Ostroh Bible❧Перша книга царів (Третя книга царств), розділ 19

1

И возвѣстѝ а҆ха́въ и҆е҆заве́ли женѣ свое́й вс̂е. е҆ли́ко сътворѝ і҆лїѧ̀. ꙗ҆ко и҆збѝ пророки ѻ҆рꙋжїемъ·

2

И҆ посла̀ е҆заве́ль къ и҆лїѝ и҆ рече, ты ли еси и҆лїѧ̀, а҆́з же и҆е҆заве́ль. сїѧ да сътворѧтъ м̂и бо́ѕи. и҆ с̂и да приложатъ м̂и ꙗ҆́ко в с̂еи҆ же ча́съ ѹ҆́тро положꙋ дш҃ꙋ твою ꙗ҆́коже дш҃ꙋ е҆ді́ног̑҇ ѿ си́хъ·

3

И҆ ѹ҆боѧ́сѧ и҆лїѧ̀. и҆ востав̑҇ и҆́де дш҃а ради свое́ѧ. и҆ прїиде въ вир꙽савїю землю̀ і҆ѹ́динꙋ. и҆ ѻ҆ста́ви ѻ҆тро́чища свое҆го т̂ꙋ·

4

И҆ то́й сам̑ и҆́де въ пꙋсты́ню дн҃ь и҆ пришед̑ сѣде подъ смерчїем꙽, и҆ просѝ дш҃и свое́и смр҃ти и҆ рече, довлѣе҆тъ м̂и. возмѝ ѹ҆бо нн҃ѣ ѿ менѐ дш҃ꙋ мою̀ г҃и. ꙗ҆́ко нѣсть а҆́зъ лꙋ́чшїи ѿц҃ъ мои҆хъ·

5

И҆ лѧ́же и҆ ѹ҆спѐ под̑ са́дом̑, и҆ с̂е а҆гг҃лъ гн҃ь коснꙋ́сѧ е҆мꙋ. и҆ рече е҆мꙋ воста́ни ꙗ҆́ждъ. и҆ и҆ възрѣвъ и҆лїѧ, и҆ с̂е ѹ҆ воз̑гла́вїѧ е҆го ѻ҆прѣснокъ пырѧ́нъ, и҆ чва́нец̑҇ воды̀. и҆ въста́въ ꙗ҆́сть и҆ пи́тъ, и҆ возврати́всѧ ѹ҆спѐ·

6

И҆ воз̑врати́сѧ а҆гг҃лъ гн҃ь втори́цею и҆ коснꙋ́сѧ е҆мꙋ и҆ реч̑҇ е҆мꙋ въста́въ ꙗ҆ждъ ꙗ҆́ко дале́ко т̂и е҆сть пꙋть·

7

И҆ воста́въ и҆ ꙗ҆́де и҆ пи́тъ, і҆ и҆дѐ въ крѣпости ꙗ҆́ди то́ѧ, м҃ дн҃їи и҆ м҃, но́щїи, до горы̀ бж҃їа хори́вы·

8

И҆ вни́де т̂ꙋ во вертепъ, и҆ ѻ҆бита т̂ꙋ. и҆ с̂е а҆́гг҃лъ гн҃ь прїиде к немꙋ̀. и҆ рече чт̂о ты здѣ̀ и҆лїѧ·

9

И҆ реч̑҇ и҆лїѧ̀ ревнꙋѧ поревнова́хъ по г҃ѣ вседръжи́тели. ꙗ҆́ко ѻ҆ста́виша т̂ѧ сн҃ове і҆и҆л҃ви. и҆ ѻ҆лтарѧ̀ твоѧ раскопа́ша. и҆ про̑҇ркы твоѧ и҆зби́ша ѻ҆рꙋжїемъ, и҆ ѻ҆стах̑ а́зъ е҆ді́нъ. і҆ и҆щꙋтъ дш҃а мое́ѧ и҆зѧти ю҆̀·

10

И҆ рече и҆зы́ди ѹ҆́тро и҆ ста́ни пред̑ гм҃ъ въ горѣ̀ се бо ми́мохо́дитъ г҃ь. и҆ с̂е дх҃ъ вели́къ крѣпок̑҇ раста́а го́ры и҆ съкрꙋша́ѧ ка́менїе в горѣ̀ пред̑ гм҃ъ. н̂о не в꙽ дꙋсѣ г҃ь и҆ по дꙋ́сѣ трс̑҇ꙋ. и҆ не въ трꙋ́сѣ г҃ь·

11

И҆ по трꙋ́сѣ ѻ҆́гнь. и҆ не въ ѻ҆гнѝ г҃ь. и҆ по ѻ҆гнѝ гла́съ свѣта то́нка. и҆ т̂ꙋ г҃ь·

12

И҆ бы́сть ꙗ҆́ко ѹ҆слы́ша и҆лїѧ̀. и҆ покры̀ лицѐ своѐ ми́лотїю свое́ю. и҆ шед̑ ста̀ пред̑ връте́помъ. и҆ с̂е к не́мꙋ бысть глас̑҇ и҆ рече чт̂о ты здѣ̀ и҆лїѧ̀·

13

И҆ рече и҆лїѧ̀ ревнꙋѧ́ поревнова́хъ по г҃ѣ вседръжи́тели. ꙗ҆ко ѻ҆ста́виша завт̑ѣ тво́и сн҃ве і҆и҆л҃еви. и҆ ѻ҆лтарѧ̀ твоа̀ разрꙋши́ша. и҆ проро́ки твоѧ̀ и҆зби́ша ѻ҆рꙋж́їемъ, и҆ ѻ҆ста́хъ а҆́зъ е҆ді́нъ. і҆ и҆щꙋтъ дш҃а мое́ѧ и҆зѧ́ти ю҆̀·

14

И҆ рече г҃ь к не́мꙋ, възврати́сѧ и҆дѝ пꙋтемъ свои҆мъ. і҆ и҆зы́деши на пꙋть пꙋсты́ни дама́сковы. и҆ пома́жеши а҆заи́ла на црс̑҇тво въ сѷрїи·

15

І҆ и҆ѹ́ѧ сн҃а а҆масїина пома́жеши на црс̑҇тво над̑ і҆и҃лем̑. і҆ е҆лисе́ѧ сн҃а а҆сафа́това, ѿ велимаѹ́ли пома́жеши про̑҇рка в себѐ мѣ́сто·

16

И҆ бꙋдꙋтъ сп҃са́емаго, ѿ ѻ҆рꙋж́їѧ а҆заи́лива ѹ҆бїетъ и҆̀ и҆ѹ́ѧ. и҆ сп҃се́наго ѿ ѻ҆рꙋж́їѧ и҆ѹ́и҆на, ѹ҆биет̑ і҆е҆лисе́и·

17

И҆ сохраню̀ ѻ҆ста́нокъ въ і҆и҆л҃и, ҂з҃, мꙋжъ. вс̂ѧ колѣ́на и҆же не прекло́нъшаѧ, ваа́лꙋ. и҆ всѧка ѹ҆ста̀ ꙗ҆́же не моли́шасѧ е҆мꙋ·

18

І҆ и҆де ѿтꙋ́дꙋ и҆ ѻ҆брѣте і҆е҆лисе́ѧ сн҃а а҆сафа́това. и҆ се́й ѻ҆раше двѣмана́десѧтьма сꙋпрꙋга́ма воло́въ пред̑ ни́мъ. и҆ то́й сам̑ по дво́юна́десѧть сꙋпрꙋ́гꙋ. и҆ прїиде и҆лїѧ̀ к немꙋ̀. и҆ свержетъ ми́лоть свою̀ на́нь·

19

И҆ ѻ҆ста́ви і҆е҆лисе́и волы̀ и҆ течѐ въ слд̑ѣ и҆лїѝ. и҆ рече молю т̂ѧ да ѻ҆блобыжꙋ̀ ѿц҃а мое҆го и҆ мт҃рь мою̀ і҆ и҆дꙋ̀ въ слд̑ѣ тебѐ. и҆ рече е҆мꙋ и҆дѝ. и҆ възврати́сѧ ꙗ҆́ко нѣсть т̂и ѹ҆жѐ дѣ́ла·

20

И҆ возврати́сѧ ѿ него̀ и҆ поѧт̑ сꙋпрꙋ́гы волов̑҇, и҆ закла̀. і҆ и҆спечѐ ѧ҆̀ сосꙋ́ды воло́вными, и҆ дасть людем̑ и҆ ꙗ҆до́ша. и҆ востав̑҇ и҆дѐ въ слд̑ѣ и҆лїѝ и҆ слꙋжа́ше е҆мꙋ·