Ostroh BibleПерша книга царів (Третя книга царств), розділ 12
Шрифт:
Запис:
1
Идѧше цр҃ь ровоам̑ въ сики́мꙋ. ꙗ҆ко въ сики́мъ прїиде весь і҆и҆л҃ь въцрс̑҇тви́ти и҆̀·
2
И҆ быс̑҇ е҆гда̀ ѹ҆слы́ша и҆е҆ровоамъ сн҃ъ нава́тов̑҇ и҆ томꙋ̀ е҆щѐ сꙋщꙋ въ е҆гѷп꙽тѣ. ꙗ҆́ко ѹ҆бѣжа̀ ѿ лица̀ соло́монѧ. и҆ пребыва́ше въ е҆гѷптѣ·
3
Въста́въ же и҆ прїиде въ́ градъ свои въ зе́млю сарират꙽скꙋ. въ предѣлы е҆фрѣмлѧ, и҆ гл҃аша лю́дїе къ цр҃ю ровоа́мꙋ гл҃юще·
4
ѿц҃ъ твои ѻ҆тѧгча̀ ꙗ҆ре́мъ нашъ. понѐ т̂ы нн҃ѣ ѻ҆блегчѝ работꙋ̀ ѿц҃а твое҆го ѕлꙋ́ю и҆ ѿ ꙗ҆ре́ма е҆го тѧ́жкаго. и҆же възложѝ на́ ны, и҆ порабо́тае҆мъ т̂и·
5
И҆ рече к ни́мъ и҆дѣте и҆ пребꙋдѣте до тре́тїꙗ҆го дн҃е. и҆ па́ки възврати́тесѧ къ мн̂ѣ і҆ и҆до́ша·
6
И҆ возвѣстѝ ровоа́мъ цр҃ь ста́рцемъ, и҆же бѣша пред̑стоꙗ҆́ще пред̑ соло́моном꙽ ѿц҃емъ е҆го, е҆гда̀ е҆ще жи́вꙋ е҆мꙋ сꙋщꙋ. гл҃ѧ ка́ко в̂ы мы́слите. да ѿвѣща́ю людемъ сим̑ слово·
7
И҆ рѣша е҆мꙋ гл҃юще. а҆ще въ дн҃ешнїи дн҃ь бꙋдеши ра́бъ лю́демъ симъ. и҆ порабо́тае҆ши и҆мъ. и҆ гл҃еши и҆м꙽ словеса̀ бл҃га. и҆ бꙋдꙋтъ т̂и рабѝ въ всѧ̀ дн҃и·
8
И҆ небрѣжа́ше совѣта ста́рец̑҇ и҆же совѣща́ша с ним꙽. и҆ совѣща́ша съ ѻ҆́троки и҆же бѣша въско́р꙽млени с ним̑ и҆ съ пред̑стоꙗ҆́щима пред̑ ѻ҆чи́ма е҆го·
9
И҆ рече им̑ чт̂о вы̀ совѣщава́ете. и҆ чт̂о ѿвѣща́ю людемъ симъ, и҆же рѣша къ мнѣ гл҃юще. ѻ҆блегча́и нн҃ѣ ꙗ҆ре́м꙽ и҆же възложи ѿц҃ъ твои на́ ны·
10
И҆ гл҃аша к немꙋ ѻ҆́троцы и҆же бѣхꙋ въскор̑҇млени с ним̑. и҆ рѣша е҆мꙋ. сице да гл҃еши людем̑ си́м꙽, и҆же рѣша к тебѣ гл҃ще ꙗ҆́ко, ѻ҆тѧгчѝ ѿц҃ъ твои ꙗ҆ре́м꙽ наш̑҇ и҆ т̂ы ѻ҆блегчѝ ѿ нас̑҇, сѝ да рече́ши к нимъ. ю҆́ность моѧ тол꙽стѣ́иши е҆сть, чре́слъ ѿц҃а мое҆го·
11
И҆ понеж̑ е҆сть ѿц҃ъ мои на́ вы ꙗ҆ре́мъ тѧ́жек̑҇ наложи́лъ. и҆ а҆зъ приложꙋ̀ къ ꙗ҆ре́мꙋ ва́шемꙋ. ѿц҃ъ мои наказа̀ в̂ы ра́нами. и҆ а́зъ накажꙋ̀ в̂ы расточе́нїем̑·
12
И҆ прїиде весь і҆и҆л҃ь къ цр҃ю ровоа́мꙋ. въ дн҃ь тре́тїи ꙗ҆́коже рече и҆мъ цр҃ь гл҃ѧ възврати́тесѧ къ мнѣ̀ въ дн҃ь тре́тїи·
13
И҆ ѿвѣща̀ цр҃ь к лю́демъ тѧ́жцѣ. и҆ ѻ҆ста́ви цр҃ь совт̑ѣ старец̑҇ и҆миже совѣща́ша е҆мꙋ·
14
И҆ гл҃а к ним̑ по совѣтꙋ ѻ҆́трокъ гл҃ѧ. ѿц҃ъ мои ѻ҆тѧгчѝ ꙗ҆ре́мъ вашъ, и҆ а́зъ приложꙋ̀ ꙗ҆ремꙋ̀ ва́шемꙋ ѿц҃ъ мои ѻ҆тѧгчѝ и҆ наказа́ше в̂ы ра́нами. и҆ а́зъ накажꙋ̀ в̂ы расточе́нїемъ·
15
И҆ не послꙋ́ша цр҃ь людїи. ꙗ҆́ко б̂ѣ раз꙽враще́нїе ѿ г҃а. ꙗ҆́коже ѹ҆ста́вити гл҃ъ свои́. ꙗ҆́коже гл҃а рꙋко́ю а҆хі́иѧ силони́т꙽скаго. къ і҆е҆ровоа́мꙋ сн҃ꙋ нава́товꙋ·
16
И҆ ви́дѣ весь і҆и҆л҃ь ꙗ҆́ко не послꙋш́а цр҃ь гла́са и҆хъ, и҆ ѿвѣща́ша лю́дїе цр҃ю гл҃юще. ка́ѧ намъ часть въ дв҃дѣ. и҆ нѣсть на́мъ наслѣдїѧ въ сн҃ѣ і҆е҆с꙽се́инѣ, разыидѣтесѧ сн҃ове і҆и҆л҃ьстїѝ въ кро́вы своѧ. нн҃ѣ пасѝ до́мъ твои дв҃де. и҆ ѿи́де і҆и҆л҃ь въ кро́вы своѧ·
17
Над̑ сн҃ъми́ же і҆и҆л҃выми и҆же живѧ́хꙋ въ́ градехъ і҆ѹ́диныхъ црс̑҇твова̀ ровоам̑ сн҃ъ соло́монь·
18
И҆ посла̀ цр҃ь а҆донира́ма. и҆же над̑ да́нью и҆ побѝ е҆го ка́менїе҆мъ весь і҆и҆л҃ь и҆ ѹ́мре. и҆ цр҃ь ровоа́мъ, пот꙽ща́сѧ на колесни́цꙋ бѣжа̀ и҆ вни́де въ і҆ерс̑҇ли́м꙽·
19
И ктомꙋ̀ не пристꙋпѝ і҆и҆л҃ь к до́мꙋ дв҃двꙋ даже до дне́сь·
20
И҆ бы́сть ꙗ҆́ко слы́ша і҆и҆л҃ь. ꙗ҆́ко възврати́сѧ і҆е҆ровоа́мъ ѿ е҆гѷпта. и҆ посла́вше по него и҆ призва́ша и҆̀ на собо́ръ. и҆ поста́виша цр҃ѧ над̑ і҆и҆л҃ем꙽. и҆ не бѣша по до́мꙋ двд҃вѣ. то́кмо, и҆же бѧ́хꙋ с хорꙋго́вїю і҆и҆ѹ́диною, и҆ венїа҆ми́нею·
21
И҆ ровоа́мъ вни́де въ і҆ерс̑҇ли́мъ. и҆ собра̀ собо́ръ і҆ѹ́динъ. и҆ хорꙋгвѝ венїа҆ми́нѧ. р҃, и҆ ҂к҃ ю҆́ношъ и҆ твори́ти бра́нь на́ брань до́мꙋ і҆и҆л҃ева, воз꙽врати́ти црс̑҇тво ровоа́мꙋ сн҃ꙋ соло́моню·
22
И҆ бы́сть сло́во гн҃е къ саме́ю чл҃кꙋ бж҃їю гл҃ѧ·
23
Рцы̀ къ ровоа́мꙋ сн҃ꙋ соло́моню цр҃ю і҆ѹ́динꙋ, и҆ къ всемꙋ̀ до́мꙋ і҆ѹ́динꙋ, и҆ вениа҆ми́новꙋ, и҆ къ про́чимъ лю́демъ гл҃ѧ·
24
Та́ко гл҃етъ г҃ь. не взы́идѣте ни побѣди́тесѧ съ бра́тїею свое́ю съ сн҃ъми і҆и҆л҃евыми, н̂о возврати́тесѧ ко́ждо в домы̀ своѧ̀, ꙗ҆́ко ѿ менѐ бы́сть гл҃ъ се́и·
25
И҆ послꙋшаша слове́съ гн҃ь, и҆ ѹ҆стави́шасѧ и҆ не и҆до́ша по гл҃ꙋ гн҃ю·
26
И҆ цр҃ь соло́мон̑҇ спѧ́ше съ ѿц҃ы свои́ми, и҆ положе́нъ бы́сть въ́ градѣ дв҃двѣ, црс̑҇твова́ же ровоа́мъ сн҃ъ е҆го в него̀ мѣ́сто въ і҆ерс̑҇ли́мѣ сы́и ѕ҃і лѣтъ, е҆гда̀ цр҃ь бы́сть. и҆ з҃і лѣтъ црс̑҇твова̀ въ і҆ерс̑҇ли́мѣ, и҆́мѧ б̂ѣ мт҃ри е҆го наа҆на́на дщѝ а҆но́нѧ сн҃а наа́са цр҃ѧ сн҃овъ а҆м꙽мо́нь·
27
И҆ сътворѝ лꙋка́вое пред̑ гм҃ъ, и҆ не начатъ ходи́ти по пꙋте́мъ дв҃да ѿц҃а е҆го. бѣ же чл҃къ се́и ѿ предѣлъ е҆фрѣмль раб̑҇ соло́монь, и҆́мѧ е҆мꙋ і҆е҆ровоа́мъ. і҆ и́мѧ мт҃ри ег̑҇ сари́ра жена̀ блꙋ́дница, и҆ да́лъ е҆го соло́монъ въ кнѧ́ѕѧ ски́томъ. въ ѻ҆держа́нїю до́ма и҆ѻ́сифова. и҆ созда̀ соло́монꙋ сари́рꙋ. въ предѣлех̑ е҆фрем̑лих̑ и҆ бѣша е҆мꙋ, т҃, колесни́ц꙽ и҆ ко́неи. се́и созда̀ а҆́крꙋ. въ ѻ҆держанїе до́мꙋ и҆е҆фрѣмова. се́и совръши град̑ двд҃въ и҆ б̂ѣ подносѧ́сѧ на црс̑҇тво. и҆ взыска̀ соло́монъ ѹ҆би́ти е҆го. и҆ ѹ҆боꙗ҆́сѧ и҆ ѿбѣжѐ до сꙋсаки́ма цр҃ѧ е҆гѷпет꙽ска и҆ б̂ѣ с ним̑ до́ндеже ѹ҆́мре соло́монъ·
28
И҆ слы́ша і҆е҆ровоа́мъ въ е҆гѷпте ꙗ҆́ко ѹ҆́мре соло́монъ, и҆ гл҃а въ ѹ́ши сꙋсакимꙋ цр҃ю е҆гѷпет꙽скꙋ гл҃ѧ. ѿпꙋсти́ мѧ и҆ ѿи́дꙋ въ зе́млю мою̀·
29
и҆ рече е҆мꙋ сꙋсаки́мъ. просѝ нѣкое проше́нїе и҆ да́мъ т̂и. сꙋсаки́м же да́сть і҆е҆ровоа́мꙋ а҆́нꙋ сестрꙋ̀ ѳеко́минꙋ, старѣ́ишѹю жены свое́ѧ е҆мꙋ въ женꙋ̀. и҆ сїѧ б̂ѣ вели́ка въ дще́рехъ црс̑҇кихъ. и҆ родѝ и҆е҆ровоа́мꙋ а҆вїѧ сн҃а е҆го. и҆ рече і҆е҆ровоа́мъ къ сꙋсаки́мꙋ сꙋще ѿпꙋсти́ мѧ, и҆ ѿи́дꙋ і҆ и҆зы́иде і҆е҆ровоа́мъ ѿ е҆гѷпта. и҆ прїиде въ зе́млю сари́рю въ предѣлы е҆фрѣмлѧ. и҆ собра́сѧ т̂ꙋ вс̂ѧ хорꙋгвѝ е҆фрѣмлѧ къ і҆е҆ровоа́мꙋ. и҆ созда̀ т̂ꙋ і҆е҆ровоа́мъ ѻ҆гра́дꙋ. и҆ разболѣсѧ дѣтищ꙽ е҆го бо́лѣзнїю крѣ́пкою ѕело і҆ и҆дѐ і҆е҆ровоа́мъ въпроси́ти ѻ҆ дѣтищꙋ. и҆ рече а҆́не женѣ̀ свое́и, въста́ни і҆ и҆дѝ. въпросѝ б҃а ѻ҆ дѣтищꙋ а҆ще жи́въ бꙋдетъ, ѿ бо́лезни е҆го·
30
Бѣ́ же чл҃къ въ сило́ме и҆́мѧ е҆мꙋ а҆хїа́ и҆ с̂е сы́и ѯ҃ лѣтъ, и҆ гл҃ъ бж҃їи б̂ѣ с ни́мъ. и҆ рече і҆е҆ровоа́мъ къ женѣ̀ свое́и. въста́ни и҆ возмѝ в рꙋцѣ твоѝ чл҃кꙋ бж҃їю хлѣ́бы, и҆ ѻ҆прѣ́снокъ дѣтемъ е҆го, и҆ гро́здїе, и҆ сосꙋдъ ме́дꙋ. и҆ въста̀ жена̀ и҆ взѧ̀ в рꙋцѣ е҆ѧ̀ хлѣбы и҆ дв̂а ѻ҆прѣ́сноки, и҆ гро́здїѧ и҆ сосꙋдъ ме́дꙋ, а҆хі́и. чл҃къ же ста́ръ б̂ѣ. и҆ ѻ́чи е҆го ѻ҆мрачи́стасѧ не видѣти, и҆ въста̀ ѿ сари́ра і҆ и́де и҆ бы́сть входѧ́щи е́й въ градъ къ а҆хі́ю силони́т꙽скомꙋ, и҆ рече а҆хїѧ́ ѻ҆́трокꙋ свое҆мꙋ. и҆зыдѝ ѹ҆́бо въ срѣте́нїе а҆́ны жены̀ і҆е҆ровоа́мли и҆ рече́ши к не́и. вни́ди и҆ не сто́и, ꙗ҆́ко сїѧ гл҃етъ г҃ь, жесто́ко аз̑ послю̀ на́ тѧ и҆ вни́де а҆́на къ чл҃кꙋ бж҃їю, и҆ рече е́и а҆хі́ѧ въскꙋ́ю принесѐ м̂и хлѣбы и҆ ѻ҆прѣ́сноки и҆ гро́здїе и҆ сосꙋдъ ме́дꙋ. сїѧ гл҃етъ г҃ь, с̂е ты̀ ѿи́деши ѿ мене. и҆ бꙋдетъ в꙽ходѧ́щꙋ тебѣ̀ въ́ градъ сари́рꙋ. и дѣвицы твоѝ и҆зыидꙋтъ на срѣте́нїе тебѣ, и҆ рекꙋтъ т̂и, ꙗ҆́ко дѣтищъ ѹ҆ме́ръ ес̑҇ ꙗ҆́ко сїѧ гл҃етъ г҃ь. с̂е а҆зъ и҆скореню̀ і҆е҆ровоа́мова моча́щаго къ стенѣ̀. и҆ бꙋдетъ ѹ҆ме́ршаго і҆е҆ровоа́мова въ́ граде и҆зъе҆дѧ́т꙽ ѱѝ и҆ ѹ҆ме́ршаго на селѣ̀ и҆зъе҆дѧ́т꙽ пти́цы нбс̑҇ныѧ. и҆ дѣтища рыда́ютсѧ ѽ г҃и, ꙗ҆́ко ѻ҆брѣте́сѧ в немъ гл҃ъ до́бръ ѻ҆ г҃ѣ·
31
И҆ ѿи́де жена̀ ꙗ҆́ко слы́ша, и҆ бы́сть е҆гда вни́де въ сари́рꙋ. и҆ дѣтищъ ѹ́мре і҆ и҆зы́иде во́пль въ срѣтенїе е҆ѧ̀ і҆ и́де і҆е҆ровоа́мъ въ сики́мꙋ и҆же въ предѣле е҆фре́мли. и҆ собра̀ т̂ꙋ колѣна і҆и҆л҃ева; и҆ възы́иде т̂ꙋ ровоа́мъ сн҃ъ соло́монов̑҇ и҆ сло́во гн҃е бы́сть къ са́мѣю е҆лами́тѧнинꙋ гл҃ѧ. възмѝ себѣ ри́зꙋ но́вꙋ. ꙗ҆́же не вни́де въ во́дꙋ. и҆ раздрѝ ю҆̀ на в҃і ча́стїи. и҆ дасѝ і҆е҆ровоа́мꙋ и҆ рече́ши к немꙋ̀, сїѧ гл҃етъ г҃ь възмѝ себѣ і҃ ча́стеи е҆же покры́ти т̂ѧ и҆ взѧ̀ і҆е҆ровоа́мъ. и҆ рече саме́ѧ сїѧ гл҃етъ г҃ь с̂е а҆зъ разделю̀ црс̑҇тво соло́моново. и҆ дам̑ т̂и і҃, скѷпетровъ. и҆ дв̂а скѷпетра бꙋдꙋтъ ровоа́мꙋ сн҃ꙋ соло́моню·
32
И҆ бы́сть по ѹ҆мрътвїѝ цр҃ѧ соло́мона въцр҃исѧ сн҃ъ е҆го ровоа́мъ в него мѣсто·
33
И҆ реко́ша лю́дїе къ ровоа́мꙋ ѿц҃ъ твои ѻ҆тѧгчѝ ꙗ҆рмо̀ своѐ на нас̑҇ и҆ ѻ҆тѧгчѝ ꙗ҆де́нїѧ трапе́зы свое́ѧ нн҃ѣ ѻ҆блегчѝ нам꙽, и҆ послꙋжим̑ т̂и. и҆ рече ровоа́мъ къ лю́демъ. е҆ще по трехъ дн҃ехъ, ѿвѣща́ю ва́мъ рѣчъ и҆ рече ровоа́мъ, приведѣте м̂и преѕви́теры, и҆ совѣтꙋ́ю с ни́ми чт̂о ѿвѣща́ю лю́демъ рѣ́чъ въ дн҃ь тре́тїи. и҆ гл҃а ровоа́мъ въ ѹ́ши и҆хъ. ꙗ҆́кож̑ посла́ша лю́дїе к немꙋ, и҆ реко́ша ста́рцы людїи та́ко ꙗ҆́ко гл҃аша к тебѣ лю́дїе, да гл҃еши къ лю́дем꙽.
34
И҆ разорѝ ровоа́мъ совѣтъ и҆хъ. и҆ не ѹ҆го́дно б̂ѣ пред̑ нимъ, и҆ посла̀, и҆ въведѐ въспита́н꙽ныхъ с ни́мъ, и҆ гл҃а и҆мъ сїѧ и҆ сїѧ. посла́ша лю́дїе къ мн̂ѣ, и҆ рѣша въспита́н꙽нїи с ни́мъ та́ко гл҃и къ лю́демъ. ю҆́ность моѧ тол꙽стѣ́иши паче чре́слъ ѿц҃а моег̑҇. ѿц҃ъ мо́и бїѧ́ше ва́съ биче́мъ аз̑ же начнꙋ̀ васъ би́ти съ расточе́нїемъ ѹ҆го́денъ б̂ѣ гл҃ъ пред̑ ровоа́момъ. и ѿвѣща лю́демъ ꙗ҆́коже совѣща́ша е҆мꙋ въспита́ннїи с ни́мъ ѻ҆́троцы, и҆ реко́ша лю́дїе ꙗ҆́ко мꙋжъ е҆ді́нъ, ко́ждо бли́жнемꙋ свое҆мꙋ, и҆ възопи́ша вс̂и гл҃юще. нѣ́сть ча́сти нам̑ въ дв҃де. ниже наслѣ́дїѧ въ сн҃ꙋ і҆е҆с꙽се́ѻ҆вѣ. ко́ждо въ домы̀ своѧ̀ і҆и҆л҃ю да и҆́детъ ꙗ҆́ко чл҃къ се́и, не е́сть въ нача́лника, ниже въ во́жда и҆ разыидо́шасѧ вс̂и лю́дїе ѿ сики́ма, и҆ ѿи́де ко́ждо въ до́мъ сво́и. и҆ низдержа̀ ровоа́мъ, и҆ ѿи́де и҆ възы́иде на колесни́цꙋ свою и҆ вни́де въ і҆ерс̑҇ли́мъ, і҆ и҆зы́иде въ слѣдъ е҆го ве́сь ски́петръ і҆ѹ́динъ, и҆ весь ски́петръ венїа҆минь и҆ бы́сть въ стоꙗ҆нїѝ е҆ді́ного лѣта. и҆ собра̀ ровоа́мъ вс̂ѧ мꙋжи і҆ѹ́дины и҆ венїа҆ми́ни. и҆ възы́иде бра́тисѧ съ і҆е҆ровоа́момъ въ сики́мъ, и҆ бы́сть гл҃ъ гн҃ь къ саме́ю чл҃кꙋ бж҃їю гл҃ѧ, рцы̀ ровоа́мꙋ цр҃ю і҆ѹ́динꙋ, и҆ къ всемꙋ̀ до́мꙋ і҆ѹ́динꙋ, и҆ венїа҆ми́ню, и҆ къ всѣмъ про́чїи҆мъ людемъ гл҃ѧ сїѧ гл҃етъ г҃ь, не восходи́те ниже бі́итесѧ съ бра́тїею вашею сн҃ы і҆и҆л҃евыми ѿврати́тесѧ кождо в꙽ дом̑ сво́и занѐ ѿ мене бы́сть гл҃ъ се́и, и҆ послꙋшаша гл҃а гн҃ѧ, и҆ не пои҆до́ша по гл҃ꙋ гн҃ю·
35
И҆ созда̀ і҆е҆ровоа́мъ сики́мꙋ въ предѣлехъ е҆фрѣмлихъ. и҆ всели́сѧ в немъ, і҆ и҆сшед̑ ѿтꙋдꙋ созда̀ ѳанꙋ́илѧ·
36
И҆ рече і҆е҆ровоа́мъ въ срд̑цы свое҆мъ. с̂е нн҃ѣ възъврати́тсѧ црс̑҇тво в до́мъ дв҃двъ·
37
А҆ще възы́идꙋтъ лю́дїе сїѝ възнестѝ жр́ътвы въ хра́мъ гн҃ь въ і҆ерс̑҇лим̑ и҆ ѻ҆брати́тсѧ срд̑це людїи къ г҃ꙋ и҆ къ господи́нꙋ их̑ ровоа́мꙋ цр҃ю і҆ѹ́динꙋ·
38
И҆ ѹ҆бїю́т꙽ м̂ѧ, и҆ смышль си́це цр҃ь и҆ сътворѝ дв̂ѣ ю҆́ницы зла́тѣ. и҆ реч̑҇ к лю́демъ довлѣ́етъ вамъ ходи́ти въ і҆ерс̑҇лимъ. с̂е бѕ҃и твои і҆и҆л҃ю и҆зведшїи т̂ѧ и҆з꙽ землѧ е҆гѷпет̑ски·
39
И поста́ви е҆ді́нꙋ въ веѳи́ли. а҆ дрꙋгꙋю поста́ви в꙽ да́нѣ·
40
И҆ бы́сть слово с̂е на согрѣше́нїе до́мꙋ і҆е҆ровоа́млю. і҆ и҆дѧ́хꙋ лю́дїе пред̑ лицемъ ю҆́нца е҆ді́ноѧ до да́на·
41
И҆ ѻ҆стави́ша хра́мъ гн҃ь·
42
И҆ сътворѝ ка́пища на высо́кихъ. и҆ сътворѝ жръцов̑҇ ча́сть ѿ людїи. и҆же не бѣша ѿ сн҃овъ левгі́инъ·
43
И҆ сътворѝ і҆е҆ровоа́мъ пра́здникъ въ и҃ мс̑҇ць. въ е҃і дн҃ь мс̑҇ца. по пра́знд̑икꙋ, и҆же въ зем꙽лѝ б̂ѣ і҆ѹ́динѣ. и҆ взы́иде въ ѻ҆лта́рь, и҆же сътворѝ въ веѳи́ли. пожретѝ ю҆́ницамъ, и҆хже б̂ѣ сътвори́лъ, и҆ поста́вилъ въ веѳи́ли жръцо́въ на высо́кихъ на всѧ́кое мѣсто е҆же сътворѝ·
44
И҆ взы́иде въ ѻ҆лта́рь и҆же бѣ̀ сътвори́лъ, въ и҃ мс̑҇ць, въ е҃і дн҃ь мс̑҇ца. въ пра́зникъ и҆же съста́ви ѻ҆ себѣ са́мъ, и҆ сътворѝ пра́зникъ сн҃омъ і҆и҆л҃евомъ. и҆ взы́иде на ѻ҆лта́рь е҆же пожрѣти·
Джерела
