Ostroh Bible❧Перша книга Самуїлова (Перша книга царів), розділ 14

1

И бы́сть въ е҆ді́нъ дн҃ь и҆ рече и҆ѻ҆а҆наѳа́нъ сн҃ъ саѹ́ловъ ѻ҆тро́чищꙋ свое҆мꙋ носѧ́щемꙋ ѻ҆рꙋжїе е҆го грѧдѝ и҆ прїидевѣ въ меса́вꙋ и҆ноплеме́нникъ и҆же на ѻ́нои стра́нѣ. ѿц҃ꙋ же свое҆мꙋ не възвѣстѝ сего·

2

И҆ саѹ́лъ седѧ́ше под̑ сѣнїю на верхꙋ хол̑҇ма и҆же в магдо́нѣ. и҆ бѧ́ше с ни́мъ ꙗ҆́ко, х҃. мꙋжъ·

3

А҆хїѧ же сн҃ъ а҆хи́товъ. бра́та и҆ѻ҆а҆ви́ѳова. сн҃а ѳенеѻ́сова. сн҃а и҆лі́ина і҆ере́ѧ бж҃їа въ сило́ме носѧ̀ ри́зꙋ жре́ческꙋ, и҆ лю́дїе не вѣдѧхꙋ ꙗ҆́ко ѿи́де и҆ѻ҆а҆наѳа́нъ·

4

Посредѣ́ минова́нїѧ, и҆дѣже хотѧ́ше и҆ѻ҆а҆наѳа́нъ минꙋти въ станы̀ и҆ноплеме́нникъ, бы́сть ка́мень ѿсю́дꙋ. и҆ ѿѻ҆нꙋдꙋ пꙋтѧ̀. и҆́мѧ е҆ді́номꙋ моси́съ. а҆ дрꙋго́мꙋ си́нна. ка́мень же е҆ді́нъ стоѧ́ше ѿ сѣ́вера проти́вꙋ махе́мы. ка́мень вторы́и ѿ ю́га проти́вꙋ гавѣ́и·

5

И҆ рече и҆ѻ҆а҆наѳа́нъ къ ѻ҆тро́чищꙋ носѧ́щемꙋ ѻ҆рꙋжїе е҆го, грѧдѝ и҆ прїидевѣ въ месав̑҇. неѻ҆брѣженꙋю сїю, и҆ е҆да г҃ь повою́етъ ѻ҆ нас̑҇. ꙗ҆́ко нѣсть г҃ꙋ съдръжа́щїисѧ, спс̑҇ти и҆л̂и въ мно́ѕѣ и҆л̂и въ ма́лѣ·

6

И҆ рече е҆мꙋ носѧ́и ѻ҆рꙋжїе е҆го, твори вс̂е е҆же т̂и срд̑це мы́слитъ, с̂е а҆зъ с тобо́ю е҆смь. ꙗ҆́ко срд̑це твоѐ, та́ко и҆ срд̑це моѐ·

7

И҆ рече и҆ѻ҆а҆наѳа́нъ с̂е мы̀ преидевѣ к мꙋжемъ, и҆ ꙗ҆ви́мысѧ и҆м꙽·

8

А҆ще же рекꙋтъ к намъ помедли́та т̂ꙋ до́ндеже възвѣсти́мъ ва́ма. т̂о посто́ива са́ма на мѣсте своем̑. и҆ не по́идевѣ к ни́мъ·

9

А҆ще л̂и на́мъ си́це рекꙋтъ преидѣта к на́мъ, т̂о и҆ пре́идевѣ. ꙗ҆́ко преда́сть ѧ҆̀ г҃ь в рꙋки на́ша, и҆ с̂е на́ма зна́менїе да бꙋдетъ·

10

И҆ внидо́ста ѻ҆́ба вкꙋпѣ въ меса́вꙋ и҆ноплеме́нникъ. и҆ гл҃аша и҆ноплеме́нницы. с̂е е҆вре́и и҆схо́дѧтъ и҆зъ распа́линъ ка́меных̑. и҆дѣже сѧ бѧ́ше съкры́ли·

11

И҆ ѿвѣщаша мꙋжи меса́вли, къ и҆ѻ҆а҆наѳа́нꙋ и҆ к носѧ́щемꙋ ѻ҆рꙋжїе е҆го, и҆ рѣша възы́идета к на́мъ. и҆ ꙗ҆́ви́мъ ва́мъ рѣчи. и҆ рече и҆ѻ҆а҆наѳа́нъ к носѧ́щемꙋ ѻ҆рꙋжїе е҆го, грѧдѝ по мн̂ѣ ꙗ҆́ко преда́сть ѧ҆̀ г҃ь в рꙋцѣ і҆и҆л҃евѣ·

12

И҆ възы́иде и҆ѻ҆а҆наѳа́нъ прегнꙋвшисѧ на рꙋка́хъ и҆ на нога́хъ свои҆хъ. и҆ носѧ́и ѻ҆рꙋжїе е҆го за ни́мъ. и҆ ѹ҆зрѣвше и҆ноплеме́нницы лицѐ и҆ѻ҆а҆наѳа́не. и҆ падо́ша пред ним̑ ѻ҆́трок̑҇ же е҆го побива́ше и҆хъ·

13

И҆ бы́сть с̂е ꙗ҆́зва прьваѧ ю҆́же побѣди и҆ѻ҆а҆наѳан̑҇ и҆ носѧ́и ѻ҆рꙋжїе е҆го ꙗ҆́ко к҃ мꙋжъ на полъ стра́ны села̀ ю҆́же дв̂а волы̀ въ дн҃ь и҆зора́ти мо́жета·

14

И҆ бы́сть ѹ҆жа́съ в по́лцѣхъ и҆ноплеменникъ, на се́лѣхъ. и҆ вси лю́дїе и҆же въ меса́вли. и҆ во́и е҆го ѹ҆жаснꙋшасѧ. т̂и б̂о ꙗ҆ко не боѧ́щасѧ бѣша. и҆ въстрепета́сѧ землѧ̀. и҆же бы́сть и҆мъ ѹ҆́жасъ ѿ г҃а·

15

И҆ бы́сть вѣ́сть саѹ́лови въ станꙋ̀ венїа҆ми́ни. ꙗ҆́ко по́лци разгна́ни бѣша сѣмо и҆ ѻ҆на́мо·

16

И҆ рече саѹ҆́лъ людемъ сꙋщим̑ с ни́мъ съчита́итесѧ нн҃ѣ и҆ дозрѣте. е҆да гд̂ѣ кт̂о е҆сть ѿше́лъ ѿ на́съ. и҆ съчто́шасѧ. и҆ с̂е не ѻ҆брѣтесѧ с ни́ми и҆ѻ҆а҆наѳа́нъ. и҆ носѧи ѻ҆рꙋжїе е҆го·

17

И҆ рече саѹ́лъ къ а҆хїѝ приведѣте ми носѧ́щаго ри́зы жре́чески. ꙗ҆́ко б̂ѣ кїѻ́тъ бж҃їи. в т̂ы дн҃и съ сн҃ъми і҆и҆л҃евыми. и҆ бы́сть е҆гда гл҃аше саѹ́лъ къ і҆е҆ре́ю. и҆ с̂е шꙋмъ бы́сть в по́лцѣ и҆ноплеме́нник̑҇ ходѧ̀ и҆дѧ́ще и҆ мно́жашесѧ. и҆ реч̑҇ саѹл̑҇ къ і҆е҆ре́ю. пригнѝ рꙋцѣ с̂и·

18

І҆ и҆зы́де саѹ́лъ и҆ вс̂и лю́дїе с нимъ. і҆ и҆зыдо́ша до сѣ́чища. и҆ с̂е бы́сть ѻ҆рꙋжїе кое҆го́ждо бли́жнего свое҆го ѹ҆бива́ше и҆ бы́сть мѧте́жъ вели́къ ѕѣло·

19

Но і҆е҆вре́и и҆же бѣша со и҆ноплеме́нники в꙽чера̀ и҆ тре́тїи дн҃ь вшед̑шїи вое҆ва́ти по и҆ноплеме́нникох꙽ ѻ҆брати́шасѧ и҆ тїѝ, и҆ бы́ша съ і҆и҆л҃ьты и҆ съ саѹ́ломъ. и҆ съ и҆ѻ҆а҆наѳа́номъ·

20

И҆ вс̂и і҆и҆л҃ьты съкры́вшасѧ въ горѣ̀ е҆фре́мли. слы́шавше ꙗ҆́ко ѿбѣго́ша и҆ноплеме́нницы. и҆ събра́вшесѧ и҆ тїи и҆ погна́вше в слд̑ѣ и҆хъ. събра́нїю·

21

И҆ та́ко сп҃се г҃ь въ то́и дн҃ь і҆и҆л҃ьты ѿ рꙋкꙋ и҆ноплеме́нникъ. бра́нь же с̂и расшири́сѧ даже до вамо́на·

22

И҆ вс̂и лю́дїе бѧ́хꙋ съ саѹ́ломъ. бѧ́ше же ꙗ҆́ко ҂і҃ мꙋжъ. и҆ б̂ѣ всего гра́да тог̑҇ бра́нь рас꙽сы́пашасѧ. и҆ ѿбѣже в горꙋ̀ е҆фре́млю, и҆ заклѧ̀ саѹ́лъ лю́ди клѧ́твою ве́лїею в то́и дн҃ь. и҆ реч̑҇ рцѣте люде́мъ. проклѧ́тыи чл҃къ и҆же ꙗ҆́сть хлѣбъ в то́и дн҃ь до́ вечера. до́ндеже ѿмщꙋ̀ враго́мъ мои҆мъ. и҆ не вкꙋси́ша лю́дїе вс̂ѣ хлѣ́ба·

23

И҆ ѻ҆брати́шасѧ лю́дїе вс̂ѧ землѧ̀ въ лꙋ́гъ. и҆ с̂е лꙋ́гъ бѧ́ше по́лнъ пче́лъ ѿ всѣхъ се́лъ ѻ҆пꙋстѣвших̑·

24

И҆ внидо́ша вс̂и лю́дїе в лꙋ́гъ пче́лныи. и҆ с̂е зрѧ́хꙋ лю́дїе ꙗ҆́ко и҆стечѐ мед̑, н̂о не бѣ възвраща́ющаго рꙋ́кы свое́ѧ къ ѹ҆стомъ свои́мъ. ꙗ҆́ко боа́шасѧ лю́дїе клѧ́твы·

25

Сего же і҆ѻ҆а҆наѳа́нъ не слы́ша е҆гда заклина́ше ѿц҃ъ е҆го лю́ди. и҆ просте́ръ конец̑҇ хорꙋгвѝ свое́а ꙗ҆́же в рꙋ́кꙋ е҆мꙋ. и҆ ѻ҆мочи́въ коне́цъ в ме́дъ и҆ ꙗ҆дѐ, и҆ възвратѝ рꙋ́кꙋ свою въ ѹ҆ста̀ своѧ, и҆ просвѣти́стасѧ ѻ҆чи е҆го·

26

И҆ речѐ е҆ді́нъ ѿ людїи гл҃ѧ. клены́и проклѧ̀ ѿц҃ъ тво́и людѝ гл҃ѧ проклѧ́тъ чл҃къ и҆же ꙗ҆́стъ хлѣбъ въ дн҃ь се́й, і҆ и҆знемого́ша людїе·

27

И҆ѻ҆а҆на́ѳанъ же разꙋмѣвъ и҆ рече. смꙋтѝ ѿц҃ъ мо́и лю́ди на землѝ, ви́дите ꙗ҆́ко просвѣти́шасѧ ѻ҆́чи моѝ е҆гда въкꙋсихъ ма́ло ѿ ме́дꙋ сего̀·

28

Є҆да̀ не лꙋчшее л̂и бы́сть а҆́ще б̂ы лю́ди ꙗ҆́ли днс̑҇е коры́сть вра́гъ свои҆хъ е҆же ѻ҆брѣто́ша. и҆ множа́ишаѧ б̂ы днс̑҇е ꙗ҆́зва была̀ въ и҆ноплеме́нницх̑ѣ·

29

И҆ побѣди́ша въ дн҃ь то́й и҆ноплеме́н꙽никы множа́иши нежели в꙽ мах̑ма́се, и҆ ѹ҆трꙋди́шасѧ лю́дїе ѕѣ́ло·

30

И҆ ѻ҆брати́шасѧ людїе на коры́сть. и҆ поѧ́ша людїе ста́да, и҆ бꙋ́иволы и҆ говѧ́да. і҆ и҆ закалахꙋ на землѝ. и҆ ѧ҆до́ша лю́дїе съ кро́вїю·

31

И҆ възвѣсти́ша къ саѹ́лꙋ гл҃юще. съгрѣши́ша лю́дїе къ г҃ꙋ, ꙗ҆дꙋщ́а съ кро́вїю. и҆ рече саѹ҆́лъ къ геѳомъ привали́те м̂и сѣмо ка́мень ве́лїи·

32

И҆ па́ки рече саѹл̑҇ шед̑ше к люде́мъ рцѣте и҆мъ. да принесе́тъ ко́ждо свое телѧ̀, и҆ ко́ждо ѻ҆вцꙋ̀ свою. и҆ да зако́лют꙽ ѹ҆ ка́мени сего̀ и҆ да ꙗ҆дѧ́тъ и҆̀ и҆ не съгрѣша́ите г҃ꙋ е҆же ꙗ҆дꙋще съ кро́вїю. и҆ приведо́ша но́щїю вс̂и лю́дїе свое ко́ждо. е҆же и҆мѣѧ́ше в рꙋ́кꙋ свое́ю, и҆ закала́хꙋ т̂ꙋ·

33

И҆ саѹ́лъ създа̀ т̂ꙋ ѻ҆́лтарь г҃ꙋ. и҆ с̂е пе́рвїе нача саѹ́лъ зда́ти ѻ҆́лтарь г҃ꙋ·

34

И҆ рече саѹ́лъ. сни́дем̑ въ слд̑ѣ и҆ноплеме́нникъ но́щїю, и҆ хи́тимъ их̑ до́ндеже за́рѧ бꙋ́детъ. и҆ не ѻ҆ста́вимъ ѿ нихъ мꙋж́а и҆ рѣша̑ вс̂ѧ бл҃гаѧ, пред̑ ѻ҆чи́ма твои́ма творѝ. и҆ рече і҆е҆ре́и прїидемъ ѿсюдꙋ къ г҃ꙋ·

35

И҆ въпроси саѹ́лъ б҃а. а҆́ще вели́ши м̂и сни́ти въ слѣдъ и҆ноплеме́нникъ. и҆ а́ще предасѝ и҆хъ въ рꙋ́ки і҆и҆л҃ьтомъ. и҆ не ѿвѣща е҆мꙋ г҃ь въ дн҃ь то́й·

36

И҆ рече саѹ́лъ стꙋпи́те сѣмо вс̂и старѣ́ишины і҆и҆л҃евы, и҆ ѹ҆разꙋмѣе́те и҆ ѹ҆вѣ́сте на ком̑ бысть грѣхъ се́й днс̑҇е·

37

Ꙗ҆́ко жи́въ г҃ь спасы́и і҆и҆л҃ѧ. а҆́ще л̂и і҆ѻ҆а҆наѳа́на ради сн҃а мое҆го бы́сть с̂е. смр҃тїю да ѹ҆́мретъ, и҆ не бѣ̀ ѿвѣщава́ющаго ѿ всѣхъ людїи і҆и҆л҃евъ·

38

И҆ рече саѹ́лъ всемꙋ і҆и҆л҃ю. в̂ы ста́нѣте по е҆ді́нꙋ стра́нꙋ, а҆з же і҆ ѻ҆а҆наѳа́нъ сн҃ъ мо́и ста́невѣ по дрꙋ́гꙋю странꙋ̀, и҆ рѣша̑ лю́дїе къ саѹ́лꙋ ꙗ҆́ко т̂и годѣ бы́сть та́ко и҆ творѝ·

39

И҆ рече саѹ́лъ г҃и б҃е і҆и҆л҃евъ что̀ се ꙗ҆́ко не ѿвѣща рабꙋ̀ свое҆мꙋ днс̑҇е, и҆л̂и мое е҆сть и҆л̂и сн҃а мое҆го, і҆ѻ҆а҆наѳа́на безаконїе·

40

Ги҃ б҃е і҆и҆л҃евъ даждь зна́менїе, а҆́ще л̂и речеши сїѧ на людѝ своѧ і҆и҆л҃ѧ безако́нїе т̂о да́ждь винꙋ̀, и҆ падѐ ѻ҆бличе́нїе на і҆ѻ҆а҆наѳа́на и҆ саѹ́ла а҆ людїе и҆зы́доша·

41

И҆ рече саѹ́лъ възвръзи́те жребїи на́ мѧ, і҆ на і҆ѻ҆а҆наѳа́на сн҃а мое҆го, и҆ е҆гоже ѻ҆бъꙗ҆ви́тъ г҃ь, смр҃тїю да ѹ́мретъ·

42

И҆ рѣша лю́дїе саѹ́лꙋ, нѣсть с̂е добръ гл҃ъ, и҆ ѹ҆дръжа саѹ́лъ лю́ди, и҆ възвръго́ша ѻ҆ немъ і҆ ѻ҆а҆наѳанѣ сн҃ѣ е҆го, и҆ падѐ на і҆ѻ҆а҆наѳа́на жребїи·

43

И҆ рече саѹл̑҇ къ і҆ѻ҆а҆наѳанꙋ сн҃ꙋ свое҆мꙋ и҆звѣсти м̂и чт̂о е҆си сътвори́лъ. і҆ и҆звѣсти е҆мꙋ і҆ѻ҆а҆наѳа́нъ. и҆ рече въкꙋша́ѧ въкꙋсих̑ ма́ло медꙋ ѻ҆мочи́въ конецъ копїѧ и҆же въ рꙋ́кꙋ мое́ю·

44

И҆ рече е҆мꙋ саѹл̑҇ та́ко сътвори́ ми б҃ъ, и҆ с̂е приложи м̂и, да смр҃тїю ѹ҆́мреши дне́сь·

45

И҆ рѣша вс̂и лю́дїе къ саѹ́лꙋ, е҆да̀ л̂и ѹ҆мре́ти и҆́мать і҆ѻ҆а҆наѳа́н꙽. сътвори́выи днс̑҇ь сп҃се́нїе вели́кое і҆и҆л҃ю·

46

Не бꙋ́ди т̂о жи́въ г҃ь. а҆́ще и҆ паде́т꙽ и҆ вла́съ главы̀ на́ землю, ꙗ҆ко млс̑҇тїю бж҃їею сътвори́въ дн҃ь сїи. и҆ помоли́шасѧ лю̂дїе, ѻ҆ і҆ѻ҆а҆наѳа́нѣ въ дн҃ь то́й и҆ не ѹ҆́мретъ·

47

И҆ не гна̀ саѹ́лъ въ слѣдъ и҆ноплеме́н꙽никъ. і҆ и҆ноплеме́н꙽ницы же ѿидо́ша в꙽ мѣ́сто своѐ·

48

И҆ саѹ́лъ ѹ҆крѣпи́сѧ црс̑҇твова́ти въ і҆и҆л҃и. и҆ побѣдѝ ѻ҆́крс̑҇тъ вс̂ѧ врагы̀ своѧ въ моа́вѣ, и҆ въ сн҃ѣхъ а҆м꙽монх̑ѣ и҆ въ сн҃ѣхъ е҆домли́хъ и҆ въ вефорѣ, и҆ въ црс̑҇твїи сꙋва́ни, и҆ въ и҆ноплеме́н꙽ницѣхъ. и҆ ꙗ҆́може а҆́ще ѻ҆браща́шесѧ т̂о спсашесѧ·

49

И҆ събра̀ си́лꙋ, и҆ побѣди а҆мали́ка. і҆ и҆зба́ви і҆и҆л҃ьты и҆з рꙋки побѣжд̑аю҆щих̑ ѧ҆̀, и҆ бѣша сн҃ове саѹ́лови. і҆ѻ҆а҆наѳан̑҇, и҆ е҆сꙋ́и, и҆ мельхисꙋе. и҆мена́ же дво́ю дще́рїю е҆го и҆мѧ пр́ьворо́днѣи ѻ҆трокови́цы меро́ва. и҆мѧ второ́и мельхо́ла·

50

И҆мѧ ж̑ женѣ̀ е҆го, а҆хїѻ́нома, дщ̂и а҆химаа҆сова. і҆ и́мѧ старѣишинѣ вой е҆го а҆вени́ръ. сн҃ъ ниро́въ, ѹ҆́й саѹ҆́ловъ·

51

Ки́съ б̂о ѿц҃ъ саѹ҆́ловъ, а҆ ни́ръ ѿц҃ъ вени́ровъ бы́ша сн҃ове а҆ви́лѧ·

52

И҆ б̂ѣ бра́нь крѣ́пка на и҆ноплеме́н꙽ники, въ вс̂ѧ дн҃и саѹ҆́ловы. и҆ кого̀ ви́дѧше въ мꙋж́ех꙽ си́лна и҆ крѣп꙽ка събира ѧ҆̀ къ себѣ·