿц҃ы свои́ми. і҆ ꙗ҆ко ѹ҆́мре і҆ѻ҆а́въ вое҆во́да старѣ́ишинамъ. и҆ рече а҆де́ръ къ фараѻ́нꙋ. пꙋстѝ м̂ѧ да сѧ възвращꙋ̀ въ зе́млю свою·

23

И҆ рече а҆де́рови фараѻ́нъ. чт̂о недово́ленъ е҆си ѹ҆ мене. и҆ с̂е ты̀ проси́шисѧ в зе́млю свою. и҆ рече е҆мꙋ а҆дер̑҇ ꙗ҆́ко ѿпꙋща́ѧ ѿпꙋсти́ши м̂ѧ·

24

И҆ възврати́сѧ а҆де́ръ в зе́млю свою. с̂и ѕло́ба и҆же сътворѝ а҆де́ръ. ѻ҆тѧж̑чи́сѧ на і҆и҆л҃ѧ. и҆ црс̑҇твова́ же в землѝ е҆до́м꙽стѣи. и҆ е҆ровоа́м꙽ сн҃ъ нава́тов̑҇ и҆ е҆фра́ѳи, и҆же ѿ сари́ра. сн҃ъ жены̀ вдови́цы рабы̀ соло́мони. и҆ сїи́ възъдви́же рꙋцѣ на цр҃ѧ соло́мона·

25

И҆ сїа вина̀ и҆же въз꙽дви́же рꙋцѣ на цр҃ѧ, внегда̀ цр҃ь соло́монъ созда́лъ б̂ѣ кра́и, и҆ съвръшѝ пло́том̑. въ́ градѣ дв҃да ѿц҃а свое҆го. и҆ чл҃къ б̂ѣ е҆ровоам̑ крѣпокъ си́лою. и҆ ви́дѣ соло́мон̑҇ ꙗ҆́ко мꙋжъ ѻ҆́трок на дѣ́ло е҆сть, и҆ поста́ви и҆̀ надо всѣми строе́нїи до́мꙋ і҆ѻ́сифова·

26

И҆ бы́сть во врѣмѧ т̂о. и҆ е҆ровоа́мъ и҆зы́де и҆зъ е҆рс̑҇ли́ма. и҆ ѻ҆брѣте и҆̀, а҆хїѧ силонитѧнин̑҇ про̑҇ркъ на пꙋтѝ, и҆ соврати и҆̀ с пꙋтѝ. и҆ б̂ѣ а҆хїѧ ѻ҆болченъ в꙽ ри́зꙋ но́вꙋ. и҆ бѣста ѻ҆́ба е҆ді́на на́ поли·

27

И҆ взѧ̀ а҆хїѧ за ри́зꙋ свою̀ но́вꙋю и҆же б̂ѣ на нем̑. и҆ раздра и҆̀, на в҃і, жре́бїѧ·

28

И҆ рече и҆е҆ровоа́мꙋ, прїими себѣ, і҃, жребїи ꙗ҆́ко та́ко гл҃етъ г҃ь і҆и҆л҃евъ, с̂е а҆́зъ ѿи҆мꙋ црс̑҇тво и҆з рꙋки соло́монѧ, и҆ дам̑ ти хорꙋгвїи, і҃·

29

А҆ дв̂ѣ хорꙋгви ѻ҆ставлю е҆мꙋ, раба̀ ра́ди мое҆го давы́да, і҆ерс̑҇ли́ма ради града мое҆го, и҆же и҆збрахъ себѣ въ все́мъ колѣ́нѣ і҆и҆л҃евѣ·

30

Зане́же ѻ҆стави м̂ѧ, и҆ поклони́шасѧ а҆ста́ртꙋ сквръномꙋ сидо́нскꙋ, и҆ хамо́сꙋ кꙋми́рꙋ моа́влю и҆ цр҃ю и҆хъ на срамленїе сн҃омъ а҆м꙽монимъ·

31

И҆ не ходи́ша по пꙋтих̑ моих̑, е҆же творити ѹд̑го́наѧ предо мно́ю, ꙗ҆коже и҆ дв҃дъ ѿц҃ъ е҆го. сего ра́ди прилага́ѧ приложꙋ̀ в꙽сѧ дн҃и живота̀ е҆го, и҆ не ѿи҆мꙋ̀ црс̑҇тва в꙽сего ѿ рꙋ́кꙋ е҆го дв҃да рад̑и̑ ра́ба моег̑҇, е҆го́же и҆збрах̑·

32

И҆ ѿи҆мꙋ црс̑҇тво ѿ рꙋки сн҃а е҆го, и҆ дам̑ ти, і҃ хорꙋгви. сн҃ови же е҆го дамъ дв̂ѣ хорꙋгвѣ, ꙗ҆́коже завѣщах̑ рабꙋ̀ мое҆мꙋ дв҃дꙋ. во вс̂ѧ дн҃и предо мно́ю въ і҆ерс̑҇ли́мѣ градѣ. е҆гоже и҆збрахъ на положе́нїе и҆́мени мое҆мꙋ т̂ꙋ·

33

И҆ т̂ѧ прїимꙋ и҆ црс̑҇твꙋе́ши, ѻ҆ них̑же жадает̑ т̂и дш҃а. и҆ т̂ы бꙋ́деши цр҃ь над̑ і҆и҆л҃емъ·

34

И҆ бꙋ́детъ а҆́ще съхрани́ши вс̂е е҆ли́ко заповѣ́даю ти. и҆ да ходи́ши пꙋте́мъ моим̑ и҆ сътвори́ши ѹ҆год̑наѧ предо мно́ю. храни́ти за́повѣди моѧ и҆ повеле́нїѧ моѧ̀ ꙗ҆́коже сътвори дв҃дъ ра́бъ мо́и, и҆ бꙋ́дꙋ с тобо́ю. и҆ соѕи́ждꙋ т̂и домъ вѣрен̑҇. ꙗ҆́коже создах̑ дв҃дꙋ и҆ дамъ т̂и і҆и҆л҃ѧ. и҆ накажꙋ ро́дъ дв҃двъ ради сего н̂о не во всѧ̀ дн҃и·

35

І҆ и҆ска́ше соло́монъ ѹ҆би́ти и҆е҆ровоа́ма. и҆ воста́въ и҆е҆ровоа́мъ бѣжа́ въ е҆гѷпетъ къ сꙋсаки́мꙋ цр҃ю е҆гѷпет꙽скꙋ. и҆ б̂ѣ въ е҆гѷптѣ, до́ндеже соло́монъ ѹ҆́мре·

36

И҆ проча́ѧ слове́съ соло́монихъ, и҆ вс̂ѧ е҆ли́ко сътвори. и҆ весь смы́слъ е҆го. не с̂е л̂и пи́сана быша в꙽ кни́зе гл҃емой соло́монъ·

37

И҆ бѣ дн҃їи в нѧже црс̑҇твова соло́монъ въ і҆ерс̑҇ли́мѣ надо всѣмъ і҆и҆л҃емъ, м҃, лѣтъ. и҆ ѹ҆спѐ соло́мон̑҇ съ ѿц҃ы свои҆ми. и҆ погребо́ша и҆̀ въ градѣ дв҃да ѿц҃а е҆го. и҆ бысть е҆гда̀ ѹ҆слы́ша и҆е҆ровоа́мъ сн҃ъ нава́товъ, е҆мꙋже е҆щѐ сꙋщꙋ въ е҆гѷпте. ꙗ҆́ко ѹ҆бѣжа ѿ лица соло́монѧ и҆ пребываше в꙽ е҆гѷптѣ. и҆ въстав̑҇ прїиде во́ град̑ е҆го в꙽ зе́млю сарираи҆ню, и҆же въ предѣлех̑ е҆фрѣмлих̑·

38

Цр҃ь же соло́монъ ѹ҆спѐ съ ѿц҃ы свои҆ми. и црс̑҇твова ровоа́мъ сн҃ъ е҆го в него̀ мѣсто·