Ostroh Bible❧Перша книга царів (Третя книга царств), розділ 20

1

И сн҃ъ а҆де́ровъ цр҃ь сѷръскїи бѧ́ше собра̀ вс̂ю си́лꙋ свою̀.

2

и҆ въшед̑ ѻ҆бъсѣ́де самарїю, и҆ с ни́мъ, л҃в, цр҃ѧ. и҆ вс̂и кон̑҇ницы и҆ ѻ҆рꙋж́ницы. и҆ вшед̑ше ѻ҆бъсѣ́доша самарїю. и҆ побѣжа́хꙋсѧ ѻ҆ ню̀. и҆ посла̀ къ а҆ха́вꙋ цр҃ю і҆и҆л҃евꙋ во́ град̑·

3

И҆ рече к немꙋ. сице гл҃етъ сн҃ъ а҆де́ровъ. сре́бро твоѐ и҆ зла́то твоѐ мое е҆сть. и҆ же́ны твоа̀ и҆ ча́да твоѧ и҆ до́браѧ моѧ̀ сꙋть·

4

И ѿвѣща̀ цр҃ь і҆и҆л҃евъ и҆ рече. ꙗ҆́коже гл҃а г҃и мо́и цр҃ю тво́и е҆смь а́зъ, и҆ вс̂е е҆же и́мам̑·

5

И҆ па́ки в꙽тори́цею прїидо́ша послы̀ къ а҆ха́вꙋ и҆ рѣша. си́це гл҃ет꙽ сн҃ъ а҆де́ров̑҇. а҆зъ посылах̑ к тебѣ̀ гл҃ѧ сре́бро твоѐ и҆ злато твоѐ и҆ же́ны твоѧ̀ и҆ ча́да твоѧ̀ да́жд̑ь мн̂ѣ·

6

Ꙗ҆́ко в се́и же ча́съ ѹ҆тро пꙋщꙋ̀ ра́бы̀ моѧ̀ к тебѣ̀. і҆ и҆зыщꙋтъ дом̑ тво́и и҆ до́мъ ѻ҆́трокъ твои҆хъ, и҆ бꙋ́дꙋтъ помышлѧ́емаѧ ѻ҆́чїю и҆хъ. на них̑же а҆́ще возло́жатъ рꙋ́кы своѧ̀ т̂о да во́змꙋтъ·

7

И҆ призва цр҃ь і҆и҆л҃евъ вс̂ѧ ста́рца землѧ̀. и҆ реч̑҇ чт̂о мы́слите нн҃ѣ ви́дите ꙗ҆́ко то́й ѕл̂ѣ про́сит̑. посыла́ѧ б̂о ко мнѣ гл҃етъ, ѻ҆ женах̑ мои҆хъ, и҆ ѻ҆ сн҃ѣхъ моих̑, и҆ ѻ҆ дще́рех̑ мои҆хъ. и҆ ѻ҆ сре́брѣ мое҆мъ и҆ златѣ мое҆мъ и҆ не послꙋшаи ни восхощи да́ти.

8

И҆ рѣша е҆мꙋ ста́рцы и҆ лю́ди вс̂и не послꙋшаи ни восхощи да́ти. и҆ сего ра́ди рече послом̑ сн҃а а҆де́рова р꙽цѣте господи́нꙋ ва́шемꙋ. всего е҆ли́коже дѣ́льма посыла́лъ е҆си къ рабꙋ̀ свое҆мꙋ преже того̀ сътворю̀. а҆ сего̀ гла́са не мо́гꙋ т̂и сътвори́ти. и҆ прїимъше ѿвѣтъ мꙋж́а а҆де́рова воз̑вратишасѧ съ си́ми словесы̀·

9

И҆ па́ки посла̀ к не́мꙋ сн҃ъ а҆де́ровъ гл҃ѧ. с̂е да сътворѧ́тъ м̂и бо́ѕи. и҆ с̂и приложи́тъ м̂и. а҆́ще не сътвори́тъ да и҆ пръсть самарїиска не бꙋ́детъ всѣмъ лю́демъ пѣш́им̑·

10

И҆ ѿвѣща̀ цр҃ь і҆и҆л҃евъ и҆ реч̑҇. да не хва́лит̑сѧ дово́лно слꙋ́кы, ꙗ҆́ко и҆ про́стыи·

11

И҆ бы́сть е҆гда̀ ѿвѣща̀ е҆мꙋ сло́во с̂е. и҆ б̂ѣ и҆спивалъ са́мъ то́й. и҆ цр҃и и҆же бѣхꙋ с ним̑ во со́нмѣхъ. и҆ рече ѻ҆́троком̑ своим̑ сътвори́те лѣ́ствица, и҆ приста́вите гра́дѣ·

12

И҆ с̂е про̑҇ркъ е҆ді́нъ прїиде къ а҆ха́вꙋ цр҃ю і҆и҆л҃евꙋ. и҆ рече сїи гл҃етъ г҃ь и҆же ви́диши ве́сь народ̑ се́й вели́кїи. и҆ с̂е а҆́зъ да́мъ и҆хъ днс̑҇ь в рꙋ́цѣ твоѝ. и҆ разꙋмѣ́еши ꙗ҆ко аз̑ е҆смь г҃ь.

13

И҆ рече а҆ха́въ въ че́мъ. и҆ рече. си́це гл҃етъ г҃ь въ ѻ́троцѣхъ и҆ кнѧ́ѕь землѧ̀. и҆ рече а҆ха́въ кт̂о соберет̑ бра́нь. и҆ реч̑҇ т̂ы·

14

И҆ созрѣ а҆ха́въ ѻ҆́трокъ кнѧ́ѕь землѧ̀ то́ѧ. и҆ бысть их̑, с҃ л҃ и҆ в҃. и҆ по сих̑ сочтѐ лю́ди вс̂ѧ, и҆ б̂ѣ сн҃овъ си́лных̑, ҂з҃·

15

І҆ и҆зы́де в полꙋ́дн҃е, и҆ сн҃ъ а҆де́ров̑҇ пїѧнъ б̂ѣ ѕѣло въ сокхо́тѣ. са́мъ и҆ цр҃и, и҆же с ни́мъ, л҃в, цр҃ѧ. помо́щника е҆мꙋ·

16

І҆ и҆до́ша ѻ҆́троцы вое҆водъ землѧ̀ тоѧ въ пе́рвыхъ, сїи́ же и҆же посла̀ сн҃ъ а҆де́ровъ възвѣсти́ша цр҃ю сѷрскꙋ гл҃ще, мꙋж́и сꙋть и҆зышли ѿ самарїѧ·

17

И҆ рече и҆мъ а҆́ще и҆ на мир̑҇ и҆зышли сꙋть т̂о пои҆мете ѧ҆̀ жи́вы и҆ а́ще л̂и на́ брань сꙋть и҆зышли т̂о жи́во ѧ҆̀ пои҆мѣте, да и҆но́гда бы́ша не и҆сходили и҆з꙽ гра́да·

18

И҆ тїи и҆зыдо́ша ѿ гра́да ѻ҆́троцы вое҆водъ страны̀ то́ѧ, и҆ си́ла въ слд̑ѣ и҆хъ·

19

И҆ бѣша ко́ждо проти́вника себѣ̀, и҆ бѣжа а҆сѷрїѧ, и҆ погна их̑ і҆и҆л҃ь, и҆ гонзе то́кмо сн҃ъ а҆де́ров꙽ цр҃ь сѷрьскїи на конѧ̀ пресѣдаа·

20

І҆ и҆зыиде цр҃ь і҆и҆л҃евъ, и҆ поѧт̑ вс̂ѧ ко́нѧ и҆ колесница, и҆ побѣди ѧ҆̀ ꙗ҆́звою вели́кою въ сѵ̀рїѝ·

21

И҆ прїиде про̑҇ркъ къ цр҃ю і҆и҆л҃евꙋ, и҆ рече крѣписѧ и҆ разꙋмѣи, и҆ виждь чт̂о сотвориши ꙗ҆́ко преходѧ́щꙋ лѣтꙋ семꙋ̀, сн҃ъ а҆де́ров̑҇ цр҃ь а҆сѷрїискїи прїидет̑ на́ тѧ·

22

И҆ ѻ҆́троцы цр҃ѧ а҆сѷрїиска рѣша е҆мꙋ, б҃ъ го́ръ б҃ъ і҆ил҃въ, а҆ не б҃ъ ѹ҆до́лнїи, сего ра́ди ѹ҆крѣписѧ па́че насъ н̂о а҆́ще ли побѣдимъсѧ с ни́ми на́ поли ѹ҆крѣпимсѧ на́ нѧ по гл҃ꙋ же семꙋ̀ сътвори, и҆ распꙋсти цр҃ь ко́гождо на мѣсто своѐ, и҆ поста́ви в ни́хъ мѣсто вое҆во́ды і҆ и҆змѣним̑ т̂и силꙋ, по силѣ ѿпад̑шїи ѿ тебѐ, и҆ ко́нѧ в ко́нь мѣсто, и҆ ѻ҆рꙋжїѧ въ ѻ҆рꙋж́їѧ мѣсто, и҆ побѣдимъсѧ с ни́ми ѹ҆до́бъ, и҆ ѹ҆крѣпимсѧ паче и҆хъ·

23

И҆ послꙋша гла́са и҆хъ и҆ сотвори та́ко, и҆ бысть минꙋвши лѣтꙋ томꙋ̀, сочтѐ сн҃ъ а҆де́ровъ сѷрїю, и҆ възы́де въ саѳе́кꙋ на́ брань на і҆ил҃ѧ·

24

И҆ сн҃ове і҆ил҃еви съглѧда́вшесѧ и҆дѧ́хꙋ на срѣтенїе и҆́мъ, и҆ въполчишасѧ і҆ил҃ьтѧне противꙋ и҆мъ, ꙗ҆́ко дв̂ѣ ста́дѣ ко́зъ, и҆ сѷрѧни и҆сполниша зе́млю·

25

И҆ прїиде чл҃къ бж҃їи, и҆ рече къ цр҃ю і҆ил҃евꙋ, сице гл҃етъ г҃ь, поне́же рече сѷрїѧ б҃ъ го́ръ, г҃ь б҃ъ і҆и҆л҃евъ, и҆ не б҃ъ ѹ҆до́лнїи, да́мъ си́лꙋ вели́кꙋю сїю в рꙋ́цѣ твоѝ, и҆ разꙋмѣ́еши ꙗ҆ко г҃ь е҆смь а҆́зъ·

26

И҆ ѻ҆полчи́шасѧ тїѝ противꙋ и҆мъ сед̑мь дн҃їи, и҆ бы́сть въ дн҃ь сед̑мыи приближишасѧ побѣдѣ, и҆ побѣди́ша і҆и҆л҃ьтѧне сѷрѧн꙽, р҃ ҂к, пѣшцев̑҇, въ а҃ дн҃ь·

27

И҆ бѣжа́ша ѻ҆став̑҇шїи во а҆ѳе́кꙋ град̑, и҆ падѐ стѣна̀, на к҃ ҂з, мж̑ꙋ збывших̑, сн҃ъ же а҆деров̑҇ бѣжа и҆ вни́де въ храм̑ лож꙽чныи внꙋтренїи·

28

И҆ рѣша к немꙋ ѻ҆́троцы е҆го, с̂е нн҃ѣ вѣмы ꙗ҆́ко цр҃и до́мꙋ і҆и҆л҃ева млс̑҇тиви сꙋть. да возло́жимъ нн҃ѣ врѣтища на чре́сла наша и҆ ѹ́жа на вы́ѧ наша. і҆ и҆зы́дем̑ къ цр҃ю і҆и҆л҃евꙋ да неглѝ живит̑ дш҃а на́ша·

29

И҆ препоꙗ҆́сашасѧ въ врѣтища по чре́слом̑ своим̑ и҆ возложи́ша ѹ҆́жа на вы́ѧ своѧ. и҆ прїидо́ша къ цр҃ю і҆и҆л҃евꙋ и҆ рѣша, раб̑҇ тво́и сн҃ъ а҆деровъ гл҃етъ да живе́т꙽ дш҃а моѧ. и҆ сїи реч̑҇, а҆́ще е҆сть и҆ е҆щѐ жи́въ братъ м̂и е҆сть·

30

И҆ мꙋж́и ѹ҆кроти́шасѧ и҆ ѹ҆тѣши́ша, прїем̑ше сло́во ѿ ѹ҆стъ е҆го. и҆ рѣша бра́тъ т̂и е҆сть сн҃ъ а҆де́ровъ. и҆ рече и҆дѣте и҆ приведѣте и҆̀. і҆ и҆зы́де к немꙋ сн҃ъ а҆де́ров꙽. и҆ възведо́ша и҆̀ к немꙋ на колесни́цꙋ·

31

И҆ реч̑҇ к немꙋ, гра́ды ꙗ҆́же б̂ѣ прїѧ́лъ ѿц҃ъ мо́и, ѿ ѻ҆ц҃а твое҆го ѿда́мъ т̂и. и҆ на и҆схо̑ сотвори́ши ѧ҆̀ себѣ̀ в дама́сцѣ. ꙗ҆́коже положѝ ѿц҃ъ мо́и в самарїѝ. и҆ а́зъ въ завѣтѣ пꙋщꙋ т̂ѧ. и҆ положѝ е҆мꙋ завѣтъ и҆ ѿпꙋсти и҆̀·

32

И҆ чл҃къ е҆ді́нъ ѿ сн҃овъ про̑҇рчь рече къ бли́жнемꙋ сѝ по словесѝ гн҃ю побїи м̂ѧ ѹ҆́бо. и҆ не хотѧ́ше поби́ти е҆го чл҃къ·

33

И҆ реч̑҇ к немꙋ поне́же не послꙋш́а гла́са гн҃ѧ. с̂е ты нн҃ѣ ѿи́деши ѿ менѐ и҆ расхитит̑ т̂ѧ ле́въ и҆ ѿи́де ѿ него. и҆ ѻ҆брѣте и҆̀ ле́въ и҆ порази и҆̀·

34

И҆ ѻ҆брѣте чл҃ка и҆́ного и҆ реч̑҇ побїи м̂ѧ нн҃ѣ. и҆ поби и҆̀ чл҃къ и҆ поби́выи, сокрꙋши и҆̀·

35

І҆ и҆дѐ про̑҇ркъ и҆ став̑҇ ѹ҆ цр҃ѧ і҆и҆л҃ева на пꙋтѝ і҆ и҆змѣнисѧ посы́павъ ѻ҆́чи своѧ̀ пра́хом̑·

36

И҆ бы́сть ꙗ҆́ко и҆дѧ́ше цр҃ь и҆ се́и҆ вопїѧ́ше ко цр҃ю и҆ реч̑҇, раб̑҇ твои и҆зы́де на́ воинꙋ бра́ни. и҆ с̂е мж̑ꙋ приведѐ ко мнѣ̀ мꙋжа. и҆ реч̑҇ ко мнѣ̀ сохранѝ мꙋ́жа сего̀. а҆́ще ли ѿрешив̑҇сѧ ѿско́чит̑ и҆ бꙋ́детъ дш҃а твоѧ̀ за дш҃ꙋ е҆го. и҆л̂и тала́нтъ ѿдасѝ сре́бра·

37

И҆ бы́сть ꙗ҆́ко призрѣ ра́бъ тво́и и҆ здѣ̀. и҆ зд̂ѣ и҆ сего не бы́сть и҆ рече к не́мꙋ цр҃ь і҆и҆л҃евъ с̂е е҆сть сꙋдъ тво́и е҆же са́мъ ѻ҆сꙋдѝ·

38

И҆ се́й пот꙽ща́всѧ ѿꙗ҆тъ пра́хъ ѿ ѻ҆чїю свое́ю. и позна и҆̀ цр҃ь і҆и҆л҃евъ ꙗ҆́ко ѿ про̑҇ркъ сїи е҆сть·

39

И рече к не́мꙋ, та́ко гл҃етъ г҃ь поне́же взѧтъ т̂ы мꙋж́а ѕвѣрїи сверепїиша ѿ рꙋ́кꙋ твое́ю. и҆ да е҆сть дш҃а твоѧ̀ въ дш҃а е҆го мѣ́сто. и҆ люд̑и̑ твоѝ въ лю́ди е҆го мѣ́сто·

40

І҆ и҆дѐ цр҃ь і҆и҆л҃евъ в до́мъ сво́и раслабленъ и҆ печа́ленъ·