Ostroh Bible❧Перша книга царів (Третя книга царств), розділ 13

1

И с̂е чл҃къ бж҃їи прїиде. ѿ и҆ѹ́ды по словесѝ гн҃ю въ веѳи́ль, и҆ е҆ровоа́мъ б̂ѣ стоѧ̀ въ ѻ҆лтари свое́мъ жрѣти хотѧ̀·

2

И҆ възопѝ къ ѻ҆лтарю̀ словомъ гн҃имъ и҆ рече ѻ҆лта́рю ѻ҆лта́рю си́це гл҃етъ г҃ь. с̂е сн҃ъ сѧ ража́етъ до́мꙋ двд҃вꙋ. и҆ѻ҆сїѧ и҆́мѧ е҆мꙋ. и҆ пожре́тъ жръцы̀ жрꙋщ́аѧ нн҃ѣ на тебѣ. и҆ ко́сти чл҃ческїѧ съж꙽же́тъ в꙽ тебѣ̀·

3

И҆ дасть ѿ дн҃їи того чю́до гл҃ѧ. с̂е гл҃ъ и҆же гл҃а г҃ь гл҃ѧ. с̂е ѻ҆лта́рь раз꙽сѧ́дет̑сѧ. і҆ и҆злѣю҆тсѧ сы́ти ꙗ҆́же сꙋть в꙽ немъ·

4

И҆ бы́сть е҆гда ѹ҆слы́ша цр҃ь и҆е҆ровоам̑. слово чл҃ка бж҃їѧ възопи́вшаго къ ѻ҆лтарю̀ въ веѳи́лѣ. и҆ простре́тъ цр҃ь рꙋкꙋ свою ѿ ѻ҆лтарѧ̀ гл҃ѧ. и҆мѣте и҆̀, и҆ с̂е ѹ҆сшѐ рꙋка̀ е҆го, ю҆́же прострѐ на́нь, и҆ не можа́ше възврати́ти ю҆̀ к꙽ себѣ·

5

И҆ ѻ҆лта́рь рас꙽сѣдесѧ і҆ и҆зли́тсѧ насыще́нїе ѿ ѻ҆лтарѧ̀, по чюдесѝ е҆же рече чл҃къ бж҃їи по словесѝ гн҃ю·

6

И҆ рече і҆е҆ровоа́мъ цр҃ь чл҃кꙋ бж҃їю. помоли́сѧ пред̑ лицемъ г҃а б҃а твое҆го. дабы́ сѧ преклони́ла рꙋка̀ моѧ̀ къ мн̂ѣ·

7

И҆ помоли́сѧ чл҃къ бж҃їи пред̑ лицемъ гн҃имъ. и҆ преклони́сѧ рꙋка̀ цр҃ѧ к немꙋ̀. и҆ бы́сть ꙗ҆́коже и҆ пре́жде·

8

И҆ гл҃а цр҃ь къ чл҃кꙋ бж҃їю. вни́ди со мною в꙽ домъ и҆ ѻ҆бѣдꙋевѣ, и҆ да́мъ т̂и да́ръ·

9

И҆ рече чл҃къ бж҃їи къ цр҃еви. а҆ще дасѝ м̂и по́лъ и҆мѣнїѧ твое҆го. не въни́дꙋ с тобо́ю ниже ꙗ҆́мъ хлѣ́ба. ни́же пїю воды̀ на мѣ́сте се́мъ·

10

Ꙗ҆́ко та́ко м̂и заповѣ́да г҃ь словомъ гл҃ѧ. ни ꙗ҆́жъ хлѣ́ба ни пїи воды̀, ниже въз꙽врати́сѧ пꙋте́мъ тѣмже·

11

Но възврати́сѧ пꙋте́мъ и҆́нѣм꙽. а҆ не и҆де пꙋте́мъ и҆́мже бѣ̀ прише́лъ въ веѳи́ль·

12

И҆ про̑҇ркъ е҆ді́нъ ста́ръ живѧ́ше въ веѳи́лѣ. и҆ прїидо́ша сн҃ове е҆го и҆сповѣда́ша е҆мꙋ вс̂ѧ дѣла̀. ꙗ҆́же сътвори чл҃къ бж҃їи въ дн҃ь то́и въ веѳи́лѣ. и҆ словеса̀ ꙗ҆́же гл҃а цр҃еви. повѣда́ша ѿц҃ꙋ свое҆мꙋ·

13

И҆ гл҃а к ним̑ ѿц҃ъ и҆хъ гл҃ѧ. кѷи҆мъ пꙋте́мъ и҆́де. и҆ показа́ша е҆мꙋ сн҃ове е҆го пꙋть и҆мже и҆де чл҃къ бж҃їи. и҆з꙽ше́дыи ѿ и҆ѹ́ды. и҆ рече сн҃омъ свои҆мъ ѻ҆сѣдла́ите м̂и ѻ҆слѧ̀ и ѻ҆сѣдлаша е҆мꙋ̀ ѻ҆слѧ̀ и҆ всѣде на́ нѧ·

14

І҆ и́де в꙽ слд̑ѣ чл҃ка бж҃їѧ. и҆ ѻ҆брѣтѐ и҆̀ под̑ дꙋбом̑ сидѧ́ща, и҆ реч̑҇ е҆мꙋ ты́ ли е҆си чл҃къ бж҃їи прише́дыи ѿ і҆ѹ́ды. и҆ реч̑҇ а҆зъ·

15

И҆ реч̑҇ е҆мꙋ прїидѝ со мною снѣ́си хлѣ́ба·

16

И҆ реч̑҇ е҆мꙋ не могꙋ̀ възврати́тисѧ с тобо́ю ниже ꙗ҆́мъ хлѣба. ни пїю́ ѿ воды̀ ѿ мѣ́ста сего·

17

Ꙗ҆́ко заповѣ́да м̂и г҃ь словесе́мъ гл҃ѧ. не ꙗ҆́жъ хлѣ́ба. ни пїи воды̀ т̂ꙋ, и҆ не възврати́шисѧ пꙋте́мъ тм̑ѣ, и҆мже и҆́деши та́мо.

18

И҆ рече к не́мꙋ, и҆ а́зъ про̑҇ркъ е҆смь ꙗ҆́кож̑ и҆ ты̀, и҆ а҆гг҃лъ къ мн̂ѣ гл҃а словесе́м꙽ гн҃имъ гл҃ѧ, възвратѝ и҆̀. к себѣ̀ в до́мъ свои да снѣсть хлѣба и҆ пї́етъ воды̀. и҆ сълга̀ е҆мꙋ и҆ възвратѝ и҆̀. и҆ ꙗ҆́сть хлѣбъ и҆ пї́етъ во́дꙋ в домꙋ̀ е҆го·

19

И҆ бы́сть и҆мъ сѣдѧ́щимъ на трапе́зѣ. и҆ бы́сть сло́во гн҃е къ про̑҇ркꙋ възвращ꙽шемꙋ е҆го·

20

И҆ рече къ чл҃кꙋ бж҃їю пришед̑шемꙋ ѿ і҆ѹ́ды. си́це гл҃етъ г҃ь. поне́же престꙋпѝ гл҃ъ гн҃ь. и҆ не съхрани за́повѣди, ю҆же заповѣ́да ти г҃ь б҃ъ твои·

21

И҆ възврати́всѧ и҆ ꙗ҆́лъ е҆си хлѣбъ. и҆ пи́лъ е҆си во́дꙋ на мѣ́стѣ семъ. и҆же реклъ къ тебѣ гл҃ѧ. да не ꙗ҆сѝ хлѣба и҆ не пі́еши воды̀. т̂о ты̀ ꙗ҆́сть и҆ пи́тъ. да ѹ҆же не и́маши погребен̑҇ бы́ти съ ѿц҃ы свои҆ми·

22

И҆ бы́сть по ꙗ҆де́нїи хлѣба и҆ пи́тїѝ воды̀. и҆ ѻ҆сѣдла́ша е҆мꙋ ѻ҆слѧ̀ про̑҇рка·

23

И҆ въз꙽вра́щъсѧ и҆ ѿи҆де. и҆ срѣтѐ и҆̀ ле́въ на пꙋтѝ, поразѝ и҆̀ и҆ ѹ́мре. и҆ б̂ѣ тѣло е҆го разбїе́но на пꙋтѝ. и҆ ѻ҆се́лъ стоѧ́ше над ни́мъ. и҆ ле́въ стоꙗ҆ше бли́зь телесѐ е҆го·

24

И҆ с̂е мꙋжи и҆дꙋщи и҆ ви́дѣша мр҃тва разбїе́на на пꙋтѝ. и҆ льва̀ стоꙗ҆́ща близꙋ тѣла мр҃тваго. и҆ пришед̑ше повѣ́даша въ́ градѣ в немже живѧ́ше про̑҇ркъ старъ·

25

И҆ ѹ҆слы́шавъ с̂е про̑҇ркъ възврати́выи е҆го с пꙋтѝ. и҆ рече ꙗ҆́ко чл҃къ бж҃їи с̂е е҆сть. и҆же престꙋпѝ гл҃ъ бж҃їи. и҆ преда̀ е҆го г҃ь львꙋ̀ и҆ съкрꙋшѝ е҆го. и҆ ѹ҆морѝ е҆го. по гл҃ꙋ гн҃ю и҆же рече е҆мꙋ·

26

И҆ повелѣ сн҃омъ свои҆мъ гл҃ѧ ѻ҆сѣдла́ите м̂и ѻ҆слѧ̀ и҆ ѻ҆сѣдла́ша·

27

І҆ и́де и҆ ѻ҆брѣтѐтѣло е҆го на пꙋтѝ. и҆ ѻ҆се́лъ и҆ ле́въ стоꙗ҆́ста над̑ тѣломъ. и҆ не бѧ́ше ѧл̑҇ телесѐ ле́въ чл҃ка бж҃їѧ. и҆ ни бѧ́ше разби́лъ ѻ҆сла̀·

28

И҆ взѧ́тъ про̑҇ркъ тѣло чл҃ка бж҃їѧ, и҆ възложѝ и҆̀ на ѻ҆се́лъ, и҆ възвратѝ и҆̀ про̑҇ркъ и҆ прїиде въ́ градъ на погребе́нїе·

29

И҆ положѝ и҆̀ въ́ градѣ свое҆мъ. и҆ рыдастасѧ по немъ с̂е го́ре бра́те мои·

30

И҆ бы́сть побїе́нїе по не́мъ, и҆ рече къ сн҃омъ свои҆мъ гл҃ѧ, а҆ще ѹ҆мрꙋ̀ т̂о положи́те м̂ѧ въ гробѣ се́мъ, и҆дѣже и҆ чл҃къ бж҃їи погребен̑҇ е҆сть, при костех̑ е҆го положи́те м̂ѧ, да съхрани́тсѧ ко́сть моѧ̀ с ко́стьми е҆го·

31

Ꙗ҆́ко пребꙋдетъ гл҃ъ и҆же гл҃а словесемъ гн҃им꙽ ѻ҆ ѻ҆лтарѝ и҆же въ веѳи́лѣ, и҆ ѻ҆ до́мх̑ѣ высо́кихъ и҆же в꙽ самарїи́·

32

И҆ по гл҃ѣ се́мъ не възврати́сѧ і҆е҆ровоамъ ѿ ѕло́бы свое҆ѧ и҆ възврати́сѧ, и҆ сътворѝ ѿ ча́сти е҆ді́ноѧ людїи. і҆е҆ре́ѧ высокїѧ е҆же помы́сли т̂о и҆ съвръшѝ рꙋко́ю, и҆ бы́сть і҆е҆ре́и въ высо́ких꙽·

33

И҆ бы́сть гла́съ се́и въ прегрѣшенїе в домꙋ̀ і҆е҆ровоа́мли на и҆спроверже́нїе, на и҆щезнове́нїе ѿ лица̀ зе́мли·