Ostroh BibleПерша книга царів (Третя книга царств), розділ 18
Шрифт:
Запис:
1
И бы́сть по дн҃ехъ мно́ѕѣхъ гл҃ъ гн҃ь къ и҆лїѝ в лѣто, г҃ е, гл҃ѧ·
2
ше́дъ и҆ ꙗ҆ви́сѧ а҆ха́вови, да́мъ б̂о до́ждъ на лицы̀ земли·
3
І҆ и҆де и҆лїа̀ къ а҆ха́вꙋ ꙗ҆ви́тисѧ. и҆ бѣ̀ глад̑ крѣпок̑҇ въ самарї́и·
4
И҆ призва̀ а҆ха́въ а҆вдїа строи́телѧ до́мꙋ. и҆ а҆вдѣи́ бѣ̀ боꙗ҆́сѧ г҃а ѕѣ́ло·
5
И҆ бы́сть е҆гда нача̀ би́ти е҆заве́ль про̑҇рки гн҃ѧ. и҆ поѧ̀ а҆вдїи, р҃, мꙋжъ про̑҇рки. и҆ скры̀ ѧ҆̀ по н҃, въ дво́ю връте́пꙋ, и҆ кормѧ́ше и҆хъ хлѣбомъ и҆ водо́ю·
6
И҆ рече а҆ха́въ къ а҆вдїю поидѝ б̂о про́идевѣ на́ землю на и҆сто́чники во́дныѧ, и҆ на всѧ́къ пото́къ, да неглѝ ка́ко ѻ҆брѧ́щевѣ бы́лїе, и҆ преко́рмивѣ ко́нѧ и҆ м꙽ска̀, и҆ да не и҆зги́нт̑ꙋ ѿ скот̑·
7
И҆ раздѣли́ста себѣ̀ пꙋть и҆тѝ и҆мъ. а҆ха́въ и҆дѐ пꙋтем̑ е҆дин꙽. и҆ а҆вдїи и҆дѐ пꙋтем꙽ дрꙋги́мъ е҆ді́нъ·
8
И҆ бѣ̀ а҆вдїи е҆ді́нъ на пꙋтѝ. и҆ прїиде и҆лїѧ̀ на срѣте́нїе е҆мꙋ. и҆ а҆вді́и пот̑ща́всѧ, поклонисѧ на лицы̀ свое҆мъ и҆ падѐ. и҆ рече а҆ще т̂ы е҆си здѣ̀ са́мъ г҃и мои и҆лїѧ̀·
9
И҆ рече и҆лїѧ̀ къ а҆вдїю с̂е а҆зъ е҆смь и҆дѝ и҆ повѣ́ждъ господи́нꙋ свое҆мꙋ гл҃ѧ, с̂е и҆лїѧ̀·
10
И҆ рече а҆вдїѧ чт̂о съгрѣши́хъ а҆зъ ꙗ҆́ко предае́ши м̂ѧ раба̀ твое҆го в рꙋцѣ а҆ха́вли на ѹ҆мре́нїе моѐ·
11
Жи́въ г҃ь б҃ъ твои. а҆ще е҆сть ꙗ҆зык̑҇ где под̑ црс̑҇твом꙽ е҆го. ка́мо нѣ́сть пꙋща́лъ господин̑҇ мои и҆ска́ти тебѐ. и҆ е҆гда̀ рѣша нѣсть, и҆ заклѧ̀ и҆ взыска́ста тебѐ въ все́мъ црс̑҇твїи свое҆мъ, и҆ въ всѣхъ землѧ́хъ своих̑ и҆ не ѻ҆брѣто́ша тебѐ. и҆ нн҃ѣ ты̀ гл҃еши м̂и, и҆дѝ възвѣстѝ господи́нꙋ свое҆мꙋ и҆ рцы̀ с̂е и҆лїѧ̀·
12
И҆ бꙋдетъ е҆гда̀ а́зъ ѿи҆дꙋ̀ ѿ тебѐ и҆ дх҃ъ гн҃ь во́зметъ т̂ѧ. и҆ в зе́млю нѣ́вкꙋю в ню́же не вѣ́дѣ, и҆ вни́дꙋ възвѣсти́ти а҆ха́вꙋ и҆ не ѻ҆брѧ́щетъ тебѐ и҆ ѹ҆бї́етъ м̂ѧ. и҆ ра́бъ твои е҆смь боѧ́исѧ г҃а ѿ ю́ности мое҆ѧ·
13
И҆л̂и не сꙋть възвѣсти́ли г҃и мо́и ꙗ҆́же сътвори́хъ. е҆гда хотѣ̀ и҆зби́ти е҆заве́ль про̑҇рки гн҃ѧ. и҆ взѧх̑ ѿ про̑҇ркъ гн҃ь, р҃, мꙋжъ. и҆ скрыхъ ѧ҆̀ въ вер̑҇те́пѣ по н҃, и҆ корми́хъ ѧ҆̀ хлѣбом꙽ и҆ водо́ю. и҆ нн҃ѣ ты̀ гл҃еши и҆дѝ и҆сповѣждъ господи́нꙋ с̂е здѣ̀ и҆лїѧ̀ и҆ ѹ҆бїет̑ м̂ѧ·
14
И҆ рече и҆лїѧ̀ жи́въ г҃ь си́лъ е҆мꙋже пред̑стою̀ пред ни́мъ ꙗ҆ко днс̑҇ь покажꙋ́сѧ е҆мꙋ·
15
І҆ и҆дѐ а҆вдїѧ противꙋ а҆ха́вꙋ и҆ възвѣстѝ е҆мꙋ, и҆ ѹ҆скорѝ а҆ха́въ и҆дѐ на срѣте́нїе и҆лїѝ·
16
И҆ бысть е҆гда ѹ҆зрѣ а҆ха́въ и҆лїю̀. и҆ рече а҆ха́въ къ и҆лїѝ, а҆ще ты̀ л̂и е҆си развраща́ѧ і҆и҆л҃ѧ·
17
И҆ реч̑҇ и҆лїѧ̀ не развраща́ю а҆зъ і҆и҆л҃ѧ н̂о ты̀ и҆ до́мъ ѿц҃а твое҆го внегда̀ ѻ҆стави́сте вы̀ г҃а б҃а вашег̑҇ і҆ и҆до́сте въ слд̑ѣ ваа́ла·
18
И҆ нн҃ѣ пꙋсти и҆ събери къ мнѣ весь і҆и҆л҃ь, на горꙋ̀ кармильскꙋю, и҆ про̑҇рки без꙽стꙋдныѧ. ваа́ловы. у҃, и҆ н҃, и҆ про̑҇ркъ, ме́рскихъ у҃, и н҃. ꙗ҆дꙋщих̑ трапе́зꙋ і҆е҆завелинꙋ·
19
И҆ посла̀ а҆ха́въ въ ве́сь і҆и҆л҃ь и҆ приведѐ всѧ про̑҇рки на горꙋ̀ карми́льскꙋю·
20
И҆ приведѐ къ всѣмъ и҆мъ и҆лїю̀. и҆ реч̑҇ и҆мъ и҆лїѧ̀ доко́лѣ в̂ы хра́млете на ѻ҆́бѣ пле́снꙋ ва́шею. а҆ще е҆сть г҃ь б҃ъ и҆дѣте въ слѣ́дъ е҆го. а҆ще л̂и ваа́ль е҆сть т̂о и҆дѣте за ни́мъ и҆ не ѿвѣща́ша лю́дїе·
21
И҆ рече и҆лїѧ̀ к лю́дем̑ а҆зъ е҆смь ѻ҆ста́хъ про̑҇ркъ гн҃ь е҆ді́нъ и҆ про̑҇рцы ваа́ловы, у҃ и҆ н҃, мꙋжъ·
22
И҆ рече и҆лїѧ̀ дади́те н̂ы дв̂а ю҆́нца и҆ да и҆зберетѐ себѣ е҆ді́нъ и҆ да расте́шꙋтъ и҆̀ на ѹ́ды, и҆ възло́жатъ на дрова̀ и҆ да не пригнѣтѧ́тъ ѻ҆гнѧ̀ и҆ а҆зъ растешꙋ̀ ю́нецъ дрꙋгїи. и҆ ѻ҆гнѧ̀ не пригнещꙋ̀·
23
И҆ да призоветѐ и҆́мена бо́гъ ва́ших꙽, и҆ а́зъ призовꙋ̀ и҆́мѧ г҃а б҃а мое҆го, и҆ то́и е҆сть б҃ъ и҆же а́ще послꙋшае҆тъ ѻ҆гне́мъ т̂о е҆сть б҃ъ. и҆ ѿвѣща́ша вс̂и лю́дїе рѣша до́бръ гл҃ъ, и҆же гл҃а, да бꙋдет̑ та́ко·
24
И҆ рече и҆лїѧ̀ про̑҇ркомъ без̑стд̑ꙋнымъ и҆зберѣте себѣ̀ ю҆́нецъ е҆ді́нъ. и҆ сътворите вы̀ пре́жде, ꙗ҆́ко вы̀ ес̑҇ мно́жаише. и҆ призовѣте и҆мена бог̑҇ ва́шихъ. и҆ ѻ҆гнѧ̀ не пригнѣща́ите·
25
И҆ поꙗ҆́ша ю҆́нецъ, и҆ сътвориша та́ко и҆ призыва́хꙋ и҆мѧ ваа́лово ѿ ѹ́тра и҆ до по́лꙋ дн҃е. и҆ рѣша послꙋшаи нас̑҇ ваа́ле послꙋшаи насъ. и҆ не бѣ гла́са ни послꙋша́нїѧ. и҆ риста́хꙋ ѻ҆ жрътве́ницѣхъ и҆же сътвориша·
26
И҆ быс̑҇ в꙽ полꙋ дн҃е, и҆ порꙋга́сѧ и҆мъ и҆лїѧ̀ ѳезвитѧнинъ, и҆ рече зовите гла́сом̑ великим̑ ꙗ҆́ко непра́зньство е҆мꙋ е҆сть. е҆да чт̂о и҆но строи и҆л̂и ѹ҆снꙋлъ бꙋдет̑ и҆ да ѻ҆бꙋ́дите и҆̀·
27
И҆ зовѧ́хꙋ гласом̑ вели́кимъ. и҆ кра́ꙗ҆хꙋсѧ по ѻ҆бы́чаю свое҆мꙋ но́жи. и҆ мно́ѕи би́шасѧ съ бичми до проли́тїѧ кро́ви свое҆ѧ·
28
И҆ бы́сть до ѿвече́рїѧ и҆ прорица́хꙋ до́ндеже бы́сть врѣмѧ взыти жрътвѣ и҆ не бѣ̀ гла́са·
29
И҆ рече и҆лїѧ̀ ѳезви́тѧнинъ проро́комъ безстꙋдным̑ гл҃ѧ ѻ҆ста́нете ѿ нн҃ѣ і҆ а́зъ сътворю̀ жрътвꙋ мою̀, и҆ ѹ҆ста́ша и҆ ѹ҆млъко́ша·
30
И҆ рече и҆лїѧ̀ к лю́демъ пристꙋпите къ мн̂ѣ. пристꙋпиша вс̂и лю́дїе к немꙋ̀ и҆ прїꙗ҆́тъ, в҃і, ка́менїи по числꙋ̀ колѣнъ і҆и҆л҃евъ, ꙗ҆коже гл҃а к немꙋ̀ г҃ь гл҃ѧ і҆и҆л҃ь бꙋдет̑ и҆́мѧ твоѐ·
31
И҆ създа̀ ѻ҆лта́рь въ и҆мѧ гн҃е і҆ и҆сцѣлѝ ѻ҆лта́рь гн҃ь раско́пан꙽ныи и҆ сътворѝ мо́ре въмѣща́ю҆ще дв̂ѣ мѣ́рѣ сѣмене ѻ҆́крс̑҇тъ ѻ҆лтарѧ̀·
32
И҆ въскладѐ дрова̀ на ѻл̑҇тар̑҇ и҆же сътвори. и҆ растеса̀ на ѹ́ды вс̂ѧсъжига́емаѧ, и҆ възложѝ на дрова̀·
33
И҆ рече и҆лїѧ̀ прїимѣте м̂и д҃ водоно́сы воды̀. и҆ възлива́ите на вс̂есъж꙽же́наѧ и҆ дрова̀. и҆ сътвори́ша та́ко. и҆ рече ѹ҆двои́те и҆ ѹ҆двои́ша. и҆ рече ѹ҆троите и҆ ѹ҆трои́ша и҆ прохожа́ше вода̀ ѻ҆́крс̑҇тъ ѻ҆лтарѧ̀ и҆ мо́ре и҆спо́лнь воды̀·
34
И҆ възопѝ и҆лїѧ на́ нб҃о и҆ рече. г҃и бж҃е а҆враа́мов̑҇ и҆саа́ковъ і҆а́ковль послꙋшаи мене г҃и послꙋшаи мене дне́сь ѻ҆гне́мъ. да дне́сь разꙋмѣ́ютъ вс̂и лю́дїе сїѝ ꙗ҆́ко ты̀ е҆си г҃ь б҃ъ е҆ді́нъ і҆и҆л҃евъ и҆ а́зъ ра́бъ твои и҆ тебѐ ради сътвори́х꙽ дѣла̀ с̂и·
35
Послꙋшаи м̂ѧ г҃и послꙋшаи менѐ ѻ҆гне́мъ, и҆ да разꙋмѣ́ют꙽ вс̂и лю́дїе сїѝ ꙗ҆́ко ты̀ е҆си е҆ді́нъ г҃ь б҃ъ и҆ ты̀ ѻ҆брати́лъ е҆си срд̑ца людїи сихъ въ слѣдъ·
36
И҆ спадѐ ѻ҆́гнь ѿ г҃а с нб҃се и҆ поꙗ҆́сть вс̂ѧсъжига́емаѧ и҆ дрова̀ и҆ ка́менїе и҆ пе́рсть, и҆ во́дꙋ ꙗ҆́же бѣ̀ в мо́ри вс̂ѧ полиза̀ ѻ҆́гнь·
37
И҆ падо́ша вс̂и лю́дїе ни́цы и҆ рѣша въи́стиннꙋ г҃ь то́и е҆сть б҃ъ.
38
И҆ реч̑҇ и҆лїѧ̀ к лю́дем̑ поима́ите про̑҇ро́ки ваа́ловы да ни е҆дін̑҇ скры́етсѧ ѿ них̑. и҆ прїѧ́ша и҆ ведѐ ѧ҆̀ и҆лїѧ̀ на пото́къ ки́совъ, и҆ закла̀ их̑ т̂ꙋ·
39
И҆ рече и҆лїѧ̀ къ а҆ха́вꙋ взы́иди ꙗ҆́жъ и҆ пїи. ꙗ҆́ко глс̑҇а е҆сть дожде́внаг̑҇ и҆схожде́нїѧ·
40
И҆ възы́иде а҆ха́въ ꙗ҆́сти и҆ пи́ти і҆ и҆лїѧ̀ взы́иде на каръми́лъ и҆ прекло́ньсѧ на́ землю и҆ положѝ лицѐ своѐ междꙋ̀ колѣнома свои́ма·
41
И҆ рече ѻ҆тро́чищꙋ свое҆мꙋ в꙽зы́иди, и҆ възрѝ пꙋте́мъ мо́рским̑. и҆ възы́иде и҆ възрѣ̀ ѻ҆тро́чищъ и҆ рече нѣ́сть ничто́же. и҆ рече и҆лїѧ̀ т̂о ты̀ ѻ҆брати́сѧ седми́жды·
42
И҆ бы́сть ꙗ҆́ко ѻ҆брати́сѧ се́дмое. и҆ с̂е ѻ҆́блак꙽ ма́лъ ꙗ҆ко нога́ма мꙋжескама възносѧ̀ во́дѣ ѿ мо́рѧ. и҆ рече взы́иди и҆ рцы̀ а҆ха́вови въпрѧжи колесни́цꙋ свою. и҆ сни́ди да тебе не ѻ҆бы́идетъ до́ждъ·
43
И҆ бы́въ до́здѣ и҆ до́здѣ, и҆ нб҃о примрачи́сѧ ѻ҆́блаки и҆ дх҃омъ. и бы́сть дождъ ве́лїи. и҆ пла́часѧ и҆дѐ а҆ха́въ до і҆и҆л҃ѧ·
44
И҆ рꙋка̀ гн҃ѧ быс̑҇ на и҆лїи. и҆ стѧ́гл꙽ чре́сла своѧ и҆ течѐ пред̑ а҆ха́вомъ до і҆и҆л҃ѧ·
Джерела
